Iniciativa entrega en presidencia un llibru sobro’l protocolu de drechos llingüísticos

   Va unes selmanes Iniciativa pol Asturianu entregaba al traviés de rexistru una carta y un llibru esplicativu del procesu de creación del que va ser un documentu internacional de gran importancia pa les llingües minorizaes, del que la entidá foi representante n’Asturies y que va aprobase en Donostia enantes de que remate l’añu 2016:el protocolu de drechos llingüísticos.

 El llibru esplica’l procesu y los problemas comunes que viven les llingües europees minorizaes, como l’asturianu, que pola falta d’oficialidá vive una situación especialmente grave. Y los grupos parllamentarios de la Xunta Xeneral y el Conseyeru d’Educación y Cultura recibieron tamién una copia. Los receptores concretos d’esta información fueron el presidente d’Asturies, Javier Fernández, el conseyeru d’Educación y Cultura, Genaro Alonso, y tolos grupos políticos de la Xunta Xeneral (PSOE, PP, Podemos, IX, Foro y C’s)

 La única respuesta llegó de momentu de la Conseyería d’Educación 

y Cultura, cola solicitú d’un conceyu per parte del Direutor Xeneral de Política Llingüística, que se producirá esti martes a les 11 la mañana.

 El mes de xunu pasáu Iniciativa pol Asturianu organizó en Xixón una charra na que se presentó énte organizaciones de la sociedá civil asturiana, el procesu de redacción del Protocolu pa la Garantía de los Drechos Llingüísticos que va aprobase dientro de los actos organizaos con motivu de la capitalidá europea de la cultura Donostia 2016, un documentu internacional que quier ser una continuación de la Declaración Universal de los Drechos Llingüísticos aprobada va agora venti años.       Fonte: asturnews.com

Somos Avilés rexistra la primer moción n’asturianu de la historia del Conceyu

por Pablo R. Guardado

Al respeuto de la ‘Llei Mordaza’. Tamién va presentar delles midíes sobre la política llingüística del Ayuntamientu “pa la so aprobación y puesta en marcha” nesta llexislatura.

Somos Avilés pretende asina da-y “normalidá, prestixu y utilidá al nuestru idioma, más allá d’aspectos sentimentales o políticos, presentándolu como un instrumentu comunicativu amañosu y preparáu pal desenvolvimientu del llabor municipal”. Dende la candidatura de xunidá popular aseguren qu’ésta va ser “una práutica habitual mientres tola llexislatura”, faciendo del asturianu “una ferramienta de comunicación avezada, tamién nel terrén alministrativu y procedimental, fuxendo d’un emplegu meramente simbólicu y/o coyuntural”.

La moción presentada, la primera na lligua propia de la historia del conceyu avilesín, vien al respeutu de la nomada ‘Llei Mordaza’, esto ye, la Llei Orgánica de Proteición Ciudadana qu’entró en vigor recién aprobada en solitariu pol PP. Somos Avilés esixe la derogación de la mesma y de la reforma del Códigu Penal, amás de la dimisión del ministru del Interior, Jorge Fernández Díaz, “polos sos postulaos contra derechos como’l d’espresión o manifestación, ente otros, qu’enzarra’l testu llexislativu”.

D’igual forma, solicita al gobiernu municipal del PSOE qu’amenorgue la so aplicación a nivel llocal: “Amosar el compromisu d’esti consistoriu nel cumplimientu de les funciones de velar pola seguridá pública, siempre de manera coordinada coles autoridaes competentes, y el nuestru refugu a que’l funcionariáu públicu de los cuerpos policiales seyan remanaos como elementos de represión de la protesta social”, apunta Somos Avilés na moción, que va aldericase en Plenu’l xueves.

Compromisu pa col asturianu

La candidatura de xunidá popular tamién va presentar al restu de grupos municipales un paquete de midíes sobre política llingüística “pa la so aprobación y puesta en marcha”, amosando’l so compromisu “pa col asturianu y los derechos civiles de la ciudadanía avilesina”. Somos Avilés foi la tercer fuercia más votada nes municipales al sumar cinco conceyales, ún menos que’l PP y trés que’l PSOE.

Fonte: Asturies.com

Pola continuidá del asturianu nes escueles

Más de 2000 neños entreguen cartes al Gobiernu pola continuidá del asturianu nes escueles

   Esti xueves los docentes de l’asignatura d’asturianu y gallego-asturianu tuvieron nel Rexistru del Gobiernu d’Asturies, n’Uviéu, pa entregar les más de 2.100 cartes que los neños que cursen esta asignatura escribieron per tola país pa pidir a la Conseyera d’Educación y Cultura, Ana González, que l’asturianu siga teniendo’l so espaciu nel programa d’estudios. Amás, entregáronse diez resolucione de claustros escolares que s’amosaron a favor d’esta reivindicación que lleva más de 2.500 apoyos na páxina web onde se recueyen.

   Nes cartes, los neños amuesen el so amor pol asturianu y piden que a la Conseyera que defienda l’asturianu frente a la Llei Wert, que podría sacar al asturianu de les aules.

   Xunta a les cartes de los neños, los docentes, que tuvieron a les puertes del Rexistru concentraos, entregaron un documentu nel qu’esplicaben les razones d’esta campaña.

   Fonte.  Asturnews.

Rexistru de la discriminación llingüística n'Asturies

Un informe atropa cientos de casos de discriminación nos últimos 30 años y l'Observatoriu de la Discriminación Llingüística n'Asturies siguirá calteniendo'l trabayu de rexistru.

L'Aconceyamientu de Xuristes pol Asturianu, tres abrir na so páxina web un portal pa recoyer denuncies –SOX- naguaben pola igua d’una rellación d’actos "discriminatorios" carecíos polos ciudadanos asturfalantes qu’abarcare dende la vixencia de la Constitución de 1978 fasta "que dalgún día, si llega, acabe l’estáu d’esceición que pa la llingua asturiana punxo en práutica l’Estáu español va yá pa 31 años". Un rexistru, nel que s’atropen "toles agresiones endenantes que la memoria les entierre", que s’actualice "día tres día" con un formatu "que permita’l so fácil espardimientu per dayuri uquiera se trate de los drechos humanos" y seya'l "vergoñosu" y "permanente" testimoniu de "l’agresión llingüística escontra’l pueblu asturianu".

L'AXA venía coricando la idega hai bien de tiempu "pero siempres faltaben les manes", fasta agora que "yá podemos cuntar con un informe qu’atropa cientos de casos de discriminación, na dómina 1979-2009, nun total de más de doscientes páxines".
Pa da-y continuidá al llabor dende l'Aconceyamientu de Xuristes pol asturianu tan sofitando la igua d’una asociación –Observatoriu de la Discriminación Llingüística n’Asturies- na que conviden "a asentar", col grau de compromisu que caún escueya.

Fonte: Infoasturies