Pa Conceyu Abiertu “esta ye la potenciación de la normalización social del asturianu que prometía’l PSOE nel so programa elleutoral”
Documentu nel que Movilla torga l'usu del asturianu
L’alcalde de Noreña, Cesar Movilla (FSA-PSOE) ye yá conocíu pol so odiu contra l’asturianu, que lu llevó en más d’una ocasión a tratar de prohibir el so usu nel plenu y nes actividaes del so Conceyu. Agora dase un nuevu casu de represión llingüística protagonizáu por él. Cesar Movilla niégase a tramitar dos solicitúes de documentación de Conceyu Abiertu por Noreña con fecha d’entrada nel rexistru del 17 y 21 d’esti mes, por tar escritos n’asturianu.
Trátase en dambos casos de testos cenciellos nos que se pide documentación, el día 17 un llistáu con documentación en xeneral de dellos temes (Ponte del Rebalde, actes de plenos celebraos, les normes subsidiaries que sustitúin al PXOU, los presupuestos de 2012, el borrador de los de 2013... Nel casu del testu del pasáu 21 trátase d’una copia de los antecedentes de les comisiones celebraes el xueves pasáu, día nel que, según espliquen dende Conceyu Abiertu “entrégasenos una carta de contestación” onde l’alcalde comunica que “previo a su tramitación deberá presentarlos en lengua castellana”.
Dende CA espliquen que “los testos son dafechamente entendibles y cenciellos, simplemente se trataría de dar el so consentimientu pa que se facilite al nuestru Grupu Municipal una copia de los documentos pidíos”.
Dende la formación política camienten que “pese a que la postura antiasturiana del alcalde ye bien conocida y ta suficientemente documentada, paeznos que nesta ocasión tamién se trata d’una nueva esculpia pa torgar un normal accesu a la información, como venimos denunciando tolos grupos de la oposición dende l’aniciu de la llexislatura”.
La formación del conceyu condal afirma que “queda claro que nesta ocasión axúntense dos de les ‘polítiques estrella’ d’esti mandatu de Movilla: Torgar tolo posible’l llabor de los conceyales de la oposición y la represión constante al drechu a utilizar l’asturianu”, lo que pa CA dexa a les clares que “la Noreña de Movilla tien una perbaxa calidá democrática”.
Pa solucionar estos casos de represión llingüistica y de prohibición del asturianu, pa Conceyu “faise necesario reaniciar la busca d’una formula que permita aprobar una midida nel ámbitu municipal, que solucione esta grave discriminación que prohibe de facto, por causa de la nula voluntá de los gobernantes, l’usu escritu del asturianu”.
Dende Conceyu Abiertu sorrayen que “l’actitú del alcalde del PSOE choca col propiu programa de la llista elleutoral qu’encabezaba”. Y ye que nel puntu 63 del programa elleutoral comprométense colos vecinos y vecines a “Potenciar la normalización social del asturiano”. Dende CA prestaría-yos saber “qué entiende’l PSOE y Movilla por normalizar l’asturianu”, y recuerden que “podríen empezar por dexar utilizalu…”.
Dende Conceyu Abiertu califiquen el puntu 63 del programa de “brinde al sol elleutoralista, cuando nin si quiera pidieron les sovenciones al Principáu, precisamente pa la normalización social del asturianu, o nin esiste partida nenguna pa ello nel presupuestu”, dalgo que, esperen “debería solucionase na redaición del d’esti añu”.
Fonte: Asturnews
.jpg)
