La 'Caravana pola Oficialidá' aporta a la cuenca'l Caudal

 Va salir de Cabanaquinta pa finar en Mieres.

 La tercer etapa de la 'Caravana pola Oficialidá' va celebrase mañana y va pecorrer los conceyos d'Ayer, Ḷḷena y Mieres. D'esta forma, la Xunta pola Defensa de la Llingua Asturiana (XDLA) sigue cola so campaña de respuesta ciudadana "ente los ataques que se tán viviendo hacia los pocos avances que se dan na normalización social del asturianu", como ye'l casu de los "recursos de Delegación del Gobiernu a ordenances y reglamentos, les campañes mediátiques contra la recuperación de la toponimia, la parálisis na presencia de la nuestra llingua na radiotelevisión pública, etc.".

 Al empar, tamién busca aprovechar y afitar los llazos de collaboración abiertos colos alcaldes y conceyales que participaron na iniciativa de Conceyos pola Oficialidá con motivu de la pasada manifestación pol Día de les Lletres Asturianes y la declaración d'oficialidá de Bimenes. La salida de mañana ta prevista pa les 11.30 hores dende la plaza'l Mercáu de Cabanaquinta pa siguir hasta Campumanes y tornar en direición norte per tola cuenca'l Caudal hasta Mieres, onde s'espera aportar a les 14 hores.

Per toda Asturies

 Enantes, la 'Caravana pola Oficialidá' percorriera nuna primer etapa Bimenes y parte de la cuenca'l Nalón, y nuna segunda Gozón y Carreño, cola participación de decenes de vehículos. Como n'ocasiones anteriores, la XDLA recomienda a tolos participantes dir bien de depósitu, llevar prendíes les lluces de cruce en too momentu, guardar la distancia de seguridá y adaptar la velocidá a la xenérica de la caravana, y señalizar toles maniobres.
Fonte: asturies.com

Decenes de coches participaron na 'Caravana pola Oficialidá' de Gozón y Carreño

2ª Caravana pola Oficialidá

Más de 70 vehículos partieron del Cabu Peñes hacia Candás na mañana del sábadu.

Nun ambiente festivu los participantes percorrieron los conceyos de Gozón y Carreño pa "visibilizar y denunciar la situación de marxinación, acosu y falta de derechos que sufre la llingua asturiana y les persones que quieren usala", esplicó la Xunta pola Defensa de la Llingua Asturiana (XDLA) nel comunicáu lleíu nesta segunda etapa de la 'Caravana pola Oficialidá'. Asina, pasaes les 11.30 hores una filera de más de 70 coches, que foi creciendo mientres la ruta prevista, salió del Faru de Peñes pa cruciar depués Lluanco y otres poblaciones de los dos conceyos y finar en Candás.

Tres la etapa de Bimenes y parte del valle del Nalón y de la de Gozón y Carreño, van entamase otros percorríos informativos próximamente sobre la situación del idioma cola fin de visibilizala y esixir "lo necesario, que ye'l reconocimientu de los derechos fundamentales de la ciudadanía, que ye la declaración del asturianu como llingua oficial".
Fonte: asturies.com