15/11/16

Lurdes Álvarez, Piquero y la Fundación Belenos, merecedores de los Premios Timón 2017



José Rogelio Álvarez Hevia, Esther García López, Humberto Gonzali, David M. Rivas, Pilar Sánchez Vicente y Xuan Xosé Sánchez Vicente, con María Teresa González Cobo como secretaria, decidieron los Premios Timón 2017 mientres una cena lliteraria celebrada en Xixón na nueche del vienres. Nesta ocasión aspiraben a los gallardones lliterarios que premien toda un trayeutoria creativa aquellos escritores nacíos nel añu 1967 o anteriores, pa lo que’l xuráu tuvo en cuenta “l'apueste pola creación d'unes obres lliteraries de gran calidá qu'espeyen una voz singular y que son a constituyise como referentes mui significativos de la poesía asturiana” de los dos premiaos.
Asina los ganadores foron los mierenses Álvarez y Piquero. Los dos recibieran una distinción consistente nuna obra del escultor y ceramista xixonés Jesús Castañón mientres la decimosegunda edición de L’Arribada.
Esta mesma recompensa tamién va dir pa la Fundación Belenos, que lleva’l gallardón más mozu de los trés, el Timón de Cultura Asturiana. Con esti fallu, el xuráu quier reconocer “un trabayu de munchos años desarrolláu per aciu de conferencies y homenaxes, del Seminariu d'Estudios Asturianos y, mui n'especial, de la revista ‘Asturies. Memoria encesa d'un País’ que vienen publicando dende 1996”. Precisamente, esta fin del selmana esti coleutivu celebra en La Puela’l XVII Seminariu d’Estudios Asturianos baxo’l nome de ‘Asturies: la viesca habitada’.
Palmarés
Álvarez, Piquero y la Fundación Belenos súmense poro al palmarés d’unos gallardones que, añu tres añu, ganen en sonadía y prestixu. Los ganadores n’ediciones anteriores foron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013), Xosé Bolado (2014), Esther Prieto (2015) y Esther García López (2016) nel casu del Timón p’autores en llingua asturiana y eonaviego; y Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013), Carmen Ruiz-Tilve (2014) Francisco García Pérez (2015) y Pilar Sánchez Vicente (2016), nel d’ autores asturianos en llingua castellana.
Nel casu del de Cultura Asturiana, n’años anteriores recibiéronlo l’Asociación Cultural Ensame Sidreru (2013), la Xunta pola Defensa de la Asturiana (2014), l’Asociación pola Recuperación de Sidros y Comedies ‘El Cencerru’ (2015) y Ramón d’Andrés (2016).
Fonte: Asturies.com

5 comentarios:

  1. Los Premios Timón d'anguaño son un aciertu en toles sos variantes. En particular Belenos lo taba pidiendo a berros.

    ResponderEliminar
  2. Magníficu palmarés 2016, la Fundación Belenos un finxu.

    ResponderEliminar
  3. Felicidaes a los premiaos toos ellos d'enforma méritu. y tamién a los xuraos de l’Asociación Cultural L’Arribada pol bon tinu amosáu na elección de los candidatos.

    ResponderEliminar
  4. Y a Bertu A. Peña cuándo lu toca?

    ResponderEliminar
  5. Bien merecíu sí que lu tien.

    ResponderEliminar

Los comentarios tán pendientes de moderación. Espublizaránse lo primero dable.