Huergo: "L'informe sobre'l Plan de Carreño tien una intención política"

• 
  

L'abogada Yolanda Huergo faló con Asturies.com sobre l'informe de Madrid nel que se basa la Delegación del Gobiernu estatal n'Asturies p'anular el Plan de Normalización Llingüística de Carreño. Entiende que la interpretación ye "esmolecedora" porque niega a los conceyos competencies que-yos correspuenden.

"Dende'l puntu de vista formal hai poco que dicir, yá qué confío nel bon facer de los servicios xurídicos del Conceyu de Carreño, pero nel so fondu, l'informe ye esmolecedor".

Nun primer puntu, Huergo apunta que'l testu redautáu pola Direición Xeneral de Coordinación de l'Alministración Periférica del Estáu del Ministeriu de Facienda y Alministraciones Públiques apunta que les competencies son del Gobiernu d'Asturies, "polo que nesti casu entiendo que ye la propia comunidá autónoma la que debería intervenir si viera les sos competencies invadíes".

Nesi sen, la xurista "niega la mayor" y entiende que los conceyos "sí tienen un marxe llegal pa facer coses nesa materia", polo qu'afirma que la interpretación que fai l'informe ye "sesgada y interesada".

Huergo señala que "los conceyos nun pueden quedar de brazos cruzaos esperando que'l Principáu faiga lo que tien que facer" y refuga'l plantegamientu de que "nun puedan poner en marcha midíes de fomentu y proteición".

Otru aspeutu que ve esmolecedor ye'l fechu de que'l documentu afirme en delles ocasiones que'l Conceyu de Carreño otorgue al asturianu "tratamientu de cooficialidá". "Paezme mui gordu afirmar eso con tal rotundidá pol fechu de que se fale del asturianu como llingua propia del conceyu", amiesta.

"Informe interesáu"

Por ello, Huergo califica l'informe de "interesáu". "Tres d'una apariencia xurídica, tien una intención política", valora, pa depués añadir que'l "criteriu interpretativu que se fai ye más que discutible".

D'igual forma, l'abogada entiende que pue haber aspeutos del Plan de Normalización Llingüística a los que se-yos pue dar una vuelta, pero nun dulda en nengún momentu de les competencies del conceyu pa facelu efeutivu. Fonte: Asturies.com

Iniciativa pol Asturianu noma d’ataque a la autonomía los conceyos la decisión de Gabino de Lorenzo

La decisión de la Delegación del Gobiernu d’España n’Asturies d’anular el Plan de Normalización Llingüística de Carreño al traviés d’una orde al Conceyu na que-y reclama qu’eche atrás esti testu y los sos efeutos nel plazu d’un mes, ye considerada por Iniciativa pol Asturianu un ataque políticu escontra l’asturianu llamentable.

Nuna nota de prensa asoleyada esti martes pela mañana, Iniciativa pol asturianu diz que “informaos d’esta situación per parte de l’alcaldesa de Carreño, Amelia Fernández López, nun podemos más que condergar esti ataque a l’autonomía de los conceyos pa establecer midíes de normalización del asturianu, tal y como afita la Llei d’Usu del asturianu de 1998. La llei diz nidiamente nel puntu 1 del Artículu 8 que “los ayuntamientos asturianos podrán adoptar les midíes necesaries p’asegurar la efectividá del exerciciu de los derechos llingüísticos qu’esta Llei otorga a los ciudadanos residentes n’Asturies” lo que dexa a les clares pala organización de defensa del idioma que la decisión de la Delegación del Gobiernu torga “la posibilidá de poner en marcha midíes, esautamente lo que se fai al traviés d’un plan de normalización como’l qu’agora quieren prohibir dende la Delegación dirixida por Gabino de Lorenzo”.

Esti nuevu ataque políticu contra l’asturianu del Partíu Popular ye especialmente llamentable, pa Iniciativa porque “usa ferramientes del Estáu y oculta cola apariencia d’una decisión xurídica lo que nun ye más qu’un nuevu intentu de da-y un golpe más al asturianu”.

Al señor De Lorendo esíxen-y que retire esta orde, “yá que los plane de normalización lleven décades funcionando ensin nengún tipu de problema xurídicu en munchos conceyos asturianos y la so reclamación nun tien base xurídica, pues la Llei d’Usu del asturianu permite a los Conceyos esti tipu de midíes”.

Y al equipu de gobiernu de Carreño solicíten-y que “se niegue a acatar esta sentencia y que sigan la llucha nos tribunales hasta acabar toles posibilidaes. El Gobiernu d’Asturies habría da-y sofitu inmediatu a Carreño nesta situación y mediar col Gobiernu d’España pa que retiren esti ataque inxustificáu”.

Fonte: Asturnews

La Delegación del Gobiernu anula'l Plan de Normalización de Carreño

por Pablo R. Guardado

La impugnación per parte de los conceyales del Partíu Popular (PP) del alcuerdu plenariu del 28 de xineru que lu aprobaba tien esta repercusión -Alega que son defeutos de forma nel procedimientu y la interpretación de que les midíes de promoción nun correspuenden a los conceyos nuna llectura de la Llei d'Usu contraria a la so lletra

L'ausencia de competencies de los conceyos pa facer cooficial al asturianu xunto col castellanu llevara años atrás al Tribunal Superior de Xusticia d'Asturies (TSXA) a anular les diferentes declaraciones d'oficialidá feches dende cerca d'una decena d'ayuntamientos asturianos tres los recursos de la Delegación del Gobiernu estatal n'Asturies, pero l'anulación agora del Plan de Normalización Llingüística de Carreño lleva la situación a un puntu esmoleciente.

Tres consultar al direutor xeneral de Coordinación de l'Alministración Periférica del Estáu del Ministeriu de Facienda y Alministraciones Públiques, y recibir un informe de siete fueyes al respeuto, l'órganu representáu por Gabino de Lorenzo señala que l'alcuerdu plenariu "adolez de de nulidá de plenu derechu por nun tramitase conforme al procedimientu establecíu pa la aprobación d'Ordenances Llocales", sinón por un "actu alministrativu". Sicasí, llueu añade "una estralimitación de la competencia municipal", igualando dicho plan a una oficialidá, como denunciaba'l PP de Carreño.

Los conceyales populares fixeron referencia nel so escritu, en primer llugar, los defeutos de procedimientu, pa depués denunciar l'ausencia "de memoria o estudiu económicu concretu" y, por último, "la inconstitucionalidá del Plan, al contener midíes que doten al bable-asturianu del carauter de llingua cooficial por 'aceptar (pol Ayuntamientu) de mou formal que l'asturianu ye, xunto col castellanu, llingua propia d'usu institucional'".

Un mes pa torgalu

Esti cuestionamientu últimu ye al que dedica más espaciu l'informe de Madrid, qu'entiende que "xunto al establecimientu de midíes de fomentu, estímulu y promoción de la llingua asturiana" el Plan de Normalización Llingüística de Carreño "tamién contién otres de carauter regulatoriu o normativu como por exemplu: el reconocimientu como méritu equiparable con otros na función pública llocal la realización de cursos de llingua asturiana pa l'alministración; o por exemplu la ellaboración d'actes n'asturianu; o aprobar una ordenanza d'usu del asturianu y billingüismu pal Ayuntamientu; o tamién por exemplu, lo que denomina como fomentu de la imaxe corporativa nel usu del asturianu en tola documentación alministrativa, multes, bandos, etc., o la normalización de les intervenciones públiques del alcalde y los conceyales n'asturianu, ente otres".

Señala tamién que'l Plan tien, como corolariu, una declaración institucional qu'asume l'usu normalizáu de la llingua asturiana nel conceyu, lo que pal Estáu "supón que l'Ayuntamientu reconoz la cooficialidá del asturianu xunto cola llingua castellana".

Darréu, fai una interpretación peculiar de la Llei d'Usu y Promoción del Asturianu/Bable, dando namái al Gobiernu d'Asturies la posibilidá de facer "planes específicos" basándose nel puntu 2 del artículu 8 d'esta llei, y escaeciendo de forma sorpredente que la llei nel puntu 1 del Artículu 8 diz lliteralmente que "los ayuntamientos asturianos podrán adoptar les midíes necesaries p'asegurar la efectividá del exerciciu de los derechos llingüísticos qu'esta Llei otorga a los ciudadanos residentes n'Asturies".

Agora l'Ayuntamientu, que recibió una carta fechada'l 18 de marzu, tien un mes p'anular dichu plan, anque lo esperao ye que recurra la decisión.

Fonte: Asturies.com

Xixón peracaba'l borrador del so Plan de Normalización Llingüística

• por Pablo R. Guardado

La selmana pasada Xixón Sí Puede reclamaba l'aplicación del plan nuevu de normalización - Esti plan ta yá nuna fase avanzada pendiente del pasu pol Conseyu Asesor y el plenu del conceyu- El Plan de 2008 incumplióse

Según pudo saber Asturies.com, una Comisión encargada de facer un borrador del Plan lleva trabayando más d'un mes y espérase que nel so conceyu de güei miércoles seya a zarrar una redaición consensuada del borrador del Plan de Normalización Llingüística que sedrá'l primer documentu d'esti tipu aprobáu dempués del que se punxo en funcionamientu en 2006.

Tres de la finalización d'esti borrador, el documentu ha pasar pa la so discusión al Conseyu Asesor de la Llingua, y, darréu, al Plenu nel que tien que ser aprobáu poles fuerces polítiques, polo que s'espera que nel mes qu'entra pueda peracabase tol ciclu y entamar tolo más en marzu coles aiciones previstes nun documentu qu'ha tar en vigor hasta 2019.

Nos últimos meses esta Comisión de Trabayu creada pol Conseyu Asesor de la Llingua Xixón, y na que participen representantes de grupos políticos y d'asociaciones en defensa del idioma, ta trabayando les propuestes que tien enriba de la mesa, pa iguar un documentu que lleve la normalización de forma tresversal a toles estayes del conceyu.

El Plan de 2008

Les organizaciones de defensa del idioma foron especialmente crítiques coles aplicación del Plan de 2008, que s'incumplió na mayoría de les sos previsiones. Amás yá a final de 2006 la falta d'implicación del equipu de gobiernu -daquella compuestu por IU-BA y PSOE- na política llingüistica llevó a tolos miembros del conseyu asesor de la llingua a la so dimisión en bloque.

Fonte: Asturies.com