Inaugúrase’l Parador de Courias ensin respetar la toponimia oficial

por Pablo R. Guardado Esti llunes celébrase la inauguración del Parador de Courias baxo la denominación castellana de ‘Corias’, actu nel que va tar presente’l presidente del país. La toponimia asturiana ye la única que la empresa Paradores nun respeta nel Estáu. La Xunta pola Defensa de la Llingua Asturiana (XDLA) foi’l primer coleutivu en denunciar de forma pública l’usu del topónimu ‘Corias’ en cuenta del tradicional y oficial ‘Courias’, quexa a la que tamién se sumó l’Academia de la Llingua Asturiana. Carlos Pulgar, voceru de la organización, presente güei en Courias a títulu individual, afirmó que nun recibieren respuesta de la empresa pública Paradores a les comunicaciones unviaes, al igual que tampoco del ministeriu nin de Política Llingüística, dalgo que dexa nidio’l pocu enfotu de les alministraciones de respetar la llegalidá toponímica: el nome del establecimientu hoteleru de lluxu ye ‘Parador de Corias’. Esti casu nun ye l’únicu que se da n’Asturies, yá que’l de Xixón tampoco nun respeta’l topónimu oficial ‘Gijón/Xixón’, al igual qu’el de Cangues d’Onís, una situación que nun se da en nengún de los establecimientos asitiaos nos territorios billingües del Estáu, con dos esceiciones: el d’Argomaiz (Araba), qu’utiliza’l topónimu non oficial Argómaniz; y el de Xàbia/Jávea (Alicante), qu’usa namái’l castellanu Jávea. Na inauguración del parador asitiáu nel occidente del país acudió Javier Fernández en representación del nuesu Gobiernu y tamién taba prevista la presencia de Sofía de Grecia y del ministru d’Industria, Turismo y Energía, José Manuel Soria. Por esti motivu, los mineros dexáronse notar na zona dende primer hora coles sos protestes. Esposición n’El Olivar El chigre uvieín El Olivar, asitiáu na cai Escura númberu 1, acueye hasta’l 30 de xunetu la muestra ‘25 años de conciertu en cartelos’ qu’entamó la XDLA coincidiendo col vixésimoquintu aniversariu del Conciertu pola Oficialidá. Nella pueden vese caún de los cartelos de les venticinco ediciones d’esti eventu. Semeya de la Xunta pola Defensa de la Llingua Asturiana. Fonte: Asturies.com

L'ALLA pide a Paradores de Turismu qu'emplegue'l topónimu Courias nel de Cangas del Narcea

L'Academia de la Llingua Asturiana exixó a la presidenta de Paradores d'España, Ángeles Alarcó, que'l nuevo parador que va abrise en Cangas del Narcea lleve'l nome de Courias, como ta aprobao oficialmente, y non el de Corias.

Asina, reclámase'l "cumplimientu de la llegalidá vixente en materia de Toponimia n'Asturies, ente la próxima inauguración del Parador de Courias, nel conceyu de Cangas del Narcea".

Nuna nota prensa, l'Academia diz venir "siguiendo con preocupación les noticies relatives a la denominación del nuevu Parador de Courias en Cangas del Narcea". Nesti sen la Institución dirixóse a la presidenta de Paradores de Turismu d'España, Ángeles Alarcó Canosa, "col envís de que se cumplan les lleis que cinquen al usu de la Toponimia n'Asturies. Esto ye: la Llei 1/1998 de 23 de marzu d'usu y promoción del asturianu, el decretu 98/2002 de 18 de xunetu pel que s'afita'l procedimientu de recuperación y fixación de la toponimia asturiana y el decretu 89/2008 de 3 de setiembre pel que se determinen los topónimos oficiales del Conceyu de Cangas del Narcea".

Fonte: Europa Press

Denuncien que'l Parador de Courias nun usa la toponimia oficial n'asturianu

Monesteriu de Courias La Xunta pola Defensa de la Llingua Asturiana vien de contactar, delles selmanes atrás, col Ente Paradores de Turismo de España S. A. pa que se rectifique l'enquivocu alvertíu na denominación del parador de Courias, que se va abrir d'equí a poco nel conceyu de Cangas del Narcea. Al nun tener respuesta de momentu, espliquen dende la organización "vémonos nel imperativu de facer públicu'l fechu y d'informar a toles alministraciones implicaes na interpretación recta de la llexislación vixente". Y ye que'l nome oficialmente reconocíu del llugar onde ta'l monesteriu que va facer les funciones de parador ye Courias (y non *Corias, como recueye la páxina web del Ente). Recuerden que la denomación oficial ta afitada dende setiembre del 2008, nel decretu 89/2008 del Boletín Oficial del Principáu d'Asturies que recueye los nomes tradicionales del conceyu de Cangas de Narcea como los únicos válidos. De la mesma manera, a nivel estatal, l'Institutu Nacional d'Estadistica encargáu del nomenclátor toponímicu yá fai constar na so documentación les denominaciones recoyíes nel BOPA. Por tolo anterior, soliciten a Paradores de Turismo de España que rectifique l'erru y dea cumplimientu a la toponimia oficial asturiana. De la mesma manera, la Xunta insta a la Direición Xeneral de Política Llingüística y al Conceyu de Cangas del Narcea a infomar con urxencia al Ente de Paradores sobre'l cumplimientu inescusable de la llexislación vixente.

Fonte: Asturnews