Iniciativa pol Asturianu propón una redaición pal mandatu-marcu de la RTPA p'afitar la normalización nel ente

por Pablo R. Guardado

En plenu procesu d'ellaboración del mandatu-marcu que va poner les bases del ente públicu de comunicación pa los nueve años próximos, Iniciativa pol Asturianu presenta l'informe 'Una RTPA pa la próxima década'. Nél fai un balance de lo fecho hasta la fecha y propón una redaición pa sumar al documentu qu'afite la normalización.

Inaciu Galán, presidente d'Iniciativa pol Asturianu, y Fonso Martín, vocal d'Eduación del coleutivu, presentaron ayeri l'informe nel Conseyu de la Moceda de Xixón. Ésti va repartise ente los miembros del conseyu d'alministristación de la RTPA, la direición y los grupos con representación na Xunta Xeneral pa que lo tengan en cuenta pa la redaición del mandatu-marcu, nel que ta trabayando anguaño una comisión parllamentaria. Esti documentu, que debería tar desendolcáu dende la llexislatura anterior tres l'aprobación de la segunda reforma de la llei del sector públicu asturiana, va definir la estuctura y oxetivos del ente públicu de comunicación pa los nueve años próximos.

Nel informe, Iniciativa pol Asturianu analiza lo fecho pela RTPA dende que comenzó a emitir nel 2006, un llabro que pretende "que nun se repita" nos años vinientes. "Una década después de la so puesta en marcha, nengún de los diferentes soportes del serviciu públicu de comunicación d’Asturies ye anguaño la referencia cimera pa los asturianos. Televisiones y radios estatales continúen hexemonizando el panorama mediáticu,talmente como si la RTPA nunca llegara a nacer y la falta de conexón llingüística y cultural ta en gran parte tres d’esa situación", apunta nel entamu.

Por ello "plantega un modelu de serviciu públicu audiovisual que, partiendo del analís de les midíes errónees implementaes demientres esta década en gran parte perdida, apueste por convertir a la radiotelevisión pública nel referente principal de los asturianos, nel motor d’un sector audiovisual propiu avanzáu y n’axente fundamental de la normalización llingüística". Asina, tres facer un análisis y proponer idees per estayes –programes informativos, deportivos, infantiles, musicales y otros formatos como magacinos, concursos documentales o películes– propón la incorporación d'un párrafu nel mandatu-marcu qu'afitara la normalización nel ente.

Ésti sería'l siguiente: "RTPA, como serviciu públicu que ye, ha contribuir al procesu de normalización social del asturianu y gallego-asturianu, garantizando l’accesu de la ciudadanía a conteníos na llingua propia en tolos xéneros y formatos, qu’han ser adecuadamente promocionaos y emitíos n’horarios afayadizos pa esti fin; afalando, de pasu, una industria audiovisual propia que garantice la producción d’estos conteníos y asumiendo un rol compensatoriu respectu a otres cadenes públiques o privaes. RTPA tien que ser exemplar nel so compromisu colos elementos fundamentales y actuales de la cultura asturiana, renunciando a siguir les dinámiques propies de los otros medios de comunicación con presencia n’Asturies".

Importancia educativa de la RTPA

"Ye importante afitar oxetivos concretos no llingüísticos que permita trabayar a la direición de la RTPA nesa direición", afirma Galán, que recuerda que l'Estatu d'autonomía sostién llegalmente esta posibilidá dafechu, yá que recueye la promoción del asturianu nos medios de comunicación. Mentes, apuntó que col documentu busquen “apurrir propuestes pa da-y utilidá social a la RTPA nos vinientes diez años, convirtiéndola nuna ferramienta eficaz na tresmisión del asturianu y na vertebración d’Asturies”.

Pela so parte, Martín valoró l'importante papel educativu que debería xugar la RTPA y que, hasta la fecha, nun cumple. "La presencia del asturianu na radiotelevisión pública, n’especial nos programes infantiles y xuveniles pue convertise nuna ferramienta bien potente que complemente al llabor nes escueles y ayude a recuperar o reforciar la tresmisión interxeneracional del idioma, en definitiva, a da-y futuru”, aseguró.

"Nun podemos dexar pasar esta oportunidá hestórica pal asturianu, p’Asturies y pal propiu ente", fina l'informe d'Iniciativa pol Asturianu, que va poner importantes esfuercios nesti asuntu.

Na semeya, Martín y Galán.

Fonte: Asturies.com

La XDLA esixe un mandatu-marcu qu’afite’l papel normalizador de RTPA

La XDLA esixía esta mañana a los partíos que negocien un mandatu-marcu qu’afite’l papel normalizador de RTPA y facía anuncia de que la emisión en castellanu de “El cuentacuentos de Presta Asgaya”, serie infantil doblada al asturianu, amuesa que “Virgili niégase a cumplir cola llexislación vixente”.

Nuna nota de prensa asoleyada na mañana d’esti martes, la Xunta Pola Defensa de la Llingua (XDLA) facíase ecu de que’l fin de selmana pasáu,TPA emitió la serie de producción propia “El cuentacuentos de Presta Asgaya”, pero na versión en castellanu, cuando hai versión doblada al asturianu. Dende la XDLA dicen nun saber “qué sentíu tien que la cadena asturiana emita conteníos infantiles en castellanu, más cuando los hai n’asturianu, si la ufierta de conteníos naquel idioma ta sobradamente cubierta con cadenes como ClanTV, Boing, Canal Disney o Neox, qu’emiten les 24 hores del día. Sicasí, los neños asturianos nun disponen de nengún conteníu audiovisual na so llingua propia. Cero minutos al día y cero minutos a la selmana. ¿Qué sentíu tien mantener una canal pública si se dedica a ufrir lo mesmo que les demás canales y nun cumple la llexislación vixente, que diz que TPA tien que tener una presencia amañosa del nuesu idioma, amás de defender la cultura asturiana? La situación muestra la belixerancia d’Antonio Virgili, direutor actual de RTPA gracies al alcuerdu de PSOE, PP y IX, que, anque nel parllamentu y de cara a la sociedá asturiana diz que ye “partidariu” de la presencia del idioma nos medios públicos, depués marxina la presencia del asturianu y escuende la so realidá na programación”.

L’anécdota de Presta Asgaya, amás de doliosa, ye pala XDLA exemplu d’esto: “tamos falando d’un espaciu infantil, polo que ye estratéxicu pa la tresmisión interxeneracional del nuestru idioma. Por eso, la XDLA esixe a los partíos parllamentarios que, depués d’anunciar que s’abren les negociaciones p’aprobar el mandatu-marcu -con retrasu, lo que muestra de la poca relevancia que-y dan al papel de RTPA-, afiten nel testu’l papel fundamental de los medios públicos na normalización de la llingua asturiana. Asina, esti mandatu-marcu, que va afitar la programación pa los nueve años próximos, tien qu’esplicitar la cantidá y tipu de programes que s’han emitir nel nuesu idioma, tanto informativos como retresmisiones deportives, programes infantiles, doblaxes y entretenimientu, amás del papel de RTPA na promoción de la cultura asturiana y la so industria cultural”.

La XDLA quier tamién recordar que, “hasta’l momentu, los programes nel nuesu idioma son minoritarios na emisión, siempre dientro de temátiques mui marcaes. Mentanto, nel restu de la emisión vemos espacios que dexen de llau la nuesa realidá llingüística o que la utilicen como forma d’allegase al espectador, pero ensin nengún procuru normativu y con ciertu enclín humorísticu y diglósicu.” Tolo contrario de lo que diz la llexislación, “pero paez qu’hasta que nun se recueya más esplicitamente’l papel de RTPA col asturianu, el señor Virgili va siguir faciendo tolo posible pa escondelo na emisión, usando la cadena pal so beneficiu personal. Ello ye, escontra la sociedá asturiana, escontra la industria audiovisual asturiana, escontra la cultura asturiana y escontra la so llingua d’espresión”.

Fonte: Asturnews