Xosé Antón Suárez Puente
Xosé Antón Suárez Puente va poner la conferencia 'De cáncer, xenomes y sidrón' esti martes nel Atenéu Obreru de Xixón.
Aporta la seronda y, con ella, les esperaes charres de l'Asociación Cultural Ástura sobre cultura asturiana, que se celebren siempre el tercer martes de cada mes. L'encargáu d'abrir esti añu les conferencies ye Suárez Puente, profesor titular de Bioquímica y Bioloxía Molecular na Universidá d’Uviéu y miembru del Institutu Universitariu d’Oncoloxía (IUOPA), amás d'académicu.
Na so intervención, l'investigador va falar sobre l'estáu de la cuestión al respeutive de les investigaciones sobre'l cáncer del equipu del Dr. Carlos López Otín. "El cáncer ye una enfermedá producía pola arrexuntanza de mutaciones nel xenoma. Poro, pa poder lluchar escontra esta malura, ye necesario conocer cuáles son les alteraciones del xenoma que faen qu’una célula sana se tresforme nuna célula tumoral. La secuenciación del xenoma d’un cáncanu ufierta la posibilidá de conocer tolos cambios importantes pa esti procesu, abriendo nueves víes pal diagnósticu, siguimientu y desendolcu de nueves terapies pa los pacientes oncolóxicos", apunten dende Ástura.
El grupu de López Otín, al que pertenez Suárez Puente, foi’l primer grupu español en secuenciar un xenoma humanu, y el primeru del mundu en secuenciar el xenoma de 4 tumores. Anguaño ta acabante de completar la secuenciación de más de 500 xenomes del cáncer y d’otres enfermedaes, como cáncer de mamiella familiar, síndromes d’avieyamientu o miocardiopatíes. Estes investigaciones, feches dende l’IUOPA, tán revolucionando’l nuesu conocimientu del cáncer, y creando, dende Asturies, parte de lo que sedrá la medicina del futuru.
La charra de Suárez Puente va principiar a les 20 hores, con entrada llibre hasta completar aforu. Fonte: asturies.com
Ver la llucha escontra'l cáncanu dende la primer llinia mundial n'asturianu foi un privilexu.
ResponderEliminarXosé Antón gracies pola maxistral llección d'ayeri nel Atenéu Obreru na que lo difícil de la tema tratada llograsti faelo divulgativu y bono d'entender a los profanos y amás n'asturianu, propiu d'un brillosu profesor ya investigador a escala mundial que ye lo que yes. Norabona.
ResponderEliminarFoi un sonáu ésitu per parte de Ástura trer al Atenéu Obreru de Xixón a esti prestixosu investigador del xenoma del cáncer a que'l so equipu, asturianu de la Universidá d'Uviéu, hemos de ver llueu galardonáu col Premiu Princesa d'Asturies y más palantre, ensin esaxerar nin llixu, col Nobel. Al tiempu.
ResponderEliminarCreo que tas no cierto y amás bien puestu. Na conferencia espresar de continuu nun fluidísimo asturianu que por daqué ye miembru de númberu de l'ALLA.
ResponderEliminarSuárez Puente grande d'Asturies.
ResponderEliminarGran usuariu y defensor de la llingua como académicu de l'ALLA que ye. Cenciellamente magníficu, ye la cazumbre nueva que yá ta llegando.
ResponderEliminar