La XDLA pon al asturianu na exa del consensu na RTPA

La Xunta pola Defensa de la Llingua Asturiana (XDLA) vieno acabante d’asoleyar una nota de prensa na qu’opina que’l consensu alrodiu de la RTPA namái pue venir al traviés del apueste por una RTPA onde l’asturianu tenga un usu normal.

La organización civil de defensa del asturianu quier destacar que “ye fundamental la renovación del Conseyu d’Alministración de RTPA y el cambiu na direición de la empresa pública, porque la directiva actual negóse a cumplir cola llexislación vixente en materia lingüística”. Ente los exemplos que presenta la XDLA pa xustificar esta afirmación clara ya incontestable alcuéntrase “una programación onde l’asturianu tuvo baxo mínimos y acutao a delles temátiques, mentes qu’hubo bien d’espacios que presentaron una imaxe diglósica y non normativizada de la nuesa realidá lingüística”.

Pa la XDLA esto ye’l momentu de que los grupos parllamentarios “sumen fuercies pa cambiar la situación y nomar unos xestores comprometíos col audiovisual d’esta tierra, cola cultura propia y col patrimoniu llingüísticu asturianu. Ye de reseñar qu’esti consensu namás pue venir al traviés del apueste por una RTPA onde l’asturianu tenga un usu normal“.

Sicasí, l’aritmética parllamentaria fai ver qu’esti consensu yá existe na opinión de la XDLA: “trés de les seis fuercies parllamentaries (Podemos, IX y Foru) presentáronse a les eleiciones defendiendo nel so programa un compromisu mayor de los medios públicos cola cultura y la llingua. En total, 17 diputaos. Pa detrás, l’acuerdu d’investidura ente PSOE y IX recueye nún de los sos puntos la necesidá d’un apueste de RTPA cola emisión de conteníos nel nuesu idioma. Quier dicise, en total son 34 los diputaos qu’apoyen nel papel un cambiu na situación actual que, otra manera, nun ye más que l’aplicación de la llexislación vidente”.
La XDLA recuerda que p’aprobar estos cambios ye necesario una mayoría cualificada. Esto ye, 30 diputaos. Polo tanto, nun queden más sides posibles pa cumplir colo que’l movimientu de reivindicación llingüística lleva defendiendo dende los años ochenta del sieglu pasáu: “qu’Asturies necesita unos medios de comunicación públicos independientes y apegaos a la realidá d’esta tierra, onde la llingua propia xuegue un papel fundamental. Ello ye, con conteníos que reflexen la realidá d’Asturies y del mundu en llingua asturiana”.

Fonte: Asturnews

El mayor consensu pola Oficialidá de la hestoria autonómica

Iniciativa pol Asturianu pide que s'impulse una reforma del Estatutu

Partíos de tol espectru políticu llevaron la promesa d’oficializar l’asturianu nel so programa eleutoral y la consencuencia foi que la postura favoratible a la resolución de la situación de desigualdá del asturianu y los sos falantes tien el mayor númberu de diputaos en tola hestoria de la Xunta Xeneral d’Asturies.

Desque en 1991 Xuan Xosé Sánchez Vicente fuera’l primer diputáu escoyíu con un programa a favor de la oficialidá, hasta güei, cuasi un cuartu de sieglu dempués, el sofitu al asturianu y de forma específica a la oficialidá normalizóse y ta asumíu pola gran mayoría de los asturianos y asturianes, siendo una parte más del programa de delles de les formaciones con más pesu.

Dempués d’estes elecciones, y de tantos años de trabayu, la reivindicación de la oficialidá axunta güei a 17 de los 45 diputaos del parllamentu, más de  los que tien l’actual partíu de gobiernu.

Les formaciones polítiques que se comprometieron colos sos votantes a defender la oficialidá (Podemos, Izquierda Xunida y Foro) han xuntar fuercies agora ya impulsar una reforma del Estatutu d’autonomía qu’incluya esti estatus llegal pal idioma, trabayando pa convencer a los demás partíos de la necesidá de camudar esta situación inxusta ya inesplicable nun sistema democráticu.

Precisamos un consensu de 3/5 de la Xunta Xeneral pa modificar l’Estatutu (27 diputaos). Ye’l momentu de forzar a los partíos tradicionalmente en contra a camudar la so postura, pa que s’adapte a la realidá social, que yá la tien asumida con normalidá. Ye’l momentu de que los partidarios de la oficialidá que tán dientro del PSOE y el PP faigan el máximu esfuerciu posible pa convencer a los suyos de la necesidá d’esti cambéu.

Y los partíos que defenden la oficialidá han demostrar, ellí onde gobiernen, que la reivindicación de la oficialidá nun ye una pallabra d’adornu nel so programa, estableciendo polítiques de normalización series y ambicioses nos conceyos.

Dende Iniciativa pol Asturianu siguimos trabayando dende’l primer momentu de la llexislatura pa consiguir esti necesariu consensu, cada día más cerca. Los ciudadanos, la so movilización y trabayu pol idioma dende tolos ámbitos posibles, van ser al final, los que consigan camudar les vieyes rocees de los dirixentes políticos pa cola llingua del país.

Fonte: Iniciativa pol Asturianu