Adultos y escolinos van poder conocer les artes y la historia del país al traviés de visites guiaes en llingua asturianu a dos de los centros culturales más importantes d’Asturies: el Belles Artes y l’Arqueolóxicu. En principio van celebrase dos xornaes, esti mes y n’avientu, cola intención de da-y continuidá al proyeutu nel 2017.
La Direición Xeneral de Planificación Llingüística y Normalización entama esta iniciativa en collaboración colos dos museos tres la bona experiencia de la Selmana de les Lletres Asturianes, onde yá se fixeron visites guiaes n’asturianu tanto al Arqueolóxicu como al Belles Artes. Esti proyeutu pilotu, enfocáu a escolinos y al públicu xeneral, establez dos feches pa dar a “conocer la nuesa historia y les nuestres artes, n’asturianu”: el día 26 de payares y el 17 d’avientu pal públicu, y los díes 25 de payares y el 16 d'avientu pa escolinos, que nesta ocasión participarán cuatru centros escolares d'Uviéu.
La visita al Muséu Arqueolóxicu va tener llugar a les 11 hores, mentes que la del Belles Artes va principiar a les 12.30 hores, siendo dambes de baldre. La intención de Planificación Llingüística ye dar continuidá a esta iniciativa nel 2017 con itinerarios diferentes, tal y como faen habitualmente en castellanu dambos museos.
Difusión del asturianu “al traviés de la cultura”
La presentación d’esta campaña de visites guiaes n’asturianu fíxose esta mañana nel Muséu Arqueolóxicu d’Asturies, actu nel que tuvo presente’l direutor del centru, Ignacio Alonso, xunto col del Belles Artes, Alfonso Palacio, y Fernando Padilla. El direutor xeneral de Planificación Llingüística y Normalización destacó sobre manera na so intervención la posibilidá qu’ufierta esta iniciativa de “averar a la población asturiana'l mundu del Arte y la Historia de la so tierra emplegando la llingua tradicional”.
Palacio, pela so so parte, emponderó’l proyeutu pilotu pola “difusión, normalización, visibilización y promoción” que permite del asturianu “al traviés de la cultura”. D’igual forma recordó’l compromisu pa col idioma del Belles Artes, señalando la torna al asturianu de la páxina web o la espublización de folletos y del calendariu del muséu n’asturianu, “del que vamos aumentar la tirada nesti 2017”.
L’encargáu d’abrir y zarrar l’actu foi l’anfitrión, Alonso, que felicitó la iniciativa porque permite “una visión non esplotada hasta agora del patrimoniu históricu”, destacando la proximidá qu’aporta la propia llingua a la esplicación de los materiales del Arqueolóxicu.
Na semeya, Alonso, Padilla y Palacio.
Fonte: Asturies.com
