L'ALLA propón al Gobiernu amosar cola TPA'l so compromisu col asturianu

DAMIÁN BARREIRO. UVIÉU - Ana Cano, presidenta de l'Academia de la Llingua Asturiana (ALLA), afirmó que'l Gobiernu nuevu d'Asturies pue amosar el so compromisu cola normalización llingüística al traviés de la presencia del nuesu idioma nos medios de comunicación publicos, «por exemplu, nos informativos, dalgo pa lo que yá hai xente preparao». La presidenta de l'ALLA dixo que la institución nun taba satisfecha «de nenguna manera» cola presencia del idioma na RTPA y indicó qu'esta tendría que ser mayor, «como amuesen tolos estudios sociollingüísticos y l'audiencia de los programes n'asturianu, que ta perriba de los que s'emiten en castellanu». Otra manera, apuntó que los espacios nel nuesu idioma nun tienen que quedar na cultura, el folclor o la propia llingua, «que ye lo que de momentu ta faciéndose».

La máxima dirixente de l'Academia dixo estes palabres esti 22 de xunetu na sé de la institución, onde l'Academia presentó un exemplar nuevu de los sos Cartafueyos normativos, concretamente'l dedicáu al léxicu de los medios de comunicación. Con estes propuestes normatives, la institución quier fixar la espresión n'asturianu de los términos más usaos nos medios de comunicación, como son la tipoloxía, la organización y les estructures de funcionamientu d'estos medios, y, per otru, del léxicu xeneral de la prensa, radio y televisión. Amás, esti testu ufierta propuestes d'espresión y llocución pal so emplegu nos contestos periodísticos y informativos.

Otra manera, preguntada pol organigrama que tendría que tener la política llingüística dientro del Gobiernu nuevu d'Álvarez-Cascos, Ana Cano dixo que lo importante nun yera si esto diba concretase al traviés d'una Dirección Xeneral o una Oficina: «Lo importante ye la política llingüística que desenrrolle la propia Conseyería de Cultura y qu'esta sía seria, amañosa, programada a mediu y curtiu plazu, que tenga oxetivos, fases y presupuestos. Y, amás, qu'haya un balance de los resultaos».

Na rueda de prensa de presentación del Cartafueyu normativu nuevu tamién compareció l'académicu Xosé Antón González Riaño, que señaló que la presencia del asturianu na TPA dientro del procesu de normalización ye dalgo «mui simbólico y importante». Asina, señaló que si de verdá hai voluntá de facer una política llingüística seria, «la TPA tendría que tener un informativu diariu n'asturianu. Cuando esi pasu se dea, el compromisu va ser creyible». L'académicu tamién señaló que yera necesario la xeneralización de la ufierta educativa d'asturianu nos centros privaos y concertaos y la reconocencia de la especialidá pal profesoráu.

Fonte: Les Noticies

Nuevu Cartafueyu Normativu dedicáu a los medios de comunicación

Ente les novedaes bibliográfiques de l’Academia de la Llingua Asturiana anunciaes pa 2011 pola so presidenta, Ana Cano, van tar nos meses vinientes dos de los sos proyectos de Cartafueyos Normativos y cartafueyos del Centru de Terminoloxía d’Asturies (TERMAST), el “Léxicu de los medios de comunicación: Prensa, Radio y TV”, iguáu y preparáu yá pa la imprenta, que l’ALLA espera poder ufrir bien llueu como númberu 7 de Cartafueyos Normativos, y que sigue al dedicáu a “Nomes de los países del mundu y de les sos capitales y xentilicios”, asoleyáu en 2010.

Según anunció Cano esti nuevu cartafueyu xébrase en dos estayes. La primera refierse propiamente al léxicu de la prensa, de la radio y de la TV, abarcando apartaos como la tipoloxía de la prensa escrita, la organización y funcionamientu del periódicu, la so estructura interna ya esterna, el léxicu xeneral del periódicu; la tipoloxía de les emisores y de la programación radiofónica, la organización y funcionamientu de la radio, el léxicu xeneral de la radio; la tipoloxía de les canales y de la programación de TV, la organización y funcionamientu de la TV o’l léxicu xeneral de la TV. Na segunda estaya úfrense les propuestes d’espresión y llocución nos medios de comunicación.

Amás, dientro del proyeutu Termast, centru encargáu de la coordinación xeneral de les xeres terminolóxiques venceyaes a la llingua asturiana, a lo llargo d’esti añu amestáronse la Terminoloxía Física y la Terminoloxía Postal (a les estayes yá esistentes sobro Terminoloxía Médica, Terminoloxía Matemática, Terminoloxía Xurídica y Alministrativa y Términos básicos d’Economía y Empresa) y bien llueu podremos axuntar otres dos más, la Terminoloxía del Ámbitu Educativu y los Términos Básicos de la Música, que yá tán a puntu apaecer.

La presidenta fizo un brinde “a tolos especialistes en terminoloxía d’un campu específicu del saber pa que collaboren con nós y mos faigan llegar les sos propuestes”, col compromisu pela parte de l’ALLA, de “llueu de la necesaria pero rápida revisión, inxertales en TERMAST y poneles a disposición de los usuarios na rede”. Cano recordó que “sedrán los propios usuarios los qu’aconseyen col so usu o refugu’l que pasen o non a inxerise na normativa académica”.

Fonte: Asturnews