El portal dixital nuevu del Circuitu de les Artes Escéniques del Principáu d’Asturies, que tamién estrena imaxe, ufierta información detallada sobre la so programación n’asturianu y castellanu. Esti semestre tán previsos 140 espectáculos en 24 conceyos.
El cambéu d’imaxe corporativa, sofitáu fundamentalmente nuna páxina web práutica y de calidá, va facilitar l’espardimientu de la programación del circuitu, l’averamientu a los profesionales del sector y, en definitiva, la interconexón ente toles partes implicaes y interesaes na escena asturiana. La web ye un escaparate importante pa les compañíes profesionales asturianes, yá que dispón d’una axenda detallada onde’l públicu pue consultar los espectáculos de teatru, danza o maxa, acceder a información sobre la compañía y inclusive ver los espacios escénicos que los conceyos ponen a disposición pa que la programación llegue a tolos requexos d’Asturies.
El Circuitu de les Artes Escéniques del Principáu d’Asturies, nacíu nel 2001, ta afitáu como un motor de la programación y exhibición de trabayos de calidá n’Asturies. Nel primer semestre d’anguaño favoreció que 43 grupos, compañíes y artistes presentaren 124 montaxes, espectáculos y actuaciones en 24 conceyos asturianos. Nesti segundu semestre, les cifres son bien asemeyaes: 24 conceyos implicaos, 40 compañíes y alredor de 140 espectáculos.
La Conseyería d’Educación y Cultura, al traviés de la Viceconseyería de Cultura, punxo anguaño 255.638 euros pa la financiación d’esta actividá.
Promoción na feria biañal del sector escénicu Mercartes
El Gobiernu va llevar el circuitu asturianu al Mercado de las Artes Escéniques (Mercartes), consideráu’l puntu d’alcuentru más importante pa profesionales y empreses del sector. Nesta edición, que va facese del 9 al 11 de payares en Valladolid, Asturies va tar presente con un stand propiu nel que van participar l’Asociación de Compañías Profesionales de Teatro y Danza de Asturias (ACPTA) y Foroescena, asociación d’empreses d’artes escéniques del país.
El viceconseyeru de Cultura y Deporte, Vicente Domínguez, va asistir a esti alcuentru’l miércoles y el xueves pa tener reuniones institucionales con representantes d’otros territorios y promocionar el teatru profesional asturianu. Mercartes consolidóse yá como una cita imprescindible nes axendes de los creadores, productores y distribuidores, programadores y xestores d’espacios escénicos y de festivales. Fonte: Asturies.com
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.