La estrena definitiva de ‘Fálame’ en TPA va ser el domingu 21

• . ‘Fálame’ va llevar les cámares de TPA a colexos pa que los escolinos s'espresen n’asturianu

 La RTPA anunció que la estrena del programa infantil en llingua asturiana ‘Fálame’ va ser el domingu 21, en principio a les 9.15 hores. El deséu de la productora, Médula, ye que s’emita nun horariu más familiar pa que lo vean grandes y pequeños.

 Yá hai fecha pa la estrena definitiva de ‘Fálame’, el programa col que la direición xeneral de la RTPA quier tapecer el vieyu déficit de la TPA de programación infantil col que cuenta la canal pública. ‘Fálame’, que va ser dafechu en llingua asturiana, va emitir el so primer episodiu’l domingu 21, nun horariu por confirmar, anque nun principio va ser alredor de les 9.15 hores.

 Esta hora tan temprana nun acaba de prestar a la productora Médula Producciones, que pretende que ‘Fálame’ s’emita a nun horariu más familiar “yá que ye un programa mui prestosu pa vulu xuntos neños, padres y güelos”. La redifusión, prevista pal sábadu siguiente, sería tamién a la mesma hora.

De colexu en colexu

 La primer temporada de ‘Fálame’, la única prevista de momento, va contar con 26 capítulos de 30 minutos de llargor caún nes que se visiten a otros tantos centros del país pa que los neños y neñes canten y falen sobre dellos temes propuestos y cosadielles, baxo la supervisión de los sos maestros, siempre n’asturianu. En cada episodiu va haber tamién llugar p’actuaciones musicales, cola participación de Pop Piquiñín.          Fonte: asturies.com

‘Fálame’ va estrenase en TPA’l día 23

• 
  
• 
  
• por Pablo R. Guardado

El programa infantil en llingua asturiana de TPA, ‘Fálame’, tien previstu’l so estrenu’l día 23. Esti espaciu pa la reciella que va emitise nes mañanes del domingu, con redifusión el sábadu siguiente.

Médula Producciones encárgase d’esti programa que tien como oxetivu divulgar conocimientos llingüísticos d’asturianu, tanto gramaticales como de vocabulariu. Asina, tán previstos 26 capítulos de ‘Fálame’ con un llargor de 30 minutos caún, nos que la popular cantante de tonada va servir como conductora.

El primer episodiu, salvo novedá d’última hora, va emitise na mañana del domingu 23 nun horariu por confirmar y var poder vese repetíu’l sábadu 29. Con esta iniciativa RTPA cumple con una demanda vieya de los coleutivos de defensa del idioma, que consideren la programación infantil nel ente públicu de comunicación como un preséu básicu pa la normalización de la llingua asturiana.

Fonte: Asturies.com

TPA va cuntar con un espaciu infantil n’asturianu: ‘Fálame’

• . La TPA fai una estrena "clandestina" de Los Bolechas

• 
  

 El conseyu d’alministración de RTPA aprobó la creación d’un espaciu infantil en llingua asturiana que va llevar el nome de ‘Fálame’, del que se va encargar Médula. Esta productora yá fixo ‘Presta asgaya’ nos primeros años de TPA.

 D’esta forma RTPA cumple con una demanda vieya de los coleutivos de defensa del idioma, que víen una programación infantil n’asturianu nel ente públicu de comunicación como una ferramienta fundamental pa la normalización del idioma. “Ye dalgo positivo y mui necesario; un pasu alantre pal usu del asturianu que cumple con ún de los oxetivos de la Llei d’Usos de la RTPA aprobada na Xunta Xeneral”, apunta Vicente González Bernaldo de Quirós, representante d’Izquierda Xunida (IX) nel conseyu d’alministración de la canal, que destaca’l consensu esistente ente tolos miembros d’esti órganu sobre la necesidá de contar con una programación infantil en llingua asturiana.

 La empresa encargada de la producción de ‘Fálame’, nome que va tener l’espaciu, ye Médula Producciones, que fora yá responsable del programa infantil ‘Presta asgaya’ nos primeros años de la TPA y que nel so catálogu tien espacios d’ésitu como ‘De folixa o en folixa’, 'Mochileros' o ‘De cai’, fechu n’asturianu dafechu y presentáu por María Cotiello. El llunes próximu va celebrase una reunión nueva del conseyu d’alministración onde s’espera concretar la fecha de comienzu de les emisiones de ‘Fálame’ y otros aspeutos del programa.

Los Bolechas
 Nos años últimos, l’espaciu únicu en llingua asturiana pa la reciella foron ‘Los Bolechas’, de la que se tornaron dos temporaes con munchu ésitu d’audiencia pese a la emisión de la segunda temporada n’agostu ensin promoción nenguna. Agora RTPA apuesta por un encargu de producción a una empresa asturiana, como Médula, “porque paez que nun tien munchu sentíu doblar una serie gallega”, señala Bernaldo de Quirós.      Fonte: asturies.com