Iniciativa pol Asturianu celebra la posibilidá d’algamar una solución a nivel estatal pa cola Academia de la Llingua Asturiana

La organización Iniciativa pol Asturianu anunciara va meses que diba solicitar a los grupos nel Congresu la presentación d'una enmienda parcial a los Presupuestos Xenerales del Estáu que reclame una partida pa l'Academia de la Llingua Asturiana, lo que consideren una inxusticia pa cola llingua asturiana. Depués de los movimientos de Foro y les Mocedaes socialistes no tocante a esti tema: foron Podemos, Foro y PSOE los que presentaren estes enmiendes nos presupuestos xenerales del Estáu pa que l’Acadamia de la llingua asturiana tenga un presupuestu igual que la tienen les demás academies del territoriu español.

El casu del PSOE sería especialmente positivo pues facilitaría l’aprobación. Como diría Antonio Trevín Lombán nuna conocía rede social: “Esti añu’l Grupu Socialista fizo tamién enmienda nos PGE'2017 pa financiar l’Estáu a l’Academia de la Llingua Asturiana. Vamos votar la nuesa y toles d’aquellos grupos que vayan nel mesmu camín”.

Dende la entidá, encamentamos que otros partíos de la cámara a que voten a favor, al igual que n’otres ocasiones onde toos votaren favoratiblemente, sacantes del Partido Popular que votó a la escontra d’esta midida. Esperamos qu’esta situación nun se repita y que con esta enmienda la nuesa Academia tenga una financiación tamién estatal como tienen el resto de les academies, entamando a tener consensu políticu nos asuntos venceyaos al idioma d’Asturies.

Iniciativa pol Asturianu vien proponiendo dende 2013 a los grupos políticos con representación por Asturies nel Congresu la presentación d’enmiedes a los Presupuestos Xenerales pa que l'Academia de la Llingua Asturiana cunte con una partida, como tienen la española, catalana, vasca y gallega, amás d’otres instituciones académiques presentes nuna partida dedicada a la so financiación.

Fonte: Iniciativa pol Asturianu

El camín del futuru pasa pela oficialidá

INACIU GALÁN Y GONZÁLEZ

Presidente d'Iniciativa pol Asturianu

Una xornada como la vivida estos díes atrás, del Día de les Lletres Asturianes, ye un bon momentu pa parar y reflexonar sobre les circunstancies d'esti idioma, los pasos daos y el camín que quedá entá por percorrer.

La sociedá asturiana tien nel añu 2017 una percepción más positiva de la so llingua propia. Güei yá naide pon el dulda la importancia del idioma asturianu como elementu cultural y la sociedá ye cada vegada más consciente de la necesidá de tomar midíes qu'eviten un futuru que s'anuncia nada positivu pa la supervivencia de la llingua asturiana (y del gallego-asturianu nel Navia-Eo). Prueba d'ello ye l'ésitu de l'asignatura d'asturianu, escoyida de forma masiva pese a la so voluntariedá en circunstancies inxustes de competencia, por exemplu col francés, les audiencies de la poca programación n'asturianu qu'emite la RTPA o l'ésitu de los grupos musicales qu'usen l'asturianu en tolos xéneros.

Los mieos del pasáu a la oficialidá, animaos dende determinaos sectores contrarios a la supervivencia del idioma, nun tán presentes yá na mayor parte de la sociedá asturiana, que ven como necesario tomar les midíes pa que l'asturianu tenga a lo menos una oportunidá pa siguir siendo la llingua propia de los asturianos y asturianes. Y güei, partíos de la izquierda y la drecha, que representen yá a 17 de los 45 diputaos de la Xunta Xeneral, apuesten nos programes pola oficialdá. Ye yá una cuestión tresversal y de consensu creciente.

A lo llargo d'esta pasada Selmana de les Lletres Asturianes el gobiernu y tolos grupos políticos de la Xunta Xeneral celebraron la nuesa lliteratura, un homenaxe a les escritores asturianes de tolos tiempos, dende Xosefa Xovellanos y Enrique González Rubín a les más moces escritores, pasando per figures como María Xosefa Canellada, Nené Losada o Berta Piñán. Pero de poco va sirvinos faer homenaxe a les Lletres Asturianes, si la llingua na que s'espresen, l'asturianu, nun sigue teniendo futuru. Y les midíes a tomar llevamos repitiéndoles, y nun pue dicise que nun insistimos ensin parar, dende va más de cuarenta años. Namás hai que poner la oreya, porque les ferramientes tán ehí y les esperiencies d'ésitu d'otres llingües cercanes con circunstancies asemeyaes a les del asturianu son una bona guía pal llabor, nun tenemos qu'inventar la pólvora.

El camín del futuru pal idioma pasa necesariamente pel establecimientu del marcu llegal qu'otorga la oficialidá na Constitución española. Asturies lleva más de trenta años de retrasu na toma d'esta midida imprescindible pa garantizar el futuru del idioma y los drechos civiles de los asturfalantes. Sicasí, tovía tamos a tiempu, aprovechemos l'impulsu d'esta Selmana de les Lletres pa construyir un consensu políticu alredor del idioma y sobre manera, un consensu social, una mayor implicación de la ciudadanía, llevando una mayor presencia y usu del asturianu a los sos trabayos, empreses, asociaciones y families. Porque na nuesa vida tenemos de faer oficial l'asturianu dende yá, porque ye la nuesa responsabilidá da-y futuru al asturianu.

Fonte: La Voz de Asturias

Oficialidá ye futuru pal asturianu

 

Güei celébrase'l Día de les Lletres Asturianes y un añu más, miles de persones vamos salir a la cai, como dende va más de cuarenta años, pa reclamar futuru pa la llingua asturiana. Anque se dieron pasos alantre importantes que meyoraron la percepción social del idioma, como la tímida presencia nel sistema educativu o nos medios de comunicación, lo cierto ye que los estudios siguen falando d'una perda de falantes que va llevanos a la estinción del asturianu en menos tiempu del que pensamos.

 

Ye la hora d'actuar, de tomar midíes que vayan más allá del simbólicu apoyu al asturianu que se fai en díes como esti. Les instituciones internacionales lleven décades avisando, la UNESCO, el Conseyu d'Europa... Paez que fuera ta más claro qué ye lo qu'hai que faer col asturianu o que dalgunos quieren más nun sentir estes recomendaciones d'organismos internacionales. Y les asturianes y asturianos, como responsables del curiáu de la llingua asturiana y del gallego-asturianu, somos los guardianes d'un patrimoniu inmaterial que ye de tola humanidá, tócanos mantenelu vivu y proyeutalu hacia'l futuru, polo que tenemos que faer que los responsables políticos sientan estes reivindicaciones.

 

Nun valen escuses, los nuesos políticos saben qué hai que faer. Nun tenemos más que mirar a los nuesos vecinos gallegos pa ver como unes polítiques actives de promoción y normalización del idioma son quien a faer muncho pa revertir un procesu de sustitución llingüística como'l que vivimos n'Asturies.

 

Pero n'Asturies nun cuerre peligru namás un patrimoniu cultural y llingüísticu. La falta d'oficialidá conviértenos a los falantes d'asturianu en ciudadanos de segunda, con menos drechos civiles que les persones que deciden o a les que nun-yos queda más remediu qu'espresase en castellán. La oficialidá ye la ferramienta que pue garantizar un cambiu nesti tratu desigual, antidemocráticu, anticonstitucional y que ye dificil d'entender dempués de más de trenta años d'oficialidá del restu de les llingües del estáu. 

 

Anque la responsabilidá principal de la situación del asturianu ye de los nuesos gobernantes, yá qu'ellos tienen les ferramientes necesaries pa camudala, la ciudadanía tien tamién que faer más, tenemos que llevar la oficialidá al nuesu día a día, reclamando mayor presencia del asturianu en tolos ámbitos, pero tamién faciendo usu del idioma, deprendiéndolu si nun lo sabemos, llevándolu a los nuesos trabayos, empreses, asociaciones y families. Porque oficialidá ye futuru y el futuru del asturianu depende de nós. 

 

Inaciu Galán y González

Presidente d'Iniciativa pol Asturianu

Fonte: El Comercio

Iniciativa pol Asturianu fai empréstamos los llunes de 19 a 21 hores na so biblioteca

L’actu, que tuvo llugar nel Conseyu de Mocedá de Xixón, entamó coles pallabres del presidente Inaciu Galán que faló de la importancia de tener un espaciu pa la lliteratura n’asturianu: “Faimos muncha ilusión poder ufrir a la sociedá esta biblioteca que ye un vieyu proyeutu d’Iniciativa pol Asturianu pa da-y visibilidá a la creación lliteraria n’asturianu. Facémoslo gracies a les donaciones de socios, editoriales y otres entidaes que mos fueron donando llibros a lo llargu de los cinco años d’actividá de la organización”.

Depués fíxose una llectura de poemes, onde escritores como Diego Solís, Sabel Tuñón o Xuan Porta recitaron dalgunes creaciones que foron bien recibíes per una audiencia ansiosa de lliteratura, que namás acabar l’actu yá acudió a la secretaría de la entidá a facese con dalgunos llibros.

Per otru llau esi mesmu día, Iniciativa pol Asturianu entamara una campaña cola que los nuevos socios van poder escoyer ente cuatro llibros de los dedicaos a autores de la Selmana de les les Lletres Asturianes cola opción d’unvialos a un colexu o institutu y difundir asina la nuesa lliteratura.

Nun principiu, l’horariu d’empréstamu ye namás los llunes de 19 a 21 hores, pero la organización espera dir ampliándolu a más díes en función d’una demanda que paez tar medrando nestos díes postreros a la presentación. Pueden garrar llibros tanto socios como non-socios, con un máximu de tres obres y por un plazu de quinces díes.

Fonte: Iniciativa pol Asturianu

Iniciativa pol Asturianu va participar un añu más na Manifestación pola Oficialidá col llema "Oficialidá pal asturianu ye futuru"

Esti vienres 5 de mayu los asturianos y asturianes vamos volver a salir a la cai pa reivindicar la reconocencia del estatus llegal d'oficialidá pal idioma nel Día de les Lletres Asturianes. Dende Iniciativa pol Asturianu sofitamos un añu más esta manifestación, participando de la marcha y animando a tolos nuesos socios, simpatizantes y en xeneral, a la sociedá asturiana, a llevantar la voz pola so llingua, que carez tanta necesidá d'acción per partes de les alministraciones, asina como polos falantes, que siguen ensin ver los sos drechos civiles básicos reconocíos.

Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial. Ye por ellos qu'esti añu vamos ufrir dellos materiales pa usar na rede, nos perfiles o como difusión, asina como pa imprimir y usar en cualesquier ámbitu, col llema "Oficialidá pal asturianu ye futuru".

Con esti llema van vendese camisetes per encargu a lo llargo d'estos díes, entregándose na propia manifestación.

La Manifestación pola Oficialidá va salir el vienres 5 de mayu a les 19:30 hores de la Estación del Norte d'Uviéu. Animamos a toles persones enfotaes nel futuru del idioma a participar con nós na manifestación organizada pola Xunta pola Defensa de la Llingua Asturiana.

Iniciativa pol Asturianu recuerda dempués de la manifestación va celebrase nel Teatru Campoamor la Xunta Estraordinaria de l’Academia de la Llingua Asturiana y que la entrada ye llibre y de baldre. Animamos a la xente a participar d'esti actu de sofitu a la institución, qu'esti añu va entregar nel actu la primer edición del Premiu Nacional de Lliteratura Asturiana.

Fonte: Iniciativa pol Asturianu

Iniciativa pol Asturianu aconceyó col decanu de la Facultá de Filosofía y Lletres

Dos miembros d’Iniciativa pol Asturianu aconceyaron col decanu de la Facultá de Filosofía y Lletres, José Antonio Gómez Rodríguez, y algamaron con elli dellos acuerdos y compromisos col representante de la facultá como que la facultá tea rotulada n’asturianu, amás d’en castellán.

Iniciativa pol Asturianu representada por Darío de Dios y Claudia Elena Menéndez─ recientemente na prensa polos sos artículos de sofitu a l’Academia de la Llingua Asturiana─ tuvo un conceyu con  José Antonio Gómez Rodríguez, decano de la facultá de Filosofía y Lletres de la Universidá d’Uviéu, algamando dellos compromisos que van facer que l’asturianu tenga más y meyor usu dientro de dichu centru.

Ente les propuestes, llegaronse a acuerdos a estudiar per partel decanu en delles  estayes: cartelería, solicitando que la facultá de Filosofía y lletres tea rotulada n’asturianu, amás d’en castellá; rellaciones internacionales, cola propuesta d’un conveniu con universidaes americanes que tienen investigación n’asturianu pa intentar xestionar dalgún conveniu que pueda resultar interesante pa los alumnos del Minor d’Asturianu. Por último tamién se-y plantegó la creación d’una plaza pa la torna de la páxina web de la facultá al asturianu, asina como facer dalguna actividá qu’incluya l’asturianu nos actos de los Premios Princesa d’Asturies que se desendolquen na Facultá de Filosofía y Lletres.

Poro, la rotulación ye un compromisu del Rector na so campaña eleutoral, polo que nun pue considerase como dengún nuevu avance, yá qu’hai un compromisu firme de desenvolver rotulación en llingua asturiana cada vegada que tengan d’anovase  cartelería institucional.

La entidá ta satisfecha colo que puede ser un pasu alantre pal asturianu nun ámbitu clave como ye la universidá asturiana si’l decanu cumple colos compromisos. De la mesma manera, Iniciativa pol Asturianu confía en que se pueda trabayar pol enanchamientu de la titulación d’asturianu si, como s’espera, estes propuestes algamen resultaos.

Fonte: Asturnews

Iniciativa pol Asturianu saca a la venta camisetes col llema “Oficialidá pal asturianu ye futuru”

Iniciativa pol Asturianu vieno acabante de facer anuncia que va sacar darréu a la venta camisetes col llema “Oficialidá pal asturianu ye futuru”. La organización va vender estes camisetes col envís de visibilizar esi mensaxe na manifestación del vienres 5.

Iniciativa pol Asturianu pon a la venta esti nuevu productu por encargu que va dir con un llema bien representativu del envís de la organización: “Oficialidá pal asturianu ye futuru”. La organización va entrgar les camisetes encargaes na manifestación del 5 de mayu, col envís de ayudar al sofitu d’una movilización que consideren fundamental pa defender l’asturianu y na qu’acompañaran a otres organizaciones y miembros de la sociedá civil que defienden los drechos llingüísticos de los asturianos.

Les camisetes son de color blancu y pueden escoyese ente distintes talles (S, M, L, XL, XXL) d’home o de muyer. El preciu de salida son 15€ (12€ pa los socios de l’asociación). Los pidíos tienen de facese encargándoles nel corréu de la entidá: contautu@iniciativapolasturianu.org

Fonte: Asturnews

Iniciativa pol Asturianu inaugura la so biblioteca con motivu del Día del Llibru

Iniciativa pol Asturianu vieno acabante anunciar qu’esti vienres 21 va facer pública l’apertura d’una biblioteca dafechamente n’asturianu en Xixón, que dirá allugada nel Conseyu de la Mocedá.

Iniciativa pol Asturianu va inaugurar una biblioteca propia esti vienres con motivu del Día del llibru que se celebra’l 23 d’abril. La biblioteca, asitiada nel Conseyu de Mocedá de Xixón, tien l’envís de servir pa dar a conocer la lliteratura asturiana al mayor númberu de xente posible. Nel actu nel que va tar presente’l presidente de la entidá y dalgunos escritores asturianos, tovía por confirmar, va facese, una llectura de poemes abierta al públicu y amás va tener llugar un pinchéu.

Per otru llau esi mesmu día, Iniciativa pol Asturianu entama una campaña cola que va regalar cuatro llibros a escoyer ente los dedicaos a autores de la Selmana de les les Lletres Asturianes a los y les que se faigan socios cola opción d’unvialos a un colexu o institutu y difundir asina la nuesa lliteratura.

L’actu va ser esti vienres nel Conseyu de Mocedá de Xixón (Avenida Manuel Llaneza, 68) dende les 19 hores na sala onde va ser la biblioteca y ta convidao tol que quiera ser partícipe d’esti nuevu ya ampliu espaciu pa llectura n’asturianu.

Fonte: Asturnews

Cuestión de responsabilidá

Claudia Elena Menéndez Fernández, responsable d’Enseñu Universitariu d’Iniciativa pol Asturianu

Nestes últimes selmanes tamos asistiendo a la defunción lenta y silenciosa de l'Academia de la Llingua Asturiana (ALlA) n'otru exerciciu más de dexadez ya irresponsabilidá política. Dende Iniciativa pol Asturianu entrugámonos cómo ye posible, depués de 37 años de creación de la institución, tener llegao a esta situación. El futuru de l'ALlA ta en xuegu y, con él, el de les cuatro persones que trabayen ellí dende va munchos años y el de la propia llingua asturiana, ¿cómo s'entiende asina tar a piques de ver desapaecer una institución creada al amparu del entós Conseyu Rexonal como culmen d'ún de los suaños de Xovellanos?, ¿ye consciente la clas política asturiana de que la desapaición de l'ALlA supón un golpe al procesu normalizador ya normativizador que con tantes torgues vien desendolcándose n'Asturies dende va 37 años?, ¿llegará la dexadez hasta esi puntu por nun ser quien a consensuar un alcuerdu pa iguar el problema?, ¿cómo encaxa esto con eses declaraciones de «hai que protexer l'asturianu» coles que tantes veces s'enllenen la boca?, ¿por qué tolo qu'arrodia la llingua asturiana ye siempre oxetu d'incompetencia y incumplimientos llexislativos?, si la situación xurídica de l'ALlA yera realmente un problema, ¿cómo pudo decatase d'ello l'Alministración 37 años depués?... Estes preguntes -y tantes otres que podíemos facer- nun son otro que'l frutu d'una irresponsabilidá caltenida y apoyada pol Gobiernu del Principáu y por tolos partíos de la Xunta, la historia que desgraciadamente mos tocó vivir.

La historia de la llingua asturiana ye la de los continuos agravios per parte d'una clas política que sistemáticamente la ignoró y marxinó, porque nunca la quixo. Porque nunca yera'l momentu, nunca yera'l momentu de la oficialidá, de la especialidá docente, de la vehicularidá del idioma na enseñanza, de la recuperación toponímica, de la normalización real nos medios; nunca yera, en definitiva, el momentu de comprometese. L'amenaza de desapaición de l'Academia ye otru agraviu más que se suma a una llista interminable.

Encamentamos a la clas política la busca d'una solución digna, eficaz y viable pa una institución, l'ALlA, que ye la garante de la normativa del idioma y una de les responsables principales del llabor científicu, investigador ya formativu sobro la llingua; encamentamos a la clas política que faiga esame de conciencia, dexe los disimulos y les mázcares y apueste de verdá por midíes que garanticen los derechos de los asturfalantes. Ye una cuestión de responsabilidá.

Fonte: La Voz de Asturias

L’ALLA queda un añu más ensin partida nos Presupuestos Xenerales

Les diferentes academies del castellanu, gallegu, eusquera y catalán reciben una aportación estatal que, quitando la RAE (1.661.290 euros), ye de 283.000 euros pa cada idioma. L’Academia de la Llingua Asturiana (ALLA), mentes, sigue ensin recibir partida nenguna de los Presupuestos Xenerales.

Iniciativa pol Asturianu lleva años demandando que s’igüe esta situación, ensin ésitu pola postura contraria del Partido Popular (PP), con mayoría absoluta hasta esta llexislatura. Toles enmiendes a los Presupuestos Xenerales del Estáu presentaes al respeuto refugáronse col votu en contra tamién d’UPyD.

El cambiu de repartu d’escaños abriría la posibilidá d’algamar sofitu a una posible enmienda pa que l’ALLA recibiera, al igual que les demás, una partida de los Presupuestos Xenerales del Estáu, polo que la organización que trabaya pola normalización del asturianu insiste nesta vía de financiación pa l’ALLA, entidá que sigue agobiada económicamente p’afrontar les nómines pese a que’l conseyeru Genaro Alonso anunciara’l día 4 que’l problema yá taba solucionáu. Según les cifres aportaes pola organización, l'Institut d'Estudis Catalans recibe 283.070 euros, al igual que la Real Academia Galega, mentes  que l’eusquera lleva una cifra mui asemeyada repartida ente la Euskaltzaindia (153.180) y la Eusko Ikaskuntza (129.900).

Fonte: Asturies.com

Iniciativa pol Asturianu noma a García Hoyuelos embaxador del idioma

• . García Hoyuelos presenta'l so proyeutu nuevu en toles llingües ibériques, ‘Aire, fuego y deseo’

Na semeya,  Inaciu Galán,  Sabel Ces  y  Juan Carlos García Hoyuelos

 L'escritor castellanu tuvo en Xixón pa presentar el so proyeutu poéticu-musical en toles llingües ibériques 'Aire, fuego y deseo'.

 "Esti títulu que recibo con mucha ilusión y sorpresa (nin en suaños imaxiné que fora merecedor de tal gallardón), anímame, entovía más, a siguir defendiendo la oficialidá y proteición de la llingua d'asturianos, llioneses, mirandeses (Distrito de Braganza, Portugal, onde llamativamente ehí si ye oficial) y estremeños, éstos últimos como falantes d'una variedá llingüística. Unos llamaránla asturlllionés, nome consensuáu que define'l so orixe (ye llingua tan propia de los asturianos como de los llioneses, del territorio de los astures), y otros polos sos glotónimos (asturianu, llionés y mirandés). Y pa defender esa oficialidá del asturllionés sólo emplegu un arma; nun ye otra que cola pedagoxía y la razón aplastante qu'otorga la verdá podemos reivindicar un xustu tratu ente les llingües falaes n'Iberia. ¿Cómo ye posible que pueda haber llingües oficiales y non oficiales? ¿Ye constitucional esti tratu descrimimatoriu por parte de les instituciones?", señala Juan Carlos García Hoyuelos tres visitar el país.

 Iniciativa pol Asturianu decidió otorgar el gallardón de 'Embaxador de la Llingua Asturiana' al poeta burgalés nacíu en Basauri pol so proyeutu poéticu-musical en toles llingües ibériques y el ladino (sefardí), que sofitó dende un primer momentu por entendelu "como un acercamientu ente toles llingües ibériques y que, sobremanera, ye una bona noticia pa la fastera de fala asturllionesa, territoriu que necesita de axuntar fuercies y texer llazos p’algamar una presencia del idioma muncho meyor fuera d’Asturies". L'actu, celebráu el vienres en La Caja de Músicos, foi una amiestu ente un recital de los autores que fixeron les tornes al asturianu, asina como de voluntarios que quixeron compartir col públicu los poemes del llibru, el visionáu d’estremaos videoclips y un conciertu de Toli Morilla.

 'Aire, fuego y deseo' ye la segunda iniciativa d'esti calter entamáu por García Hoyuelos, que nel 2012 espublizó 'Se lo dije a la noche'.                                                  Fonte: asturies.com

Entréguense en Xixón los diplomes d´un taller lliterariu dirixíu por Vanessa Gutiérrez

Na imaxe, Vanessa Gutiérrez

 Iniciativa pol Asturianu va facer entrega de los diplomes d´esti taller lliterariua a los alumnos y alumnes que superaren el cursu dirixíu pola escritora asturiana Vanessa Gutiérrez dende´l mes d’ochobre.

 Nel actu tará Inaciu Galán, presidente de la entidá, y Vanessa Gutiérrez, como profesora faciendo entrega de los diplomes dambos dos. Dende Iniciativa pol Asturianu afirmen que “Tamos mui satisfechos del resultáu d´esti cursu como primer esperiencia pa tener al asturianu como llingua vehicular y non solo pa cursos puramente llingüísticos. Vamos siguir con estes esperiencies nel futuru

 L’actu de pieslle y entrega va ser esti xueves nel Conseyu de Mocedá de Xixón (Avenida Manuel Llaneza, 68) a les 19 hores. Y tán convidaos tolos participantes nel cursu, asina como los interesaos n’averase a los nuevos cursos qu’entama Iniciativa pol Asturianu dende’l mes d’abril y que pueden consultase na páxina oficial.     Fonte: Infoasturies.com

Iniciativa pol Asturianu va tener un puestu informativu nel micru abiertu de Fame Poétika

Iniciativa pol Asturianu tendrá presencia con un puestu informativu na timba poética que va facese esti vienres 24 en Mieres dende les 19 hores na llibrería-café ‘La llocura’.Nel puestu van poder mercase llibros, revistes, amás de servir d’información sobre la situación del idioma y cómo la nuesa organización desendolca un llabor perimprotante na so dignificación.

Per otru llau, la timba poética ye un micro abiertu al que podrán apuntase toles persones que lo deseen, especialmente les que quieran lleer testos propios, anque esto nun ye fundamental. Como ye vezu, nesti tipu d’eventos, agradécense les participaciones ya seya de músicos, poetes o artistes de tou tipu que quieran acercase a esti puntu d’alcuentru pal arte en direutu. Nesta ocasión , el coleutivu, vien acompañao de la banda de versiones rock “El hombre de las estrellas” que, dende les 19 hores, entamará l’eventu a ritmu de guitarra llétrica.

El colectivu de poesía Fame Poétika, que lleva cuatro años xestionando este tipu d’alcuentros poéticos y usando con total normalidá l’asturianu nos sos eventos, visita Mieres por segunda vez na so hestoria dende que’l caberu añu presentaren ellí’l so poemariu ‘Seguimos con Fame’ na Casa de cultura Teodoro Cuesta. Y esti vienres, dende les 19 hores na llibrería-café ‘La llocura’, quieren volver a semar otru ésitu pa la poesía n’Asturies.

Fonte: Iniciativa pol Asturianu

Iniciativa pol Asturianu presenta'l proyeutu poéticu-musical "Aire, fueu y deséu"

Iniciativa pol Asturianu va presentar, en collaboración col poeta Juan Carlos García Hoyuelos, el proyeutu poético-musical "Aire, fuego y deseo" (n'asturianu "Aire, fueu y deséu”), tornáu a toles llingües ibériques y al ladinu (sefardí).

La entidá tien a bien sofitar un proyectu qu’entiende como un acercamientu ente toles llingües ibériques y que, sobremanera,  ye una bona noticia pa la fastera de fala asturllionesa, territoriu que necesita de axuntar fuercies y texer llazos p’algamar una presencia del idioma muncho meyor fuera d’Asturies.

El llibru cunta con bon númberu d’autores asturianos, lleoneses y mirandeses como Berta Piñán, Pablo Texón, José Alfredo Hernández Rodríguez, Roberto González-Quevedo o Amadeu Ferreira. Esta obra lliteraria vien acompañada d’un discu con cantares de músicos de la talla de Tarna, Toli Morilla o Manuela Elena. Amás de la nuesa collaboren con esta obra instituciones como l’Academia de la Llingua Asturiana, y les asociaciones llioneses y zamoranes Faceira y Furmientu.

La "Presentación-Recital" va ser el vienres 31 a les 21 hores nel espaciu de La Caxa de Músicos (C/ Buen Suceso) en Xixón y va cuntar cola presencia y llectura de tolos autores y collaboradores del llibru na fastera asturiana ente los que s’alcuentren grandes nomes de la nuesa lliteratura. Al términu del actu, va facese una folixa abierta pa tol que-y pueda interesar.

Fonte: Iniciativa pol Asturianu

Iniciativa pol Asturianu presenta los sos cursos de primavera-branu en Xixón

Los cursos vas ser d'asturianu, creción poética, comic y teatru van entamar nel mes d'abril. La matricula ta abierta hasta'l 26 de marzu.

Amás de los yá conocíos cursos d’asturianu, Iniciativa pol Asturianu ufierta la posibilidá de matriculase en cursos de teatru, creación poética y cómic. Poro, la duración de los cursos va tener modificaciones en comparanza con otros años por mor d’estes nueves incoporaciones y les sos concretes necesidaes. Asina, los cursos van durar 35 hores, sacantes el cursu de creación poética que va durar 16 hores, y van celebrase dende'l mes d'abril a xunu.

Los mayestros de los cursos serán Sergio Buelga pal de teatru, Diego Solís nel de creación poética y Ruma Barbero pal de comic.

Como n’otres ediciones, los cursos d'asturianu van cuntar con un diploma d'aprovechamientu otorgáu pola Academia de la Llingua Asturiana pa l'alumnáu que supere'l cursu, nel restu de los cursos entrégase diploma d'aprovechamientu d'Iniciativa pol Asturianu.

La matrícula fadrase efectiva col ingresu de 60 euros (50 euros pa socios d'Iniciativa pol Asturianu), a diferencia del cursu d'Introducción al Cómic que tien un preciu de 70 euros (60 euros pa socios) o el de Creación poética que son 40 euros (30 euros pa socios). Tolos cursos incluyen los materiales pertinentes.

Los y les interesaes pueden matriculase nesti formulariu.

Pa más información pueden ponese en contautu cola organización a traviés del so corréu: info@iniciativapolasturianu.org

Fonte: YeXixón.com

Iniciativa pol Asturianu celebra la puesta en marcha del plan pilotu en primaria

Iniciativa pol Asturianu celebra la puesta en marcha del plan pilotu pal asturianu como llingua vehicular en primaria y “que se cumpla la llexislación y los neños d’infantil vayan poder tener clases d’asturianu”.

L’asociación de defensa del idioma, Iniciativa pol Asturianu amosaba esti día’l so apoyu al plan pilotu que se va poner en marcha a la lo llargo del próximu cursu con un comunicáu nel que dexaba afitao qu’esta midida “ye un fechu positivu y que va na llinia de lo qu’ha ser un verdaderu procesu de normalización, magar qu’entamar en namás diez centros, dempués de cuasi cuarenta años de retrasu d’esti procesu, paez insuficiente y demasiao lento”.

Sicasí, ye importante recordar que l’asignatura de Llingua Asturiana vien tando en marcha dende 1984 de forma voluntaria en tolos niveles, “inclusive compitiendo en secundaria con asignatures mui atractives, y que les families y l’alumnáu vienen acoyéndola con gran ésitu, magar les torgues puestes en dellos centros. Esto da una base bien esperanzadora pa la puesta en marcha del procesu d’introducción del asturianu como llingua vehicular d’otres asignatures”.

Hai que recordar qu’amás d’esti apoyu de les families los sindicatos asturianos y estatales amosaron yá’l so sofitu a estes midíes, sigún l’asociación. Agora ye importante “planificar bien esti procesu, pa que seya esitosu, xenerar los materiales necesarios, la formación que’l profesoráu precise y la promoción afayadiza de la midida”.

La noticia de la ufierta pal próximu cursu de l’asignatura de Llingua Asturiana n’Educación Infantil “ye bien positiva tamién, y vien a terminar con una illegalidá, pues la Llei d’Usu del asturianu de 1998 determinaba la obligación pa l’alministración d’ufiertar l’asignatura en tolos niveles educativos. Ye necesario, pa cumplir dafechu la llexislación, qu’esta ufierta s’estienda a otros niveles onde entá nun llega, talos como la FP, FP básica y otros estudios reglaos qu’entá nun cuenten cola ufierta d’asturianu”.

Amás, pa Iniciativa, “ye de suma importancia la reconocencia inmediata per parte del Ministeriu d’Educación de la especialidá docente d’asturianu pal profesoráu, que vive en condiciones llamentables de continua interinidá, xenerando situaciones que nun permiten garantizar la calidá del enseñu, con una gran inestabilidá.

Animamos a les families asturianes a reclamar nos sos centros que s’apliquen estes midíes, y recordamos que la llei garantiza que con qu’un solu alumnu o alumna quiera matriculase na asignatura, esta ha d’impartise nel centru, un modelu qu’habría estendese, como drechu humanu que ye, a la posibilidá de tener l’asturianu como llingua vehicular d’otres asignatures”.

Fonte: Asturnews