Xurde Álvarez nos talleres de llectura n'asturianu de Nava

Esti xueves a les 19:00

 Los alcuentros col autor de los talleres de llectura n’asturianu de Nava, qu’entama’l Serviciu de Normalización Llingüística de la Comarca de la Sidra, acueyen esti próximu xueves, 16 d'abril, a les 19:00 hores, na sala Marta Portal de la Casa la Cultura de Nava, al escritor llangreán Xurde Álvarez, que falará nesta ocasión al rodiu de la so novela cabera Si’l temblor niega’l fríu.

 Esti trabayu ta ambientáu nun psiquiátricu alemán en tiempos del nazismu. Xurde Álvarez (Sama, 1973) ye poeta, narrador y autor de testos teatrales. Tien editao, aparte d’esta última novela, los poemarios  La sema (1999),  Tierra d’esperanza y La caída, nel añu 2008; la novela  No fondero de l’alcordanza de Dios (2004) y la obra dramática  Les llames del to llar antiguu (2005).
Fonte: Infoasturies.net

Cursu d'asturianu en Nava

Cartelu del Cursín d'Asturianu de 30 hores, en Nava

Tendrá entamu'l 12 de xineru

   El Serviciu de Normalización Llingüística de la Comarca de la Sidra, en collaboración cola Conceyalía de Cultura del conceyu de Nava, ta acabante d'abrir el plazu pa un nuevu cursu de llingua asturiana de nivel inicial. El cursu impartiráse llunes y miércoles, de 17:30 a 19:00 hores nel Antiguu Telecentru (cai Luis Armiñán) dende'l 12 de xineru al 18 de marzu de 2015.

   Trataranse temes d'historia y socioloxía de la llingua asturiana, normes ortográfiques básiques, meyora de lésicu, sintaxis y morfoloxía, amás de cultura actual fecha n'asturianu. Los interesaos pueden apuntase, hasta'l propiu 12 de xineru, poniéndose en contactu col Serviciu de Normalización Llingüística de la Comarca de la Sidra, bien per mail, empobinándose a normastur@lacomarcadelasidra.com, bien pel teléfonu 985718413 (Pablo, SNLL), llamando de llunes a xueves ente les 9:00 y les 15:30 hores.                                              Fonte: Infoasturies.net