Leonardo Padura va tener yincana lliteraria en Xixón

  La Fundación Princesa d’Asturies va entamar una yincana lliteraria basada na obra de Leonardo Padura, Premio Princesa d’Asturies de les Lletres, sol títulu “Xixón a la cubana”.Esta actividá, que va ser abierta al públicu y va tener llugar en Xixón el sábadu, 17 d’ochobre, pretende dar a conocer la obra del escritor cubanu, al traviés d’un percorríu por ocho aparques lliteraries. La respuesta a caúna d’elles atoparáse nel testu presente en cada localización o en dalguna clave del so escenariu. “Xixón a la cubana” ye un viaxe a la cultura y al ambiente cubano que reflexa Leonardo Padura na so obra, sobremanera na so novela negra.

  Los allugamientos de les estaciones lliteraries son les orixinales de la ciudá onde trescurre l’acción de les noveles protagonizaes por Mario Conde, L’Habana, y van tar señalaes nun mapa de dicha ciudá con un númberu que rellaciona cada allugamientu con una similar de Xixón, ciudá especialmente venceyada a la carrera del escritor.

  El puntu de salida y de llegada va tar asitiáu nel Palaciu de Revillaxixéu. El percorríu podrá empecipiase ente les 11.30 y les 13.30 hores y va tar señalizáu nun mapa que se va apurrir a cada participante al pie de un pasaporte que recueye les entrugues, material necesario pa empezar la yincana.

  Pa participar na yincana, los comenenciudos podrán inscribise primeramente al traviés de laweb de la Fundación ( a partir del 10 d’ochobre, a les 12 hores, lo que garantiza una plaza nesta prueba, o bien de manera presencial nel hall del Palaciu de Revillaxixéu (Plaza del Marqués, 2) el 17 d’ochobre, ente les 11.30 y les 13.30 hores.

  Los participantes en “Xixón a la cubana” que lleguen a la fin del percorríu respondiendo toles entrugues de forma correcta, van poder participar nel sortéu d’entraes pal alcuentru que va caltener l’escritor con clubes de llectura de distintes biblioteques públiques d’Asturies, Llión, Toledo, Guadalaxara, Albacete, Galicia y Cantabria, ente otres, que va tener llugar n’Uviéu, el 20 d’ochobre, a les 19.30 hores.
Fonte: asturnews.com

Leonardo Padura

Premio Princesa de Asturias de las Letras 2015  /  Premiu Princesa d'Asturies de les Lletres 2015

L'escritor cubanu Leonardo Padura

   Diéron-y el premiu Princesa d’Asturies de les Lletres (en castellán, claro) al cubanu Leonardo Padura. Préstame que se reconozan los méritos d’un escritor dedicáu a escribir novela negra, un xéneru del que refugaron va tiempu una riestra de famosos/es autores que lo consideraben: un xéneru menor/ un xéneru acabáu. Llueu, cuando dalgún d’ellos recurrió a él pa cuntar les sos histories, la cosa cambió, anque entovía sigui siendo dalgo demasiao “popular” como pa que guste a determinaes mentes “cultivaes”.

   A min siempres me prestó y hai verdaderos maestros dientro del so cultivu, un d’ellos el que yá ganó’l premiu l’àñu pasáu, l’irlandés John Banville que, embaxo l’alcuñu de Benjamin Black, tien dalguna prestosa novela (yá reseñada nesti blogue) protagonizada pol forense Quirke. Y ye que como’l mesmu Banville dicía va tiempu nuna entrevista a “El País”: “Contra la crisis, novela negra”.

   Lleí de Padura namás La neblina del ayer, percorríu del protagonista Mario Conde, antiguu policía, per L’Habana en cata d’una antigua artista de nome Violeta del Río. Una Habana decrépita, abandonada y enllena de miseria, onde l’autor, en boca y maxín del protagonista, va superponiendo l0s actuales llugares qu’atopa colos que fueron fai unos cuantos años.  Una novela de personaxes marxinaos que lluchen por sobrevivir como puen -y puen bastante mal- pa ganase más o menos honradamente la vida.

   Padura visitónos durante la Selmana Negra -donde-y dieron el Premiu Hammet- y perehí hai una entrevista suya mui sabrosa colgada nes redes. Allégrome, pues, del premiu a un escritor que trabaya nun xéneru consideráu “menor”, y que lo fai con aciertu, fondura y amenidá. Y con un tastu de señaldá per un tiempu que pasó y que’l presente recuerda enllenu de pantasmes. Norabona, entós, al autor cubanu y que’l premiu encartie pa que lu llea la xente que, hasta agora, entá nun lo fizo.  
Fonte: TrabayudeCampu.VicenteGarcíaOliva/Asturies.com