Andecha Astur pide la intervención de l'Academia de la Llingua Asturiana na polémica alrodiu de la denominación “Faba”

  L'intentu de privatizar el términu asturianu “faba” pa usu esclusivu d'una marca vieno xenerando estos díes una fonda polémica y supón" la espresión de la situación kafkiana de la falta d'oficialidá de la nuesa llingua nacional y l'absolutu despreciu del “Principado” escontra tolo asturiano" según asoleyaba esti dói nuna nota de prensa Andecha Astur. La organización política vieno acabante dirixise a l'Academia de la Llingua Asturiana pa que, "d'alcuerdu al so mandatu estatutariu, actúe en defensa de la llingua asturiana y de los drechos de los asturianofalantes, considerando que l'intentu per parte de la Conseyería de Sanidá y Consumu de privatizar l'usu del términu asturianu “faba” pa que namás puea ser utilizáu pa los productos d'esta marca de calidá costitúi una agresión a la llingua asturiana".

  Andecha Astur diz qu'al asturianu amenorgase-y "arbitrariamente'l campu semántico del términu, comu a la del conxuntu de los asturianu falantes que namás podríen utilizar esi términu refiriéndose a la faba controlada pola DO. Términu que per otru llau ye d'usu xeneralizáu en tol país y que costitúi una referencia identitaria d’Asturies y del Pueblu Asturianu".

  Dende Andecha Astur quieren esclariar que "de mena dala tase escontra les Denominaciones d'Orixe, de les qu'habría namás que dicir que lleguen con 20 años de retrasu, cuandu pasó'l so momentu álxidu y cuandu yá se tán replantegando en toa Europa, sinón que lo que se denuncia ye'l fechu de privatizar un términu asturianu pa usu esclusivu d'una marca, contra toa llóxica y sentíu común."

  Per otra parte, Andecha Astur atalanta qu'asemeyada situación solo puede dase pola situación predemocrática que se vive n’Asturies, onde la nuesa llingua non solo nun ye oficial, "sinón que sigue siendo oxetu de represión sistemática per parte de les istituciones, especialmente dende'l “Principado”, que con esta nueva agresión llingüística pon n’evidencia tantu’l so despreciu a tolo asturianu comu la so falta de xacíu!.                                                                    Fonte: Asturnews

El PAS pide esclariar si pue usase la pallabra "faba"

El Partíu Asturianista camienta que la prohibición del Principáu ye otru ataque escontra la llingua asturiana

  Tres de les noticies de que l'actuación de los téunicos de la Conseyería de Sanidá y Consumu crearon tracamundiu ente los comerciantes, que nun saben si tienen qu'esaniciar la palabra “faba” de los sos anuncios, si lo que vienden nun ye Faba con denominación asturiana, el PAS esixía esti día al gobiernu nun comunicáu qu'esclarie si prohibe usar la pallabra "faba", no que camienta ye otru ataque escontra la llingua asturiana.

  El PAS diz nun ignorar qu'esa restricción llingüística namái esiste nel sintagma “faba asturiana”, que ta acutáu pa la faba con denomación, "pero tarrez que l'escesu de celu de los funcionarios, la so mala interpretación del reglamentu o unes males esplicaciones llevaren a los comerciantes a entender que'l términu “faba” queda prohibíu p'anunciar cualesquier exemplar de faseolus".

  Pal PAS, na práctica, "esa interpretación confusa de la norma convirtióse nun ataque más a la llingua asturiana, forciando la sustitución de la palabra “faba” pola de “alubia”, lo que va acabar primiendo tamién l'usu na llingua falada".

  El PAS reclama a la Conseyería de Sanidá y Consumu qu'emita "una nota aclaratoria sobre l'usu del términu, tantu por razones comerciales, como por razones sociales y de proteición de la llingua asturiana".                                                                                                         Fonte: asturnews