La Gala d’Entrega de los Premios Lliterarios 2015 sedrá esti vienres

El patiu de columnes del Palaciu Conde de Toreno n’Uviéu acueye’l vienres 29 de xineru, a partir de les 19.30 hores, l’actu d’entrega de los cinco premios lliterarios que la Conseyería d’Educación y Cultura convoca anualmente col fin d’afitar la llingua asturiana como vehículu d’espresión lliteraria de primer orde.

Los premios lliterarios del Principáu son el «Xosefa Xovellanos» de Novela (36.ª edición); el Premiu «Xuan M.ª Acebal» de Poesía (21.ª edición); el Premiu «Máximo Fuertes Acevedo» d’Ensayu (21.ª edición); el Premiu «M.ª Josefa Canellada» de Lliteratura Infantil y Xuvenil (8.ª edición), y el Premiu «Alfonso Iglesias» de Cómic (7.ª edición).

Nel actu, que va tar presidíu pol conseyeru d’Educación y Cultura,Genaro Alonso Megido, va dase a los gallardonaos l’Árbol de les lletres, una pieza artística esclusiva otorgada en reconocimientu a la calidá de les obres premiaes. Los ganadores son:

• Premiu «Xosefa Xovellanos» de Novela: Francisco Álvarez, por Lluvia d’agostu.
• Premiu «Xuan María Acebal» de Poesía: Antón García, por Ferralla.
• Premiu «Máximo Fuertes Acevedo» d’Ensayu: José Ángel Gayol, por Vértigu. L’atracción del abismu na sociedá contemporánea.
• Premiu «María Josefa Canellada» de Lliteratura Infantil y Xuvenil: Vicente García Oliva, porFontenebrosa III: el final.
• Premiu «Alfonso Iglesias» de Cómic: Ruma Barbero, por El viaxe a la lluz.

La gala, que ye d’entrada llibre, va cuntar amás cola actuación musical d’Anabel Santiago y Xulio Arbesú.

Fonte: Asturnews

Arrequexando al asturianu

 

Xuan Pandiella, n'AsturNews Opinión

Xuan Pandiella

   Esti llunes 20 de mayu, la presidenta de la Comisión Promotora Local de FORO en Bimenes, Ainara García Martín, denunció l’actitú de la Conseyería de Cultura d’Asturies que se niega a patrocinar la romería conmemorativa de la declaración de la oficialidá del asturianu nel conceyu yerbatu.

Ye llamativo que’esa falta de sofitu económicu pa la romería seya xustificada pol Gobiernu cola falta de fondos cuando la realidá, que toos conocemos, ye que namás hai menos intereses políticos nesa decisión.

   Esti comportamientu de la Conseyería nun ye casual. Nun ye nada nuevo. Ye’l reflexu del pensamientu d’unos represantes políticos que nun valoren nin respeten nin la llingua, nin la identidá cultural del país onde gobiernen. Reflexa esi pensamientu anti-asturianu, encabezáu por Javier Fernández y siguíu por Ana Gonzalez, pa los que les señes d’identidá d’Asturies nun precisen sofitu nengún de l’alministración, sinón, que son un problema y tienen que ser arrequexaes.

   Esti pensamientu, esta postura, concuerda cola actitú demostrada a lo llargo de 30 años de socesivos gobiernos socialistes, acompañaos en delles ocasiones por IX, como nesti casu, amás d’UPD. Esos gobiernos que siempres tuvimos actuaron baxo la premisa que lo “d’equí” nun yera útil n’Asturies son quien provocaron qu’Asturies seya un país en decadencia.

   El PSOE nunca tuvo enfotu en valorar la riqueza cultural (y tamién porque non, económica) que xenera y que podría xenerar (en condiciones normales) l’asturianu. Nunca tuvo enfotu na cultura del país, nin siquiera m’atrevo a decir, tuvo enfotu n’Asturies.

   Unos gobernantes que nun valen nin pa defender les singularidaes del llugar donde manden nun valen pa ocupar esi gobiernu. Esta actitú nun ye de recibu y nosotros, como asturianos, nun lo tendríemos que permitir.

   Nun ye de recibu la falta de talante que la máxima responsable de cultura d’Asturies tien hacia l’asturianu.

   Nun ye de recibu que la Conseyera de Cultura nun tea presente nel actu académicu más relevante de l’asturianu como ye la Xunta Estraordinaria de l’Academia de la Llingua Asturiana.

   Nun ye de recibu la poca representación institucional nos actos oficiales de la Selmana de les Lletres.

Nun ye de recibu nin almisible qu’una conseyera llegue tarde y mediu actu a una presentación de llibros d’unos premios lliterarios.

   Nun ye de recibu tener una conseyera más preocupada de crear conflictos que d’igualos.

   Nun ye de recibu que por motivos políticos la fiesta de la oficialidá de Bimenes quede ensin sofitu del Gobiernu asturianu.

   Como nun ye de recibu ye tiempu de dexar de quexanos y agora que podemos, trabayemos p’algamar el futuru qu’Asturies precisa. Pa facer d’Asturies un país prósperu y arguyosu de si mesmu nun podemos permitir actitudes d’esta triba hacia la nuesa identidá.

   Dende equí tol mio sofitu a los organizadores de la fiesta pa que sigan con ella, a les asociaciones que la caltienen añu tres añu y a tolos visitantes que faen posible que la fiesta aumente en participantes y presencia mediática.                            Fonte: asturnews

Convocaos los premios lliterarios en llingua asturiana de 2014

La Conseyería d'Educación, Cultura y Deporte vien de convocar los premios lliterarios en llingua asturiana pal añu 2014 La Conseyería d'Educación, Cultura y Deporte vien de convocar los premios lliterarios en llingua asturiana pal añu 2013: la 35.ª edición del Premiu "Xosefa Xovellanos" de novela; la 20.ª edición del Premiu "Xuan M.ª Acebal" de poesía; la 20.ª edición del Premiu "Máximo Fuertes Acevedo" d'ensayu; la 7ª edición del Premiu "María Josefa Canellada" de lliteratura infantil/xuvenil; y la 6ª edición del Premiu "Alfonso Iglesias" de cómic. La convocatoria asoleyóse a lo llargo d'esta selmana santa y los interesaos na convocatoria de dalgún de los concursos van tener de plazu hasta'l próximu 12 de setiembre pa participar. Más información: Convocatoria nel BOPA de los premios

Los escritores piden la oficialidá y optar a los Premios Nacionales de Lliteratura

Premiaos 2013 La recoyida de los Premios Lliterarios 2013 conviértese nun actu reivindicativu de los escritores gallardonaos, que reclamaron la oficialidá y la so participación nos Premios Nacionales de Lliteratura, n’igualdá de condiciones col restu de les llingües del Estáu. Nel actu, una probe representación institucional, el viceconseyeru de Cultura, Alejandro Calvo, y la directora xeneral de Política Llingüística, Ana María Fueyo, lo qu’amuesa que los premios non solo rebaxaron la so cuantía, de 12.000 a 4.000 euros, sinón que tamién la presencia institucional. Tolos gallardonaos ficieron referencia a la necesidá de la oficialidá del asturianu pa garantizar un futuru dignu pa la so lliteratura. Mientres que’l viceconseyeru calificó esta reclamación de “lexítima” y dixo que’l Gobiernu d’Asturies entamaría “acciones llegales pa garantizar la presencia del asturianu nel sistema educativu”. Recoyeron los premios, Quique Faes, ganador del Xosefa Xovellanos pola novela “La vida increíble”, Milio Rodríguez Cuerto, que llevó’l Premiu María Josefa Canellada de lliteratura infantil y xuvenil por “Carne de Melandru”, José Ángel Gayol, col “Xuan María Acebal” de poesía por “El llibru de les coses”, Xulio Arbesú pol ensayu “Los deseos del dineru”, ganador del Premiu Máximo Fuertes Acevedo” y Javier Antonio Marinas, ganador del Alfonso Iglesias de cómic por “Homes”. Fonte: Asturnews

El martes presentaránse n’Uviéu les espublizaciones de los Premios Lliterarios 2011

por Pablo R. Guardado

El salón d’actos de la Biblioteca d’Asturies va ser sede esti martes d’un actu de presentación de les espublizaciones de los Premios Lliterarios 2011. Tres el mesmu, va celebrase una mesa redonda con tolos autores gallardonaos.

La Conseyería d’Educación, Cultura y Deporte, Trabe y Suburbia Ediciones entamen esti eventu nel que la escritora Vanessa Gutiérrez va encargase de la conducción de la presentación de les espublizaciones de les obres premiaes y de la moderación del alderique posterior. Los autores gallardonaos na edición pasada de los Premios Lliterarios son Xandru Fernández, por ‘El príncipe derviche’ (Premiu Xosefa Xovellanos de Novela); Xosé Ánxelu Gutiérrez Morán por ‘Un ciertu desorde’ (Premiu Xuan María Acebal de Poesía); Lluis Portal, por ‘Cipriano Folgueras. Una gloria d’Asturies (Premiu Máximo Fuertes Acevedo d’Ensayu); Paquita Suárez Coalla, por ‘Camín de lletres: d’Asturies a Nueva York’ (Premiu María Josefa Canellada de Lliteratura Infantil y Xuvenil); y Isaac del Rivero, por ‘Doña Berta’ (Premiu Alfonso Iglesias de Cómic).

L’actu na Biblioteca d'Asturies 'Ramón Pérez de Ayala', asitiáu na uvieína plaza Daoíz y Velarde, va principiar a les 19.30 hores y nél van tar presentes tolos autores premios na edición del 2011 de los gallardones más prestixosos de la lliteratura na llingua del país.

Fonte: Asturies.com

Xornada lliteraria pa la entrega los premios de la Oficialidá

Bimenes entama una xornada lliteraria pa entregar los premios de la Oficialidá.

La Estaya de Cultura del Conceyu Bimenes entama una Xornada Lliteraria pal prósimu vienres 6 de xunetu. La mesma consistirá na entrega premios del XV Concursu de Cuentos pola Oficialidá del Asturianu, na llectura del cuentu ganador na voz del so autor o autora y na presentación del llibru “Poemes del últimu salvaxe”, de Daniel García Granda (La Pola Siero, 1972), poemariu ambientáu nel pueblu de Viñái (Bimenes), onde l’autor tien los sos raigaños.

La Xornada Lliteraria tendrá llugar na Casa Cultura de Santuyano, de magar les 19’30 hores. D’otra miente, el fallu del concursu cuentos fadráse públicu el prósimu martes, 3 de xunetu, en cuantes finen los discutinios de los miembros del xuráu, formáu nesta edición polos escritores Xulio Vixil Castañón, Pablo Rodríguez Medina y Nacho Fonseca Alonso.

Fonte: Asturnews

La XXXIII Selmana de les Lletres Asturianes va dedicase a la poesía de la Illustración

Pablo R. Guardado
Emilio Marcos Vallaure anunció que la XXXIII Selmana de les Lletres Asturianes va tar dedicada a la poesía y los poetes de la Illustración. Foi na entrega de los Premios Lliterarios 2011 que tuvo llugar esti martes nel Palaciu d’Inclán Leiguarda d’Uviéu.

Autores de la tamién nomada Xeneración de Mediu Sieglu, como Gaspar Melchor Xovellanos y la so hermana Xosefa, Bruno Fernández Cepeda, Antón Balvidares Argüelles, González Villar, Teresa Cónsul o Benito A. Ahuja, van ser estudiaos y recordaos na selmana qu’arrodia al Día de les Lletres Asturianes, que va cellebrase’l 4 de mayu. D’esta forma, los illustraos asturianos garren el relevu de Mánfer de la Llera, protagonista de la edición d’esti añu.

Na so intervención, en llingua asturiana, el conseyeru de Cultura y Deporte, que tuvo acompañáu por Alfredo Ignacio Álvarez Menéndez, direutor xeneral de Política Llingüística, destacó’l so “compromisu cola creyación lliteraria n’asturianu”, pa lo que tien previsto desarrollar un programa d’apoyu al traviés de sovenciones y averamientu a los centros escolares, y señaló la necesidá de poner en conocimientu de los asturianos “que tienen la última oportunidá pa que nun desapaeza esa parte común que ye la cultura asturiana”. Otra manera, fixo referencia a la importancia que tien la dignificación d’una llingua pa la so normalización social.

L’actu de los Premios Lliterarios 2011, cellebráu énte numberosu públicu, entamó cola entrega del IV Premiu María Josefa Canellada por ‘Camín de lletres: d'Asturies a Nueva York’ a Paquita Suárez Coalla, autora residente nesa ciudá estauxunidense que viaxó hasta Uviéu a recoyer el gallardón tres muchos años ensin visitar el país. La emigrante destacó que los guaḥes yeren el futuru de la llingua asturiana, dalgo que-y motiva pa escribir lliteratura infantil y xuvenil. Tres ella, xubió a la tarima Isaac del Rivero, ganador del III Premiu Alfonso Iglesias de cómic por ‘Doña Berta”, qu'anunció que diba siguir creyando obres d’una forma clásica, “con papel, pincel y acuarela”, pese a los sos problemes de visión.

El XVII Premiu Xuan María Acebal foi pal poemariu ‘Un cierto desorde’, de Xosé Ánxelu Gutiérrez, que dedicó’l gallardón a la so güela pa, darréu, destacar el papel perimportante que tienen los güelos na tresmisión del idioma. Pela so parte, Lluis Portal Hevia tuvo pallabres de reconocimientu pal escultor Cipriano Folgueras tres recibir el XVII Premiu Máximo Fuertes Acevedo pol ensayu ‘Cipriano Folgueras, una gloria d’Asturies”. Nesti momentu del actu, Marcos Vallaure aprovechó pa destacar qu’una escultura del uvieín va esponese’l mes qu’entra nel Muséu de Belles Artes procedente del Museo del Prado, “una obra pola que llevábamos insistiendo denda hai munchu tiempu”.

Pa terminar, Xandru Fernández recoyó’l so tercer Premiu Xosefa Xovellanos, qu’esti añu vivía la so edición númberu 32, por ‘El príncipe derviche. L’escritor dedicó’l gallardón a “tolos militantes del procesu de recuperación llingüística, porque ensin ellos nun esistiría la lliteratura asturiana”.

Fonte: Asturies.com