Alcuentru con Miguel Mingotes

Esti llunes a les 19:30 hores nel CMI El Llano hai progamao un alcuentru col poeta Miguel Mingotes.

Con motivu de la inauguración de la esposición 'Coses Míes' , Miguel Mingotes mantendrá un alcuentru pa comentala col so particular inxenu y sentíu del humor. Conocíu pola so trayectoria lliteraria, fundamentalmente como poeta, Mingotes ye un d'esos creadores qu'estiende la so capacidá creativa a otros munchos campos.

Nesta ocasión amuesa la una esbilla de los sos trabayos nos qu'axunta imaxe y testu y qu'él mestu entitula 'Coses Míes', una mirada divertida, poética, personal dafechu, na qu'entra tou. Inxenu y xuegos de palabres, coles sos imáxenes, pa  contanos como ve'l mundu y la vida mesma.

La esposición 'Coses Míes' tará hasta'l 26 de febreru nel CMI El Llano.

Fonte: YeXixon.com

Iniciativa pol Asturianu va tar presente en Miranda nun alcuentru de blogueros

por Pablo R. Guardado

El IX Ancontro de Blogueiros an Miranda va contar con representación asturiana. Dellos miembros d'Iniciativa pol Asturianu desplácense a esti territoriu onde la variedá llocal del asturlleonés ye oficial pa participar esti sábadu nel eventu.

Baxo'l nome de 'Buolta al Praino' celébrase esta edición del alcuentru al qu'acude la organización asturiana col oxetivu de "siguir afondando nes rellaciones positives ente toles comunidaes de falantes del dominiu llingüíticu asturlleonés". D'esta forma van poder compartir esperiencies con blogueros de Miranda de l Douro y d'otros territorio de fala asturlleonesa.

Ente los coleutivos que tienen anunciada la so presencia tán Faceira, El Teixu o l' Associação de Língua Mirandesa. Les actividaes van principiar a les 9.30 hores y van allargase mientres tol día.
Fonte: Asturies.com

Softastur nel I Alcuentru ibéricu de traductores de software llibre a llingües minorizaes

Una representación del colectivu Softastur ta desplazada esta fin de selmana a Santiago de Compostela pa participar nel primer alcuentru ibéricu d'equipos de traducción de llingües minorizaes, que tien llugar nel Centro de Novas Tecnoloxías de Galicia.

Les xornaes, entamaes pol grupu gallegu Trasno, xurden cola idea de compartir el conocimientu alquiríu a lo llargu los años polos distintos grupos, pa deprender unos d'otros y intentar solucionar los problemes que xurden nos distintos proyeutos que trabayen.

Dos díes de charres y conferencies onde Softastur acude tamién cola idega de proponer alcuerdos de collaboración pal desendolcu de ferramientes y compartición de recursos y tiempu con otros equipos pa optimizar el funcionamientu d'unos proyeutos que, como Softastur, funcionen gracies al trabayu de voluntarios y son mayoritariamente autofinanciaos, refugando sovenciones públiques pa caltenese como proyeutos independientes.

Amás de Softastur y los anfitriones, Trasno, a les xornaes acuden grupos que trabayen col vascu (Librezale), aragonés (Softaragonés) y catalán (Softcatalà) amás d'un representante de Mozilla, empresa que desendolca el famosu restolador web Firefox.

En cuantes a la delegación de Softastur ta compuesta por cinco voluntarios, qu'ente otros, coordinen proyeutos como Firefox, Thunderbird, Ubuntu, Debian, CyanogenMod, Telegram o Gnome.

Fonte: Infoasturies

Coleutivos de promoción del idioma de tol dominiu llingüísticu participen esti sábadu nun alcuentru na Tierra de Miranda

Por Pablo R. Guardado

Iniciativa pol Asturianu va acudir esti sábadu al VII Ancontro Blogueiros de l Praino, que se celebra na población mirandesa de Cicuiro. La cita va contar cola participación de coleutivos de tol dominiu llingüísticu asturlleonés.

Inaciu Galán, presidente d’Iniciativa pol Asturianu, va encargase de zarrar l’alcuentru de blogueros, qu’esti añu se centra nel conocimientu de les realidaes llingüístiques hermanes del mirandés, cola charra ‘¿Qué podemos facer xuntos pola nuesa llingua?’, intervención na que va parase “nes distintes acciones que dende la entidá asturiana camienten que ye posible poner en marcha pa trabayar a favor de la llingua común compartida por asturianos, lleoneses y mirandeses, mesmo nel ámbitu llocal como nel internacional, onde la situación de la llingua asturiana preocupa a entidaes como’l Conseyu d’Europa, la UNESCO o l’Altu Comisionáu de Drechos Humanos de la ONX”. Enantes, va tomar la pallabra Amadeu Ferreira, de l'Associaçon de Lhéngua i Cultura Mirandesa, pa dar pasu darréu a Fernando Álvarez-Balbuena, de ‘El Teixu. Rede pal Estudiu y Defensa de la Llingua Asturllionesa’, que va falar ‘De llenguas y fronteiras’, y a Ricardo Chao, de l’Asociación Cultural Faceira,  que va tratar el tema ‘Mirandeses y llioneses: dous puebros vecinos y hermanos’.

Xuegos tradicionales, llectura de versos en toles variedaes, una xinta y una visita por Cicuiro son otres de les actividaes que van desendolcase a lo llargo de la xornada, que va principiar a les 9 hores, tando les charres previstes pa les 14 hores. La xente interesao en participar nesta xornada pue facelo inscribiéndose nel corréu lletrónicu elf_vlf@hotmail.com o nel teléfonu 918.217.183., col prefixu 351. 

Fonte: Asturies.com

Alcuentru col Seminariu de Filoloxía Asturiana en Corvera

L'Aula Polivalente del Centru Sociocultural de Les Vegues (Corvera) acueye esti martes 13 un alcuentru abiertu colos profesores de la Universidá d’Uviéu y miembros del grupu d’investigación "Seminariu de Filoloxía Asturiana", Ramón d’Andrés y Xulio Viejo. El martes 13 dende les 19 hores va desarrollase un alcuentru abiertu colos profesores de la Universidá d’Uviéu y miembros del grupu d’investigación "Seminariu de Filoloxía Asturiana", Ramón d’Andrés y Xulio Viejo, nel Aula Polivalente del Centru Sociocultural de Las Vegas/Les Vegues. L'Actividá ye d’asistencia llibre y de baldre. El Seminariu de Filoloxía Asturiana ye un grupu d’investigación de la Universidá d’Uviéu formáu nel 2003. Esti grupu asume como campu d’investigación de so tolo relativo al estudiu de la llingua y la lliteratura asturiana, tanto dende una perspectiva inmanentista como interdisciplinar. Dende eses premises vien favoreciendo distintos proyectos d’investigación mesmo que publicaciones de la temática más diverso (historia llingüística y lliteraria, dialectoloxía, sociollingüística, llingüística variacional, computacional y de corpus, etc.), col puntu común de xuntura d’una perspectiva innovadora y la busca de la escelencia científica. En representación del Seminariu de Filoloxía Asturiana van participar los profesores titulares de la Universidá d’Uviéu, Ramón d’Andrés y Xulio Viejo. El primeru ye autor de bien d’artículos y llibros ente los que pueden señalase títulos como Llingua y xuiciu, Cuestiones d’asturianu normativu, Franco nos diccionarios o’l recién Gramática comparada de las lenguas ibéricas. No tocante al segundu, ye autor d’obres como La formación histórica de la llingua asturiana, Llingua y cultura lliteraria na Edá Media asturiano-lleonesa, Pensar asturiano o Hablar en tiempo. Tamién son coordinadores de distintos proyectos d’investigación como l’Asturneo o l’Eslema. Tamién va participar nel alcuentru Esther Prieto, responsable d’Ediciones Trabe, editorial encargada de publicar la Revista de Filoloxía Asturiana y que pa la ocasión va traer una muestra de publicaciones venceyaes col estudiu y investigación de la llingua asturiana y que van tar a la venta esi día. Fonte: Infoasturies

La páxina del alcuentru internacional d’esperantistes inclúi versión n'asturianu

Los díes 15, 16 y 15 de marzu, les mocedaes esperantistes de la Península Ibérica van celebrar en Madrid el so Alcuentru Internacional. Pa informar de les actividaes punxeron en marcha una páxina web na que parte de los conteníos pueden lleese n’asturianu. El programa del Alcuentru d’esti añu “tará basáu de mena fondera na muticulturalidá y na diversidá”. Más información: Ver páxina web Fonte: Asturnews

La XPDLLA aconceyó cola Conseyera d'Educación y Universidaes

Carlos Pulgar ya Iris Díaz Trancho, miembros de la Xunta pola Defensa de la Llingua Asturiana (XPDLLA) aconceyaron estos díes con Ana Isabel Álvarez González, Conseyera d'Educación y Universidaes, que según la organización “mostróse receptiva pa velar pol cumplimientu de la Llei d'Usu y a tar atenta pa que tolos centros –yá sían públicos, privaos o concertaos– cumplan cola ufierta xeneralizada de l'asignatura d’asturianu”.

Otru de los compromisos d’Álvarez González ye’l de tener nel organigrama de la Conseyería “una persona encargada de coordinar y apoyar les iniciatives referíes a la presencia del idioma dientro del sistema educativu”.

Los representantes tresmitiéron-y “les reivindicación básiques y clásiques sobre la situación de la llingua asturiana en caún de los niveles educativos”, que Pulgar esplicó “la propia conseyera reconoció que lleven munchos años pendientes de solución”.

Amás, la Xunta pidió “l'usu normalizáu del asturianu dientro de la estructura interna de la Conseyería y solicitaron que se creyara un serviciu de normalización, coordinación y apoyu didáuticu a l'asignatura”.

No que cinca al reconocimientu de la especialidá d'asturianu pa los profesores, la Conseyera tresmitió-y a la organización que “cuando de la Universidá salgan los primeros titulaos de la reordenación universitaria nueva, esi va ser el momentu y la oportunidá pa reconocer a los enseñantes d'asturianu n'igualdá de condiciones que nes demás materies”.

Fonte: Asturnews

Alcuentru de Mocedá Europeo Falante de Llingües Minorizaes

Xunta Moza participa nel Alcuentru de Mocedá Europeo Falante de Llingües Minorizaes.

La mocedá de la XPDLLA, Xunta Moza, tuvo representando a los xóvenes falantes asturianos nel Alcuentru Internacional de Mocedá Europeo Falante de Llingües Minoritaries/Minorizaes, celebráu na ciudá vasca de Gasteiz. Amás de los representantes asturianos, tuvieron mozos falantes de vascu, bretón, corsu, gallegu y catalán.

Los representantes de Xunta Moza pudieron certificar nesti actu que “mientres que la mocedá d’otres comunidaes peninsulares tienen garantizada, por exemplu, la educación de y na so propia llingua, n’Asturies siguen ensin respetase nin garantizase unos drechos mínimos que permitan la supervivencia del idioma y que protexan a los falantes de la llingua minorizada”. Una situación que dexa a los asturianos como “ciudadanos de segunda”, afirmen.

Nel Alcuentru ellaboróse y firmóse un manifiestu robláu por tolos participantes:

Manifiestu de la mocedá poles llingües – Vitoria-Gasteiz 2011

Mocedá falante de llingües minoritaries y minorizaes d’Europa aconceyámonos en Vitoria-Gasteiz ente los díes 19 y 22 de xunetu del 2011, y alcordamos:

1) Toles llingües son iguales por naturaleza y, por ende, toes deben tener los mesmos drechos y deberes, y les mesmes oportunidaes d’usu.

2) Les nueses llingües conformen la nuesa identidá y, por ello, nun vamos renunciar a elles y adoptar formes de pensamientu únicu. La nuesa riqueza ye la nuesa identidá.

Les nueses mas y pás dexáronnos la meyor de les herencies, un patrimoniu cultural y llingüísticu al que nun vamos a arrenunciar, per contra, va ser la riqueza que dexemos a xeneraciones futures.

3) Comprometémonos a utilizar, defender y potenciar les nueses llingües en tolos ámbitos de la vida. Amás, comprometémonos a allegar los nuestros idiomes a aquelles persones que nun los conocen y xenerar actitúes positives p’haza ellos.

4) Demandamos a les autoridaes la reconocencia llegal de toles llingües en condiciones d’igualdá. De la mesma manera, la defensa y promoción de tolos idiomes, el drechu a una Educación íntegra nes nueses llingües y la esistencia d’unes polítiques llingüístiques qu’aseguren l’usu en tolos ámbitos.

Defendemos l’intercambiu llingüísticu y cultural porque les nueses llingües contribúin a la sostenibilidá y a la bayura mundial, sumen y non resten.

Somos el futuru.

Les nueses llingües son el futuru.

El futuru escomienza güei.

Fonte: Asturnews