L'ATNL demanda la creación del SNL d'Uviéu pa una planificación seria de la normalización

"Ye'l principiu de la normalización llingüística n'Uviéu", afirma Álvarez López

Califica d'improvisación les midíes que se pretenden poner en marcha n'Uviéu y señala que'l primer pasu debería ser la creación del SNL. "Daría forma planificada, con personal cualificao, a estes actuaciones que se pretenden facer a saltu mata", apunta.
"Col pasu de los años, vese que los Servicios de Normalización Llingüística (SNL) son la meyor ferramienta cola que trabayar de manera planificada, directa, creando actitúes positives hacia l’asturianu y, de fechu, esta ye la manera de trabayar en 34 conceyos asturianos. Toos nun puen tar enquivocaos", señala nun comunicáu l'Asociación de Trabayadores de la Normalización Llingüística (ATNL).
Tres apuntar que nun ye que quien a atalantar cómo hasta la fecha la "capital d’Asturies y segunda ciudá en población, pudo permitise nun executar nengún tipu de midida pa protexer, recuperar y normalizar el mayor padremuñu que tien, que ye la llingua asturiana", apunta, tres conocer les propuestes d'Izquierda Xunida (IX) pa normalizar l'idioma, que "les actuaciones en política llingüística han planificase y estudiase pa que tengan efectu positivu na población y sobre manera, pa que tengan éxitu".
"Primero de promocionar unos cuantos topónimos aleatoriamente hai qu’esixir l’aprobación y aplicación del decretu de toponimia del Conceyu d’Uviéu. Falar de rotular vehículos, ente otres coses, y nun diseñar un plan d’actuaciones pa normalizar l’asturianu dientro de l’Alministración ye un error. La creación del SNL daría forma planificada, con personal cualificao a estes actuaciones que se pretenden facer a saltu mata. Eso nun ye planificación llingüística, ye improvisación y, a estes altures, la llingua asturiana nun merez eso. Merez muncho más", afirmen los trabayadores.
Presupuestu "bien ruin"
Hai selmanes, l'ATNL yá se manifestara que la creación del SNL "debería ser al más altu nivel, fuera del área de Cultura, porque la esperiencia diznos que la tresversalidá ye la única garantía d’éxitu en política llingüística". Tampoco ta conforme col presupuestu presentáu pal asturianu —44.000 euros, de los 24.000 van destinaos a l'Academia de la Llingua Asturiana—, que califica de "bien ruin" y llonxanu al d'otres ciudaes "del so nivel poblacional, como pue ser Xixón".
"Si tol presupuestu que va manexar 'pal asturianu' s’invirtiera na creación d’un SNL, Uviéu empezaría a facer les coses bien, empezaría a recuperar el tiempu perdíu y a poner soluciones pa que la llingua asturiana sía una realidá na vida del conceyu", calca l'ATNL, que s'ufre a "asesorar y collaborar" col ayuntamientu na creación del serviciu.
Fonte: asturies.com

L’Asociación de trabayadores de servicios de normalización pide un SNL al más altu nivel n’Uviéu

Asociación de Trabayadores de la Normalización Llingüística

   L'Asociación de Trabayadores de la Normalización Llingüística (ATNL) pide al Conceyu d’Uviéu la creación d’un Serviciu de Normalización Llingüística (SNL) nel Conceyu que nun dependa de Cultura y que s’alcuentre al más altu nivel.

  Depués de 24 años, tiempu enforma nel que nun se fizo nengún tipu de planificación llingüística nel conceyu d’Uviéu y l’usu que se fizo siempre foi residual y lligáu al ámbitu cultural y a “lo asturiano”, ye’l momentu pa l’Asociación de Trabayadores de la Normalización Llingüística crear un SNL del Conceyu d’Uviéu, porque hai qu’arreblagar “perriba de polítiques llingüístiques ausentes y entamar un procesu claru de recuperación de la llingua propia del conceyu”.

  Nun comunicáu asoleyáu esti xueves, l’Asociación critica a los distintos gobiernos y partíos que configuraben la vida política d’Uviéu a lo llargo del tiempu y que nun fueron a tomar en serio la cuestión llingüística nel conceyu, “actuando d’una manera irresponsable al atesterar negando los derechos llingüísticos a los vecinos y vecines y poniendo asina a la capital d’Asturies como referente na falta respetu p’hacia la idiosincrasia plurillingüe de la so ciudadanía”.

  Los trabayadores de los servicios de Normalización Llingüística asturianos aconceyaos nesta asociación atalanten que’l” procesu de normalización social d’una llingua ye un procesu llargu, y yá se perdieron munchos años n’Uviéu como pa qu’agora que paez ser qu’hai un acuerdu ente los distintos partíos nun se remate cola creación del SNL, que ye la ferramienta cola que trabayar a nivel municipal n’Asturies y nel restu de territorios con llingua propia”.

  Va dellos meses, los y les trabayadores pola normalización llingüística caltuvieron una xunta con representantes de los partíos que formen el tripartitu (PSOE, IX y SOMOS) y otros colectivos de defensa de la llingua asturiana y ellí plantegaron qué se debería facer pa poder “garantizar un procesu de recuperación de la llingua asturiana. La propuesta yera clara: la creación d’un SNL al más altu nivel dientro del Conceyu, un SNL al qu’hai que dotar d’un presupuestu dignu col que poder desenvolver actuaciones que tengan como oxetivu la recuperación y normalización social de la llingua asturiana nel conceyu y evitar el so allugamientu nel ámbitu cultural pa fuxir de lo problemes qu’ello trai (plantegamientu diglósicu de la planificación llingüística, pocu marxe de maniobra pa garantizar la tresversalidá, etc…)”.

 La esperiencia diz-yos a los trabayadores de los servicios de normalización que “los SNL dependientes de conceyalíes de cultura tienen una menor capacidá d’actuación y la so dilixencia queda restrinxida al ámbitu cultural; pela contra, los que dependen de conceyalíes propies, d’alcaldíes o vicealcaldíes actúen d’una manera tresversal, facilitando’l procesu normalizador con intervenciones eficaces y reales”.

  Nesa xunta insistieron abondo “nesti calter tresversal del SNL como garantía única d’éxitu, un serviciu del que’l so llabor actúe en tolos ámbitos de la vida municipal: cultura, mocedá, igualdá, servicios sociales, facienda, educación…Y mesmamente árees onde tamién ta implicáu’l conceyu como garante del bon funcionamientu de la nuestra sociedá: comerciu, hostelería, ociu… Y equí, vese a les clares l’interés y enfotu seriu, sinceru y verdaderu d’un Conceyu o d’un gobiernu: llendar o arrequexar un SNL a cultura ye la meyor manera de poder xustificar cualesquier compromisu pa cola so creación ensin que dea más el so bon funcionamientu, impactu social y garantíes de sobrevivencia”.                                                  Fonte: asturnews.com

N'ast denuncia que'l Gobiernu va desaniciar l'aidanza pa la normalización del asturianu nos conceyos

Los Servicios de Normalización finánciense con estes ayudes L'asociación N'ast emitió un comunicáu nel que denuncia qu'esti llunes pasáu, 8 d’abril, el Boletín Oficial del Principáu d’Asturies asoleyó'l “Plan Estratéxicu de Subvenciones pa 2013” de la Conseyería d’Educación, Cultura y Deporte y que nel mesmu pudieron confirmar lo que califiquen como "un fechu pergrave", la desapaición de les ayudes económiques que, dende va años, el Gobiernu venía apurriendo a los Conceyos pa la normalización social del asturianu. Recuerde que "si bien ye cierto que puxar pola normalización social del asturianu nun ye competencia municipal, sinón de la institución cimera que tien la obligación de mirar por esta llingua y de facela oficial", espliquen que "sí ye verdá que valoramos positivamente too aquello que se faiga pol asturianu dende los Conceyos por ser l’alministración más averada al pueblu". Daqué que con estes nuevu recorte que denuncien sedrá más difícil. Camienten que "ensin sovenciones la mayoría de les entidaes llocales van dexar d’entamar actividaes de normalización, porque pa munches d’elles sí ye verdá que faen falta unes perres que yá nun van recibir". Sicasí, recalcaquen "que la responsabilidá última de normalizar socialmente l’asturianu nun ye de los Conceyos y que nun se los pue cargar con una competencia que nun-yos correspuende". Dende N'ast llamenten que'l PSOE, partíu que gobierna Asturies col sofitu d’Izquierda Xunida y UPyD, "vuelve a amosar qu’esta dómina de crisis económica viéno-y perbién pa siguir col procesu de dexar morrer al asturianu baxo la escusa d’un “nun hai perres” que suena abondo mal, más nestes selmanes nes que tamos comprobando que sí les hubo, sí les hai, pa marafundiar llibremente polos xestores de los sos “proyeutos estrella”, casu del Centru Niemeyer", denuncien. Fonte: Asturnews

Cursín básicu d'asturianu en Nava

Nava acueye la celebración d'un cursu básicu d'asturianu

El Serviciu de Normalización Llingüística de la Comarca de la Sidra, en collaboración cola conceyalía de Cultura del Conceyu de Nava, tien abiertu'l plazu pa la inscripción, gratuíta, nun cursu d'asturianu de 30 hores, que s'impartirá en La Llaguna (Nava) del 15 d'abril al 24 de xunu, los llunes y miércoles de 17:30 a 19:00, y fadrá un repás a la hestoria y socioloxía, les normes ortográfiques, léxicu, sintaxis y morfoloxía, música, lliteratura y cine en llingua asturiana.

Los interesaos pueden informase y inscribise, hasta'l 14 d'abril, poniéndose en contactu col Serviciu de Normalización Llingüística de la Comarca de la Sidra (615798551) o bien cola Conceyalía de Cultura del Conceyu de Nava (985718412)

Fonte: Asturnews

Corvera entama un cursu de nivel básicu d'asturianu

Dende esta selmana y hasta’l 13 de marzu, ábrese’l plazu pa inscribise nel "Cursu Básicu de Llingua Asturiana" que, igual que n’ediciones anteriores, quier ser un mecanismu de deprendimientu de les normes básiques d’escritura del idioma, pero tamién una manera d’acercase a tantos d’aspectos de la cultura asturiana. El cursu, de carácter gratuitu, va ser impartíu pol técnicu responsable del Serviciu de Normalización Llingüística de Corvera. L’horariu del mesmu va ser tolos miércoles de 18 a 20 hores, siendo la primer sesión el próximu miércoles 13 de marzu nel Centru Sociocultural de Les Vegues. Los conteníos d’esti cursu inclúi conteníos alredor de la hestoria de la llingua asturiana; la llingua asturiana: léxicu, sintaxis y morfoloxía; normes ortográfiques; introducción a la toponimia de Corvera; cine, lliteratura y música n’asturianu, ya inscripciones nel Centru Sociocultural de Les Vegues. Fonte: Asturnews

Organicen un taller de llectura n'asturianu en Colunga

El Serviciu de Normalización Llingüística de la Comarca de la Sidra, en collaboración col Área de Cultura del Conceyu de Colunga, acaba d’abrir el plazu pa la inscripción nun nuevu taller de llectura nel Conceyu de Colunga. Los talleres de llectura n’Asturianu de la Comarca celébrense tamién en Nava y en Villaviciosa y por ellos yá pasaron autores de la calidá de Vanessa Gutiérrez, Xandru Fernández o Miguel Rojo. La inscripción nel taller, que ta abierta hasta’l 22 de marzu, ye gratuita dafechu y podrá facese na biblioteca Pedro Caravia, de Colunga o poniéndose en contactu col Serviciu de Normalización Llingüística de la Comarca de la Sidra, nel teléfonu 985718413 na sede de la Mancomunidá en Paraes (Nava). A partir d’abril entamarán a celebrase les sesiones, que consisten na llectura d’una obra de lliteratura asturiana y la celebración d’un alcuentru col autor o autora de la mesma. Fonte: Asturnews

"El llibru pa lo más piquiñino de casa"

El SNL d’El Cabu Peñes principia cola distribución de  ‘El llibru pa lo más piquiñino de casa’

   Esta selmana principió la distribución en Carreño y Gozón de ‘El llibru pa lo más piquiñino de casa’. El SNL de la Mancomunidá d’El Cabu Peñes busca impulsar con esta campaña la tresmisión xeneracional del idioma.

   ‘El llibru pa lo más piquiñino de casa’ trátase d’una especie de cuadernu onde los padres van apuntando los datos y costumes del críu, asina como la so evolución dende’l momentu de la so nacencia hasta los 3 años: etapes de crecimientu, calendariu de vacunación, fiches personales, espacios p’anotar delles coses, espacios pa fotografíes... Dende esta selmana, les persones de los dos conceyos que tengan fíos recibirán un exemplar nel Rexistru, anque tamién van repartise nes escueles de 0 a 3 años y nes oficines del Serviciu de Normalización Llingüística d’El Cabu Peñes hasta agotar esistencies.

   Arancha Prado, responsable del SNL, destaca qu’esti llibru tien como oxetivu cimeru “destacar la importancia del usu de la llingua materna nes families, como tresmisores xeneracionales del so usu comunicativu y habitual pa colo más piquiñino de casa”. La presentación d’esta guapa y orixinal campaña celebróse’l xueves pasáu na Casa La Escribana coincidiendo col Día Internacional de la Llingua Materna, onde Prado lleó unes pallabres de la direutora xeneral de la UNESCO, Irina Bokova, nes que defende’l plurillingüísmu y la importancia que tienen los llibros pa caltener la vitalidá de los idiomes.

   Fonte:  Asturies.com