Planteguen integrar l'asturianu l'inglés y l'español nel currículu escolar

El direutor de la Ikastola Hegoalde plantega un programa integráu d'asturianu, inglés y español nel currículu escolar.
Afita que nel País Vascu y Navarra los alumnos que más competencies tienen en castellanu son los de los modelos plurillingües

El direutor de la Ikastola Hegoalde de Pamplona, Aitor Etxarte, ponente nes xornaes 'Llingua y Educación' que güei y mañana celébrense en Xixón entamaes pol sindicatu Suatea, apostó güei por un "programa integráu" d'asturianu, castellanu y inglés sometíu a una planificación conxunta nel currículu escolar de los centros asturianos. Punxo como exemplu'l País Vascu y Navarra, onde, según la so versión, los alumnos qu'estudien estos modelos plurillingües son los que meyores competencies educatives tienen, fasta en llingua española.
Etxarte ofreció güei una conferencia sobre esti tema nel marcu de les xornaes, que se celebren nel Centru Cultural El Llanu.
Etxarte sofita'l modelu de "un programa integráu de llingües". "Allá hai trés llingües curriculares, eusquera, español y inglés, y nos últimos 30 años tuvieron desarrollu didáutivos bien distintos", afirmó. "Nestos momentos", añadió, "ye cada vez más l'enclín qu'esiste per parte de coleutivos docentes y na lliteratura profesional a entender que tol trabayu que tien que ver coles competencies comunicatives tien que ser frutu d'una planificación profesional rigorosa". Nesti sen reconoció que "la esperiencia dizmos qu'en cada colexu entámase'l currículu de les llingües de forma independiente, non condicionada, non vinculada, y eso ye un auténticu despropósitu dende'l puntu devista de la comunicación llingüística", señaló, matizando que ye un problema xeneral, y non yá del País Vascu y Navarra.
"Ye una realidá que se plantegó nos llugares onde la educación plurillingüe foi importante, como en Quebec, Bélxica o norte d'Europa, y na comunidá falante vasca hai una gran esperiencia, hai propuestes bien avanzaes reconocíes a nivel internacional", añadió. Según Etxarte, "si equí hai trés llingües con presencia escolar, l'asturianu, l'español, l'inglés, tienen que plantegase d'una manera conxunta en tol desarrollu del currículu escolar".
El proyeutu que desendolcaron na Ikastola Hegoalde, según Exarte, consiste en que "toles situaciones con procesos comunicativos nel ámbitu escolar redúcense a un perfil de testu reconocible y qu'esos testos plániense de manera asemeyada en caúna de les trés llingües".

Meyor nos programes plurillingües
Según Etxarte, "la esperiencia internacional rescampla, y en toles evaluaciones Pissa. En tolos programes nos qu'hai esperiencies plurilingües los resultaos escolares tienden a ser meyores qu'onde nun lo son". "En toles evaluaciones diagnóstiques que nesti momentu d'una manera obligatoria se faen en toa España, les posiciones tán contrastaes y demuestren que en Navarra y País Vascu los meyores resultaos danlos los alumnos que tán en modelu d'inmersión llingüística, o seya que l'asuntu ta mui claru", añedió.
El direutor esplicó que "tamién asocede nos controles de competencia en llingua española". "Falen y escriben meyor en llingua española que los que namás estudien en llingua española", acabó.

Fonte: Europa Press

Analicen l'usu del asturianu como llingua vehicular nel enseñu

La potencial utilización del asturianu como llingua vehicular nel enseñu, en cuenta de como una asignatura, será ún de los temes a tratar nes segundes Xornaes 'Llingua y Educación' de SUATEA.
Asina lo esplicó güei Xosé Luis Colodrón, responsable de la Secretaría de Llingua del Sindicatu y ún de los organizadores de les Xornaes, que'l sindicatu d'enseñu Suatea va entamar mañana y pasao nel Centru Cultural El Llano de Xixón. Pa Colondrón, n'Asturies esiste personal y medios enforma como pa dar esti usu docente a la llingua asturiana.

Una de les charres programaes sedrá la de mañana, a les 16.30, a cargu d'Aitor Etxarte Berezibar, direutor de la Ikastola Hegoalde, de Pamplona. Colodrón esplicó que nesti centru de Navarra, "conviven l'eusquera, el castellán y l'inglés, polo qu'Etxarte va esplicar cómo conviven, la xeneral del Estáu, la minoritaria y la llingua de comunicación más internacional". "Vamos ver cómo faen esa planificación porque equí la nuesa llingua ta tratada como una estranxera, con una carga horaria ínfima, con una carga horaria pequeña, y ensin una utilización vehicular", criticó. "Nun ta utilizada como una llingua de comunicación y d'instrucción, sinón sólo pa la propia llingua y pa les actividaes rellacionaes cola propia llingua", añadió. Entrugáu por Europa Press si ve factible que n'Asturies se llegue a usar l'asturianu como llingua vehicular na enseñanza, retrucó que sí. "Ye ún de los nuesos oxetivos. Puxamos pa que l'asturianu s'emplegue como llingua vehicular. Agora mesmo tropiézase cola voluntariedá. Los padres del alumnáu tienen drechu a elixir la llingua que quieran, pero nun se promociona l'asturianu nel sen d'introducilu nel currículu". comentó. Pa ello reivindicó que l'asturianu "tien que tar presente nel currículu en toles etapes y niveles". "Alministrativamente sí ye posible, porque esiste material, esisten competencies y esiste profesoráu. Hai 180 profesores que lu dan mayoritariamente en precario, porque son interinos, pero que son personal cualificáu". Nesti sen, consideró mui importante tamién la reconocencia de la especialidá docente de llingua asturiana. Dientro del programa d'actividaes tamién ocupará un llugar importante'l taller Edubuntu, a cargu de l'asociación Softastur, que presentará'l nuevu sistema operativu GNU/Linus aplicáu al enseñu pal profesoráu de secundaria y de primaria.

Nes xornaes amás habrá charres esplicatives sobre los planes d'estudiu de llingua na Escuela de Maxisteriu y na Facultá de filoloxía, a cargu de los profesores Xosé Antón González Riaño y Xulio Viejo Fernández, y sobre les diferentes esperiencies docentes. A lo último presentaránse los nuevos llibros y materiales tanto pa los niveles de primaria como pa los de secundaria.

Fonte: Asturies.com

II Xornaes Llingua Asturiana y Educación

El sindicatu SUATEA presentó les II Xornaes Llingua Asturiana y Educación, que se van cellebrar ente'l 19 y el 20 de marzu nel Centru Cultural El Llano de Xixón. El cursu ta dirixíu a profesoráu de Primaria y Secundaria y el plazu p'apuntase ta abiertu fasta'l 15 de marzu.

Los asuntos que se van tratar nestes xornaes son l'estatus nuevu que garró la Llingua Asturiana na Universidá, en cuantes que mención en Maxisteriu y minor en Filoloxía; el tratamientu integráu de les llingües na escuela; los recursos web qu'existen pa la enseñanza del asturianu; les esperiencies na clas de Gallego-asturianu; los planes llingüísticos nos centros; y el material didáuticu existente pa impartir l'asignatura. Amás, va dase un taller d'Edubuntu sobre'l sistema operativu GNU/Linux pal enseñu.

De toes estes cuestiones van falar Aitor Etxarte Berezibar, direutor d’Hegoalde Ikastola de Pamplona; Nel Caldevilla y Xulio Berros, profesores d’institutu; Xosé Antón González Riaño, profesor de la facultá Ciencies de la Educación de la Universidá d’Uviéu y académicu de l’ALLA; Xulio Viejo Fernández, profesor de la facultá Filoloxía de la Universidá d’Uviéu; Aurora Bermúdez, mayestra na escuela de Tapia; Berto Cobreros Gil, profesor d’institutu; Nacho Fonseca, mayestru de Primaria; el Coleutivu Softastur; y Paz Fonticiella y Concha Prieto, profesores de Llingua Asturiana d’institutu.

Los oxetivos d'estes segundes xornaes qu'entama SUATEA son normalizar y facer visible l'usu de la llingua asturiana y el gallego-asturianu ente l'afiliación del sindicatu y la comunidá educativa en xeneral; creyar un espaciu cotidianu visible y al algame de la comunidá educativa y la docencia onde la llingua asturiana y el gallego-asturianu tean presentes; potenciar actitúes positives de la comunidá educativa hacia la llingua asturiana y el gallego-asturianu; valtar prexuicios y facer ver que son una canal de comunicación amañosa nel ámbitu educativu; animar a la reflexón y el contraste de proyectos, conteníos, métodos y actividaes rellacionaes cola enseñanza de la nuesa llingua; ya intercambiar conocimientos y esperiencies con otres comunidaes con llingua propia p'ameyorar la nuestra aición educativa nesta estaya.

Fonte: Les Noticies