La XDLA llamenta'l papel xugáu hasta la fecha pola RTPA na normalización del asturianu

Esti llunes cumpliéronse 3.000 díes d'emisión na RTPA. Un tiempu que nun sirvió pa que l'ente cumpliera'l so papel de ferramienta normalizadora del idioma, como demandó de siempres la XDLA.

Pese a que la TPA asitió nesa xornada baxo la mosca de la canal el lema n'asturianu '3.000 díes xuntos', lo cierto ye que nun se pue tar satisfechos pol papel xugáu hasta la fecha pol ente públicu na normalización del idioma, como bien espresa la Xunta pola Defensa de la Llingua Asturiana (XDLA) nun comunicáu entituláu 'TPA: 3.000 díes de lo que pudo ser y nun foi pal asturianu'. Ye'l siguiente:

"Cúmplense 3.000 díes d'emisión de la Radio Televisión del Principáu d'Asturies (RTPA), 3.000 díes que pudieron ser una ferramienta fundamental al serviciu públicu d'Asturies y a la normalización del asturianu, pero que nun lo foron.

Dende la puesta en marcha del ente públicu de comunicación asturianu nel 2005, y cola programación n'emisión normal nel 2006, pudimos ver cómo se configuró un modelu de televisión que, en gran midida, contradicía toles indicaciones qu'espertos y comisiones parllamentaries foron dando a lo llargo de los años anteriores. Del modelu propuestu y deseáu pola mayoría de la sociedá (un modelu abiertu de serviciu públicu y interés social y, como nes demás televisiones de proximidá europees, ferramienta de normalización y visibilización de la llingua propia) pasóse al ente que tenemos, onde, como venimos denunciando sistemáticamente, la precariedá llaboral, el clientelismu y la manipulación política son los sos principios rectores.

Mentanto, la programación escasa, marxinal y tematizada n'asturianu nun fizo otro que subsistir na precariedá. Tuvieron que pasar años, dos en concreto, pa qu'apareciera'l primer programa n'asturianu na televisión. Y, dende entós, namás pudimos ver programación n'asturianu en porcentaxes ínfimos, de menos del 5 por cientu incluyendo redifusiones, y con temátiques centraes no cultural. Siempre quedaron escluíos informativos, ficción, deportes y programación infantil, quitando dalgún casu cuntáu. Vetáronse, polo tanto, conteníos populares que son fundamentales pa reforzar la estima hacia l'idioma propiu de los falantes d'una llingua minorizada.

Ye de reseñar que nesta temporada 2013-2014 namás s'estrenó un programa nuevu que tuviera como idioma vehicular l'asturianu. Mentanto, hubo más de venti espacios d'estrena en castellanu. Esmolecedor ye tamién l'usu habitual nos programes d'un mecigayu d'asturianu amestao y castellanu, rexistru que pue tar bien en dellos contestos coloquiales pero que nun ayuda a normalizar un usu correctu del asturianu.

Otra manera, los pasos alantre daos nesti añu col usu de la llingua na televisión pública –que se puen contar colos deos d'una mano– foron el doblaxe d'una película y la emisión de delles pieces informatives en 'TPA Noticias'. Sicasí, a pesar de la espectación xenerada y l'éxitu d'audiencia, quedaron en casos aislaos que nun tuvieron continuidá.

Cola Llei nueva de la RTPA aprobada nesti 2014, los partíos PP y PSOE non solo nun aprovecharon pa rectificar esta situación sinón que dieron una vuelta de tuerca más na precarización del trabayu, nel control políticu y nel despreciu al papel fundamental de la llingua nun serviciu públicu de comunicación.

De toles maneres, aprovechando esta fecha de los 3.000 díes d'emisión, queremos reafirmar dende la Xunta pola Defensa de la Llingua Asturiana'l nuestru compromisu permanente cola reivindicación d'unos medios de comunicación públicos al serviciu de los intereses d'Asturies y de la normalización de la llingua asturiana".

Fonte: Asturies.com