El miércoles fállase’l Premiu al Pueblu Exemplar de la FPA

Premiu Princesa d'Asturies al Pueblu Exemplar

   Esti próximu miércoles, 9 de setiembre, va celebrase nel Hotel Reconquista d’Uviéu la xunta del xuráu encargáu de conceder el Premiu al Pueblu Exemplar d’Asturies 2015 na so ventiavu sesta edición.

   Los miembros del xuráu van empecipiar les deliberaciones a les 9.30 hores, darréu dempués de la semeya de familia, y van faer públicu’l fallu a les 14.00 hores nel mesmu hotel (Patiu de los Gatos).

   El Premiu al Pueblu Exemplar d’Asturies constituyóse a lo llargo de les sos ediciones nuna de les iniciatives de la Fundación de más amplia y meyor acoyida dientro del Principáu, al tar destináu a galardonar “al pueblu, aldega, núcleu de población, espaciu paisaxísticu o grupu humanu del Principáu d’Asturies que destacara de manera notable na defensa y caltenimientu de la so redolada natural, ambiental, del so patrimoniu históricu, cultural o artísticu, n’iniciatives d’impulsu económicu y social o na realización d’obres comunales o otres manifestaciones de solidaridad sobresalientes”. Fonte: asturnews.com

La Fundación Príncipe de Asturias usa l'asturianu y l'eonaviego na convocatoria a Pueblu Exemplar

   El reglamentu del Premiu al Pueblu Exemplar, qu’entama la Fundación Príncipe de Asturias, espublizóse n’asturianu y gallego-asturiano, amás d’en castellanu. Ésta ye la primer vez que la entidá utiliza les trés llingües que se falen nel país.

   El Serviciu de Política Llingüística collaboró cola Fundación pa tornar esti reglamentu tanto a l’asturianu como a la fala, fechu que destaquen dende la propia organización nuna nota de prensa. D’esta forma, les poblaciones interesaes n’algamar esti gallardón con repercusión a nivel estatal y una recompensa económica de 25.000 euros van poder consultar les bases del premiu y presentar la candidatura na llingua propia de la so zona.

Teberga, Pueblu Exemplar d'Asturies 2013

En concreto, pueden aspirar al XXV Premiu al Pueblu Exemplar d’Asturies el “pueblu, aldea, nucleu de población, espaciu paisaxísticu o grupu humanu del Principáu d’Asturies que destacara de mou notable na defensa y conservación del so entornu natural, ambiental, del so patrimoniu históricu, cultural o artísticu, o tamién na realización d’obres comunales u otres manifestaciones de solidaridá sobresalientes”. El plazu de presentación de candidatures p’asoceder nel palmarés del gallardón a la comunidá vecinal de Teberga fina’l 7 d’agostu.   Fonte:  Asturies.com