CaleyAvilés 2017 dobla’l númberu de visites guiaes n’asturianu pel conceyu

Cartelu CaleyAvilés 2017

 La Estaya de la Llingua d’Avilés entama la segunda edición de CaleyAvilés, actividá consistente en visites guiaes n’asturianu a dellos puntos del conceyu. Esti xueves va tener llugar la primera: percorríu pel cascu históricu comenzando per Sabugo, pela mañana, y pel Muséu de la Historia Urbana d'Avilés, pela tarde.

 L’ésitu de CaleyaAvilés l’añu pasáu llevó al serviciu de normalización llingüística a organizar el doble de visites nesta ocasión, toes elles de baldre previa inscripción nel númberu de teléfono 985.54.55.08 o nel corréu electrónicu estayallingua@ayto-aviles.es, yá que el númberu de places ta llendáu a 25 en cada salida. La Estaya de la Llingua recomienda emplegar calzáu cómodu en toes elles.

 Concidiendo col Día de los Museos, esti xueves va tener llugar la primer salida, que va ser doble. Pela mañana, dende les 10 hores, los asistentes van poder percorrer el cascu históricu comenzando pel barriu de Sabugo, mentes que pela tarde, a les 18 hores, van poder visitar el Muséu de la Historia Urbana d’Avilés. Nesti casu, ye necesario apuntase nel corréu electrónicu museodeaviles@ayto-aviles.es o nel teléfonu 985.56.55.12.

 En mayu va haber otra actividá de CaleyaAvilés, el miércoles 24 dende les 16 hores, col Parque Ferrera como protagonista. En xunu la salida va ser el miércoles 21 (18 hores) nel Parque La Madalena, y en xunetu’l vienres 21 (18 hores) pel cascu históricu. Va zarrar la edición d’esti añu una visita al Barriu de Llaranes, que va tener llugar el 21 d’agostu (18 hores).

Interés en toda Asturies

 CaleyaAvilés tuvo orixe na iniciativa del 2015 d’una visita guiada n’asturianu Parque Ferrera, a la que siguió otra en mayu del 2016 al Muséu de la Historia Urbana d’Avilés. Na primer edición la organización tuvo qu’ampliase el númberu de places en dalgunes salides dada la demanda, con presencia de persones d’otros conceyos del país, sobre manera d’Uviéu y Xixón, qu’asina pudieron conocer meyor, y na llingua llariega, la historia y los requexos del Conceyu d’Avilés.                                                                                        Fonte: asturies.com

‘Nora’ protagoniza una actividá nueva de La Reciella de La Factoría

Espaciu Escénicu de la Factoría Cultural d’Avilés

 Factoría Norte representa esti vienres n’Avilés la obra de teatru ‘Nora’. Trátase d’una actividá nueva del ciclu La Reciella de La Factoría, entamáu pola Estaya de la Llingua en collaboración con ‘Reciella. Families pol Asturianu’, que programa cuatro sesiones.

 ‘Nora’, Premiu Oh! de les Artes Escéniques d’Asturies 2013 a la Meyor Banda Sonora, la Meyor Escenografía y al Meyor Espectáculu Infantil, ta interpretáu por Ana Morán y cuenta col acompañamientu musical de David Varela y l’animación de Juan Hernaz. Cuenta la historia de “una neña mui especial”, Nora, escrita por Fátima Fernández, nuna sablera al traviés de marionetes, música y imáxenes.

 La representación de la obra del grupu de teatru xixonés va tener llugar mañana, a les 19 hores, nel Espaciu Escénicu de la Factoría Cultural d’Avilés, con entrada llibre hasta completar aforu. La de ‘Nora’ ye la segunda de les cuatro previstes en La Reciella de La Factoría qu’inauguró’l pasáu 3 de febreru la Compañía Olga Cuervo con ‘Yérase que se yera’ y que va siguir el 28 d’abril con ‘Montesín’ (Kamante Teatru) y el 19 de mayu con ‘La bruxa Llara’ (Factoría Norte).                                                                  Fonte: asturies.com

La Estaya de la Llingua d’Avilés entama talleres pa la reciella sobre indumentaria tradicional

Cartelu de "Traxinando n'Avilés"

 El vienres va celebrase’l primer de los talleres ‘Traxinando n’Avilés’ sobre indumentaria tradicional a cargu de Susana Sela previstos estos meses. La Estaya de la Llingua entama esta iniciativa de baldre pa neños y neñes de 5 a 10 años.

 La escritora, poeta y investigadora na etnografía asturiana va averar a la reciella los traxes del país al traviés de les histories d’Oneta, una neña con muncho que contar. Va ser mientres les dos hores de llargor del taller (de 17.30 a 19.30) que va tener como sede en primer llugar la Biblioteca de La Xungarosa esti vienres.

 La segunda oportunidá pa participar en ‘Traxinando n’Avilés’ va ser na Biblioteca de La Carriona, el 28 d’abril, mentes que la tercera y última, el 26 de mayu na Biblioteca de Los Canapés. El númberu máximo de places por taller ye de 20 persones, polo que ye necesario acutar plaza de manera previa nes biblioteques que son sede de la iniciativa.
Fonte: asturies.com