Conceyu Abiertu: La rixidez de les postures polítiques pa col asturianu faen inútiles les comparecencies

Comisión d'Asturianu nuna Xunta Xeneral casi erma

  El 70 por cientu de los llectores que participaron en ‘Conceyu Abiertu’ ve inútiles les comparecencies informatives de la Comisión Especial d’Estudiu sobre'l Réxime de Proteición y Promoción del Asturianu. Considera que nun van camudar les postures polítiques afitaes pa col idioma de los grupos parllamentarios.

 La entruga plantegada nesta ocasión tres cuatro sesiones na Xunta Xeneral yera ‘¿Valen pa dalgo les comparecencies informatives de la Comisión Especial d’Estudiu sobre'l Réxime de Proteición y Promoción del Asturianu?’. Un 70 por cientu entiende que ‘Non, porque les postures polítiques anguaño tán mui nidies’, mentes qu’un 30 por cientu si-y ven utilidá ‘porque faen que los diputaos conozan la realidá de la situación del idioma de la boca de convidaos de prestixu’.

 Nes cuatro sesiones celebraes hasta la fecha, amás de responsables del Gobiernu, como’l conseyeru Genaro Alonso o los direutores xenerales Fernando Padilla y María Cristina Valdés, pasaron personalidaes como Ana María Cano, Ramón d’Andrés, David Rivas, José Alba, Enrique del Teso, David Melendi o Xuan Bello, ente otros. Diputaos de tolos grupos parllamentarios pudieron sentir la so opinión y entruga-yos, anque Foro nun acude a les comparecencies informatives y la FSA-PSOE nun exerce’l so derechu de preguntar nunes sesiones que van siguir en mayu.

 Dende esti momentu yá ye posible participar nun ‘Conceyu Abiertu’ nuevu. Nesta ocasión prestaríanos conocer la opinión de los nuesos llectores sobre la polémica abierta pola decisión del Gobiernu estatal de sofitar la postura defendida por Foro pa la variante de Payares pola que se va instalar víes d’anchu internacional nos túneles, dexando’l tráficu de mercancíes pa la vieya infraestructura, que va tener una inversión de 145 millones d’euros pa la so renovación.                                                                                  Fonte: asturies.com

El Plenu de Noreña vota les ordenances d'usu del asturianu

Pérez Fonseca y Martínez Fernández nel momentu de presentar la propuesta d'ordenances nel Rexistru Municipal

  Esti xueves, a les 19 hores, va celebrase na Casa Conceyu de Noreña un Plenu nel que, ente otros asuntos, va votase l'ordenanza d'usu del asturianu que presentó Conceyu Abiertu. Ésta saldrá alantre colos votos d'Independientes por Noreña (IPÑ), Foro y Izquierda Xunida (IX), cola dulda de la postura que caltendrán PSOE y PP.

  Lo dos conceyales de Conceyu Abiertu por Noreña, Pablo Pérez Fonseca y Antonio Martínez Fernández, presentaron el pasáu 4 de marzu nel Rexistru Municipal la propuesta de la candidatura de xunidá popular pa unes 'Ordenances municipales pal usu de la llingua asturiana nel conceyu de Noreña'. Ésta yera la segunda ocasión na qu'esta formación proponía una serie de midíes p'asegurar la efectividá de los derechos llingüísticos que la llexislación otorga a los ciudadanos, pero na anterior, nel 2012, con Pérez Fonseca como edil únicu nacionalista, atopó la oposición del PSOE y de la conceyala d'Independientes de Asturia (Ideas), partíu qu'incluyera la oficialidá del asturianu nel so programa eleutoral.

  Nesta ocasión, con otru color políticu en Noreña, la situación va camudar y les ordenances van salir alantre. Na comisión informativa celebrada'l miércoles pasáu, el documentu de Conceyu Abiertu por Noreña algamó, tres un llargu alderique de dos hores, l'apoyu del grupu del equipu de gobiernu d'IPÑ y Foro, amás d'Izquierda Xunida (IX). Mentes, el PSOE y el PP astuviéronse.                                                                                               Fonte: asturies.com  

Los Conceyos Abiertos vuelven a Noreña tres les elleiciones

L'agrupación d'electores celebra un conceyu abiertu el próximu llunes nel Antiguu Depósitu de l'Agua

   Conceyu Abiertu por Noreña va decidir el so posicionamientu pa la constitución de la nueva corporación nuna asamblea pública y abierta a la participación, depues de qu'esti día, l'agrupación d'electores ficiera anuncia de la celebración d'un conceyu abiertu el próximu llunes 8 de Xunu nel Antiguu Depósitu de l'Agua.

  Conceyu Abiertu por Noreña siguiendo col so funcionamientu asambleariu y abiertu va decidir el so posicionamientu de cara a la constitución de la nueva corporación onde se va escoyer alcalde o alcaldesa de Noreña.

   L'agrupación d'electores noreñesa convocó pal próximu llunes día 8 un conceyu abiertu, xunta a la que pueden asistir tolos vecinos y vecines, pa decidir el so posicionamienyu nel Plenu, onde esti mandatu va cuntar con dos representantes tres ser la tercer fuerza política más votada. Nesta asamblea va informase de la xunta caltenida con Independientes por Noreña, la otra agrupación d'electores noreñesa, que ye la única fuerza político que, enagora, púnxose en contactu con Conceyu Abiertu por Noreña. Dende Conceyu Abiertu per Noreña animen a los y les noreñeses a participar el llunes a les 21:00 hores na Aula de talleres del Antiguu Depósitu de l'Agua y recuerda que, dende la so formación en 2011, lo decidío nos conceyos abiertos ye lo que los representantes treslladen al Plenu exercitando asina la democracia directa y la participación popular na política municipal ensin cortapises.                                                                                                  Fonte: asturnews.com

Conceyu Abiertu pal entamu de la foguera de San Xuan nel Antiguo d'Uviéu

A les 20 hores na plaza'l Paragües (Uviéu). Entama l'Espaciu La Llegra.            Fonte: Asturies.com

El 90% de los llectores d'Asturies.com cree que debería haber más contautu ente les comunidades llingüístiques del asturlleonés

   Los usuarios d’Asturies.com consideren que sería positivu pal idioma un contautu mayor ente les diferentes comunidaes llingüístiques del dominiu asturlleonés. Un 90 por cientu cree que l’actual ye insuficiente.

   Según los datos que desprende’l nuesu ‘Conceyu Abiertu’, los falantes d’asturianu, lleonés y mirandés nun cuenten con una rellación afayadiza que serviría pa l’afitamientu del idioma en tol territoriu. Asina, un 90 por cientu cree qu’un mayor contautu ente estes comunidaes sería positivo pal idioma, por un 6 por cientu que piensa que l’actual yá ye suficiente. Mentes, un 4 por cientu votó pola opción ‘Nun sé’.

   Dende esti momentu yá ye posible participar nun ‘Conceyu Abiertu’ nuevu. Nesta ocasión queremos conocer si los resultaos del reférendum sobre la independencia d’Alba yeren los qu’esperaben los nuesos llectores. Un 55,3 por cientu optó por caltener la xunión col Reinu Xuníu, mentes qu’un 44,7 por cientu amosóse favoratible a la dixebra.                 Fonte: Asturies.com

Nuevu cursu de llingua de la XPDLLA

   La Xunta Pola Defensa de la Llingua Asturiana sigue apostando pola organización de cursos empobinaos al deprendizaxe de la llingua asturiana y tres del cursu entamáu selmanes atrás nel CS Sestaferia de Xixón, dirixíu al deprendizaxe de la llingua asturiana dende un nivel básicu, acaba empobinase a la convocatoria d'otru pa la enseñanza dende una perspeutiva avanzada.

   L'entamu del nuevu cursu ta previstu pal martes 8 d'abril., con una duración de 40 hores, desenvolviéndose los martes y xueves de 19 a 21 hores. El llugar escoyíu ye'l Conceyu Abiertu, asitiáu na Cai La Gascona 12, baxu. Uviéu. El preciu matrícula+materiales ye de 20€ pa socios y 30€ non socios. La Xunta pola Defensa de la Llingua Asturiana ye una entidá acreitada pola Conseyería d'Educación pa la formación permanente del profesoráu.   Fonte:  Asturnews

PSOE y PP torguen en Noreña la tramitación d'una ordenanza d'usu del asturianu

    L'Ayuntamientu de Noreña volvió a torgar ayeri l'estudiu d'una ordenanza pal usu de la llingua asturiana nel conceyu. PSOE y PP votaron xuntos pa refugar la urxencia -y polo tanto la discusión na sesión d'ayeri- de la propuesta presentada por Conceyu Abiertu pa regular l'usu de la llingua nel municipiu. FDLI, IPÑ, Conceyu Abiertu y Foro votaron a favor mientres qu'IDEAS abstúvose. El conceyal Pablo Pérez Fonseca, que denunció la represión llingüística nel conceyu, defendió la so propuesta d'ordenanza pa garantizar el derechu a espresase n'asturianu. L'alcalde del conceyu, César Movilla, refugó la urxencia de la propuesta porque "hai  problemes  más  importantes".

Plenu 27-02-2014. Moción d'urxencia de Conceyu Abiertu sobre l'usu del asturianu (vía InfoNoreña)

   Nun ye la primer vegada que l'aprobación d'unes ordenances d'usu del asturianu llega alAyuntamientu de Noreña. En xunetu de 2012, el plenu del conceyu refugó colos votos en de PSOE yá Ideas aprobar la propuesta de Conceyu Abiertu y que namái cuntó col sofitu del conceyal d'esi partíu y el representante del Frente de la Izquierda.

   Tamién ye frecuente la torga d'escritos pol equipu de gobiernu local por tar n'asturianu. Va un mes, l'Ayuntamientu obligó al Coleutivu de Paraos y Precarios de Siero y Noreña a presentar un documentu "en castellano, la lengua oficial de la Comunidad Autónoma". Fonte: Qué ye ho!

El Defensor del Universitariu recibe al Conceyu Universitariu y a Iniciativa pol Asturianu pol casu de discriminación llingüística en Formación del Profesoráu

Representantes del Conceyu Universitariu pol Asturianu y d’Iniciativa pol Asturianu aconceyaron esta selmana pasada con Ramón Durán, Defensor del Universitariu de la Universidá d’Uviéu, pola mor del casu de discriminación llingüística sufríu na Facultá de Formación del Profesoráu a finales de 2013. Nel conceyu algamóse’l compromisu de tomar acciones pa evitar que vuelvan a repitise casos como’l denunciáu va dellos meses. Nel conceyu, celebráu esti xueves 6 de febreru, el Defensor comprometióse a estudiar una recomendación a la Universidá pa que, cola llexislación na mano, nun vuelvan a dase casos como’l denunciáu por un alumnu de la Universidá nel mes de payares, cuando una funcionaria quixo prohibir que presentara más documentos n’asturianu nes oficines d’alministración de la so facultá. Esti documentu, pal que dambes organizaciones dieron les sos recomendaciones, y que podría presentar el Defensor del Universitariu basaríase na sentencia que’l Tribunal Superior de Xusticia d’Asturies emitió contra’l Reglamentu d’Usu del Asturianu de la institución, por insuficiente con respeuto a la Llei d’Usu del Asturianu de 1998. Amás, encamentará tamién a la formación del personal de la universidá asturiana nes competencies básiques d’asturianu pa evitar estos casos. Dende Iniciativa pol Asturiau y el CUPA agradecióse al Defensor la rápida respuesta nel casu del alumnu reprimíu, que recibió en pocos díes una disculpa del Defensor y la ufierta de busca de soluciones llegales pal futuru. Fonte: Conceyu Universitariu pol Asturianu

L'Atenéu N'Alfoz entama un Conceyu Abiertu pal domingu viniente

L'Atenéu N'Alfoz llama a un Conceyu Abiertu, nel que van a tratase delles cuestiones rellacionaes cola so actividá. L'asociación cultural de la comarca avilesina, Atenéu N'Alfoz, entama un Conceyu Abiertu pa esti domingu 26 de xineru, a les 19.00 hores, nel Llocal Social L'Ensame. L'orde del día tocará cuestiones como la valoración del Cursu d'introducción a la toponimia asturiana, la inscripción del Atenéu como asociación, conceyos con instituciones y asociaciones, o cuestiones organizatives como ayalguería y socies. L'Atenéu N'Alfoz ñaz del enfotu de ciudadanes y ciudadanos de los conceyos d'Avilés, Castrillón, Corvera ya Illas pa crear una entidá cívica centrada nes cuestiones culturales y llingüístiques, que desendolque’l so llabor principalmente nesti ámbetu territorial conocíu como la Comarca d'Avilés". L'orixe d'esta entidá remóntase meses atrás, dempués de dellos alcuentros ente persones veníes de distintos ámbetos de lo que se puede denomar l´asturianismu social. Fonte: Infoasturies

Cellebrada la concentración pola oficialidá de la llingua asturiana en Mieres

  La protesta entamada por Conceyu Abiertu por Mieres axuntó a varies decenes de persones énte l'Ayuntamientu Mieres.

   

   Esti sábadu dende les 13:00 la Casa Conceyu de Mieres acoyó la concentración entamada pola pataforma municipalista Conceyu Abiertu, qu'axuntó a decenes de persones pa denunciar la represión llingüística exercía nel conceyu pola Policía Llocal, que según denunciaron dende CA "viola los drechos de les persones asturfalantes con total impunidá". El  baberu de la concentración cuntaba col llema de la mesma, "L'asturianu llingua oficial", nesta reivindicación polos drechos de los asturfalantes.

    Amás, tal como desplica Conceyu Abiertu por Mieres, "les persones concentraes dixirímonos depués a la cercana sede de la Policía Llocal pa siguir cola protesta. Ellí una compañera de Conceyu Abiertu por Mieres intervino pa denunciar la vergoñosa situación xenerada y l'actitú oportunista, compliz ya hipócrita del gobiernu de Mieres, gobernáu por IU-LV. Na intervención tresmitió que l'únicu garante pa que se respeten los drechos de los asturfalantes ye la declaración d'oficialidá de la llingua propia n'Asturies y el Conceyu de Mieres".

  Amás, la plataforma conceyil afitó que "valoramos positivamente la rempuesta xenerada y nuevamente pidimos la oficialidá de la llingua propia. Pa finar, insistimos en qu'IU, tanto nel nuesu conceyu como nel país, nun ye opción valible y seria pa algamar los nuesos drechos llingüísticos, como nun lo son les fuercies polítiques sucursalistes qu'hai na Xunta Xeneral"

Fonte:   Infoasturies.com

Conceyu Abiertu por Mieres entamó una concentración baxo'l llema "L'asturianu llingua oficial"

La plataforma conceyil desixe que se depuren responsabilidaes pol casu de represión llingüística en Mieres, polo que convoquen concentración pa esti sábadu a les 13:00 nel Ayuntamientu Mieres.

Dende Conceyu Abiertu consideren que "la Casa Conceyu, como alministración pública más cercana al ciudadanu, y el alcalde en particular, tienen de tener la prioridá absoluta de velar por que se garanticen los drechos llingüísticos de los sos vecinos y amosar nestos casos una mayor sensibilidá. Teniendo en cuenta que l’asturianu ye la llingua tradicional d’Asturies y de Mieres, falada pola mayoría de los vecinos y fácilmente comprensible por toos, incluso por aquellos que nun son asturfalantes, camentamos que la actitú reaccionaria, provocativa y de despreciu por parte d’un axente de la policía municipal haza’l asturianu nun pué vese pa enriba reforzada pola decisión del alcalde de retirar tales autorizaciones n’asturianu".

Nesa llinia, dende Conceyu Abiertu por Mieres camienten "que l’alcalde de Mieres debería entamar un espediente disciplinariu al axente en cuestión cola fín d’esclariar si tres la actuación d’esi axente hai un fechu represivu haza un ciudadanu por motivaciones ideolóxiques, ya que la única causa aparente pa que talu axente sancionare al usuariu de la Casa Cultura ye que la autorización taba n’asturianu, y non la incomprensión de la mesma por parte del axente".

Amás, remembren que "casos como esti ponen de manifiestu nueamente la necesidá urxente de declarar l’asturianu como llingua oficial d’Asturies cola fin de garantizar los drechos de los asturfalantes". Poro, convoquen una concentración de protesta esti sábadu 9 de payares a les 13:00 hores énte la Casa Conceyu de Mieres, col llema “L’asturianu llingua oficial”, pa la que faen un llamáu a toles persones esmolecíes por esti casu de represión llingüística.

Fonte: Infoasturies

L’alcalde socialista de Noreña sigue prohibiendo l’usu del asturianu

Pa Conceyu Abiertu “esta ye la potenciación de la normalización social del asturianu que prometía’l PSOE nel so programa elleutoral”

Documentu nel que Movilla torga l'usu del asturianu

L’alcalde de Noreña, Cesar Movilla (FSA-PSOE) ye yá conocíu pol so odiu contra l’asturianu, que lu llevó en más d’una ocasión a tratar de prohibir el so usu nel plenu y nes actividaes del so Conceyu. Agora dase un nuevu casu de represión llingüística protagonizáu por él. Cesar Movilla niégase a tramitar dos solicitúes de documentación de Conceyu Abiertu por Noreña con fecha d’entrada nel rexistru del 17 y 21 d’esti mes, por tar escritos n’asturianu.

Trátase en dambos casos de testos cenciellos nos que se pide documentación, el día 17 un llistáu con documentación en xeneral de dellos temes (Ponte del Rebalde, actes de plenos celebraos, les normes subsidiaries que sustitúin al PXOU, los presupuestos de 2012, el borrador de los de 2013... Nel casu del testu del pasáu 21 trátase d’una copia de los antecedentes de les comisiones celebraes el xueves pasáu, día nel que, según espliquen dende Conceyu Abiertu “entrégasenos una carta de contestación” onde l’alcalde comunica que “previo a su tramitación deberá presentarlos en lengua castellana”.

Dende CA espliquen que “los testos son dafechamente entendibles y cenciellos, simplemente se trataría de dar el so consentimientu pa que se facilite al nuestru Grupu Municipal una copia de los documentos pidíos”.

Dende la formación política camienten que “pese a que la postura antiasturiana del alcalde ye bien conocida y ta suficientemente documentada, paeznos que nesta ocasión tamién se trata d’una nueva esculpia pa torgar un normal accesu a la información, como venimos denunciando tolos grupos de la oposición dende l’aniciu de la llexislatura”.

La formación del conceyu condal afirma que “queda claro que nesta ocasión axúntense dos de les ‘polítiques estrella’ d’esti mandatu de Movilla: Torgar tolo posible’l llabor de los conceyales de la oposición y la represión constante al drechu a utilizar l’asturianu”, lo que pa CA dexa a les clares que “la Noreña de Movilla tien una perbaxa calidá democrática”.

Pa solucionar estos casos de represión llingüistica y de prohibición del asturianu, pa Conceyu “faise necesario reaniciar la busca d’una formula que permita aprobar una midida nel ámbitu municipal, que solucione esta grave discriminación que prohibe de facto, por causa de la nula voluntá de los gobernantes, l’usu escritu del asturianu”.

Dende Conceyu Abiertu sorrayen que “l’actitú del alcalde del PSOE choca col propiu programa de la llista elleutoral qu’encabezaba”. Y ye que nel puntu 63 del programa elleutoral comprométense colos vecinos y vecines a “Potenciar la normalización social del asturiano”. Dende CA prestaría-yos saber “qué entiende’l PSOE y Movilla por normalizar l’asturianu”, y recuerden que “podríen empezar por dexar utilizalu…”.

Dende Conceyu Abiertu califiquen el puntu 63 del programa de “brinde al sol elleutoralista, cuando nin si quiera pidieron les sovenciones al Principáu, precisamente pa la normalización social del asturianu, o nin esiste partida nenguna pa ello nel presupuestu”, dalgo que, esperen “debería solucionase na redaición del d’esti añu”.

Fonte: Asturnews

Reclamen que la web del Ayuntamientu de Mieres tea tamién n'asturianu

Conceyu Abiertu por Mieres reclama que la web del Ayuntamientu tea tamién n'asturianu.

La formación mierense reclamó nun comunicáu que la páxina web del Ayuntamientu tea tamién la so versión en llingua asturiana, aniciativa que s'amesta a la de Conceyu Abiertu por SMRA díes atrás.

Conceyu Abiertu por Mieres desplicó que "La páxina web del Ayuntamientu de Mieres, muérganu dixital oficial de la institución municipal, nun ufre a los usuarios de la rede la posibilidá de visualizar la mesma na llingua asturiana. Dende Conceyu Abiertu por Mieres, depués de dexar dalgo de tiempu al nuevu executivu llocal pa que tornara esta situación, queremos desixir que se nos dea la posibilidá d'una opción de visualización d'esta páxina tamién na llingua propia d'Asturies y del Conceyu de Mieres".

Poro, piden la versión n'asturianu porque "entendemos qu'un conceyu como'l de Mieres, claramente asturfalante, nun pue permitise tener la páxina web oficial namás na llingua castellana. El fechu de que la páxina www.ayto-mieres.es nun tea una versión de visualización n'asturianu tresmite una imaxe de pasotismu pa col ciudadanu, alloñando ainda más la institución municipal del pueblu. Poro, dende Conceyu Abiertu por Mieres entendemos que la realidá llingüística que se vive nes cais del conceyu nun se correspuende col diseñu monollingüísta d'esti mediu dixital".

Amás, despliquen que "dende la plataforma Conceyu Abiertu por Mieres, atalantamos que la situación del asturianu ye pergrave y yá son dellos muerganismos internacionales los que señalen que con esti camín de falsa normalización l'idioma d'Asturies ta nel camín de desapaecer dafechu. Una bona midía de normalización sedría ufrir una versión n'asturianu de la páxina web municipal y asina contribuyir a caltener viva la nuesa llingua, cosa que yá ficieron dellos conceyos de la redolada de Mieres".

Nesi sen, consideren que "L'alministración, depués de munchos escándalos y de xenerar situaciones discriminatories, yá foi avisada y llama a orde con esti tema, con resoluciones xudiciales inclusive, que llamaben a fomentar l'emplegu y usu l'idioma dende l'alministración pública. Nesti sen, sedría importante que'l gobiernu llocal y los responsables de la web punxieranse manes a la obra y normalizar y fomentaren l'emplegu del asturianu na páxina web, que ye un muérganu de l'alministración mierense na rede".

Crítiques a IX-LV

Pa finar manifiesten que "nun queremos escaecer a la xente qu'Izquierda Xunida-Los Verdes, llevaba nel conceyu enantes de ganar les eleiciones, nel so programa eleutoral, el compromisu de dignificar y normalizar la posición del idioma propiu del país. Ye una irresponsabilidá qu'enantes de ganar les eleiciones prometieran afondar nesa normalización llingüística y qu'entá nun ficieran nada. Ciertu ye qu'hai prioridaes agora mesmu, xestionaes, por ciertu, malamente hasta'l momentu, pero los ciudadanos mierenses asturfalantes tienen drechos irretrucables nesta materia y tienen de cumplise".

Fonte: Infoasturies

Piden que la páxina del Ayuntamientu de Samartín se torne al asturianu

Conceyu Abiertu por Samartín del Rei Aurelio pidió nun comunicáu que la web del conceyu tea tamién disponible n'asturianu, al entender que ye un drechu fundamental y básicu pa los y les vecines.

Pa Conceyu Abiertu por Samartín, "L´actual estáu de la páxina web ye que únicamente se pue visualizar en castellán, siendo esta una actitú de despreciu y marxinación pa cola llingua asturiana y pa cola cultura qu´ésta representa por parte de l´actual gobiernu municipal". Camienten que "Amás ye una midía perfácil de iguar y que yá fixeron otros Ayuntamientos de conceyos veceros como por exemplu los de Llaviana y Llangréu, nos que se puede atopar una pestiñina cola que se tien accesu a la web na llingua que’l llector prefiera".

Consideren que "el nuesu conceyu tien una oficina de política llinguística que debería encargase de xestionar esti tema y actualizar la web de mou que quede una versión n´asturianu normativu", polo que finen afitando que "también falamos n´asturianu y por ello queremos que los medios de comunicación públicos del conceyu tean tamién na nuesa llingua".

Fonte: Infoasturies

Conceyu Abiertu propón una Ordenanza pal usu del asturianu en Noreña

El conceyal d’esta formación nel conceyu condal presentó una propuesta al restu de partíos col oxetivu d’intentar que s’apruebe por unanimidá.

Conceyu Abiertu por Noreña presentó-yos al restu d’organizaciones polítiques del conceyu (PSOE, IPÑ, PP, FDLI, FAC ya IDEAS) una propuesta d’Ordenanza municipal pal usu de la llingua asturiana nel Conceyu de Noreña pa que la puean estudiar y facer propuestes de cara a llevala a los órganos de decisión del conceyu nes próximes selmanes. La propuesta tien como referencia otres ordenances d’usu del asturianu vixentes anguaño n’otros conceyos asturianos.

Conceyu Abiertu por Noreña espera poder aconceyar con representantes de toles organizaciones, “de cara a recoyer les sos impresiones y propiciar l’aprobación d’una ordenanza por unanimidá”, espliquen. D’aprobase, esta sedría la primer vegada que Noreña se dote d’una normal llocal sobre la llingua propia del conceyu, se reconozan los drechos llingüísticos de tolos vecinos y vecines, se regule l’usu nel ayuntamientu y dalgunes midíes de promoción y normalización. Ye por ello que dende Conceyu Abiertu albidre que “sedría preferible aprobalo tolos grupos, siendo amás la llingua patrimoniu de tolos noreñenses independientemente de la so ideoloxía”.

Mientres los últimos meses, espliquen, “en Conceyu Abiertu por Noreña venimos estudiando les ordenances sobre l’asturianu vixentes n’otros conceyos d’Asturies, de cara a llevar alantre esti puntu del nuesu programa elleutoral”.

Recuerden la necesidá d’estes ordenances con un casu asocedíu va unos meses, cuando pa Conceyu Abiertu “volvió a vese claramente nel conflictu llingüísticu que se vivió en Noreña a finales del añu pasáu”, en referencia a la negativa del alcalde a almitir mociones n’asturianu y el rechazu a una propuesta posterior de solución provisional, que presentaron dende Conceyu Abiertu.

Aquella polémica fizo que l’Academia de la Llingua Asturiana amosara’l so descontentu pola actuación del alcalde, xunto a otres organizaciones de defensa de la llingua y cultura asturianes.

Conceyu Abiertu alvierte que presenta “unes ordenances axustaes a la llexislación vixente y asumible por tolos grupos municipales y pol propiu gobiernu municipal (PSOE-IDEAS)” y recuerden que’l PSOE “tien aprobao ordenances d’esti tipu n’otros conceyos asturianos”, recordando amás que “les ordenances nun supondríen un coste económicu al Conceyu, dependiendo gran parte de les actuaciones de la voluntá política y que tres aprobala, diría poniéndose en práutica paulatinamente, según los medios disponibles”.

Pa la formación nacionalista “l’aprobación de la ordenanza, amás de ser un actu de dignificación de la llingua y cultura asturianes, supón un necesariu avance democráticu”.

Fonte: Asturnews

La Xunta Elleutoral de Llaviana refuga les candidatures de Conceyu Abiertu n'asturianu pese a la sentencia del Tribunal Constitucional

Nuevu casu de represión llingüísitica nunes elleiciones anque esta vegada el proceder de la Xunta ye anticonstitucional gracies a la sentencia 48/2000 de 24 de febrero de Tribuna Constitucional.

La Xunta Ellectoral de Zona de Llaviana comunicó ayeri a los representantes de Conceyu Abiertu énte la mesma que nun daba por válides les candidatures presentaes nos conceyos de Samartín del Rei Aurelio y Llangréu por emplegar l’asturianu na documentación requería al efeutu. Concretamente, lo que s’argumenta dende la XEZ de Llaviana ye que “nun s’utiliza nenguna de les llingües oficiales del Estáu español”. De momentu, ye l’únicu casu nel que se refuguen les llistes de Conceyu Abiertu por esta razón, ya que nin la Xunta Ellectoral Provincial nin nenguna de les otres de Zona nes qu’hai presentaes candidatures de Conceyu Abiertu comunicaren nada al respeutu.

Magar que nun ye definitivu, Conceyu Abiertu quixo facer públicu y denunciar el determín tomáu pola XEZ de Llaviana porque supón "l’enésimu ataque escontra la llingua asturiana y aquellos ciudadanos que la empleguen". Ye más, Conceyu Abiertu "llamenta" que los responsables de la XEZ de Llaviana "tovía nun conozan la sentencia 48/2000, de 24 de febreru, del Tribunal Constitucional (BOE nº 76, 29 de marzu de 2000) qu’anulaba’l determín de la Xunta Ellectoral Provincial d’Asturies de nun proclamar les candidatures de la organización política Andecha Astur al Congresu los Diputaos y al Senáu pola mesma razón, al considerar que se taba vulnerando’l drechu de les persones a acceder a los cargos públicos en condiciones d’igualdá, sentando un precedente hestóricu".

Conceyu Abiertu retrucará al determín de la Xunta Ellectoral de Zona de Llaviana sofitándose nesta sentencia y confía en que’l prósimu llunes, 25 d’abril, se proclamen les sos candidatures nos conceyos de Samartín del Rei Aurelio y Llangréu.
Fonte:blogue frayando cadenes