Entamó la 'Feria del Libro de Xixón'

Na semeya ayeri, Raquel F. Menéndez, Vanessa Gutiérrez y Carlos Espina.

  El Paséu de Begoña va acoyer hasta'l domingu stands d'editoriales y llibreríes, presentaciones, talleres y conferencies.

 Dieciocho años depués, torna a entamase en Begoña una feria dedicada al llibru, organizada pol Conceyu de Xixón al traviés de la Fundación Municipal de Cultura, Educación y Universidá Popular, y la collaboración l'Asociación Cultural de Libreros de Gijón, el Club de Editores al Margen, l'Asociación de Escritores Noveles, l'Asociación d'Escritores d'Asturies y la Unión de Comerciantes del Principado de Asturias. Nel llugar hai instalaos 40 puntos de venta nes que participen 23 llibreríes de la ciudá y 20 editoriales.

 L'horariu de la 'Feria del Libro de Xixón'' ye de 11 a 15 hores y de 17 a 22 hores, hasta'l sábadu, mentes que'l domingu va tar abierta de 11 a 15 hores y de 17 a 20 hores. Amás de la posibilidá de mercar llibros con descuentu d'hasta'l 10 por cientu na mayor parte de los puestos, los visitantes van poder disfrutar d'una amplia programación con presentaciones talleres, talleres y conferencies na carpa de conferencies lliteraries, nel stand de la Rede Municipal de Biblioteques o nel Café Dindurra.

 Ayeri celebróse la primer xornada, na que destacó la presentación en Xixón de 'El llibru póstumu de Sherezade', primer poemariu n'asturianu de Raquel F. Menéndez, autora que tuvo acompañada por Carlos Espina, d'Impronta, y pola escritora Vanessa Gutiérrez, qu'emponderó la obra y el valir creativu de la de Salas, "que tien qu'enfrentase al fechu de ser moza y moza". "Ye una escritora en busca de la identidá, como me pasó a min", apuntó Gutiérrez.

 Pela so parte, Menéndez afondó nel "camín de l'analfabeta' que percorrió a la hora d'escribir la obra, emplegando una llingua tresmitida de manera oral, y lleó dalgunos poemes intercalaos con reflexones a entrugues de Gutiérrez. Asina, afirmó nun sentise honesta creando en castellanu y aseguró que facelo n'asturianu "nun ye un compromisu políticu; fáigolo por necesidá".

Programación

 Amás d'esta presentación, na xornada d'ayeri Francisco Álvarez firmó exemplares de 'Lluvia d'agostu' y Inaciu Galán punxo la charra 'Promoción y difusión de la lliteratura asturiana nos medios de comunicación', na que tuvo acompañada por María Esther García López. Pa la xornada de güei ta prevista una firma a cargu de Ramón Lluís Bande d'exemplares de 'Templu, cabaña' (18 hores) y les presentaciones de 'El llibru nuevu' de Xuan Bello (18.45 hores) y de 'Cuentos de ser y de tar' de Laura Marcos (20.15 hores).

 Pue consultar la programación completa de la Feria del Libro de Xixón calcando nesti enllaz. Fonte: asturies.com

El Festival Arcu Atlánticu va celebrase del 25 al 30 de xunetu en Cimavilla

La xunta rectora de la Fundación Municipal de Cultura, Educación y Universidá Popular aprobó esti xueves los cambios nel VI Festival Arcu Atlánticu, que dexa El Muelle pa pasar a celebrase nes places de Cimavilla. Nesta ocasión va durar 6 díes, del 25 al 30 de xunetu.

El presupuestu del certame xixonés va vese tamién amenorgáu (174.000 euros, 20.000 menos que nel 2016)  y, nesta ocasión, el festival nun va tar dedicáu a nengún país, sinón a les llingües minoritaries del arcu atlánticu. Asina, va haber xornaes dedicaes al asturianu y al mirandés, al gallegu, al eusquera, al occitanu y al bretón.

La gran novedá ye que’l certame dexa El Muelle y pasa a repartise pel Campu Valdés y les places de Cimavilla. Tampoco nun va haber Arcu Lliterariu, actividá que dende la primer edición venía entamada l’Asociación Cultural L’Arribada.

Nel terrén musical, tán previstes les actuaciones de Dixebra, Felpeyu, Corquiéu, los gallegos Xabier Díaz y Adufeiras de Salitre o los bretones An Tri DipoP na Plaza Mayor. A éstos hai que sumar otros munchos conciertos nel Centru de Cultura Antiguu Institutu.
Fonte: asturies.com

FETEN 2014 arranca el 16 de Febreru en Xixón con una ufierta de 150 representaciones y l'estrenu de 7 espectáculos

Va cuntar cola participación de más de 70 compañíes.

   La víxesimo tercer edición de la Feria Europea d'Artes Escéniques pa Neños y Neñes de Xixón, FETEN va tener llugar del 16 al 21 de febreru cola participación de setenta compañíes procedentes de siete países que van ufiertar alredor de 150 representaciones ente les que caben destacar l'estrenu de siete espectáculo. Toos ellos empobinaos al públicu infantil y familiar.

   La Feria Europea d'Artes Escéniques pa Neños y Neñes de Xixón, FETEN 2014, que va celebrar so ventiavu tercer edición ente los próximos díes 16 y 21 de febreru, va cuntar cola participación de setenta compañíes nacionales ya internacionales que van amosar na ciudá asturiana les sos últimes producciones escéniques, dirixíes a la infancia. Los distintos escenarios oficiales de la Feria van acoyer alredor de 150 representaciones de la mano de compañíes procedentes d'España, Arxentina, Bélxica, Francia, Bulgaria, Holanda ya Italia. Ente tolos trabayos, destaquen los siete estrenos absolutos que la organización incluyó na programación de la nueva edición.

   Consolidáu como un alcuentru de referencia y de xunta pa los numberosos programadores, distribuidores y ceadores qu'alleguen a Xixón mientres estes feches, FETEN 2014 va sirvir a toos estos profesionales p'analizar los nuevos enclinos creativos y trabayar pa impulsar un mercáu cultural que fortaleza'l sector, frente a les dificultaes de sostenibilidá de les artes escéniques.

   Amás de cuntar con una importante presencia internacional, la Feria Europea d'Artes Escéniques pa Neños y Neñes escoyó los espectáculos de compañíes procedentes de 15 comunidaes autónomes del nuesu país. Les casi 150 representaciones, creaes a partir de diverses disciplines artístiques, como la danza, los títeres y oxetos, la música, el circu o la maxa, ente munches otres, van tener llugar nos distintos escenarios oficiales de la Feria y en delles de les cais y places más emblemátiques de Xixón.

   Siete compañíes españoles van amosar mientres FETEN 2014 los sos espectáculos empobinaos a los más pequenos en calidá d'estrenos absolutos. Ye'l casu de la compañía asturiana Factoría Norte que va presentar l'espectáculu de cai 'Llumeru'. Pela so parte, los castellán y lleoneses Teloncillo Teatru, qu'apocayá llograben el Premiu Nacional d'Artes Escéniques pa la Infancia y la Mocedá, recalen en Xixón con una nueva producción de pequenu formatu, 'Niales'; ente que los cántabros La Machina Teatru van ufiertar en primicia 'El neñu corpuspín'. Los valencianos Teatre del Bleu y La Pavana Compañía de Teatre van poner n'escena 'Dong Dong Quixote' y 'L'home invisible', respectivamente. Completen l'apartáu d'estrenos les compañíes de Marina Bollaín (Madrid) y Marie de Jongh (País Vascu) que van llevar a los escenarios de Xixón el musical 'El Duende Calcetu' y el montaxe de títeres y actores 'Kibubu'

   La Feria Europea d'Artes Escéniques pa Neños y Neñes de Xixón, FETEN, ta entamada pola Fundación Municipal de Cultura, Educación y Universidá Popular y el Conceyu de Xixón.

Fonte:  Asturnews.com