Galán abrió la sesta edición del ‘Veranu Lliterariu’ de Corvera

Inaciu Galán en Corvera, "Veranu Lliterariu"

  Esti llunes echó a andar una edición nueva, la sesta, del ‘Veranu Lliterariu’, actividá qu’entama la Casa de la Llingua de Corvera cola fin de promover la llectura infantil en llingua asturiana. Inaciu Galán lleó la so obra ‘Nel, el coríu que nun sabía nalar’ a la reciella.

  Los neños y neñes que s’averaron a la Biblioteca de Les Vegues pudieron disfrutar de la historia escrita pol xixonés y, al empar, conocer al autor, qu’aldericó con ellos sobre’l llibru. El ‘Veranu Lliterariu’ desendólcase tolos llunes de xunetu y agostu, con sesiones de sesenta minutos a les 11.30 hores, y la so participación ye de baldre.

  Tres la visita de Galán, esti sábadu’l turnu va ser pa Xurde Fernández, que va falar sobre ‘L’árbol de la verdá’. Completen la programación d’esti añu Paula Pulgar, con ‘Aventures de Pulgu y Yolín’ (día 17); Carlos González Espina, con ‘Falar ensin parar’ (24); Sidoro Villa, con ‘Nun-yos tengas perceguera’ (31); Vitu Álvarez, con ‘Samalandrán’ (7 d’agostu); Xesús González Rato, con ‘El coneyín y la elefantina que quieren dormir’ (14 d’agostu); Daniel García Granda, con ‘Versos d'Asturies’ (21 d’agostu); y Berto García, con ‘Cuadros con munchu cuentu’ (28 d'agostu).                                                                    Fonte: asturies.com

Corvera torna a disfrutar d’un ‘Veranu Lliterariu’ (recordatoriu)

Cartelu "Veranu Lliterariu 2015"

  Los neños y neñes van conocer un añu más a los autores de les sos histories favorites.

  Esta actividá entamada pola Casa de la Llingua-Serviciu de Normalización Llingüística de Corvera pretende servir de promoción y animación a la llectura de lliteratura infantil n’asturianu, amás de ser una manera d’averar a los autores a los sos llectores. L’actividá, de baldre pa neños y neñes de dientro y fuera del conceyu, desendólcase na mañana de los llunes de xunetu y agostu –a esceición del día 31– na Biblioteca de Les Vegues n’horariu de 11.30 a 12.30 hores.

  En cada sesión, l’autor convidáu afonda nuna de les sos histories, con llectura de cuentos que se completa con actividaes como la pintura, xuegos de memoria o cantares. Por exemplo, Aránzazu García-Prado, encargada ayeri d’abrir el ‘Veranu Lliterariu’, centróse nel so llibru ‘Xuanín y el so perru Starsky’.

  La intención de la organización ye la de “amosar la diversidá y pluralidá de la lliteratura asturiana d’anguaño”, pa lo que conviden a diferentes autores. Son los siguientes: Susana Sela Rodríguez, con ‘Xuna’ (llunes); Esther García, con ‘Menú de versos’ (día 20); Rafa Valdés, con ‘Vamos escribir un cuentu’ (27); Xurde Fernández, con ‘Antón quería ser porteru’ y ‘L'árbol de la verdá’ (3 d’agostu); Carlos González Espina, con ‘Falar ensin parar’ (10 d’agostu); Cristina Muñiz, con ‘La pota encarnada’ (17 d’agostu); y Berto García, con ‘Fame de versos’ (24 d’agostu).    Fonte: Asturies.com