El curtiumentraxe asturchinu rodáu en llingua asturiana ‘Ad-vientu’ va estrenase esti vienres nel marcu del LIV Festival Internacional de Cine de Gijón (FICXixón). Va ser na segunda xornada del Día d’Asturies, que comienza esti xueves.
Roberto F. Canuto (Xixón, 1973) y Xiaoxi Xu (Sichuan, 1981) son los direutores d’esti drama psicolóxicu de misteriu que cuenta la hestoria de Suso, “un mozu ensin trabayu y al debalu, que depués de siguir a una moza daqué peculiar, ésta acaba por azotase al mar per un espeñaderu ensin qu'él pueda evitalo. Suso andará a la busca de respuestes que pudan esperta-y alcordances del pasáu y inclusive lu faigan replantegase la so verdadera identidá”.
La cinta ta producida por Almost Red Cultura Communication Co., con sede en China, empresa de la que son propietarios los dos direutores. Pa ello escoyeron Asturies como llugar de rodaxe, con llocalizaciones n’Avilés y Carreño, y l’asturianu como llingua vehicular. Una apuesta por un idioma minorizáu que yá utilizaron con ‘Ni Jing: No Robarás’ y ‘Sandía Amarga’, a la que sumó recién ‘Sunken Plum’, onde los actores empleguen el sichuanese, dialeutu de la rexón china del que ye orixinariu Xu, en cuenta del oficial mandarín.
Dambos direutores destaquen la importancia del usu de la llingua asturiana en ‘Ad-vientu’, un “ idioma que tien falta de sofitos nel so espardimientu y de puxu p'algamar la oficialidá. L'emplegu de la llingua, xunto a lo poético de la fotografía y la música suxerente, compuesta pol maestru Andrea Centazzo), sirvió pa crear una atmósfera especial”, afirmen. La maestra y esperta en Llingua Asturiana Laura Prieto Rodríguez encargóse del asesoramientu llingüísticu del curtiumetraxe.
La estrena de ‘Ad-Vientu’ va tener llugar mientres la segunda sesión del Día d’Asturies, prevista pa mañana a les 22.30 hores na sala 4 de los Cines Centru, siendo la única rodada na llingua propia de les producciones asturianes que se proyeuten. La primer sesión va celebrase esta nueche, a la mesma hora.
Fonte: Asturies.com
El Festival de Cine de Xixón dende va unos años paez que va a menos y eso ye una pena, va cuesta abaxo a nivel local y a nivel del mundu del cine.
ResponderEliminarNun ye asina Marina, cenciellamente tomó otru aldu de tinte más modestu anque eso implique pasar a un segundu términu n'importancia cinematográfica,y ye que si nun hai medios non pueden faese milagros.
ResponderEliminarAgora yá baxemos a la tercer categoría de los festivales del cine español, de los internacionales nin llegamos nin por asomu. Ye meyor que se dedique solo a curtiumetraxes.
ResponderEliminar¿Ónde tas, a ónde te fuisti, Cienfuegos?
ResponderEliminar