Aporta la Navidá y con ella tornen les ‘Escenines pa la Reciella’

Lleguen les fiestes navidiegues y, per cuartu añu, el ciclu ‘Escenines pa la Reciella’ protagoniza los eventos infantiles previstos pa estos díes nel país. ‘Reciella. Families pol Asturianu’ amplía nesta edición les actividaes que se celebren en Xixón a cinco, dos d’elles con sede nel Antiguu Institutu.

El conciertu-presentación de ‘Bestiariu 2’, discu producíu por La Fabriquina y editáu por Araz.net –empresa tamién editora d’Asturies.com– qu’inclúi doce temes nuevos d’otres tantes bandes asturianes, siguiendo l’ésitu del primer ‘Bestiariu’, va abir ‘Escenines pa la Reciella’ el llunes 26. Va ser al meudía nel salón d’actos del Colexu Públicu Xovellanos.

La segunda cita va ser tamién músical, cola presentación de la versión n’asturianu de ‘Pulgarina’. Va celebrase a les 19 hores del xueves 29 nel salón d’actos del Centru de Cultura Antiguu Institutu y va contar cola actuación d’Alicia Álvarez, que va interpretar los temes d’esti discu-llibru editáu tamién por Araz.

El teatru, mentes, va protagonizar les trés actividaes restantes. ‘Retalinos’, d’Olga Cuervo y David Varela, va representase’l llunes 2 de xineru a les 12 hores (Antiguu Institutu), siendo’l turnu de ‘Una casa’, d’Higiénico Papel, el día siguienta a les 19 hores (CP Xovellanos). Va poner el ramu al tercer ‘Escenines pa la Reciella’ la obra ‘Runa’, de Nun Tris, el miércoles 4 a les 19 hores (CP Xovellanos).

La entrada a los cinco eventos del ciclu entamáu por Reciella ye de baldre hasta completar l’aforu de les sales.

Fonte: asturies.com

Un conciertu de Pop Piquiñín y una cantidá grande d'actividaes, nel II Día de la Reciella

Cartelu del II Día de la Reciella

    Esti domingu va celebrase nel Muséu del Pueblu d’Asturies el segundu Día de la Reciella. Dende les 11, y hasta les 19 hores, el recintu va acoyer una cantidá grande d’actividaes de baldre que va zarrar un conciertu de Pop Piquiñín n'acústico y una danza prima.

   Neños y neñes van vivir una xornada dafechu n’asturianu al traviés de xuegos, lliteratura y música qu’entama, tres la bona esperiencia del añu, l’asociación ‘Reciella. Families pol Asturianu’. A les 11 hores, el grupu d’animadores Trebeyos va ufrir a los pequeños xuegos medievales, mentes qu’Esbilla va facer lo propio con xuegos tradicionales. Una exhibición infantil de cuatriada gracies a la Federación Asturiana de Bolos y a la participación de los subcampeones infantiles d’Asturies, la Peña Morcín, va centrar l’actividá na bolera del Pueblu d’Asturies a les 12.30 hores, pa depués facer una posa y xintar, cola posibilidá de facelo nel puestu de comida y bébora del recintu.

   Yá de tarde, a les 16 hores, ‘El cantar del vasu’, que promete ser una revolución ente los neños y neñes asturianos, va garrar protagonismu, continuando la xornada con un taller d’instrumentos tradicionales nel tendayu (17 hores) dirixíu por David Varela. Los encargaos de zarrar esti segundu Día de la Reciella van ser, dende les 18 hores, Pop Piquiñín, actuación a la que va siguir una danza prima ente tolos presentes nel prau. Hai que destacar que la banda xixonesa va interpretar dalgunos de los temes del que va ser el so segundu trabayu n’asturianu, ‘Nun mos gusten los llunes’.

   Aparte d’esta programación, les persones que s’averen al Pueblu d’Asturies tamién van poder disfrutar con puestinos nos que mercar llibros de lliteratura infantil y xuvenil –con presencia de Trabe y Pintar-Pintar– o acceder a material de la Oficinal de Normalización Llingüística de Xixón nel de la Rede de Normalización Llingüística nos Conceyos, amás d’espacios de pintacares y música. Tamién va ser posible mercar material nuevo de Reciella, como chapes o pegadielles pal coche. Dende l’asociación recuerden que los menores han de tar siempre acompañaos d’un adultu.                                                                                        Fonte: Asturies.com