Susana Sela pon n'escena 'Ausencies' xunto a Luis Núñez en Les Vegues

El conciertu va celebrase finalmente nel salón d'actos del Centru Sociocultural por mor de les obres nel Teatru El Llar, llugar onde taba previsto nun primer momentu.

L'espectáculu poéticu-musical 'Ausencies' de Susana Sela y Luis Núñez aporta a Corvera. Ésti se basa nel poemariu espublizáu por Sela, de mesmu nome, nel 2014 y desendólcase como un cuentu, "la historia d'una persona que un día recueye toles sos ausencies y entama a caminar".

Pa da-y musicalidá a los poemes y cuentos que conformen el conciertu, Sela y la guitarra de Núñez van tar acompañaos por Marcos Díaz, al baxu; Armando Fernández, al pianu; y Antón Barquero, a les percusiones. L'actuación va tener llugar güei, a les 20 hores, con entrada llibre.

Fonte: Asturies.com

Trasnu zarra la so xira con Conciertu na Filarmónica

A Banda de Gaitas cuañesa El Trasno

   A Banda de Gaitas El Trasno, de Cuaña, vai dar un concerto nel Teatro Filarmónica d'Uviéu el venres 21 de novembre, ás 8.30 horas. Esta actuación pon el ramo á xira qu'amañóu a Conseyeiría d'Educación, Cultura y Deporte pra esta banda como ganadora da edición del ano 2013 del Premiu al Meyor Cantar cua cántiga «Volviche». A entrada al concerto é llibre hasta completar el aforo.

   A banda cuañesa, acompañada por dalgús dos músicos que colaboraron na grabación del sou disco Axeitín, actuóu el 3 d'agosto nel Centro Niemeyer d'Avilés, el 17 d'agosto nel Festival Intercéltico d'Occidente en Tapia y el 7 de setembre en Candás, dentro das celebracióis institucionales del Día d'Asturias.                                                                      Fonte: Asturnews

La XDLA califica d'insultu a los asturianos el patrociniu de RTPA a un conciertu d'Isabel Pantoja

La empresa pública patrocina a la cantante, condergada por blanquéu de capitales, mentes-y da una atención mínima a los artistes asturianos

   La XDLA califica d'insultu a los asturianos el patrociniu de RTPA a un conciertu d’Isabel Pantoja entendiendo que'l fechu de que la empresa pública patrocine a la cantante, condergada por blanquéu de capitales, mentes-y da una atención mínima a los artistes asturianos, ye dafechamente incomprensible. Asina, los fondos públicos de RTPA van valir pa publicitar a la cantante más famosa d’España, acusada de cometer delitos de llaváu de dineru y fraude a la Facienda Pública.

   El 22 de payares, la cantante Isabel Pantoja va dar un conciertu n’Uviéu y a pesar de que l’artista ta condenada por blanquéu de capitales y tien que pagar una multa de más d’un millón d’euros, el conciertu cuenta cola collaboración del mesmu Conceyu d’Uviéu y, lo que ye peor, col patrociniu de RTPA, la televisión pública de tolos asturianos.

   La Xunta pola Defensa de la Llingua Asturiana (XDLA) entiende esti patrociniu como un insultu a los televidentes de la emisora, a la xente que trabaya pola cultura asturiana y a tola ciudadanía asturiana en xeneral.

   Como vien denunciando la XDLA "de magar la RTPA empezó a emitir, allá pel 2005, el modelu de programación de la radio y la televisión pública rescampla pola marxinación de la llingua y la cultura asturiana. Sicasí, como demuestren les audiencies, los programes apegaos al territoriu y a la identidá asturiana son los que más audiencia tienen. Ye más, a pesar de que RTPA tien que cumplir por llei una función de promoción de la cultura asturiana, la presencia de la música asturiana nes emisores públiques ye cuasi inexistente. Too esto choca col patrociniu al conciertu d’Isabel Pantoja, fórmula que nun usó RTPA con nengún artista asturianu".

   Por mor d'ello, la XDLA fai un llamáu "a la industria cultural d'esti país pa que denuncie y actúe contra esta tomadura de pelo, que paez que mete de capitón a TPA nel modelu de Canal 9. Nun fai falta recordar cómo acabó esta canal. Y ye que nun se nos pue presentar como dalgo normal que la televisión pública collabore con una artista que representa lo más rancio de la música española y que podría tar a puntu d’entrar na cárcel, mentes dexa de llau les muestres más importantes, nueves y actives de la cultura asturiana".                                                                     Fonte: Asturnews

Romería de Primavera en Ciañu

Llangréu celebra la tercer Romería de Primavera en Ciañu L’Ayuntamientu de Llangréu, en collaboración cola Asociación de Vecinos S. Antonio de Ciañu, la Escuela de Música Tradicional del AMPA del Conservatoriu Valle del Nalón y les agrupaciones corales José León Delestal y Santa Apolonia organicen esta tercer fiesta de primavera que va tener llugar en Ciañu mañana sábadu 2 de xunu y el domingu 3 de xunu. La Romería presenta una montonera actos que, dende la nueche’l sábadu, van llevar folixa y cultura tradicional per tol distritu llangreanu de Ciañu. El sábadu a les 21:00 hores va tener llugar l’empiezu’l tercer certame Cantando pelos chigres cola entrega llibros de canciones y la puesta en marcha de les rondes de cantares pelos chigres de Ciañu con pareyes de gaita y tambor, coros y artistes locales. Yá’l domingu, a les 11:00h. va haber Diana floriada con gaita y tambor, desfile de Xigantes y Cabezudos y disparu de morteros. Dempués, a les 13:30 va tener llugar la segunda parte del certame Cantando pelos chigres, cola entrega llibros de cantares y ronda pelos chigres de Ciañu. Yá de tarde, a les 17:00h, el parque de Ciañu va ser escenariu de la III ROMERÍA DE PRIMAVERA con actividaes pa tolos públicos: xuegos y deportes tradicionales, hinchables pa neños y neñes y actuaciones de bandines y pareyes de gaita y tambor. A les 18:00 hores, nel quioscu’l parque va tener llugar un gran conciertu a cargu de los alumnos y alumnes de la Escuela de Música Tradicional "Llangréu" y los sos profesores amás de Carlos Ronderos, Justino González, Xuan Nel Expósito y les agrupaciones corales José León Delestal y Santa Apolonia de Pañeda. Too esto con escenariu llibre y pipa de sidra. Fonte: Asturnews.