TARANUS gana el VII Premiu al Meyor Cantar

Taranus

Taranus va representar a Asturies nel Liet International  de Córsica

   El cantar ‘Ensin ti’, de Taranus, resultó ganador del VII Premiu al Meyor Cantar que se celebró’l viernes nel Teatru de la Llaboral ente glayíos d’oficialidá. La banda de folk-metal va representar a Asturies nel Liet International de Còrsica.

   El xuráu encargáu de decidir cuál yera’l meyor cantar n’asturianu del 2012 ente los cinco finalistes decidióse pol presentáu por Taranus, ‘Ensin ti’, una balada con lletra de Diego Díaz Martino nel que destaca la voz de la sopranu Susana Mortem y que’l grupu va interpretar na seronda en Còrsica en representación d’Asturies y de la llingua asturiana. D’esta forma, Taranus alcuentra recompensa a munchos años de trabayu y esfuerciu que culminaron na espublización del so primer discu, ‘Taranus’, el pasáu mes d’avientu gracies a l’aportación de fondos propios, ensin solicitar subvención a Cultura.

   El restu de formaciones finalistes foron ACD (‘La güela’), Aire (‘Enzo’), Fala non Caduca (‘Escoyer el camín’) y La Tarrancha (‘Qué faer!’). Tamién actuaron na gala de la llaboral, presentada por Sonia Fidalgo y Naciu Varillas, Asturiana Mining Company como formación ganadora de la edición del añu pasáu con ‘Si nun conoces Vaḷḷouta’. Amás de la plaza pa participar nel Liet International, Taranus recibió una escultura de María Xesús Rodríguez entitulada ‘El pascu’ y valorada en 2.000 euros.

Lletra de ‘Ensin ti’:

Suaño podete afalagar
y al espertar muerro d’amor
d’otros siéntote falar
frayándome’l corazón

Faigo l’esfuerciu de dexar
d’imaxinate xunto a min
y nun soi quien a lo llograr
mio boca tien fame de ti

Y al vete siento
que m’afuega’l deséu de querete besar
lloro en silenciu
ardo por dientro al disimular

miro tos güeyos
fáenme falta hasta pa respirar
perdíu m’alcuentro
ensin ti

Autoengáñome al pensar
que pueas mirar pa min
soi un sapu nun bardial
tu una xana nun xardín

Busco escuses pa quedar
pa venos solos los dos
tu pienses que ye amistá
yo desfáigome d’amor

Y al vete siento
que m’afuega’l deséu de querete besar
lloro en silenciu
ardo por dientro al disimular

miro tos güeyos
fáenme falta hasta pa respirar
perdíu m’alcuentro
ensin ti

Y al vete siento
que m’afuega’l deséu de querete besar
lloro en silenciu
ardo por dientro al disimular

miro tos güeyos
fáenme falta hasta pa respirar
perdíu m’alcuentro
ensin ti

La murnia amostálgame
la llercia faime fuxir
manca abondo reconocer
qu’ensin ti nun pueu vivir

Nel mio interior sé bien
que’l to amor nun voi tener
yes un suañu nada más
qu’enxamás escaeceré

Y al vete siento
que m’afuega’l deséu de querete besar
lloro en silenciu
ardo por dientro al disimular

miro tos güeyos
fáenme falta hasta pa respirar
perdíu m’alcuentro
ensin ti

Y al vete siento
que m’afuega’l deséu de querete besar
lloro en silenciu
ardo por dientro al disimular

miro tos güeyos
fáenme falta hasta pa respirar
perdíu m’alcuentro
ensin ti.

Fonte:  Asturies.com

El grupu de folk-metal TARANUS saca'l so primer discu n'asturianu

El grupu de folk-metal Taranus saca a la venta’l so primer discu

     Esti  sábadu va ponese a la venta’l primer trabayu discográficu de TARANUS.
     La banda de folk-metal con lletres n’asturianu grabó 11 cantares que van poder sentise nel conciertu de presentación que va tener llugar el día 22 en Xixón.

    Tres munchu esfuerciu y tirando de fondos propios –la banda refugó solicitar la subvención que concede’l Gobiernu a les producciones discográfiques en llingua asturiana–, los miembros de Taranus consiguieron facer realidá’l suañu d’editar un discu. Fundáu nel 1994 en Xixón cuando “un grupu de rapazos, dempués de sentir enforma a Llan de Cubel y Manowar, deciden xuntar los dos estilos”, nun sería hasta 2009 cuando, con una formación musical más completa tres pasar los sos componentes iniciales por delles formaciones como Lloréu, La Gueta la Runa, Stormrider o OI! N’Ast, y cubrir delles baxes de ‘lleendes urbanes’ na formación orixinal con collacios de la escena, el proyeutu de Taranus entama a garrar forma. Trés años depués, tres llevar la so música a dellos puntos d’Asturies, Galicia y Castilla, la banda de folk-metal ve recompensáu’l so trabayu con esti discu, que lleva’l propio nome del grupu.

    L’álbum, editáu por Santo Grial Records, grabóse nos Bunker Estudios de Llanera, rexentaos por Alberto Rionda (Avalanch), que tamién fixo de productor d’un discu que tien un soníu folk-metal que recuerda a grupos como In Extremo o Corvus Corax. Amás, Rionda nun duldo en poner voz nel tema ‘Siñor de la guerra’. Otres collaboraciones que presenta’l discu son la del cantante d’Avalanch, Ramón Lage, en ‘Réquiem’, y la de la soprano Susana Mortem (Stormrider, La Gueta la Runa y Xana Escura) nos coros. El resultáu tán espectacular de la participación de Susana, llevó a la banda a convidar a la cantante a formar parte del grupu pa temes futuros.

    Anguaño TARANUS ta compuestu por Antonio Carballo (guitarra clásica, acústica, llétrica, mandolina y voz llimpio), Xesús Nel García ‘ChusMa’ (guitarra llétrica, xiblates, bombarda bretona y voz sucio) Fernando Diaz ‘Pindy’ (gaites en Do y Sib, low whistles y xiblates), Diego Martino ‘Super’ (baxu llétricu y voz medio) y Jose Manuel Bernabéu (batería). Estos cinco componentes van presentar en direuto’l discu, que destaca por unes lletres que traten dende esperiencies personales a llendes, pasando pela crítica social, el sábadu 22 con un conciertu na xixonesa sala The Class (22 hores). La entrada pa esta cita ye de 5 euros, 8 xunto col discu.

Fonte:  Asturies.com