Izquierda Asturiana considera que "L'actual anteproyectu de llei d'educación (LOMCE) dexa fuera la posibilidá de que l'asturianu tea presente como materia a impartir". Nesi sen, afiten que "La condición de llingua non oficial del asturianu va facer imposible, col nuevu marcu, la so inclusión nel currículum", fechu que yá denunció díes atrás l'Academia de la Llingua Asturiana.
N'opinión d'IAS, "Una vez más pagamos les consecuencies de que'l asturianu nun seya oficial", al tiempu que denuncien que "esti pue ser l'asaltu final a un idioma milenariu que muerre adulces ente la desidia y la hipocresía de la clase política asturiana". Como consecuencia, anuncien que "vamos entamar aiciones lo más xunitaries posibles pa valtar esta agresión".
Fonte: Infoasturies
