¿Qué pasa con Llingua Asturiana nos concertaos?

El diariu El Comercio asoleyaba una noticia al respective de la presencia de l'asignatura de Llingua Asturiana y Cultura Asturiana nos centros concertaos:"Llingua fracasa en la concertada". Nel artículu dábase a entender que l'asignatura entamara'l so andar nos concertaos esti cursu. Inaciu Galán, presidente d'Iniciativa pol Asturianu respondió esti martes 28 con un artículu asoleyáu nes páxines del periódicu qu'agora reproducimos.

Esti diariu asoleyaba una noticia al respective de la presencia de l'asignatura de Llingua Asturiana y Cultura Asturiana nos centros concertaos: "Llingua fracasa en la concertada". Nel artículu dábase a entender que l'asignatura entamara'l so andar nos concertaos esti cursu. Esto nun ye asina, los concertaos, como parte de la rede pública tán obligaos a ufiertar l'asignatura en tolos niveles dende va munchos años. Y hai centros concertaos que son modelu nesti ámbitu. Sicasí, la mayoría nunca incluyeron la uferta, mientres la inspección educativa del Principáu miraba pa otru llau.

La información básase primero nuna falsedá, que Llingua Asturiana comenzaba a ser d'obligada ufierta pa los centros concertaos nesti cursu. Al menos dende los años noventa y cola Llei d'Usu del Asturianu de 1998, tolos centros teníen que tar yá ofreciendo la posibilidá d'estudiala a los alumnos y alumnes. Pero en munchos concertaos esto nun yera asina, los centros nun respetaben la llei y la opción d'escoyer Llingua Asturiana nun apaecía nes fueyes que daben a los alumnos, o cuando apaecíen, acompañábense de presiones pa evitar tener qu'introducir profesoráu d'asturianu.

Yo mesmu, como alumnu d'unu de los centros concertaos qu'apaecen na noticia, puedo dar fe de como a lo llargo de los más de 14 años que pasé nel Colexu Corazón de María nunca tuvi la oportunidá siquiera d'escoyer asturianu, cuando la llei marca que tien que s'incluyir na ufierta. ¿Quieren dicime que de 615 alumnos, nenguna familia, nin siquiera una, quixo llevar a los sos fíos a Llingua Asturiana? Tan absoluta unanimidá, el 100%, abúltame increible, tanto como aquella que tuvo'l Referéndum organizáu por Franco en 1967, y mirái, inclusive naquella ocasión, cuasi un 5% votó en contra. 

Detrás d'esta noticia ta la negativa de los centos concertaos a invertir en profesoráu. Porque l'alternativa a Llingua Asturiana, Cultura Asturiana, que tan increible consensu xenera nestos centros, puede dala'l tutor del grupu, ensin que tenga nengún tipu de formación sobre'l tema, mientres que pa dar Llingua Asturiana tienen que tener al tutor nel grupu de Cultura Asturiana y a otru profesor dando Llingua. Por eso, estos datos nun demuestren el fracasu de Llingua Asturiana, sinón como dalgunos centros concertaos, por suerte non la totalidá, dan la espalda a que los sos alumnos puedan meyorar les sos capacidaes llingüístiques, deprendiendo a falar bien asturianu, y con ello, tamién a meyorar el so castellán, coles importantes ventayes que supón falar dos llingües del so entornu pa deprender con mayor facilidá otros idiomes.

A los centros qu'enseñen tan increibles datos, que sepan que nun cuela, y a la presidenta de la Confederación Católica Nacional de Padres de Familia y Padres de Alumnos (Concapa) de Asturias, Sandra Ruiz, dici-y que si-y paez que cola llingua asturiana "no se va a ningun lado", sedrá que quier que los sos fíos tengan qu'emigrar fuera d'Asturies a trabayar y vivir. Los que queremos qu'Asturies dexe de ser una tierra d'emigrantes vemos en deprender asturianu una oportunidá de facer comunidá y nel deprender otres llingües, la oportunidá de vender a Asturies y a les nueses empreses nel mundu. Deprender asturianu y otres llingües, non solo nun ta reñío, sinón que ye complementario y necesario en conxuntu. A los alumnos y families de los concertaos, recorda-yos que con qu'un solu alumnu escueya asturianu nun centru, ésti tien la obligación de pone-y profesor, un drechu reconocíu, como la voluntariedá d'estudiar o non asturianu.

Inaciu Galán y González

Presidente d'Iniciativa pol Asturianu

Fonte: Iniciativa pol Asturianu/El Comercio

“Xueguen a la confusión cola materia de Llingua Asturiana”

por Pablo R. Guardado

La polémica retomada esta selmana pol PP sobre l’asignatura de Llingua Asturiana y la so alternativa, Cultura Asturiana, yá tien les primeres rempuestes. “Ye ridícula y interesada”, según SUATEA, mientres que dende Reciella, l'asociación del families pol asturianu, señalen a dellos centros  que “xueguen a la confusión cola materia”.

El sábadu diose a conocer el decretu d’aplicación de la LOMCE en Primaria y el PP, al traviés de la diputada Susana López Ares, qu'aprovechó la ocasión pa cargar otra vuelta contra la Llingua Asturiana, pretendiendo confrontar la materia con una segunda llingua estranxera, postura que namás sofita UPyD ente los partíos del arcu parllamentariu, mientres que PSOE, IX y Foru refuguen que l'asturianu compita con otres asignatures.

“Xuegen a la confusión cola materia de Llingua Asturiana. Tán xugando una baza engañosa”, añaden dende Reciella, coleutivu que considera que l’ausencia d’una segunda llingua estranxera nel currículu nun ye culpa del asturianu, sinón d’una falta de previsión nos horarios por parte de la Conseyería. “En Catalunya sí dan catalán y un segundu idioma”, afirmen.

Faustino Zapico, del Sindicatu Unitariu Autónomu de Trabayadores del Enseñu n’Asturies (SUATEA), califica esta polémica de “ridícula y interesada”, y ve detrás de too ello “un complexu brutal per parte de delles families que nun quieren nada rellacionao con Asturies". Mentes, María Elena González Fernández, presidenta de la FAPA Miguel Virgós, nun ve motivu pa los ríos de tinta que corren por esti asuntu al entender que nun ye razón d’enfrentamientu na escuela pública. “Nenguna AMPA presentó quexa nenguna al respeuto; namái dalguna familia de manera particular, pero mui poques”, señaló.

¿Cómo ye la situación actual?

Cola entrada de la LOMCE les materies en Primaria divídense en trés bloques: les troncales, les específiques obligatories –onde s’inclúi Relixón, cola so alternativa Valores Sociales y Cívicos– y les de llibre configuración, que queden a decisión de les comunidaes autónomes. La Conseyería d’Educación, Cultura y Deporte estableció nesti bloque últimu la materia de Llingua Asturiana y Gallego-asturiano –nel so ámbitu–, dando la posibilidá d’escoyer como alternativa Cultura Asturiana. Esta situación ye diferente a la que se vivía hasta’l momentu, onde l’asignatura nun competía con nenguna otra, "polo que pasa de ser voluntaria a de llibre configuración", lo que nun convenz a Reciella, que ve nello un retrocesu. “Debería ser troncal”, afirmen dende’l coleutivu –esto ye, tar al mesmu altor que Lengua Castellana y Literatura, Matemátiques, la primer llingua estranxera, Ciencies de la Naturaleza y Ciencies Sociales–, que considera escases les 3 hores per ciclu –en xeneral los centros dan 1,5 hores selmanales– que se dediquen a la materia.

“La solución nun pasa per hora y media. Ye una cantidá ridícula”, señala Zapico, qu’entiende que’l plantegamientu actual de la materia “ye un parche más de tantos; parar la muerte de la llingua asturiana con mercromina, anque sía meyor qu’a mazazos”. La opinión de SUATEA ye que dambes materies deberíen ser obligatories y que la oficialidá del idioma llevaría a salvar situaciones como l’actual. Pela so parte, Elena González ve como un avance y un ésitu de la comunidá educativa’l fechu de que la Llingua Asturiana tea presente en tolos centros, cola alternativa de Cultura Asturiana, y nun cree negativo pa los escolinos que l’enseñu de la segunda llingua estranxera principie en Secundaria, como hasta agora. Al respeuto, Zapico apunta que nun sería positivo “saturar a los neños” con más tiempu de clase y critica la cantidá d’hores de Relixón que van impartise n’Asturies, más del mínimu qu'establez la LOMCE.

Tiempu de Llingua Asturiana dedicáu a otres materies

La puesta en marcha de la LOMCE y la implantación de la Llingua Asturiana como asignatura de llibre configuración provoca una situación que dende Reciella califiquen de fundamental pa entender la situación, yá que “enantes l’asturianu yera voluntariu y los neños que nun s’apuntaben teníen una alternativa ensin nome nin carga curricular”, lo que permitía a  dellos centros aprovechar esti tiempu pa impartir otres materies –como una segunda llingua estranxera– o ampliar conteníos d’otres, una illegalidá que, pola falta d’inspecciones, diose de manera esceicional en dalguna escuela pública, y en munchos concertaos y privaos, como se supo cuando principió esta falsa polémica. Agora, estos centros nun podrán siguir con estes práutiques, d’ehí los sos ataques contra la materia de Cultura Asturiana, según señalen dende esti coleutivu, que tamién ve una motivación económica nes sos protestes, al tener que contratar profesoráu o formar al que tienen anguaño pa dar estes materies.

Reciella amuesa d'igual forma'l so refugu respeuto "a los sectores minoritarios que tán en contra la llingua asturiana, y qu'aprovechen cualquier oportunidá pa intentar crear una situación de conflictu, que nun existe, o que si existe ye precisamente pola poca presencia del asturianu y l'incumplimientu de la llei". Por último, recuerda la situación de la Llingua Asturiana n’Educación Infantil, onde nun ta presente nel currículu: “Cola llei podría introducise la materia, pero nun se fai, y ye dalgo que dende la nuesa asociación consideramos fundamental pal futuru del idioma”. 

Fonte: Asturies.com

Foru defende la obligatoriedá de la materia de Llingua Asturiana en Primaria

por Pablo R. Guardado

Manuel Peña, diputáu y voceru d'Educación de Foru, aseguró que’l so partíu sofita “que la llingua y cultura asturiana sía obligatoria en Primaria, pa da-y el status que merez”. Demanda a Javier Fernández que, amás del idioma maternu, garantice tamién l’enseñu de dos llingües estranxeres.

“La polémica surdida poles decisiones del Gobiernu central del PP y del Gobiernu rexonal del PSOE ye gratuita y pon de manifiestu una vegada más que nin Rajoy en Madrid nin Fernández n’Asturies tienen el menor compromisu cola educación de los españoles y de los asturianos”, manifestó esta mañana Peña por mor de les quexes del PP a la decisión de la Conseyería d’Educación, Cultura y Deporte, cola entrada de la LOMCE, d’ufrir les asignatures de Llingua Asturiana y Gallego-asturiano –nel so ámbitu– en Primaria como materia de llibre configuración, cola alternativa de Cultura Asturiana, y refugar la inclusión d’una segunda llingua estranxera –por falta de perres, argumentó la conseyera Ana González–. “La XE tien como oxetivu que cada ciudadanu de los estaos miembros pueda falar dos idiomes amás de la so llingua materna. Pa contribuyir a esi oxetivu, Foru presentó una enmienda a la LOMCE pa que la segunda llingua estranxera tuviera’l carauter d’obligatoria na educación primaria. El PP de Rajoy refugóla, dexando llibertá a les comunidaes autónomes pa que la incluyeran o non nes sos planes d’estudios”.

Nesi sen, Peña apuntó que Mercedes Fernández, “nel marcu del desquicie que vive’l PP” asturianu, desautorizó a Génova “al pidir la segunda llingua estranxera y, agora, invéntase una confrontación col asturianu pa dividir a la ciudadanía”, amás de recorda-y al presidente del país que “debe respetar l’ oxetivu marcáu pola propia XE de garantizar l’enseñu de dos llingües estranxeras amás de la materna”. “Dende Foru apoyamos igualmente que la llingua y cultura asturiana sía obligatoria en Primaria, pa da-y l’estatus que merez, por ello somos favoratibles a la midida y esiximos a Javier Fernández que garantice l‘asturianu y dos llingües estranxeres nes escueles y colexos del Principáu”, continuó’l diputáu na Xunta Xeneral y voceru d’Educación de Foro nuna defensa del plurillingüismu al entender que “contribúi al desarrollu personal y a reforciar la ciudadanía europea al tiempu que proporciona meyores oportunidades profesionales”.

Fonte: Asturies.com

La Conseyera d’Educación afirma que la Llei Wert incluyirá a la fin l’asignatura d’asturianu

Ana González La conseyera d'Educación y Cultura del Principáu, Ana González, anunció ayeri que la futura Llei Orgánica pa la Meyora de la Calidá Educativa (LOMCE), conocida como Llei Wert, va incluyir finalmente a la llingua asturiana como asignatura d'ufierta obligada nos centros, calteniendo l’estatus que tenía hasta agora. González caltuvo un alcuentru en Madrid col ministru d'Educación, José Ignacio Wert, y llegaron a un primer alcuerdu pa incorporar un testu como disposición adicional a la llei pa que "l'asturianu quede como ufierta obligada na Comunidá Autónoma y eso ye importante", esplicó. "A pesar de que, como se sabe, caltengo como conseyera una posición contraria a la del Gobiernu d'España alrodiu de esta reforma que quieren facer, tengo que dicir que l'actitú del ministru pa cola reivindicación que ficimos sobre l'asignatura de llingua asturiana foi positiva", esplicó González. La conseyera socialista fizo estes declaraciones momentos enantes de participar nun actu del so partíu nel Centru de Servicios Universitarios d'Avilés sobre la nueva llei sol títulu de "Alderique proxecto LOMCE ¿Una contrarreforma educativa?". Fonte. Asturnews