Solidaridá asturiana escontra'l refugu a promocionar l’idioma en Zamora

La vocalía de dominiu llingüísticu d’Iniciativa pol Asturianu, coordinada por Denis Soria, espresó al traviés d’un comunicáu “el so maltar énte la negativa de discutir una moción n'amparu del patrimoniu llingüísticu na Diputación de Zamora”. La iniciativa defendida pol grupu ADEIZA que daba un primer pasu na conquista de los drechos llingüísticos básicos (con midíes de proteición, promoción, recuperación toponímica o refuerzu institucional de la creación cultural y lliteraria de la llingua asturiana/lleonesa y gallega na Provincia de Zamora) partió del coleutivu Furmientu, una de les organizaciones qu'integren el movimientu de reivindicación llingüística al sur del cordal y cola qu'Iniciativa pol Asturianu aconceyara'l pasáu 31 de marzu n'Estorga (Lleón). El representante de los independientes zamoranos y diputáu provincial, Antonio Juanes García, defendió esta moción que nun se llegó a debatir al cuntar colos votos en contra del PP y a favor d'ADEIZA, PSOE ya IX. Iniciativa pol Asturianu púnxose en contautu tanto con Furmientu como con AZEIZA “p'apoyar el so compromisu en favor del idioma y ofrecer tola collaboración posible nesti ámbitu, al ser un sector importante de la sociedá zamorana y asturiana parte d'una mesma comunidá llingüística." Fonte: Asturnews

Solidaridá de Paraguái cola llingua asturiana

Paraguái solidarízase cola situación de la llingua asturiana.

L’Ateneo de Cultura y Lengua Guaraní solidarízase col asturianu al traviés d’un documentu robláu nel país suramericanu.

L’”Ateneo de Cultura y Lengua Guaraní” vien d’unviar una comunicación oficial a Iniciativa pol Asturianu na qu’afirma al traviés del so Direutor Xeneral, David Galeano Olivera, que la institución paraguaya “quier espresar el so incondicional y permanente sofitu y solidaridá na campaña de defensa de la llingua asturiana” que la organización ta faciendo col so llabor. Amás, l’Atenéu afirma na so carta a l’asociación qu’altiende que l’asturianu ye una “valiosa, xenuina y hestórica manifestación de la cultura” d’Asturies y que los sos falantes, responsables del so caltenimientu y tresmisión, “tienen tol drechu del mundu –como drechu humanu y llingüísticu- d’espresase na so llingua llariega”, yá que esta llingua resume la “hestoria y manera de ser de la xente asturiano”.

L’Atenéu, amás, quixo dexar nidio na so carta a Iniciativa pol Asturianu que, “tres facer un siguimientu de la nuestra actividá al traviés de la rede y d’informase de la situación de la llingua”, la resolución de sumase a esta “gran cruzada” foi “unánime” per parte la institución.

Dende Iniciativa pol Asturianu amuesen el “fondu respetu y almiración haza esta entidá, que defende y promueve la cultura y la llingua guaraní”, falada por un 90% la población de Paraguái, amás de ser falada tamien en Brasil, Bolivia y Arxentina. Dende la organización ficieron pública la so “más fonda simpatía pa con esta llingua y cultura, símbolu d’un país tan próximu al de nueso por razones hestóriques y sociales, ya que, d’igual mena qu’asocede col asturianu, nun dexa de ser patrimoniu de toos y toes, y nuesa ye la responsabilidá de nun la dexar desapaecer”.

L’”Ateneo de Lengua y Cultura Guaraní” ye una entidá autónoma con caráuter científicu-cultural y que foi creada como una institución d’educación superior, con rangu universitariu pa “cultivar y esparder la Llingua y Cultura Guaraní”. Foi declarada d’interés cultural educativu pol Viceministeriu de Cultura de Paraguái y desendolca cursos de guaraní y actividaes de promoción cultural en Paraguái en dellos países.

Fonte: Asturnews