Asturies aportará so perspeutiva a la redaición del Protocolu pa la Garantía de los Drechos Llingüísticos

Paul Bilbao Sarria, Kontseilua  ya  Inaciu Galán, Iniciativa pol Asturianu. _Xixón 2016

 La comunidá asturfalante va aportar les sos esperiencies y necesidaes a la redaición del Protocolu pa la Garantía de los Drechos Llingüísticos, tres del aconceyamientu que convocara en Xixón Iniciativa pol Asturianu pa esparder un documentu  que tien calter européu y va aprobase en Donostia 2016.

 Esti sábadu pasáu Iniciativa pol Asturianu organizó en Xixón una charra na que se presentó énte organizaciones de la sociedá civil asturiana el procesu de redacción del Protocolu pa la Garantía de los Drechos Llingüísticos que va aprobase, un documentu internacional que quier ser una continuación de la Declaración Universal de los Drechos Llingüísticos aprobada va agora venti años.

 L’actu sirvió pa conocer el documentu de mano de Paul Bilbao Sarria, de la organización vasca Kontseilua, entidá que pon en marcha esti procesu en xunto con ELEN y otres organizaciones, y celebrose na Biblioteca Xovellanos de Xixón, cola presentación d’Inaciu Galán, presidente d’Iniciativa pol Asturianu,  Les entidaes asturianes qu’asistieron al actu pudieron consultar les duldes que teníen sobre esti procesu y preparase pa facer les sos aportaciones a esti Protocolu que va marcar les llinies de la política llingüística y la revidicación de los drechos llingüísticos na Europa de les décades vinientes.

 Les entidaes asturianes convidaes a participar, más d’un cientu, y otres que tengan interés en participar, van poder presentar les sos propuestes hasta’l 20 de xunu nel corréu info@iniciativapolasturianu.org trabayando cola Guía creada a tal efectu y que se-yos pue facilitar en papel o per corréu lletrónicu, solicitándola nel mesmu corréu.

 Esti proyectu configúrase dientro del marcu de la Capitalidá Europea de la Cultura, Donostia 2016, y tien n’Asturies y pa tol dominiu llingüísticu asturlleonés a Iniciativa pol Asturianu como entidá representante y organizadora, pola pertenencia a la organización europea ELEN (Rede Europea d’Igualdá Llingüística)    Fonte: asturnews.com

Esti sábadu 21 preséntase en Xixón el Protocolu pa la Garantía de los Drechos Llingüísticos

Dientro del marcu de la Capitalidá Europea de la Cultura, Donostia 2016, va redactase y proclamase un Protocolu pa la Garantía de los Drechos Llingüísticos, coincidiendo col 20 aniversariu de la Declaración Universal de los Drechos Llingüísticos, que va presentase esti sábadu en Xixón.

Pa ello, ta faciéndose una rolda de contactos, que tien n’Asturies y pa tol dominiu llingüísticu a Iniciativa pol Asturianu como entidá representante y organizadora, pola nuesa pertenencia a la organización europea ELEN (Rede Europea d’Igualdá Llingüística)

L’actu quier ser un espaciu pa conocer cómo va funcionar el Protocolu y la so ellaboración, (axuntamos tamién un documentu esplicativu) de la mano de Paul Bilbao Sarria, de la organización Kontseilua y representante d’ELEN, que visita Asturies esta fin de selmana.

Nel actu podrán aportase yá propuestes dende la esperiencia de cada entidá, o faelo más alantre dempués de conocer el funcionamientu del Protocolu, un documentu européu que va tener en cuenta les propuestes d’entidaes de tol continente y que va marcar la reivindicación llingüística de los idiomes amenazaos d’Europa nes próximes décades.

Iniciativa pol Asturianu convidó a entidaes y empreses con sensibilidá pa cola normalización del asturianu, y fai un llamáu a aquelles organización a les que nun fuere a llegar, pa convidales de nuevo, yá que ye un actu abiertu al públicu xeneral. Sedrá’l sábadu 21 de mayu, ente les 10:30 y les 14 hores nel Salón d’actos de la Biblioteca Xovellanos de Xixón.

Fonte: Asturnews