Iniciativa pol Asturianu ta presente na xunta xeneral d’ELEN

Cartelu IV Asamblea Xeneral d'ELEN

  Inaciu Galán, presidente d’Iniciativa pol Asturianu, acudió a Barcelona pa participar na xunta xeneral d’European Language Equality Network (ELEN), que nesta ocasión se celebra na capital catalana. El presidente de la Generalitat, Carles Puigdemont, va recibir a les diferentes delegaciones.

El Camp Nou va ser mañana la sede de la cuarta xunta xeneral de la Rede Europea d’Igualdá Llingüística, asociación na que participen 150 coleutivos de defensa de llingües minorizaes pertenecientes a 22 estaos y na qu’Iniciativa pol Asturianu ye’l representante del nuesu idioma. Munchos d’ellos desplácense esta fin de selmana a Barcelona pa sentir cómo ye la situación actual de los 44 idiomes representaos n’ELEN y poner coses en común.

  La intervención de Galán, que sustitúi a Xosé B. Álvarez, responsable de Rellaciones Internacionales d’Iniciativa pol Asturianu, al nun poder desplazase dende Cymru, ta prevista pa les 17.35 hores, momentu nel qu’espondrá al restu de delegaos les novedaes al rodiu de la situación del asturianu nel añu últimu. La presencia nesti tipu d’eventos "ye una de les llinies de trabayu clave” de la organización, yá que permite “da-y presencia internacional al asturianu en munchos ámbitos de gran importancia n'espacios como les Naciones Xuníes o'l Conseyu d'Europa".

  La xunta xeneral, organizada pola organización catalana Plataforma per la Llengu col sofitu de la Generalitat, va inaugurala Carme Forcadell, presidenta del Parlament, xunto col comisionáu del Espai Barça y representante del Barcelona, Jordi Moix. Mentes, el conseyeru d’Asuntos Esteriores, Rellaciones Institucionales y Tresparencia, Raül Romeva, va zarrar l’asamblea, na que se va tratar sobre la vía a siguir con respeuto a les llingües minorizaes, la situación del catalán y la so rellación col procesu soberanista, el Protoculu pa la Garantía de los Drechos Llingüísticos y l’efeutu del ‘Brexit’ pa les llingües céltiques, ente otros munchos asuntos.

Recibimientu nel Palau de la Generalitat

  Toles delegaciones qu’acuden a la xunta xeneral d’ELEN va ser recibíes esta tarde, a les 17 hores, nel Palau de la Generalitat pol presidente de Catalunya, Carles Puigdemont. Esti actu protocoloriu, nel que va tar presente Galán como representante asturianu, amuesa’l compromisu del Gobiernu catalán na defensa de la so llingua y el respetu hacia otros idiomes minorizaos. Fonte: asturies.com