L’Antiguu Institutu acoyó la presentación del VI Premiu Fierro Botas, ‘L’espeyu onde miranos’, “un llibru imprescindible”, según Carlos Rubiera. El so autor, Damián Barreiro, aprovechó l’actu pa defender el periodismu n’asturianu.
Na semeya Prieto, Barreiro, Rubiera y Riesgo sosteniendo'l llibru premiáu
El periodista avilesín nacíu n’A Estrada finó ayeri la so intervención felicitando a Beatriz Redondo Viado, ganadora del XIX Premiu Máximo Fuertes Acevedo d’ensayu por ‘Yá cuasi nunca lo facemos por amor. Conciencies mercenaries’ y llanzando un mensaxe sobre’l papel importante que xuega y pue llegar a xugar el trabayu periodísticu na llingua del país. “Los dos trabayamos na mesma redaición del desapaecíu selmanariu ‘Les Noticies’, y los dos, na mesma selmana, ganamos los dos únicos premios d’ensayu n’asturianu. Amás, dambos con un trabayu sobre medios de comunicación: medios y poder, ella; televisiones y llingües, yo. Paezme qu’estos dos premios puen valir como metáfora, si daquién d’arriba lo quier llegar a ver, de lo que somos capaces de facer los periodistes que trabayamos n’asturianu si ye que nos dexen y si ye qu’hai apoyu”, reclamó.
Enantes, el restu de la mesa conformada por Carlos Rubiera, conceyal d’Educación, Cultura, Xuventú y Fiestes; Xosé Nel Riesgo, direutor de la Fundación Municipal de Cultura, Educación y Universidá Popular; y Esther Prieto, copropietaria d’Ediciones Trabe –qu’espubliza’l llibru–, tomara la pallabra pa emponderar el trabayu desendolcáu por Barreiro con ‘L’espeyu onde miranos: televisiones de proximidá n’Europa Occidental y procesos de recuperación identitaria’. “Ye un llibru absolutamente imprescindible, fundamental nel análisis que los medios de comunicación, y más en concreto del papel que les televisiones tienen que xugar na recuperación de la identidá cultural y llingüística d’Asturies”, afirmó Rubiera, que considera como gran aportación del ensayu de Barreiro la comparación del casu asturianu coles de toles televisiones de proximidá vinculaes a otres zones europees o países con identidá cultural y llingüística propies.
D’igual, forma el responsable de Cultura del Conceyu de Xixón apuntó que’l llibru merecedor del VI Premiu d’Ensayu y Trabayos d’Investigación Fierro Botas “tien que conocelu non sólo les persones interesaes nos medios de comunicación pola so profesión, sinón tamién los qu’ocupen cargos institucionales que, d’una u otra forma, tengan que ver con estes problemátiques; per un llau, de los medios de comunicación y, pel otru, les cuestiones culturales y llingüístiques d’Asturies”. Pela so parte, Riesgo señaló que la llectura del trabayu de Barreiro foi “una prestosísima sorpresa” y centróse na importancia del Fierro Botas, “que se consolida cada añu cola calidá” de les obres de los autores premiaos que, “en tolos casos, usen l’asturianu como llingua habitual”.
Como un “premiu fundamental” tamién catalogó Prieto al Fierro Botas, destacando darréu la temática escoyida por Barreiro pal so trabayu. “Si Asturies fora un país normal, les instituciones y persones de les que dependen los medios de comunicación públicos lleeríen esti ensayu y tomaríen nota d’él. Lo más fácil ye que nun sía asina”, añadió la copropietaria de la editorial uviedina, qu’incorpora esti títulu a la coleición ‘Batura’. Ésta nació de la mano d’Antón García nel añu 2005 “pa da-y un marcu al ensayu n’asturianu, que yera probablemente’l pegollu de la lliteratura n’asturianu que faltaba, quiciabes xunto col teatru”, garrando esti términu occidental “porque quería ser l’espaciu del ensayu” nel nuesu idioma. Col títulu de Barreiro, yá suma 22 nestos nueve años.
La importancia de les televisiones de proximidá
Na so intervención, l’ex redautor d’Asturies.com apuntó que’l so trabayu, pese a que lu escribió nel 2013 tres seis meses de llabor, espublizóse nel 2014, cuando se cumplen “50 años de la llegada de la televisión n’Asturies; 40 dende que s’empezó a emitir ‘Panorama Regional’, primer espaciu de la televisión asturiana; y 30 del nacimientu de la televisión n’asturianu, precisamente presentada por Carlos Rubiera”. Nun faltaron tampoco los agradecimientos a Trabe pola edición de ‘L’espeyu onde miranos’ “y por demostrar día a día que l’asturianu, amás del padrimoniu cultural más importante que tenemos n’Asturies tamién ye una fonte de trabayu y una de fonte ganancies; qu’amuesa que se pue vivir n’asturianu y, como dicía Gustavo Bueno, ‘vivir del bable’”, apuntó en chancia Barreiro.
Darréu, l’avilesín fixo llectura d’un testu remocicáu que, de primeres, diba a formar parte del llibru, y qu’empondera’l llabor de les televisiones de proximidá, poniendo l’exemplu de la TVG col tráxicu accidente ferroviariu de Santiago de Compostela del añu pasáu. Ye’l siguiente:
Actualmente, parez que’l periodismu y los periodistes nun son necesarios. Los medios de comunicación son difíciles de mantener y nun tiempu de crisis hai otres prioridaes. Sicasí, la TVG dio una lleción al restu del Estáu español y demostró lo necesarios que son los medios de comunicación locales. El 24 de xunetu del 2013, xustamente 28 años depués del so nacimientu, la cadena preparábase pa celebrar la viéspera del Día de Galicia cola tradicional retresmisión d’una gala musical y de los fuegos del Apóstol. Pa too ello, contaben con un operativu técnicu y humanu desplazáu a dellos puntos de Santiago de Compostela. Sicasí, una hora enantes d’empezar la programación especial, un tren que facía’l trayectu Madrid-Ferrol escarrilaba pocos quilómetros enantes de llegar a la capital gallega. En pocos minutos, y depués de decatase de la magnitú de la traxedia, los responsables de TVG suspendieron la programación y reorganizaron l’operativu al serviciu de la información. Anque les noticies yeren confuses –nun se sabíen les causes del accidente- y el númberu de fallecíos nun paraba de medrar, TVG tuvo en directo más de tres hores y pudo facilitar tola información que tuvo nes sos manes. Mesmamente, informó de la necesidá de donar sangre y en pocos minutos los centros médicos viéronse superaos poles persones qu’acudieron al llamáu.
Mentanto, TVE, la televisión pública de tolos españoles, nun informó hasta dos hores depués de los fechos y al traviés de la so canal de noticies, 24H. Amás, al nun disponer d’imáxenes usó les d’un accidente del 2003. Too ello ensin avisar a l’audiencia de que lo que taba viendo nun yera l’actualidá. Otra manera, les cadenes privaes nun cortaron la so programación habitual hasta bien entrada la madrugada cuando CNN o BBC y yá ufrieran la noticia a nivel internacional. L’actitú de los medios estatales chocó cola de la pública gallega, qu’algamó un 44,4% d’audiencia y que tuvo qu’ufrur la so señal en directo al traviés de la so web al vese superada pola demanda del públicu del restu del Estáu, que conoció la noticia peles redes sociales y qu’acudió a la web énte’l silenciu del restu de televisiones.
Nun foi hasta’l día siguiente y depués de contabilizar 70 muertos –según pasaren les hores diben ser munchos más-, cuando les cadenes estatales centraron la so atención nel accidente. Sicasí, mentes TVG siguió ufriendo una información de cercanía y de serviciu públicu, les televisiones privaes incluyeron nos sos magazines matinales debates sobre los culpables del accidente y declaraciones de familiares destrozaos pola traxedia. Mesmamente, los tertulianos d’un conocíu programa líder na so franxa horaria quexáronse porque’l presidente de Galicia usara l’idioma de la so tierra nun mensaxe institucional dirixida al so pueblu y que foi retresmitíu per toles canales del Estáu. Según los tertulianos, Feijóo diera un mensaxe que yera d’interés pa tolos españoles, que, como non, nun teníen porque entender otra llingua que nun fora la suya. Lo que nun criticaron foi qu’un día enantes, la canal pa la que trabayen tardara cuatro hores en cortar la emisión d’un de los sos programes más vistos, Hay una carta para ti, pa ufrir la información sobre’l fechu qu’agora-yos parecía tan importante.
La situación mostró lo imprescindible que ye contar con medios públicos y periodistes independientes como terapia pa face-y frente a les desgracies colectives. Ente la falta d’información, les enquivocaciones y la falta de profesionalidá –mesmamente de profesionales-, una televisión de proximidá nuna llingua minoritaria mostró que los medios de comunicación cercanos al ciudadanu faen falta, muncha falta. Ye de reseñar el trabayu de los profesionales de la canal gallega, que nun taben n’activu nesi momentu pero que foron al so puestu p’asegurar que la TVG ufría’l meyor serviciu posible énte una situación d’emerxencia.
Énte esto, destaca la nula capacidá de reacción de TPA, que nun programó nengún informativu especial pa informar d'unes elecciones europees históriques o pa falar de que’l xefe del Estáu taba acabantes d’abdicar y que diba haber una reina d’orixe asturianu y una Princesa d’Asturies nueva –convirtiéndose asina na única televisión del Estáu español que nun varió la so programación pa informar de la noticia, dalgo que ye tovía más grave al tener en cuenta que ye una televisión pública-. Con too, naide llevantó la voz énte estos fechos. Hai que recordar les polémiques y critiques que surden toles navidaes cuando la televisión vasca anuncia que nun va emitir el mensaxe del xefe del Estáu-. L’audiencia da’l llombu a la so televisión, porque la so televisión da’l llombu a la so audiencia, dalgo que pon en peligru’l futuru de la mesma RTPA y de la mesma Asturies, porque un país ensin televisión ye un país ensin mirada propia, un país ensin voz. Quiero recordar les palabres de Xosé Luis Barreiro, exvicepresidente de la Xunta de Galicia y ganador del premiu d’Ensayu Xovellanos d’anguaño, nel so discursu del 24 de xunetu de 1985, cuando inauguró la emisión de TVG: “Si güei daquién nos pregunta que tamos faciendo equí, qu’a naide se-y ocurra dicir que tamos inaugurando la televisión. Afirmaremos altu y fuerte que tamos faciendo Galicia”.
Convocáu’l VII Fierro Botas
El Conceyu de Xixón ta acabante de convocar el VII Premiu d’Ensayu y Trabayos d’Investigación Fierro Botas, correspondiente al 2014, gallardón que tien como oxetivu recordar la figura del xesuita Federico González-Fierro Botas, espertu en llingua asturiana que finó n’accidente de tráficu en Rusia nel 2002, y reconocer el llabor de los investigadores asturianos na llingua del país. “Esti premiu empobínase a aquelles obres d’ensayu o trabayos d’investigación nos que se recueyan los siguientes ámbitos: investigación sobre la cultura asturiana; investigación sobre la cultura rusa o eslava; la memoria social y colectiva de los pueblos rusu y asturianu; la memoria social y colectiva de Xixón”, recen les bases.
El plazu pa presentar los trabayos fina’l 10 d’ochobre, tando previsto’l fallu pal 25 de payares. Nesta edición del gallardón caltiénse l’importe de la recompensa al ganador, de 3.000 euros, amás de la espublización del trabayu. Fonte: Asturies.com
