31/10/16

Froles mirandesas: Cuntigo digo-me you mesma!

Cuntigo digo-me you mesma!



          Quando me digo cuntigo,
          ye cumo nadar nas augas lhimpas dun ribeiro,
          mexer las piernas sien alboroto
          para que las augas nun s´antrúbien,
          l cantar de ls paixaricos nun se atelundre,
          las xardas béngan a cascalhar a las mies manos,
          me fágan cuçquinhas
          i tu lhéngua mie,
          cun palabras me béngas a atamar la risa.

          Deitada  nesse ribeiro, subre l cielo,
          beio l cielo rial porriba, azul anfenito cun castielhos brancos
          adonde bou screbindo
          cun tinta azul que del sorbo.
          Assi me quedo.
          Palabra atrás de palabra
          que tu me bás ditando,
          ourquestra afinada de letras,
          sensible  sonido,
          acumparada  antoaçon,
          música de palabras que me arrólhan,
          me fázen beilar por drento.

          Ua nubre yá stá chena.
          Passo par´outra.
          Ua partitura acabada.
          Bira-se outra fuolha.
          Mais un biolino a fazer que chora,  
          reissenhor na punta dun galho de salgueiro
          mais sonidos, mais palabras,
          mais cantares d´outros paixaricos,
          l´auga a correr,
          l sangre a calcer,
          las palabras a nacer.
          Mais xardas a spreitar l miu cuorpo znudo,
          you screbindo l cielo, deitada subre l cielo,
          ribeiro d´augas cristalina de palabras,
          cuntigo.

          Un airico sacude las nubres,
          las palabras bénen bolando an correlina,
          fázen cachoneira al chegar,
          ajéitan-se,
          tóman l sou lhugar,
          arríman-se an scaleiras,
          sbarrúlhan-se,
          tórnan-se a ajeitar,
          uas bezes son de seda,
          outras bezes cantarie  
          i tierra an carambina.

         Cuntigo  digo-me
         you mesma!


III CURSU D’INICIACIÓN A LA LLINGUA LLIONESA


  La nuesa asociación, cumpriendo cono sou compromisu cona defensa y promoción de la llingua y cultura llionesas, y ante l’exitu de los cursos llevaos a cabu los dous pasaos años, organiza’l sou tercer cursu d’iniciación al nuesu idioma en modu presencial que vai tener llugar na ciudá de Llión, concretamente nas aulas de la consultoría de formación Skala, asitiada na calle Jorge de Montemayor, 6.

  El cursu tendrá una duración total de 48 horas lectivas que s’impartirán cada vienres ente las 17,00 y las 19,00 horas, dende’l 4 de noviembre del presente añu hasta’l 5 de mayu de 2017. Las crases contarán cumo base de trabayu cona guía gramatical de llionés   Xurdir y el manual prácticu d’iniciación Falar con Xeitu, editaos entrambos los dous pola nuesa asociación, amás d’outrosFaceira materiales didácticos que serán entregaos a cada alumnu dientro’l preciu de matrícula. Xunto al aspectu concretamente llingüísticu, el cursu abordará tamién aspectos de literatura, historia, toponimia ou cultura tradicional llionesa, eiros au la nuesa llingua siempre xugóu un papel fundamental.
   Tódolos interesaos en matriculase pueden facelo en Skala Formación, calle Jorge de Montemayor, 6. El prazu de matrícula remata’l próximu 31 d’outubre y el preciu de la mesma ye de numás un pagu únicu de 40 €. Las prazas son llimitadas. Pa más información contactar na nuesa dirección de corréu asociacionfaceira@gmail.com
Llugar: Skala Formación, calle Jorge de Montemayor, 6.
Horas lectivas: 48.
Crases: Los vienres de 17,00 a 19,00 horas dende’l 4 de noviembre hasta’l 5 de mayu.
Preciu: 40 € (pagu únicu)
Prazu d’inscripción: Hasta’l próximu 31 d’outubre.                                      Fonte: faceira.org

30/10/16

Viñetes d'Efrén d'Andrés

Una pena
Efrén d'Andrés 27 Ochobre, 2016
L'humor asturianu n'asturianu.
Fonte: asturies.com
Reflexión: paez que les penes con una plizca d'humor son menos penes. O tamién qué coses pasen.

Celia en la Revolución (II)


“Celia en la Revolución” ye un manuscritu qu’Elena Fortún principió a escribir durante los mesmos socesos que narra, en plena Guerra Civil española, y que finó yá nel esiliu americanu en 1943. Escritu a llapiceru, atopóse años depués y un poco por casualidá y, según dicen los editores, taba ensin correxir pola autora y costó munchu trabayu pasalu a llimpio y da-y una coherencia pa la so publicación, cosa qu’asocedió en 1987.
L’autora madrileña emplega al so personaxe favoritu -la neña Celia- pa cuntar unos acontecimientos que-y dexaron una fonda güelga a ella, al igual qu’a tolos españoles que tuvieron la desgracia de vivilos. Equí Celia yá nun ye una neña más o menos ocurrente, sinón que ye una adolescente de 16 años a la cuál los fechos pelos que va a dir pasando van faciéndola maurecer hasta un final abiertu, nun sé mui bien si el definitivu o unu provisional a la espera d’unes correiciones que nunca llegaron a facese.
Y lo que cuenta Elena Fortún, por boca del so personaxe, ye cómo trescurría la vida cotidiana na estaya republicana dende l’aniciu la contienda hasta los caberos díes de la mésma. Nun hai equí frentes de guerra, anque toa España fuera un frente de guerra, nin nomes de políticos d’un o otru bandu. Ye namás, y na menos, la memoria d’una traxedia al traviés de los que la sufrieron na retaguardia. Celia, como’l restu los españoles, trema colos bombardeos, pasa una fame atroz (dellos díes marcha pa la cama con un vasu caliente d’agua endulzada), ve desfacese la ciudá, ve morrer a xente a la que quier y va quedándose sola, separtada de los sos hermanos más pequeños y de so padre, feríu, al que nun pue atender. Asina va pasando, según los avatares del conflictu, de Madrid a Valencia, a Albacete, a Barcelona, y otra vuelta a empezar.
Depués de lleer la novela, lo qu’a min me tresmite l’autora ye que los buenos y los malos nun taben agrupaos por bandos. Nun había un bandu onde taben los buenos y otru los malos, sinón qu’ente la xente corriente, la de a pie, la que sofría les violencies cotidianes, habíalos buenos y malos. Xente que se xugaba’l pelleyu por aidar a otros, y xente que nun tenía altor moral nengún: que denunciaba, que tomaba la xusticia pola mano, qu’especulaba cola fame de los vecinos… Otra cosa llamativa ye’l distintu mou en que se vivía la guerra d’unos llugares a otros de la retaguardia. Asina, mientres Madrid yera una ciudá cuasi destruyida, onde’l mieu, la fame y los “paseos” s’espardíen auquiera, en Valencia les tiendes taben abiertes y tomábase café nes terraces, y en Barcelona podía dise al cine, a un restaurante o a un cabaré, pese a los bombardeos que nun faltaben. Sólo al final, cuando la derrota yá yera inaparable, se contaxó’l desastre a tolos llaos.
Novela emocionante, dura, que se llee con una llárima nos güeyos, anque la bondá inxenua de la protagonista la ducifica un poco. Quiciás ehí s’asitie la única crítica que pueda facese. Celia ye demasiao inxenua inclusive al final cuando ya la cosa ta decantada. La mocina nunca nun llega a entender lo que ta pasando, nin sabe posicionase nun de los bandos, anque so padre ye militar de la República y a so güelu lu maten nel primer capítulu de la novela. Nun paez mui creyible esa especie de inorancia infantil nuna moza de dieciseis años, edá na que otres moces, quiciás pola propia situación, tienen una conciencia más real de los fechos. Poca crítica pa un rellatu qu’espeya lo que fue esa llamada “tercera España”, que nun tenía sitiu en nenguna de les otres dos, y al que los perguapos dibuxos d’Asun Balzola “pespuntéen” con aciertu. Mui recomendable.              Fonte: trabayudecampu.com

29/10/16

“El problema de l'anulación de les ordenances solucionóse con sentíu común; falando”, apunta Iglesias

Na semeya Inaciu Iglesias

  Esta selmana espublizáronse nel BOPA les ordenances d’asturianu de Noreña depués de que’l Conceyu de Noreña algamara’l compromisu de la Delegación del Gobiernu de nun recurriles. Inaciu Iglesias, conceyal de Foro y miembru del equipu de gobiernu, esplica con satisfaición que la situación “solucionóse con sentíu común; falando”.
  Foi en xunetu cuando Delegación del Gobiernu estatal n’Asturies unvió un requerimientu nel qu’obligaba al  a anular la decisión del Plenu del 28 d’abril nel que s’aprobaron les ordenances d’asturianu del conceyu colos votos favoratibles d’Independientes por Noreña (IPÑ), Foro, Izquierda Xunida (IX) y Conceyu Abiertu por Noreña, organización que propunxo’l documentu, y la oposición única del PSOE y el PP. Énte esta situación, l’equipu de gobiernu decidió nun cumplir col mandáu y responder con una carta.
  “Aneciamos nes nueses ordenances porque éstes non sólo s’axustaben a la llegalidá, sinón que facíen cumplir el mandatu del Estatutu, la Llei d’Usu y la Constitución de dar garantíes a los nuesos ciudadanos. Ye obligación de los conceyos facelo”, afirma Iglesias. Tres dos meses ensin noticies, y yá pasáu’l plazu d’un mes p’anular les ordenances, Gabino de Lorenzo púnxose en contautu per teléfonu cola alcaldesa María Amparo Antuña “pa desbloquiar la situación”.
  Esta llamada desendolcó nuna reunión n’Uviéu con personal téunicu de la Delegación nel que’l diálogu y la bona disposición ente les dos partes foron les notes carauterístiques. “Analizamos el tema más fondamente y entós apuntáronnos la so decisión de nun recurrir les ordenances”, apunta l’edil de Foro.
   “En primer llugar punximos firmeza; depués, diplomacia; pa terminar con flexibilidá, ufriendo la posibilidá de falar y modificar les ordenances nel casu de que fora preciso”, esplica con arguyu. Al respeuto, destaca l’apoyu que tuvo’l Conceyu de Noreña de la Xunta pola Defensa de la Llingua Asturiana y Iniciativa pol Asturianu, “dalgo que nos prestó muncho”, al igual que de l’Academia de la Llingua Asturiana “a nivel institucional y xurídicu”.
  Tampoco nun quixo escecer el papel que xugó la Direición Xeneral de Planificación Llingüística y Normalización, “que nos facilitó’l so estudiu xurídicu, lo que reforzó la nuesa posición y nos permitió pisar en firme”.
“Fai normal lo que yá ye normal”
  Sobre la importancia de les ordenances pa la ciudadanía de Noreña, Iglesias destaca que la so entrada en vigor tres la espublización nel BOPA “fai normal lo que yá ye normal”. Nesi sen recuerda que l’asturianu yá tenía una presencia importante nel día a día municipal, anque ésti documentu permite regularizalo.
  Entrugáu pola posible puesta en marcha d’un Serviciu de Normalización, posibilidá que recueyen les propies ordenances, el conceyal apunta que “nun lo veo como una prioridá”, y recuerda “qu’en caso de tener falta d’ello, tenemos la posibilidá de collaborar colos de Siero y Llanera dientro la Mancomunidá de la Comarca del Nora’.                      Fonte: asturies.com
AdxuntuTamañu
PDF icon ordenances_asturianu_norena.pdf304.7 KB

28/10/16

La viesca centra’l XVII Seminariu d’Estudios Asturianos de la Fundación Belenos

Cartelu del XVII Seminariu d'Estudios Asturianos de la Fundacion Belenos

  La Puela torna a acoyer una edición nueva del Seminariu d’Estudios de la Fundación Belenos, la decimosétima, pa la que yá ta abierta la matrícula. Les actividaes van celebrase los díes 19 y 20 de payares baxo’l nome de ‘Asturies: la viesca habitada’.
  Tres centrar los dos seminarios últimos en bébores propies como la sidra y el vinu, y na cultura del gochu, la Fundación Belenos centra la so mirada nuna entidá clave pa entender el país, como ye la viesca. Al traviés de cinco conferencies, los asistentes van conocer la importancia de los árboles na nuesa sociedá, sobre los productos que se pueden sacar de la madera y inclusive lleendes alredor de la mesma, ente otros asuntos.
  L’actividá va principiar el sábadu a les 10 hores cola inauguración oficial, actu que va contar cola presencia del alcalde, José Antonio Mesa. Darréu, el naturalista Ignacio Abella va abrir les charres cola intervención ‘L’árbol y la viesca na sociedá tradicional’, a la que va siguir la doctoranda de la Universidá d’Uviéu Maider Fernández Zúñiga, que va falar de ‘Les madreñes: decoración tradicional y el so posible significáu’.
  Enantes de la xinta, prevista pa les 14.45 hores, va haber otra charra, entitulada ‘Cachapos: una güeyada hestórica, xeográfica y tipolóxica’, a cargu de Alfonso Fernández Canteli, profesor eméritu de la Universidá d’Uviéu. Tres garrar fuercies, a les 17 hores, l’etnógrafu y miembru de la Fundación Belenos, va sorprender a los presentes con ‘L’ánima de la viesca: mitos y llendes’.
  La intervención cabera del seminariu va protagonizala a les 18 hores l’inxenieru de Montes y sociu de Biesca Inxeniería, Adolfo Blanco, que va falar de ‘Viesques y xestión forestal n’Asturies: una visión integral y propuestes de futuru’. Llueu, como ye vezu, los presentes van poder disfrutar d’una cena a les 21.30 hores pa siguir col tradicional filandón del seminariu con música del país qu’acueye, a partir de les 23.30 hores, el Café Centro.
Tornería y paxos
  La xornada de domingu, baxo’l nome de Conceyu Abiertu, va principiar a les 11 hores con una amuesa de tornería tradicional a cargu de Vitorino García, tixileiru de Trabáu. Tres la mesma, Xosé García ‘Llábana’ va amosar, en comuña cola xente de L’Alcuentru, cómo se faen los paxos. La xinta, prevista pa les 14.30 hores, va servir como piesllu a esta edición del seminariu.
  Les persones que quieran formalizar la matrícula pa participar nesta actividá han de facer un ingresu de 30 euros, axuntando’l nome y apellíos, na cuenta bancaria de la Fundación Belenos: ES83-3059-0086-0923-4865-2823. Nel casu de que s’escueya tamién la opción d’agospiu con pensión completa –inclúi les dos xintes y una cena– en ‘La Nueva Allandesa’, han de sumar 60 euros a la cantidá inicial. Pa más información sobre’l XVII Seminariu d’Estudios Asturianos pue contautase cola Fundación Belenos nos teléfonos 985.24.48.11 y 616.242.319, o al traviés del corréu electrónicu seminariubelenos@gmail.com.               Fonte: asturies.com

El llunes fina'l plazu pa participar nel XXVI Premiu Teodoro Cuesta


 La recompensa ye de 1.200 euros.
 El Conceyu de Mieres, pente medies de la Casa Cultura y el Serviciu de Normalización Llingüística, entama una edición del Premiu Teodoro Cuesta de Poesía. Nél pueden participar toles persones que deseen que presenten un poemariu inéditu, orixinal y escritu en llingua asturiana.
 Los orixinales entregaránse en mano o per corréu certificáu na secretaría de la Casa de Cultura Teodoro Cuesta, asitiada na cai Manuel Llaneza númberu 8 (33600, Mieres del Camín), siendo'l día final del plazu esti llunes. El fallu del premiu, del que foi ganadora Marisa López Diz l'añu pasáu, va dase a conocer nel plazu d'un mes.
 Ente los compromisos del ganador pa llevar la recompensa de 1.200 euros ta la participación nel programa 'Alcuentros col autor', del Club de Llectores Atenéu de Turón, y na presentación del poemariu na propia casa cultura mierense cuando tea espublizáu. Ente los compromisos de la organización ta la promoción de la obra pal so asoleyamientu por una editorial.                                                                                                      Fonte: asturies.com

27/10/16

Galán reflexona sobre'l trabayu fechu na defensa del asturianu y presenta idees pa da-y futuru

 
Cartelu de la charra

 El presidente d'Iniciativa pol Asturianu protagoniza una charra de la Lliga Celta d'Asturies na Biblioteca Pública Xovellanos.
 Inaciu Galán va poner la conferencia '¿Qué podemos facer pa da-y futuru al asturianu? Reflexones sobre'l camín andáu; propuestes de futuru' nesta instalación xixonesa de magar les 19 hores de mañana. Nella va analizar el "percorríu fechu t'agora en defensa del asturianu, los llogros amalgaos y propuestes de futuru pa l'asturianu", según espliquen de la Lliga Celta d'Asturies.
 L'actu va encargase de presentalu Fernán Morán, presidente d'esti coleutivu qu'entama de manera periódica charres y visites guiaes a castros y otres edificaciones del país. La entrada ye llibre hasta completar aforu.                                                                   Fonte: asturies.com

Formientu celebra'l so décimu aniversariu con un actu nel Toma 3

Cartelu décimu aniversariu deFormientu

  Va presentalo Vanessa Gutiérrez y va consisitir nuna timba poética.
  La revista de lliteratura moza Formientu cumple diez años y va celebralo mañana con un actu nel xixonés Toma 3. Ésti va principiar a les 19 hores y nella van participar dalgunos de los munchos escritores qu'espublizaron nella nesti tiempu, ente los que ta la propia presentadora, Gutiérrez.
  "Esta fecha tan especial queremos abrila a tolos collaboradores de la revista a la llargo de los caberos diez años, pa que participéis con testos propios interviniendo nel actu", espliquen dende Formientu. Tamién va abrise l'eventu a tolos presentes que quieran participar na timba poética.
  D'igual forma, la organización recuerda qu'entovía ye posible unviar testos pa la espublización nel númberu 15 de la revista tres ampliar los plazos previstos pa los menores de 30 años. Los autores han d'unviar les sos creaciones acompañaos de la fecha y llugar de ñacimientu, el númberu teléfonu y una pequeña biografía al corréu revistaformientu@gmail.com.                                                           Fonte: asturies.com

L'Arqueolóxicu va acoyer la presentación d’un llibru sobre fórmules máxiques na tradición oral asturiana


 "Fórmulas mágicas de la tradición oral asturiana. Invocaciones, ensalmos, conjuros" ye una obra del investigador Jesús Suárez López que se va presentar esti xueves nel Muséu Arqueolóxicu. El llibru ta coeditáu por Trea y la Conseyería d’Educación y Cultura.
 El trabayu de Suárez López, ún de los máximos especialistes nel ámbito del patrimoniu inmaterial y creador del Archivu de la Tradición Oral d'Asturies, asitiáu nel Muséu del Pueblu d'Asturies, ye resultáu d'una investigación llarga que permite sacar a la lluz rellaciones ente les invocaciones, ensalmos y esconxuros qu'entá se reciten n'Asturies con otros que se documenten en distintos países europeos, dalgunos inclusive nel sieglu IX.  El llibru zarra un gran llabor de campu, nel que collaboraron Xosé Antón Fernández 'Ambás' y Ramsés Ilesies, que dexó alcontrar delles fórmules enxamás enantes documentaes na tradición asturiana, como, por exemplu, les invocaciones a la mosca del ganáu, al perrucuspín o a la utre.
 El testu apurre una antoloxía d'estes invocaciones, ensalmos y esconxuros, y realiza un estudiu comparativu, cronolóxicu y espacial de les mesmes, configurando una espublización llamada a convertise nun referente nos estudios sobre patrimoniu inmaterial. La investigación qu'enconta la mesma foi una de les primeres en llograr el respaldu del Plan Nacional de Salvaguarda del Patrimonio Inmaterial, lo que-y dexó cuntar mientres tres años con financiamientu del Instituto del Patrimonio Cultural Español y de la Direición Xeneral de Patrimoniu Cultural.
 L’actu del presentación de ‘Fórmulas mágicas de la tradición oral asturiana. Invocaciones, ensalmos, conjuros’ va dar comienzu a les 19 hores nel Muséu Arqueolóxicu. La direutora xeneral de Patrimoniu Cultural, Otilia Requejo, va conducir l’eventu.        Fonte: asturies.com

26/10/16

El Conseyu Asesor de la Llingua de Xixón crea una Comisión de Siguimientu del Plan de Normalización

Conseyu Asesor de la Llingua de Xixón
  • . Xixón aprueba'l Plan de Normalización del asturianu cola abstención del PP
  • . Los quince puntos más destacaos del Plan de Normalización Llingüística de Xixón 2016-2019
  •   
  •     Na tarde del martes celebróse nel Centru de Cultura Antiguu Institutu una reunión nueva del Conseyu Asesor de la Llingua de Xixón. Nella creóse la tan demandada Comisión de Siguimientu del Plan de Normalización cola intención d’aconceyar una vez al mes.
       Esta comisión ta formada por cerca d’una decena de voluntarios de los partíos políticos y organizaciones que participen nel Conseyu Asesor de la Llingua de Xixón, que se reúne una veza al trimestre. D’esta forma se pretende facer un siguimientu mayor del cumplimientu de los 68 puntos del Plan de Normalización y de los plazos establecíos nél, axuntar propuestes y dar avisos d’actividaes a la conceyalía de Cultura y a la Oficina de Normalización Llingüística.
     Nel aconceyamientu d’ayeri, amás de falar de los avances fechos nel Plan de Normalización, tamién se votó la vicepresidencia del Conseyu Asesor, pa lo que se presentó como única candidata Nenaye Carbajal, la representante de la Tertulia Cultural El Garrapiellu, que tuvo’l preste de tolos presentes. Iniciativa pol Asturianu, mentes, aprovechó la cita pa recordar l’ausencia del asturianu de la documentación del procesu participativu del presupuestu de Xixón, lo que pa la organización “ye un casu claru de discriminación, yá qu’afecta a un procesu de participación democrática, onde’l drechu ciudadanu a usar la llingua propia del conceyu de Xixón ye especialmente sensible”.               Fonte: asturies.com

Delegación del Gobiernu da marcha atrás con respeuto a les ordenances d'asturianu de Noreña

 
Copia del requerimientu de la Delegación del gobiernu p’anular el Plenu del 28 d’abril

  Les conversaciones ente’l Conceyu de Noreña y Delegación del Gobiernu estatal n’Asturies llegaron a bon puertu y les ordenances d’asturianu nun van atopa más pilancos. En xunetu llegara a la Casa Conceyu un requerimientu p’anular el Plenu del 28 d’abril que les aprobaren al entender que’l testu entrepasaba les competencies municipales.
  “La Delegación del Gobiernu español n'Asturies tien asegurao a esti consistoriu que, a lo último, nun va presentar recursu énte’l nuestru alcuerdu plenariu d'aprobación de les mencionaes ordenances. Apoyaos nesta palabra, la ordenanza acaba salir publicada nel BOPA”, apunta l’Ayuntamientu nun comunicáu nel que destaca que “nunca compartimos” los argumentos utilizaos pa tratar de torgar el documentu.
  “Siempre caltuvimos que la nuestra regulación del usu del asturianu cumplia la llei y los mandatos constitucional y estatutariu de promoción y defensa del nuestru idioma y que’l requerimientu de Delegación del Gobiernu nun tinía fundamentu.  Y, poro, esti consistoriu dexó cumplir el plazu ensin anular la nuestra ordenanza”, aprobada colos votos favoratibles d’Independientes por Noreña (IPÑ), Foro, Izquierda Xunida (IX) y Conceyu Abiertu por Noreña, organización que propunxo les ordenances. Namái’l PSOE y el PP opunxéronse al testu.
  Dende’l Conceyu de Noreña agradecen l’asesoramientu y el sofitu mostráu nesti tiempu por delles asociaciones: “Iniciativa pol Asturianu y la Xunta Pola Defensa de la Llingua enseñáronnos el so apoyu dende'l primer momentu. L'Academia de la Llingua Asturiana y la Dirección Xeneral de Planificación Llingüística apurriéronnos argumentación xurídica enforma. A toos ellos damos-yos les gracies”.                                            Fonte: asturies.com
AdxuntuTamañu
PDF icon bopa_ordenanza_dasturianu_de_norena.pdf200.18 KB