Na semeya, Ástur Paredes, primeru na filera d'abaxo pela izquierda, xunto a los sos compañeros de la Fundación Belenos Naciu Llope, Lisardo Lombardía, Fonsu Fernández y Antón Álvarez Sevilla. Na filera d'enriba, Xuan Fernández-Piloñeta, Alberto Álvarez Peña y Gausón Fernande.
La revista ‘Asturies, memoria encesa d’un país’ cumplió venti años de vida y la Fundación Belenos celebrólo cola presentación del númberu 36. Ástur Paredes (Uviéu, 1956), miembru del Conseyu Editorial de la publicación, recuerda nesta entrevista los anicios de la mesma, los llogros algamaos nestes dos décades y los temes pendientes.
. Cúmplense venti años del proyeutu de 'Asturies, memoria encesa d'un país'. Echando una mirada atrás, ¿tán satisfechos del llabor desendolcáu?
Emprimamos a publicar la revista en 1996 pero facía yá más de 25 años qu’entamáremos col trabayu etnográficu de campu. Desque entamemos, a últimos de los 70, tener un mediu editorial nel qu’amosar los nuesos trabayos yera ún de los enfotos que más pruyíen. Agora tenémoslu.
Per otru llau, yá son 36 los númberos asoleyaos de ‘Asturies’, munchos artículos d’interés, munches collaboraciones importantes… Nesi sen tamos contentos. Sicasí, un númberu de la revista al añu, que ye lo único que somos a publicar agora por cuestiones económiques, nun ye pa tar satisfechu.
. ¿Cómo recuerda aquellos primeros años?
Magar que paeza mentira, d’aquella sabíase dalgo del mundu de les mentalidaes pero la cultura material d’Asturies, sacante cuatro tópicos, yera dafechu desconocía. Les salíes de campu yeren una ‘aventura’. Hai que decatase de que, por exemplu, el conceyu Somiedu malpenes tenía carreteres… De xuru que yera la hospitalidá celta, pero d’aquella la xente metíate por sistema nes cases y tabes ‘obligáu’: café, coñá, sacábente’l xamón…, n’orde inciertu. Nun pueblu, que nun voi nomar, invitáronme a dos cases al tiempu y, claro, dalguna tenía que dir primero… A la segunda casa yá nun pude entrar –dexándolos de ‘segundones’, ¡menudu despreciu-yos fixera!–.
Yera un tiempu mui ilusionante: alcuérdome’l ‘subidón’ cuando vi per primer vegada La Pornacal; cuando entré en Santiso d’Ibias nun día murniu de xarazu y apaecieron delantre min un montón de teitos o cuando ‘descubrí’ los horros con decoración pintada del conceyu Quirós… Agora cuando marches pa un sitiu yá vas sobreinformáu y ye mui raro que surdan ayalgues.
. La revista siempre destacó pola so calidá, tanto en conteníos como en presentación.
En cuantes a los conteníos, la nuesa voluntá siempre foi clara: la cultura asturiana, en toles sos manifestaciones, atendiendo especialmente a delles disciplines como Etnografía y Antropoloxía; Arqueoloxía y Hestoria; Musicoloxía, Naturaleza y Ecoloxía..., buscando mayormente artículos d’investigación pero afitando penriba too la divulgación como obxetivu y, poro, un tonu a mediu camín ente l’artículu académicu y el de difusión. Tamién dende’l principiu quiximos inxerir ente los conteníos una mirada gráfica al pasáu. Surdió asina una de les seiciones que güei son fixes na revista:
‘Memoria gráfica d’Asturies’, onde, al traviés de semeyes antigües con una unidá temática, fálase de la obra d’un fotógrafu, un conceyu o un llugar concretu. Otramiente, paecíanos interesante ufiertar un espaciu onde dar anuncia de publicaciones d’actualidá, mesmo de llibros que de discos, apurriendo una reseña mínime, esto ye, ‘L’estoxu’, otra de les seiciones güei fixa na nuesa revista. Y pa finar, los ‘cartafueyos de Belenos’, seición que recueye comunicaciones o noticies curties.
Y respeutu a la calidá de la presentación, gracies, porque dalgo tócame (rises). Tuviemos claro siempres que la revista pola que naguábemos tenía que ser una revista con bayura d’ilustraciones y visualmente atractiva; fuxíamos del cliché de fancine n’asturianu pa consumu de ‘militantes’. El nuesu envís yera ‘tar na sala d’espera del dentista’.
. Cuando echó a andar 'Asturies' esta publicación yera una necesidá pa salvar y dignificar la identidá propia asturiana. ¿Hai un mayor ciñu y conocimientu ente la población d'ella anguaño?
Paezme que ye un erru particularizar y qu’hai qu’acollumbrar más llargo: Belenos y la revista ‘Asturies’ tán inxeríos nun procesu munchu más ampliu de reivindicación de les cultures tradicionales, de les identidaes nacionales, que se dio en bona parte d’Europa occidental y particularmente n’España. Nel casu d’Asturies, por poné-y un ñiciu, entamaría a mediaos de los 70 cola creación de Conceyu Bable. Yo d’aquella taba con un garrapiellu xente: llamábamonos Sestaferia y publiquemos, ente otres coses, el calendarín col candil de mina de Picasso, que dicía ‘Asturias, alluma’l to camín; nun sedrás llibre ensin autonomía’. Agora suena un pocu a chiste (rises). En fin, los estudiosos de la parte lliteraria d’esti procesu llamáronlu –pa min con perbón xacíu–, ‘Surdimientu’ y ye un nome escelente pa entender tou’l procesu.
Ta claro que nun hai comparanza ente’l conocimientu qu’había entós d’Asturies y el que tenemos agora. Surdimos d’un ermu y, ensin dulda, ameyoramos abondo. Con respeutu al ciñu pol país…, nun sé, tamos convirtiéndolu nun desguace.
. Nestos 36 númberos, ¿hai dalgún o dalgunos trabayos de los que la Fundación Belenos tea especialmente arguyosos?
Home, yo puedo falar por min, anque de xuru que munchos de Belenos van tar d’alcuerdu: qu’un Premiu Nóbel te mande un poema inéditu dedicáu a Asturies y que s’asoleye nel primer númberu de la revista… ‘The little canticles of Asturias’, de Seamus Heaney, foi un bombazu. Que Sir Raymond Carr te escriba un articulín y que participe n’Avilés na presentación del númberu trés foi utru… Y hebio abondos más; sedría llargo.
Pero yo particularmente siéntome arguyosu d’un trunfu de Belenos: demostrar l’orixe de la Diadema de Moñes. ‘Diadema de Ribadeo’, ‘Diadema de Oscos’, ‘Diademas Asturianas con Guerreros’ yeren oficialmente d’aquella los sos nomes. Nunes xornaes en Mieres sobre La Edá del Fierro n’Asturies nes que participaben especialistas de tol Estáu, Belenos fexo una esposición y dedicámos-y too un panel a la Diadema, xuntando tolos datos conocíos sol so aniciu y apurriendo dellos testimonios inéditos. Dellos investigadores garraron el datu y Marco Simón, de la Universidá de Zaragoza, ún de los másimos especialistes del Estáu en mentalidaes de la Edá del Fierro, espublizó un ampliu artículu recoyendo yá esa denominación. Güei el nome de Diadema de Moñes yá pue vese nel retayu que se caltién nel Muséu Arqueolóxicu Nacional y cuido que tamién nel de Saint-Germain-en-Laye.
. ¿Hai investigadores nuevos que sigan col trabayu desendolcáu depués de tantos años?
Home tola vida hebio ‘xente raro’ y cuido que siempres haberá minoríes que s’averen al estudiu de la cultura tradicional asturiana. En Belenos, por exemplu, tenemos dos fichaxes nuevos, excelentes: Dani Cueli y Cristobo de Milio Carrín.
El casu ye que dende la década de los 60 entamó una resquiebra na sociedá tradicional de carauterístiques colosales, una especie de fin de dómina au la realidá va camudando aína, díi tres díi, delantre los tos güeyos y nós inda pudimos ver dalgo d’esi procesu. Ta claro que los que vengan darréu van tenelo mui abegoso pa estudiar, por exemplu, l’arquitectura de la casa redonda o les formes tradicionales de transporte… Ye dicir, hai aspeutos de la cultura que desanicien materialmente. Y respeutu al estudiu de les mentalidaes pasa daque asemeyao: los informantes tamién desapaecen físicamente (que-y lo entruguen a Berto Peña). Bueno, ná, a los que vengan siempre-yos quedará l’estudiu de la introducción y desendolcu de los tractores n’Asturies (rises).
. ¿Qué más actividaes vien desendolcando la Fundación aparte de la espublización de 'Asturies'?
L’actividá principal de Belenos ye’l trabayu de campu, esto nun hai qu’escaecelo. D’equí surden conferencies, que faen de mou particular los distintos miembros de Belenos y sobre too un montón d’información que ta vagando nos caxones. Respeutu a la difusión, tenemos fecho un bon númberu d’esposiciones: ‘Patrimoniu etnográficu d’Asturies: hórreos y pallozas’ (1983), que foi itinerante per Asturies; ‘Etnografía Asturiana’, que se presentó en Killarney, Irlanda (1984) y que tevo tamién en Perranporth (Cornualles) y en Vigo; ‘Asturies na Edá del Fierro’, Mieres (1991); ‘Asturies Memoria Celta’, Lorient, Bretaña (1998); ‘La Llingua de Papel. 25 años de cartelismu n’Asturianu’ (1974-1999), etc.
Tamién espublizamos una coleición de llibros: ‘Cartafueyos de Belenos’, de los que tenemos nueve títulos asoleyaos y entamamos añalmente’l Seminariu d’Estudios Asturianos de la Fundación Belenos, unes xornaes abiertes al públicu, onde nel trescursu d’un fin de selmana y cola participación de dellos ponentes faese analís d’un tema concretu de la cultura asturiana. Y yá son 16 los años que fiximos estes xornaes na Puela d’Allande. Esti añu entamaremos el XVII Seminariu, que vamos dedicar a la cultura de la viesca, la madera y el so usu tradicional, etc.
. ¿Qué asignatura pendiente tienen cola revista?
Asignatures pendientes tenemos abondes. Podría face-y una carta a los Reis Magos de delles fueyes…, o meyor, una de propósitos d’Añu Nuevu que va ser más curtia: necesitamos faer una bona web –esti ye un asuntu entamáu va años qu’enxamás terminamos d’iguar–. Necesitamos con urxencia salvar el nuesu archivu gráficu: tenemos dellos cientos de miles d’imáxenes d’Asturies y la so cultura tradicional –y nun ye desaxeración–, lo más d’ello en diapositiva. Esti material va perdiendo adulces la emulsión, camudando’l color y al cabu va perdese dafechu. Mercar un escaner potente –oseya, munches perres– y un trabayu de munches hores de dixitalización sedría la única solución. Tamién, tenemos un montón de llibros en caxón que quixéremos asoleyar y que conformaríen una colección…Y la revista. ¡Qué menos que sacar dos al añu, que material hailu abondo! Pero ná, a lo cabero siempres el mesmu muriu pesllando’l paisax: ¡les perres!
. ¿Considera que los ámbitos d'estudiu de Belenos cuenten col suficiente sofitu y interés institucional?
Home, qué te voi dicir… Nos últimos venti años les aldees asturianes –parte central del perantropizáu paisax asturianu– camudaron hasta faese irreconocibles nun procesu de suburbanización y perda de patrimoniu que nun ye de creer na Europa del sieglu XXI. El problema ye qu’esto nun tien marcha atrás. Ehí tán, por exemplu, los horros de los sieglos XV y XVI, protexíos pola llei pero caendo pasu ente pasu pol desdexamientu y la ruina. Ye perfácil dicir que la culpa tienla l’Alministración, pero la xestión total d’un patrimoniu tan descomanáu ye inalgamable. Y mientres: ¿Aú tán los asturianos? ¿Aú ta la ‘sociedá civil’? A lo meyor llantando una puñetera palmera al delláu d’un horru d’esa dómina o construyendo un xalé de colloraxos metanes d’una aldega tradicional. Esti tipu d’estudios y la so difusión son indispensables y urxentes porque, como dixe enantes, hai una bona parte de la cultura que desanicia materialmente pero albidro qu’a la fin nun interesa a cuasi naide.
. Pa finar, ¿hai país?
¿Faime esa entruga en serio? Si ye en serio, tendría que dame munchu tiempo pa contesta-y ya igual teníemos que coxitar partiendo de los trabayos nesi sen de Valdés del Toro y de Roberto González-Quevedo –por tentar facer un discursu más obxetivu–. Yo, ta claro, quédome col segundu.
De toes maneres el mio analís ye por definición subxetivu y yo soi mui antiguu, un tantu esencialista, creo nel teixu Bermiego y nel Picu Tarañes, y creo dafechu en cuélebres y xanes. Asturies ye’l mio país y nesi sen soi un patriota –Raymond Carr refirióse a nós, la xente de Belenos, como los ‘patriotas asturianos’ parafraseando la denominación que-yos dieron a los que se llevantaron contra l’exércitu francés–. Per otru llau hai que camentar qu’hai asturianos que se disfracen de sevillanos, beben fino y festexen la Feria d’Abril…
La meyor respuesta ye de xuru una sentencia, de va años, del mio amigu Lisardo Lombardía: “Asturies, el país que nun quier ser”. Fonte: asturies.com
