Asturtoons presentó los sos nuevos llibros en Blimea

   

 

Presentación por Asturtoons en Blimea

    

    Ayeri xueves la Casona del Bravial de Blimea acoyó la presentación de les últimes novedaes de la editorial Asturtoons, los títulos “Una mascota pa Carola” d’Enrique Carballeira, “El misteriu del Vassilius Destounis” de Jorge Fernández” y “El misteriu de les histories que s’escribíen soles” de Xavier Frías Conde.

   Nel actu de presentación participaron los escritores Enrique Carballeira y Jorge Fernández, que tuvieron acompañaos pola conceyal de Cultura de Samartín del Rei Aurelio, Gema Suárez Torre, y por Hugo Cortina, el responsable de la Oficina de Normalización Llingüística del conceyu. Carballeira , periodista, ilustrador y escritor de L’Infiestu ye autor d’otros llibros infantiles como “El cuélebre y el principín medranosu” o “El día de los charcos”, por citar dalgunos. Pela so parte, Jorge Fernández ye maestru y pedagogu, autor de narrativa curtia, testos teatrales y lliteratura infantil, con títulos como “El lladrón de galletes” o “Einstein y la relatividá”, ente otros.

   Los autores sorrayaron el mal momentu qu’atraviesa’l mercáu editorial y la dificultá que supón caltener vivu un proyeutu d’estes carauterístiques nesta situación. Al final del actu hubo un alderique colos asistentes y los escritores firmaron exemplares de los sos libros.

   Con esti actu púnxose’l ramu a la esposición “Asturtoons y les Lletres Asturianes”, que pudo visitase nesti centru cultural dende’l pasáu 5 de mayu, y na que se fizo un repasu del llabor d’esta empresa dedicada a la lliteratura infantil asturiana cuando ta a puntu de cumplir 10 años. Alredor d’esta esposición tamién se llevaron a cabu actividaes con varios centros escolares del conceyu, onde los escolinos pudieron charrar colos autores sobre estos nuevos libros.         Fonte:  Asturnews

Nuevu taller de llectura infantil en Samartín del Rei Aurelio

L'autor Chechu García abre un nuevu taller de llectura infantil en Samartín del Rei Aurelio L’actividá ta incluyida nes XII Xornaes de Lliteratura Infantil y Xuvenil Esti vienres 22 de payares a les 6 de la tarde na Casona del Bravial de Blimea va tener llugar un nuevu taller de llectura infantil entamáu pola Oficina de Normalización Llingüística del conceyu en collaboración cola asociación cultural Bocina Nalón y la Oficina d’Información Xuvenil. Si los dos vienres anteriores un grupu de neños d’ente 7 y 10 años s’acercaben al argumentu y el pallabreru del llibru “Tapín de Picupáu”, de Pablo Rodríguez Medina, esta selmana va ser otru grupu d’edaes ente 4 y 6 años los que van poder conocer en persona al escritor Chechu García, que-yos va cuntar el so llibru tituláu “Marta y el peludín de Carrandi” (Ámbitu). Amás de charrar col autor van facer distintes actividaes rellacionaes con esti llibru, ente les que s’incluyen manualidaes y dibuxos, too ello dende un enfoque llúdicu y d’entretenimientu. Chechu García dase a conocer como escritor en 1996 col llibru infantil “Vieyu Trasgu”, col qu’algamó’l primer premiu de “Llectures pa rapazos” de l’Academia de la Llingua. Nesi mesmu añu algama tamién el premiu Teodoro Cuesta de poesía col llibru tituláu “Les coraes de la roca”. Tamién tien escrites distintes obres teatrales, rellatos curtios, antoloxíes, estudios sobre la historia del cómic y llibros infantiles. Ye ún de los fundadores de la tertulia lliteraria “Tom Malory” y el coordinador de la revista que surde d’ella. Estos talleres son una de les principales novedaes que presenten les Xornaes de Lliteratura Infantil y Xuvenil d’esti añu, y que se suma a les esposiciones y les representaciones teatrales que se tán celebrando nel conceyu a lo llargo del tol mes. Fonte: Asturnews

Día de la Llingua Materna en Blimea

La Casona del Bravial de Blimea prepara’l Día de la Llingua Materna

Casona del Bravial en Blimea

    El próximu xueves 21 de febreru va celebrase na Casona del Bravial de Blimea'l Día de la Llingua Materna, qu'esti añu dediquen a los nomes asturianos. Pa ello va cuntase cola presencia de Loreto Díaz Suárez, filóloga ya investigadora n'antroponimia que va ufiertar una charra que lleva por títulu “Los nomes asturianos: ente’l raigañu y les modes”.

   Amás, va presentase nel conceyu la campaña de normalización llingüística “El to nome diz muncho de ti”. Tolos asistentes al actu van recibir el material de la campaña de baldre. A lo llargo de los próximos díes va dase más información sobre estes actividaes, según espliquen los organizadores.

   Fonte: Asturnews.

Alfonso Zapico dibuxa'l cartelu del XIV Congresu de Periodismu Dixital de Huesca

Alfonso Zapico dibuxa'l cartelu del XIV Congresu de Periodismu Dixital de Huesca

   L'historietista asturianu Alfonso Zapico, premiu nacional recién de Cómic 2102, ye l'autor de la obra que va sirvir d'imaxe pa la decimocuarta edición del Congresu de Periodismu Dixital, que se va desenvolver nel Palaciu de Congresos d'Huesca ente los díes 14 y 15 de marzu de 2013. El Congresu de Periodismu Dixital ta entamáu l'Asociación de Periodistes d'Aragón y el Conceyu d'Huesca y cuenta cola collaboración de Gobiernu d'Aragón, Ibercaja, Diputación Provincial d'Huesca, Telefónica y Conceyu d'Huesca.

   La previsión de losorganizadores ye qu'asistan más de 300 periodistes a un eventu que se convirtió nuna cita clásica onde s'axunten los meyores especialistes de medios dixitales d'España y Llatinoamérica. Como n'ediciones anteriores, el día 13 de marzu, víspora del congresu, van axuntase na ciudá los responsables d'alredor de 50 medios dixitales nun ‘workshop' a puerta zarrada. Los comenenciudos en participar na edición de 2013 van poder facer la inscripción a partir del día 15 de xineru na páxina web del congresu.

   Alfonso Zapico (Blimea, Samartín del Rei Aurelio, 1981) ye un historietista y ilustrador asturianu que trabaya fundamentalmente pal mercáu francu-belga y qu'esti añu 2012 algamó cola so novela gráfica Dublinés el Premiu Nacional de Cómic.

   En faciendo los estudios d'ilustración y diseñu na escuela d'arte d'Uviéu, los sos primeros trabayos profesionales nel mundu del cómic vieron la lluz en Francia: La guerre du professeur Bertenev (Editions Paquet, 2006), ambientada na guerra de Crimea y que recibió'l Prix BD Romanesque nel FestiBD Ville de Moulins nel 2007, y el volume colectivo Un jour de mai.Nel 2008 publicó Café Budapest, qu'enceta'l conflictu árabe-israelín y que foi editáu n'España por Astiberri y en Polonia (Timof). En xunu de 2008 algamaría'l Premiu Haxtur al meyor guion. Amás de cómic, realiza trabayos gráficos pa diverses editoriales. Collabora coles mesmes col diariu La Nueva España y otros periódicos rexonales, y facer cola revista de cómic n'asturianu El Gomeru.

   A partir del mes d'ochobre de 2008 empezó a collaborar col selmanariu Les Notícies con una tira titulada Les Pites de Grau, que sustituyó al espaciu qu'ocupaba otru dibuxante asturianu pernomáu, Ruma Barberu. N'agostu de 2008 llogró una beca otorgada pol Festival de la historieta de Angulema que-y dexó morar nel so célebre Maison deas auteurs hasta 2011.

   En 2010, llogró'l Premiu Josep Toutain al Autor Revelación nel Salón del Cómic de Barcelona por La guerra del profesor Bertenev, editáu n'España por Dolmen.

   Fonte:  Asturnews.

Esposición sobre´l patrimoniu de Samartín, Blimea.

Blimea acueye una esposición sobre’l patrimoniu nel conceyu de Samartín.

La muestra va poder visitase a lo llargo de tol mes de febreru.

El conceyu de Samartín del Rei Aurelio cuenta con numberoses construcciones de calter relixosu que van dende la época prerrománica hasta los nuesos díes, munches d’elles reconstruyíes a lo llargo del sieglu XX, pero la mayoría con restos de les sos construcciones orixinales. La Casona del Bravial de Blimea cuenta a partir del llunes 6 de febreru con una esposición na que se fai un repasu de toa esta arquitectura de tipu relixosu.

Al traviés d’once paneles informativos ufiértense datos históricos y artísticos sobre les diferentes edificaciones relixoses que s’estienden a lo llargo del tol conceyu, tanto nos núcleos urbanos como nos rurales. La esposición ta dividida en cinco partes, caúna de les cuales se correspuende a les cinco parroquies nes que ta dividíu’l conceyu. Amás, inclúyense semeyes de los templos, tanto interiores como esteriores, y tamién mapes esplicativos.

A lo llargo de la muestra faise un repasu a les capielles pequeñes de calter rural, carauterizaes pola cenciellez de les sos formes y la economía de los materiales emplegaos na so construcción, y tamién a otres con una mayor riqueza de materiales que se construyeron nel últimu sieglu. Tamién se fai referencia a los elementos escultóricos qu’incluyen- retablos o imáxenes- que se carautericen pola imitación de les formes que “la moda llitúrxica” de les distintes époques imponía na provincia o nel focu artísticu más averáu.

La esposición va poder visitase na planta baxa de la Casona del Bravial de Blimea a lo llargo de tol mes de febreru, los llunes, miércoles y vienres de 9 a 14 h. y los martes y xueves de 11 a 13 y de 17 a 20 h.


Fonte: Asturnews