"Menudu Traxín” averará’l baille y el traxe tradicional asturianu a lo más pequeño de la casa esti xueves

L'actividá entamada por Vezos y Reciella celebrase nel colexu Xovellanos de Xixón el día 2 Redacción Esti xueves 2 d'abril, Xixón acoyerá “Menudu Traxín”, una actividá qu'averará’l baille y el traxe tradicional asturianu a lo más pequeño de la casa, entamada por Vezos Astures y Reciella. L'actividá ye gratuita y va facese nel patiu del Colexu Xovellanos de Xixón. Esti día del traxe y el baille tradicional pa neños y neñes ye una iniciativa con vocación de continuidá añal. La so primer edición va celebrase esti xueves 2 d'abril nel patiu del Colexu Xovellanos de Xixón (entrada pela cai Begoña) dende les 10.30 hasta les 14.00 hores. Toles neñes y neños - y les sos families- tán convidaos a venir; col traxe o ensin él, sepan o nun sepan baillar y falen o nun falen asturianu. Va haber talleres, xuegos, y actividaes pa deprender a baillar y pa conocer el traxe del país, too ello col oxetivu de pasar una xornada prestosa na que la reciella que tea familiarizao col baille y el traxe atope un entornu afayadizu pa rellacionase con xente de la so edá, y pa que lo que nun lo tea pueda averase y aficionase de forma lúdica a la nuestra tradición. Y amás col asturianu como llingua vehicular de les actividaes. Tolos neños y neñes tienen que dir acompañaes d'una persona adulta. La entrada ye llibre y toles actividaes son gratuites y cuenten cola collaboración del Colexu Públicu Xovellanos y la Oficina de Normalización Llingüística de Xixón. PROGRAMA 10.30 h. ENTAMU: xuegos tradicionales, photocall, talleres de colorear 12.00 h. TALLER DE BAILLE: Páxara Pinta, Capuchinos, Cachetíus y Danza del Pumba. 13.00 h. PASACAIS Fonte: Asturnews

Vezos Astures dedica los sos alcuentros a Euskadi y Asturies

Vezos Astures, asociación  de calter etnográficu que tien ente los sos socios persones bien importantes dientro del ámbitu del baille tradicional

    Esti sábadu van tener llugar los VII Alcuentros cola Cultura Tradicional qu'entama Vezos Astures. Nesta ocasión miren a Asturies y Euskadi, cola presencia d'Aiko Taldea.

    La xornada, de calter gratuitu, principia nel Centru de Cultura Antiguu Institutu de Xixón a les 11 hores cola conferencia 'El baille dende un puntu de vista antropolóxicu', a cargu de Yolanda Cerra, pa siguir darréu cola charra 'Medicina tradicional', protagonizada Bertu Álvarez Peña, etnógrafu de la Fundación Belenos.

   Pela tarde, l'actividá va comenzar a les 17.30 hores nel patiu de la instalación con un taller de bailles de romeríes vasques a cargu d'Aiko Taldea: jauzis, soka-dantza, jota, puerro, vals, mazurka, chotis, pasodoble, polka, contradanza, contrapás, etc. Los alcuentros culturales de Vezos Astures van rematase con una espicha nel Llagar Bernueces a les 21.30 hores tres una visita guiada pel llagar prevista pa les 21 hores.
                                                                                 Fonte: asturies.com