Iniciativa pol Asturianu fai empréstamos los llunes de 19 a 21 hores na so biblioteca

L’actu, que tuvo llugar nel Conseyu de Mocedá de Xixón, entamó coles pallabres del presidente Inaciu Galán que faló de la importancia de tener un espaciu pa la lliteratura n’asturianu: “Faimos muncha ilusión poder ufrir a la sociedá esta biblioteca que ye un vieyu proyeutu d’Iniciativa pol Asturianu pa da-y visibilidá a la creación lliteraria n’asturianu. Facémoslo gracies a les donaciones de socios, editoriales y otres entidaes que mos fueron donando llibros a lo llargu de los cinco años d’actividá de la organización”.

Depués fíxose una llectura de poemes, onde escritores como Diego Solís, Sabel Tuñón o Xuan Porta recitaron dalgunes creaciones que foron bien recibíes per una audiencia ansiosa de lliteratura, que namás acabar l’actu yá acudió a la secretaría de la entidá a facese con dalgunos llibros.

Per otru llau esi mesmu día, Iniciativa pol Asturianu entamara una campaña cola que los nuevos socios van poder escoyer ente cuatro llibros de los dedicaos a autores de la Selmana de les les Lletres Asturianes cola opción d’unvialos a un colexu o institutu y difundir asina la nuesa lliteratura.

Nun principiu, l’horariu d’empréstamu ye namás los llunes de 19 a 21 hores, pero la organización espera dir ampliándolu a más díes en función d’una demanda que paez tar medrando nestos díes postreros a la presentación. Pueden garrar llibros tanto socios como non-socios, con un máximu de tres obres y por un plazu de quinces díes.

Fonte: Iniciativa pol Asturianu

Compromisu por Xixón felicita al Conceyu pol so apueste pol asturianu na Biblioteca del Natahoyo

Daniel Fernández afirma que van siguir trabayando pola normalización del asturianu frente a la desidia institucional

Daniel Fernández, voceru de Compromisu por Xixón, informó que’l Conceyu de Xixón solicitó habilitar na Biblioteca de Natahoyo un espaciu pa llibros n’asturianu na nueva estantería doble qu’instalaron na mentada biblioteca, ante la suxerencia de la organización d’esponer al públicu la sección asturiana de la biblioteca, como asina asocedió.

Compromisu por Xixón “agradez al Ayuntamientu’l so apueste pol asturianu na Biblioteca Natahoyo” y encamienta a apostar pola normalización del asturianu dientro de tolos ámbitos social y cultural, yá que ye un elementu enriquecedor y la so potenciación na mayoría de los casos nun supon gastar nin un euru más, namái voluntá política”.

Pa Compromisu por Xixón tamién rescampla “la dexadez institucional a tolos niveles respecto al asturianu” y recordaron que “esiste una obligación llegal pola que toes les Alministraciones Públiques deben fomentar l’usu del asturianu y l’usu de la toponimia oficial, que casi siempres s’escaez nel caxón”.

Daniel Fernández reafitó’l compromisu de la nuesa organización pa siguir trabayando pola normalización del asturianu y frente a la desidia institucional nesti campu” concluyó’l voceru de Xixón.

Fonte: Aruelu.com