XsP pide que’l Premiu Café Gijón permita la presentación d’obres n’asturianu

Recueyen el testigu d’Iniciativa pol Asturianu, que denunció la discriminación que supón pal idioma’l que nun se tenga en cuenta la llingua asturiana nesti premiu lliterariu.

Xixón Sí Puede (XsP) presentó un ruegu na Comisión de Bienestar Social, Cooperación, Cultura y Educación pa que se faiga la modificación precisa nes bases del Premiu Novela Café Gijón de 2017 o siguientes pa crear una categoría pa obres n’asturianu o que se permita la presentación d’obres nel idioma que les Ordenances d’Usu del Asturianu de Xixón recueyen como propiu. Amás, nel artículu 8 d’esta norma dizse que "l’Ayuntamientu va fomentar y promocionar l’usu del asturianu en tolos ámbitos de la vida social y nes diverses actividaes culturales, deportives, mercantiles y cualesquier otres" A la vez, nel Plan de Normalización Llingüística de Xixón 2016-2019 indícase que ún de los sos oxetivos ye “incluyir la perspectiva de normalización llingüística en toles aiciones, midíes, iniciatives y propuestes del Conceyu, independientemente de la Conceyalía o entidá que les lleve alantre”.

Ente eses propuestes del Conceyu, convién resaltar la relevancia del Premiu Novela Café Gijón. “Dende XsP recoyemos el testigu d’Iniciativa pol Asturianu que propón que na próxima edición y les socesives del Premiu Novela Café Gijón se reconoza l’asturianu n’igualdá de condiciones col castellanu. Pareznos mui importante y valiosa esta iniciativa, polo que esperamos que nel Ayuntamientu de Xixón se tenga en cuenta esta propuesta y se cuente col asturianu, patrimoniu de toos y toes”, señala Orlando Fernández Casanueva, conceyal de XsP.

El Premiu Novela Café Gijón vien entamándose dende l’Ayuntamientu dende 1989 y ta dotáu con 20.000 euros pa obres lliteraries en castellanu. A esta partida hai que sumar les de difusión de les bases, dietes del xuráu, prellectura y escoyeta d’obres y compra d’exemplares, lo que supón una inversión d’unos 30.000 euros nesti prestixosu premiu. “Lo suyo y de xusticia ye que la promoción de la cultura n’Asturies y en Xixón nun arrequexe a la llingua propia, l’asturianu, en situación de minorización. L’alministración municipal tien d’asumir la so responsabilidá pa la superviviencia d’un idioma qu’ensin l’apoyu decidíu de les instituciones cuerre’l pelligru de desapaecer. Ye’l nuesu patrimoniu y la nuesa responsabilidá”, caltién Fernández.

Al empar, tal como afirmaba Iniciativa pol Asturianu nel so comunicáu, “esta ye una midida de costu cero, yá que nun supondría añadir un mayor presupuestu del yá aplicáu, y que daría un importante prestixu a les obres lliteraries n’asturianu y que se convertiría nel premiu lliterariu al que puen presentase obres nesti idioma con una mayor dotación”. 

Fonte: YeXixón.com

Iniciativa pol Asturianu denuncia que'l Premiu Café Gijón de novela vuelve a nun permitir que se presenten obres n'asturianu

Iniciativa pol Asturianu denunció va un añu que'l Premiu de Novela Café Gijón, qu'organiza'l Conceyu de Xixón y tien una dotación de 20.000 euros, nun permite presentar obres n'asturianu. Un añu más, y magar la nuesa reivindicación, el concursu vuelve a nun permitir nes sos bases que se presenten obres n'asturianu, lo que ye ensin dulda una marxinación pal idioma y pa los y les escritores que se manden d'esti idioma.

Ye un drechu llingüísticu que la convocatoria seya también n’asturianu y reclamamos al Conceyu de Xixón que se faiga la modificación precisa nes bases pa que se cree una categoría pa obres n'asturianu o se permita la presentación d'obres nel idioma que les Ordenances d'Usu del Asturianu de Xixón recueyen como propiu. 

El Conceyu de Xixón tien un exemplu perbonu bien cerca, nel Conceyu de Villaviciosa, qu'esti añu pasáu, dempués de faer una convocatoria d'un concursu de rellatos namás pa obres en castellán y tres la nuesa quexa y propuesta, facía'l cambiu y convertíalu nun certame pa rellatos n'asturianu. 

Esta ye una midida de costu cero, yá que nun supondría añadir un mayor presupuestu del yá aplicáu, y que daría un importante prestixu a les obres lliteraries n'asturianu y que se convertiría nel premiu lliterariu al que puen presentase obres nesti idioma con una mayor dotación. 

Iniciativa pola Asturianu pide por otra vegada, tanto al equipu de gobiernu como a les fuercies presentes nel plenu qu'impulsen esta reforma y el Premiu Café Gijón seya una forma más de potenciar la creación lliteraria n'asturianu, y con ello, sofitar el procesu de normalización social del idioma, finando asina con esta discriminación que fai que dende va cuasi trenta años los autores nun puean presentar obres n'asturianu.

Fonte: Iniciativa pol Asturianu

Iniciativa pol Asturianu demanda que'l 'Premio de Novela Café Gijón' permita la participación d'obres n'asturianu

por Pablo R. Guardado

Coincidiendo cola Selmana de les Lletres Asturianes, Iniciativa pol Asturianu demanda al Conceyu de Xixón una modificación de les bases del 'Premio de Novela Cafe Gijón' pa que permita la participación de trabayos en llingua asturiana. "Daría un importante prestixu a les obres lliteraries n'asturianu", afirma.

El Conceyu de Xixón garró nel 1989 el testigu de la organización d'esti premiu de novela creáu nel 1949 por iniciativa de Fernando Fernán Gómez col nome tertulia que se reunía na cafetería madrilana que llevaba'l topónimu castellanu de la ciudá asturiana. D'esta forma nun morría esti gallardón lliterariu al que nesti 2016 l'ayuntamientu dedica 20.000 euros.

Les bases del premiu espresen nel so puntu 1 que "podrán optar al 'Premio de Novela Café Gijón' las novelas inéditas escritas en  lengua castellana que no hayan sido premiadas anteriormente en ningún otro concurso", dalgo qu'Iniciativa pol Asturianu considera discriminatoriu. "Ye un drechu llingüísticu que la convocatoria seya también n’asturianu y coincidiendo cola Selmana de les Lletres Asturianes queremos pidir al Conceyu de Xixón que se faiga la modificación precisa nes bases pa que se cree una categoría pa obres n'asturianu o se permita la presentación d'obres nel idioma que les Ordenances d'Usu del Asturianu de Xixón recueyen como propiu".

Según la organización que trabaya pola normalización del idioma esta modificación sería a "costu cero, yá que nun supondría añadir un mayor presupuestu del yá aplicáu", y daría "un importante prestixu a les obres lliteraries n'asturianu yá que se convertiría nel premiu lliterariu al que pueden presentase obres nesti idioma con una mayor dotación". D'esta forma, el Conceyu de Xixón potenciaría "la creación lliteraria n'asturianu", amás de sofitar "el procesu de normalización social del idioma, acabando asina con esta discriminación que fai que dende va 27 años los autores nun puedan presentar obres n'asturianu".

Fonte: Asturies.com