La XDLA esixe a Educación qu’informe a los centros de la desapaición de la ratio mínima en Llingua Asturiana

Pablo R. Guardado

El Tribunal Supremu confirmó n’abril la sentencia qu’eliminaba la ratio mínima d'ocho alumnos pa cursar asturianu n'ESO La Xunta pola Defensa de la Llingua Asturiana (XDLA) esixe a Educación qu’informe de la mesma a los centros.

Según señalen dende la organización cívica, dellos institutos tán faciendo maniobres pa inorar la decisión del Supremu que tornaba'l recursu de casación interpuestu pola Conseyería d'Educación contra la sentencia del Tribunal Superior de Xusticia d'Asturies (TSXA) qu'estimaba la demanda interpuesta por CC OO contra la Resolución del 16 de mayu del 2008 de la conseyería pola que s'establez la ufierta y les condiciones pa la eleición de materies optatives y materies opcionales pa la Educación Secundaria Obligatoria (ESO). Estes irregularidaes lleven a la XDLA a considerar necesario que la conseyería remarque a los centros la obligatoriedá de cumplir cola llei na Circular de principio del cursu y que tamién se monitorice tol procesu de matriculación.

“Como yá critiquemos duramente nel so momentu, les autoridaes del Gobiernu asturianu, col per entós conseyeru Herminio Sastre a la cabeza, amosaron el so despreciu testerón pola llegalidá y les perres públiques cola presentación d'un recursu en casación que, como nun podía ser d'otra manera, acabó en confirmación de la sentencia y la condena a costes de l'Alministración asturiana”, espliquen dende’l coleutivu de defensa de la llingua. Agora, tres la confirmación de l’anulación de la ratio por parte del Supremu, reclama l’actuación de la conseyería pa cumplir cola llei y anucia que va tar sollerte a tol procesu de matriculaciones pa que nun haya irregularidaes.

Fonte: Asturies.com