Iniciativa pol Asturianu reclama a Caja Rural de Asturias que los sos caxeros puean usase n'asturianu

Dempués de recibir delles quexes d'usuarios de Caja Rural de Asturias, Iniciativa pol Asturianu unvió una petición a esta caxa asturiana pa que los sos caxeros, qu'anguaño ufren hasta siete llingües nos sos menús, puedan incluyir tamién la posibilidá d'usar el caxeru en llingua asturiana.

La quexa ta teniendo una importante repercursión nes redes sociales y munchos usuarios d'esti bancu tán sofitando la iniciativa. Iniciativa pol Asturianu ufrió la so collaboración pa llevar a cabu esta aición y va tar controlando que les bones pallabres recibíes dende les redes sociales de Caja Rural, tengan respuesta y a lo llargo del añu 2017 esta seya la primer entidá bancaria qu'ufra la posibilidá de remanar los sos caxeros n'asturianu.

Pidimos a toles persones que sofiten esta iniciativa escribiendo a Caxa Rural al traviés del so Twitter @CRASTURIAS y etiquetando a Iniciativa pol Asturianu (@iniciativaXast) pa faer siguimientu y difusión de la campaña.

Fonte: Iniciativa pol Asturianu

La Caxa Rural entama'l so ciclu "Corales d'Asturies"

   La Caxa Rural d'Asturies va entamar esti sábadu 20 de xunu na Ilesia de San Antonio en L'Infiestu a les 20,30 hores un ciclu de conciertos de grupos corales asturianos que va desenvolveses hasta'l 4 del mes de xunetu en dellos otros conceyos d'Asturies como Llanes, Pravia y Navia cuntando cola participación d'una docena de Corales de tol país. El conciertu d'esti sábadu va cuntar col Coro Santa María de Lieres, el Errante de la Comarca de la Sidra y la Polifónica Piloñesa.

   El siguiente conciertu va ser na Basílica de Santa María de Llanes el 2 de xunetu a les 20,15 hores cola participación del Coro Peña Santa de Cangues d'Onis, la Coral Cima de Parres y el Coro Reconquista.

   la Coral Polifónica Santiago López de Pravia, el Coro Mixto San Pedro de Cuideiru y la Coran de Muyeres de San Esteban, conformen la programación del conciertu que va celebrase na Casa de la Cultura de Pravia'l 3 de xunetu a les 20 hores. Y al día siguiente, el 4 de xunetu, va pesllase'l ciclu a les 20,30 hores na Ilesia de la Barca en Navia cola Coral Villa de Boal, el Coro Villa de Navia y Iuvena Coro mozu del COAS.

   Esti ciclu de conciertos corales prográmase en coincidiendo coles celebraciones del 50 aiversariu de la Caxa Rural d'Asturies.                                                     Fonte: asturnews