Muyeres y Lletres presentóse nel Auditoriu d’Uviéu

Dientro los actos d’esta Selmana les Lletres Asturianes dedicada a les muyeres, ayeri tuvo llugar l’alcuentru lliterariu “Muyeres y Lletres”, nel que lliteratura y música se xunieron pa reivindicar el llugar de les muyeres na llingua ya’l de la llingua nel país

 L’actu consistió nun rápidu y prestosu percorríu musicáu y dramatizáu pela obra de les muyeres escritores asturianes, cruciando cerca de 300 años dende Xosefa Xovellanos dica Claudia Elena Menéndez Fernández, la escritora más moza d’esta nuea antoloxía de muyeres escritores. La obra recueye retayos de 92 muyeres, -pente les que s`alcuentra la nuesa compañera de redaición Llucía Fernández Marqués- que pesi a toles torgues, decidieron escribir na so llingua llariega. Los actores Carla Loga y Nesto González, acompañaos al pianu por Amparo Antuña, punxeron voz y xeitu a los testos y los cancios d’Anabel Santiago aidaron enforma a crear l’ambiente respigáu col que s’acoyeron les pallabres.

                                       

 Na so intervención destacaba Esther Prieto la condición de marxinalidá múltiple qu’acueye a esti coleutivu, como muyeres, como escritores, como asturianes y como asturfalantes. Pel so llau, Marisa López fexo una prestosa comparanza de la llingua col camín qu’anda un pueblu. “Cuenta d’aú vien, señala p’aú va, marca caún de los sos pasos”. Vanesa Gutierrez apurrió coles sos pallabres otru interesante camientu, y ye que pesi a reconocer lo necesario d’estes iniciatives que recueyan la obra femenina, ya hai ganes de que dexen de ser precises y les escritores nagüen por tener el llugar que merecen por si mesmes pa “dexar de sentise una cuota”.

 Esta  Antoloxía, cola que se cellebra el 38 Díi de les Lletres Asturianes, puede alcontrase en llibreríes de magar la so presentación nel Cientru Asturianu de Madrid el pasáu 27 d’Abril y repártese de baldre a tolos que merquen un exemplar de cualesquier llibru escritu n’asturianu demientres esta selmana.                                                Fonte: infoasturies.com

Congresu Cultura Asturiana Mozo nel Auditoriu d'Uviéu

Sánchez Vicente: “Tolos ponentes del Congresu tienen una mui bona disposición; hai munchu enfotu”

   L’Auditoriu d’Uviéu va ser sede esti sábadu del Congresu Cultura Asturiana Mozo. Más de venti ponentes van tomar parte nuna iniciativa na que tol mundu ta poniendo “una mui bona disposición”, afirma Xuan Xosé Sánchez Vicente.

   Fundación Nueva Asturies y l’Asociación Cultural L’Arribada son les organizaciones qu’impulsen esti congresu que coordina un bon piñu de xente especialista en caúna de les estayes nes que se divide. “L’oxetivu ye treslladar a la opinión pública qu’esiste una bona cantidá de xente que trabaya nel mundu de la cultura asturiana, conocer la visión de futuru de los rapazos que participen nel Congresu y propiciar un poco d’ánimu ente ellos”, resume Sánchez Vicente, que va encargase d’inaugurar l’eventu en nome de la organización xunto a Ana Fueyo, direutora de Política Llingüística, en representación del Gobiernu. La conseyera Ana González torna a dar asina’l llombu a un actu que tien que ver cola llingua del país. Tamién taba convidáu l’alcalde d’Uviéu, Agustín Iglesias Caunedo, pero dende la Casa Conceyu tovía nun se confirmó l’asistencia del primer edil o de dalgún representante del gobiernu municipal.

   La inauguración va tener llugar a les 11 hores, pa depués dar pasu a les ponencies diverses previstes. Dende l’avance del programa, conocíu’l llunes, hai delles novedaes. Asina, confirmóse la participación de Claudio López Ardura (Banda de Gaitas El Penedón de Castropol), que va falar de ‘La Escuela d’Asturianía’, y de Miguel Álvarez Solares (Banda de Gaitas La Reina del Truébano), que va tratar del ‘Pasao, presente y futuro das bandas de gaitas nel occidente d’Asturias’, amás de Javier Cubero (Ciencies Polítiques), Iván Cuevas (Filoloxía) y Llorián García (Musicoloxía). Mentes, na estaya de Lliteratura va intervenir Laura Marcos, que sustitúi a Sofía Castañón.

   “Tolos ponentes del Congresu tienen una mui bona disposición; hai munchu enfotu”, asegura Sánchez Vicente, qu’espera una bona asistencia de públicu y que’l Congresu tenga continuidá n’años próximos. La entrada al Auditoriu d’Uviéu ye llibre y la idea ye que los presentes participen nos alderiques que van siguir a caúna de les trés estayes previstes.

Fonte.  Asturnews.