Bimenes entrega los premios del so concursu de Cuentos pola Oficialidá

Esti prósimu vienres 10 de xunetu entregaránse los premios del XVIII Concursu de Cuentos pola Oficialidá del Asturianu, convocáu pol Conceyu Bimenes. L’actu, nel que participará Salvador Gutiérrez Ordóñez (yerbatu y miembru de la RAE), va tener llugar a les 20’00 hores énte la capiella de San Xuan, en Tabayes y nel trescursu del mesmu fadráse una llectura pública del cuentu ganador na voz de la so autora. L’actu pesllarálu’l monologuista maliayés Marcos SL, qu’interpretará’l monólogu “Xente mozo”. La ganadora del certame foi Ana Esther Martínez Sierra, algamando’l primer premiu, dotáu con 600 euros, pola so obra “Ensin fades, ensin perdices”. El segundu premiu, dotáu con 450 euros, foi pal cuentu “Stylommantophora”, de Laura Marcos Domínguez, y Héctor Pérez Iglesias (Llanera, 1978) algamó’l tercer premiu, al que se-y apurren 300 euros, con “Si verde”. En casu de mal tiempu l’actu desarrollaráse na Casa Cultura de Bimenes, sita en Santuyano. Fonte: Asturnews

Álvaro Álvarez Fernández ganó'l Concursu de gaita de Bimenes

El domingu pasáu, 6 de xunetu, tuvo llugar en Martimporra la final del XV Concursu de Gaita de Bimenes

Gaita  asturiana

     Esti certame foi de nueu entamáu pol Conceyu Bimenes coincidiendo cola Fiesta de la Oficialidá, cellebrada’l día enantes. El ganador d’esta edición foi’l gaiteru sierense Álvaro Álvarez Fernández, de 19 años d’edá, que llevó los 300 € en metálicu y el troféu del primer premiu. Amás, al ganador apurrióse-y un exemplar del “Cancioneru de la gaita asturiana”, obra iguada por Eugenio Otero Vega, Fonsu Fernández García y Gausón Fernande Gutierri, editada, y donada pa la ocación, pol Muséu del Pueblu d’Asturies.

   El segundu premiu, dotáu con 200 € y troféu, foi pal gaiteru Fernando Vázquez Cárcaba, de 20 años y tamién de Siero. Y el ganador del tercer premiu, al que se-y apurríen 100 € y troféu, foi Diego Lobo Tuñón, de 19 años y que vieno del conceyu d’Ayer. Nel concursu participaren finalmente trece gaiteros y gaiteres qu’interpretaren dos pieces cada ún, siendo valoraes les mesmes por José Ramón García Navia, Eugenio Otero Vega y José Luis García Díaz, miembros del xuráu na edición d’esti añu.                                                                                       Fonte: InfoAsturies

Inaciu Galán y Alicia Cortina ganen nel Carmen Ruiz-Tilve

Na semeya,  Inaciu Galán

   Esti llunes vieno acabante d'asoleyase’l determín del xuráu del Concursu de Rellatos curtios y Poesía Carmen Ruíz-Tilve Arias de la Facultá de Profesoráu de la Universidá d’Uviéu apautándose en concede-y a Inaciu Galán el primer premiu de la seición de Poesía en Llingua Asturiana pol so poema "regatu". Na seición de Microrrelatu n'Asturianu algamó'l primer premiu Alicia Cortina Dávila con “L’Abellugu maternu” y el segundu premiu foi pa Naomi Suárez González por “Tarántula”.

   Los premios nos que s'aconceyó'l xuráu según se recueyen na so acta son los que vienen darréu:

-   Poesía en Asturianu Primer premio: Inaciu Galán y González.“Regatu” Segundo premio: Desierto.

-  Microrelato en Asturianu Primer premio: Alicia Cortina Dávila. “L’Abellugu maternu” Segundo premio: Naomi Suárez González. “Tarántula” 

-  Poesía en Castellano Primer premio: Adoración Diego de Oliveira.“Yo sin ti” Segundo premio: Iván Mallada Álvarez. “Haiku a una mirada”

-  Microrelato en Castellano. Primer premio: Patricia Álvarez Fernández. “Recordando sus ojos” Segundo premio: Covadonga Rodríguez Juan. “Agua”.

   El xuráu tuvo compuestou polos siguientes profesores del Área de Didáctica de la Llingua y la Lliteratura Xosé Antón González Riaño,  Eva María Iñesta Mena,  Marta Mori de Arriba,  Mª Rosario Neira Piñeiro  y  Julián Pascual Díaz,  faciendi de Secretariu'l Decanu de la Facultá,  Juan Carlos San Pedro Veledo.                                                Fonte: Asturnews

XXVIII Edición de los Premios Andrés Solar

La Xunta pola Defensa de la Llingua Asturiana cellebra esti sábadu la XXVIII Edición de los Premios Andrés Solar, con Dixebra y Trabe como gallardonaos.

La Xunta pola Defensa de la Llingua Asturiana entama esti sábadu una nueva edición de los Premios Andrés Solar, concretamente la XXVIII entrega, na que los gallardonaos col pegollu foron, ex aequo, l'hestóricu grupu musical asturianu Dixebra, y la editorial Trabe, como premiu a la trayeutoria desempeñada nes sos distintes estayes. En cuantes al "Madreñazu" -un "contrapremiu"-, esti añu dirán tamién ex aequo pa la Llei Wert y los retayos en materia llingüística.

La entrega de los premios va a tener llugar nel Centru Cultural Antiguu Institutu de Xixón (Cai Xovellanos 21), onde'l so Salón d'Actos acoyerá de magar les 19:30 la gala d'esti añu. Na mesma, los y les asistentes podrán esfrutar de l'actuación musical de Dani Stylo, que fadrá reellaboraciones de temes hestóricos de la banda d'orixe avilesín Dixebra. La banda lliderada por Xune Elipe recibe'l premiu nel 25 aniversariu de la so creación.

Fonte: Infoasturies

Dixebra y Trabe algamen el Premiu Andrés Solar. Los retayos en llingua asturiana y la Llei Wert el Madreñazu

La Xunta pola Defensa la Llingua Asturiana acaba d'anunciar los ganadores de los XXVIII Premios Andrés Solar. Nesta ocasión, el Pegollu foi, ex aequo, pa la formación musical Dixebra y pa la editorial Trabe, que cumplen 25 y 20 años, respectivamente, como proyectos fundamentales pa entender el desarrollu cultural, social y económicu de la llingua asturiana nes últimes décades. El Madreñazu foi, tamién ex aequo, pa los recortes en materia llingüística y pa la Llei Wert.


La Xunta pola Defensa de la Llingua Asturiana decidió conceder esti 2012 el Pegollu de los Premios Andrés Solar a los decanos del rock astur y a la editorial uviedina «pol so apueste decidíu pola música y lliteratura a lo llargo de bien d'años, demostrando que l’asturianu ye una ferramienta útil y necesaria nel rellatu de la contemporaneidá d'Asturies».

Otra manera, la versión negativa, el Madreñazu, reconoz a la persona o entidá que rescamplaren pol so llabor negativu pa cola llingua asturiana. Na edición del 2012, va pa los recortes en materia llingüística y pa la Llei Wert. «Nos últimos años, con diferentes gobiernos y cola pasividá de los grupos parllamentarios, tamos asistiendo a la aplicación d’un programa sistemáticu de desmantelamientu del texíu cultural y mediáticu n’asturianu», afirma la organización, qu'añade que no que cinca a la llamada Llei Wert, «namás hai que dicir qu’introduz modificaciones brutales que puen suponer un peligru de desaniciu de la enseñanza de la llingua, que yá ta nuna situación de marxinación llaceriosa».

La entrega de los Premios va facese’l día 15 d’avientu a les 19.30 hores, nel Salón d’Actos del Antiguu Institutu de Xixón. L’actu va contar cola actuación musical de Dani Stylo que va facer reellaboraciones de temes históricos de Dixebra. Tamién, como tolos años, depués de l’actu va haber una espicha nel chigre xixonés Canteli, la entrada val 20 euros. Pa dir, hai qu’acutar sitiu y llamar al 985229553 o mandar corréu a info@exunta.org, primero d’esti 13 d’avientu.

Fonte: Les Noticies

Asturies gana'l Premiu del Públicu y Bretaña'l del Xuráu nun Liet marcáu pola reivindicación de la oficialidá

DAMIÁN BARREIRO .
La cantante bretona Lleuwen Steffan -orixinaria de Gales- ganó la final del Liet International 2012 col tema tituláu «Ar gouloù bev» («La lluz viva»), nuna gala qu'axuntó a numberosu públicu nel Teatru de Llaboral Ciudá de la Cultura, en Xixón. Amás, Asturiana Mining Company fíxose col Premiu del Públicu nun actu marcáu pola reivindicación de la oficialidá. Asina, los glayíos a coru de «L'asturianu llingua oficial» y unes lletrones que formaben la frase n'inglés «S.O.S. Asturian Language» tuvieron presentes nel eventu al qu'acudió la conseyera d'Educación, Cultura y Deporte, Ana González, y de la directora xeneral de Política Llingüística, Ana Fueyo.


La gran trunfadora de la nueche, Lleuwen, llevó pela primer vez el premiu del xuráu del Liet pa Bretaña. Trátase d'una cantante nacida y criada nel norte de Gales, pero que vive normalmente en Bretaña, onde aprendió a falar y cantar en bretón. Por eso, tien una perbona reputación tanto en Bretaña como en Gales y viaxa davezu ente les dos naciones celtes. Musicalmente, ye complicao etiquetar a Lleuwen y, anque tienen dicho d'ella que tien aires de jazz, a esta cantautora tamién-y presta'l rhythm and blues y el rock.

Per otru llau, l'Asturiana Mining Company fixo que'l premiu del públicu quedara en casa, convirtiéndose nel primer grupu en llingua asturiana que lleva dalgún de los premios d'esti prestixosu festival européu. Parez que «Si nun conoces Val.louta» prestó al públicu que votó per Internet a lo llargo de toa Europa y a la xente qu'enlleno les butaques del Teatru de la Llaboral -onde destacaben, amás de les d'Asturies, les banderes corses-. Y ye que'l grupu lideráu por Michael Lee Wolfe realizó una de les sos actuaciones en directo más potentes, onde resaltó la fuercia de la voz de Berto Varillas.

El resultáu del premiu del xuráu ye'l siguiente: Lleuwen (Bretaña), 87 puntos; Dopu Cena (Córcega) 86 puntos; The Voodoolectric (Frisia Oriental), 76 puntos; Asturiana Mining Company (Asturies), 66 puntos; Brian O hEadhra (Escocia), 64 puntos; Claudia Crabuzza and Claudia Gabriel Sanna (L'Alguer), 64 puntos; Yldau (Frisia), 52 puntos; Enkore (País Vascu), 41 puntos; Ivan B & 4CP (Udmurtia), 35 puntos; Inger Karoline Gaup (sami), 35 puntos; y Jonokognos (Friul), 32 puntos.

Amás, el grupu asturianu Dixebra dio un conciertu nel tiempu que duraron les votaciones del públicu y les deliberaciones del xuráu, conciertu qu'amás fixo llevantase y blincar a tol Teatru de Llaboral. Les consignes del líder de la banda, Xune Elipe, reivindicando los derechos llingüísticos de los asturianos valieron pa que la mayor parte del patiu de butaques glayara al empar «L'asturianu llingua oficial» o «Independencia, Puxa Asturies Dixebrá» nun eventu que se taba retresmitiéndose en directo per televisión y per Internet, con presencia de medios como Al-Jazeera o la televisión pública vasca, qu'amás va emitir el festival el sábadu próximu en diferíu.

Sicasí, Dixebra nun foron los únicos que reivindicaron un meyor marcu llegal pal nuestru idioma: el cantante del grupu vascu Enkore, Xabi Hoo, acabó la so actuación con un «munches gracies» y lleendo les lletres que formaben «S.O.S. Asturian Language» y que portaron dellos activistes llingüísticos dende les butaques del teatru.

L'añu que vien, el Liet International va celebrase en Córcega, anque van tener bien difícil llegar al nivel de la gala entamada pol Gobiernu d'Asturies, onde músicos, organización, públicu y el mesmu equipu que retresmitió la gala per TPA conxugáronse a la perfeición pa facer la que posiblemente foi, dexando a un llau lo musical, la meyor edición del festival de la canción nes llingües minoritaries europees.

Fonte: Les Noticies

Dixebra reclama la oficialidá del asturianu al recibir dos premios

El grupu Dixebra, qu’anguaño cumple venticinco años d’actividá ininterumpida, recibía esta selmana dos gallardones por cuenta de la so llarga trayectoria. El primeru recoyíalu’l llunes pasáu en Piedrasblancas, capital del conceyu de Castrillón, onde la Banda de Gaites L’Alborecer facía entrega del so máximu gallardón a la formación decana del rock asturianu. La Gaita d’Oru recibíenla nel marcu del Día de Castrillón nes fiestes llocales, de manes de l’alcaldesa, Ángela Vallina, pola so xera en defensa de la llingua asturiana y la incorporación de la música asturiana a contestos sonoros contemporáneos.

El segundu reconocimientu llegó-yos en casa, asina na novena edición de los premios qu’añalmente concede’l periódicu La Voz de Avilés, foron merecedores del gallardón nel apartáu d’Acción Cultural. Na gala d’entrega, que se facía esti xueves, y a la qu’asistíen bien de representantes políticos del país, ente ellos tolos alcaldes d’Avilés y comarca, diputaos na Xunta Xeneral (como Ignacio Prendes d’UpyD o Jesús Gutiérrez del PSOE –amás de secretariu xeneral de la FSA-), senadores (como l’expresidente asturianu Álvarez Areces), conseyeros (Presidencia y Educación y Cultura) y otros cargos de l’alministración, Dixebra fizo alcordanza de tolos músicos que trabayen cola llingua asturiana como ferramienta de creación, pidió “dende la humildá, pero tamién dende la convicción nes nuestres razones, que los representantes políticos asuman con naturalidá, respetu y llibertá’l fechu llinguísticu asturianu”, desixeron que s’acabe col “apartheid llingüísticu que sufre esti país llamáu Asturies” y acabaron la so intervención comentando que’l “meyor premiu que nos pueden dar a la xente que trabayamos, nos comunicamos o creamos na llingua asturiana ye’l de la so oficialidá”.

Otra manera, Dixebra sigue cola so xira braniega, que los va llevar a tocar nes próximes selmanes en llugares como Candás, Carabanzo o Avilés, amás de delles cites fuera del país. A la vuelta del branu van enzarrase nel llocal d’ensayu pa preparar los temes que van formar parte del so discu nuevu, pal que baraxen la so salida a la cai nos primeros meses del añu qu’entra.

Fonte: Asturnews

La Fiesta de les Lletres Catalanes

La Festa de les Lletres Catalanes - Nit de Santa Llúcia és considerada la vetllada literària més important en llengua catalana. Organitzada per Òmnium Cultural des dels seus orígens, aquest any 2011 arriba a la seva 61a edició. Entre els premis hi conten el premi Sant Jordi de novel•la, el Carles Riba de poesia i el Mercè Rodoreda de contes i narracions. Entre la llarga llista de premiats hi ha molts dels principals noms de la literatura catalana contemporània.
Òmnium Cultural organitza des dels seus orígens la vetllada més important de les lletres catalanes. Entre els premis que s’atorguen destaquen el Sant Jordi de novel•la, el Carles Riba de poesia i el Mercè Rodoreda de contes i narracions.

Els principals guardons de la festa de les lletres catalanes van premiar Sebastià Alzamora amb el Premi Sant Jordi de novel·la i Marcel Riera amb el Carles Riba de poesia. La Nit de Santa Llúcia, organitzada per Òmnium Cultural, també va tenir molts més premiats, com el canal Super3 d'aquesta casa, que va rebre el Premi de Comunicació.
Sebastià Alzamora i Marcel Riera parlen dels seus llibres després de guanyar els premis literaris Sant Jordi i Carles Riba, dos dels principals de la Nit de Santa Llúcia organitzada per Òmnium Cultural.

Enllaz al programa emitíu per TV3

Fueya güeb de Santa Llúcia

Más enllaces de la nueche de Santa Llúcia: 1,2,3

La XDLLA axudicó'l pegollu y el madreñazu añales

La XDLLA concede’l pegollu al vinu Ḷḷumés y el madreñazu a César Movilla, alcalde de Noreña.
Pablo R. Guardado
La Xunta pola Defensa de la Llingua Asturiana (XDLLA) dio a conocer a los ganadores de los XXVII Premios Andrés Solar. El pegollu foi pal vinu Ḷḷumés y el madreñazu pa l’alcalde de Noreña, César Movilla.

La versión positiva del gallardón viaxa d’esta forma a Cangas del Narcea, en concreto a Bodegas Oblanca, onde se fai’l vinu Ḷḷumés, el primeru n’etiquetase n’asturianu. “La Xunta quier reconocer l’usu que fai de la llingua asturiana na marca Ḷḷumés, nun exemplu de normalidá y puesta en valor de les nuestres señes d’identidá. La visibilización social del idioma nun sector clave y la recuperación de la toponimia asturiana son dalgunes de les razones poles que se dan esti premiu”, señalen dende’l coleutivu ciudadanu.

Mentes, el madreñazu, la versión negativa, tien como destín Noreña. El alcalde del conceyu, César Movilla, recibe esti premiu “d’honor duldosu” pola “so actitú repetida de rechazu al usu de la llingua asturiana nel ámbitu de la so competencia, vulnerando d’esta manera tanto los drechos de la ciudadanía xeneral como la de los sos llexítimos representantes democráticos”. D’esta forma, Movilla sucede nel gallardón Herminio Sastre, ex conseyeru d’Educación y Ciencia. El ganador del pegollu nel 2010 foi’l programa ‘Camín de Cantares’ de la TPA.

Fonte: Asturies.com

Premios Llanterna Digital

Premios Llanterna Digital de fomento de catalán y aranés

Era convocatòria des PRÈMIS LLANTERNA DIGITAL 2012 ei ua iniciativa dera Coordinadora de Servicis Lingüistics de Lhèida qu’ei integrada per representants dera Direccion Generau de Politica Lingüistica deth Consòrci entara Normalizacion Lingüistica (CNL de Lhèida), des servicis territoriaus d’Ensenhament, de Salut e de Justícia dera Generalitat de Catalonha, deth Servici Lingüistic dera Universitat de Lhèida, dera Escòla Oficiau d’Idiòmes de Lhèida e deth Servici Lingüistic de Comissions Obrères.Es Prèmis Llanterna Digital vòlen contribuïr ath foment der usatge deth catalan e der occitana a trauès de cuertmetratges que promòiguen ua reflexion sus eth hèt lingüistic.

Generalitat, UdL, Escola d'Idiomes de Lleida y CCOO han convocado la sexta edición de los premios Llanterna Digital de creación audiovisual en catalán y aranés, tanto en categoría abierta como para centros de educación y universitarios. El plazo de presentación de obras finalizará el 31 de marzo. Más información en Llanterna Digital.

Fontes: Llanterna Digital y Diari Segre martes 22 de Payares de 2011

La editorial Trabe convoca'l Premiu Narraciones Trabe 2011

La editorial Trabe ta acabante de convocar el Premiu Narraciones Trabe 2011, que va tener una dotación económica de 2.000 euros en conceptu de derechos d’autor, amás de publicar la obra premiada nuna de les colecciones de la casa. Los autores interesaos en participar tienen de plazu hasta’l 30 de setiembre pa presentar los sos trabayos, que pueden ser lo mesmo noveles que recopilaciones de cuentos o cualesquier otra forma de narración. Les obres presentaes a concursu han ser inédites y han tener una estensión mínima de sesenta páxines, teniendo en cuenta que cada páxina tien que tener 1.800 caracteres.Con esta, ye la octava edición na que se convoca’l concursu, que tien el so orixe nos años noventa, cuando salieron premiaes obres tan paradigmátiques como Histories d’un seductor de Miguel Rojo, Los Párpagos de Buda de Santi F. Ochoa, o Esa lluz que naide nun mata de Marín Estrada. Nel 2005, depués d’unos años de parón, escomenzó a convocase otra vuelta’l certame, saliendo ganadora La Banda Sonora del Paraísu de Xandru Fernández. Na última edición foi’l candasín David Artime’l quien se fixo col premiu pola novela d’ambiente futbolísticu La Bufanda, que resultó ser una de les obres de más repercusión del añu pasáu.

Fonte: les noticies

Editorial Trabe

Entrega de Premios de los Concursos de l’Academia de la Llingua Asturiana 2011

L’Academia de la Llingua Asturiana cellebra’l vienres 10 de xunu, a les 12 la mañana, nel nuevu llar social (cai L'Águila 10, d’Uviéu), l'actu d’entrega de los premios a los ganadores de los Concursos de l’Academia de la Llingua Asturiana 2011: «Concursos d’Investigación (de recoyida de material toponímico y de léxicu asturianu)», «Concursu de llectures pa rapazos», «Concursu de creación lliteraria, premiu “Llorienzu Novo Mier”», «Concursu de material lliterario escrito, premiu “Federico González-Fierro Botas”» y «Concursu de Teatru».

Fonte: Infoasturies,blogue Tierra alantre, la mesma fala.

Más info:
14/06/2011
L’Academia entregó los sos premios lliterarios y d’investigación

Asturnews ufre una galería de semeyes de la entrega de premios.
Redacción

Ganadores de los concursos xunto a los miembros de l'ALLA
L’Academia de la Llingua Asturiana (ALLA) entregó’l vienres pasáu los premios de los sos concursos. Esti añu, per primer vegada, celebróse l’actu nel llar nuevu de la institución, nel Monesteriu de les Pelayes d’Uviéu. Nel actu tuvieron presentes la Presidenta, Ana Cano; l’Aylagueru, Carlos Lastra, y el vicepresidente Miguel Ramos Corrada. Ente los premiaos, Xosé Ramón Lozano, Rafael Valdés y Héctor Pérez Iglesias, ente otros.

El xuráu del Concursu d'Investigación de Recoyida de Material Toponímico Oral, formáu por Ana María Cano González como presidenta, Xosé Lluis García Arias como vocal y Corsino García Gutiérrez faciendo de secretariu decidió premiar con 600 € el trabayu tituláu “Toponimia de la parroquia de Barros (Llangréu)” del que ye autor Xabiel Fernández García; mientres que nel casu del Concursu d'Investigación de Recoyida de léxicu asturianu, el premiu foi pal trabayu “Léxicu de Llaiñes, Sobrescobiu” del que ye autor Xosé Ramón Lozano Cuervo.

Nel casu del Concursu de Llectures pa Rapazos el xuráu formáronlu Urbano Rodríguez Vázquez como presidente, Vicente García Oliva como vocal y Pablo Xuan Manzano como secretariu, apautando dar el premiu de 600 €, al trabayu tituláu “Eladio, el dinosauriu que ñació ayeri”, del que ye autor Alberto Menéndez García.

Ramos Corrada, Cano y Lastra
El Concursu de Creación Lliteraria, premiu "Llorienzu Novo Mier" foi nesta ocasión pa “La mano vacía”, poemariu del que ye autor Héctor Pérez Iglesias. El xuráu formáronlu Miguel Ramos Corrada como presidente, Xosé Ramón Iglesias Cueva como vocal, y Marta Mori d'Arriba como secretaria.

El Concursu de Teatru tuvo como xuráu a Miguel Ramos Corrada, Adolfo Camilo Díaz y Carlos Rubiera Tuya, que decidió facer ganador a Noel Canto Toimil por “El facedor de gomeros”.

N’últimu llugar entregóse un accesit de 150 euros del Concursu de Recoyida de Material Lliterario Escrito, premiu "Federico G.-Fierro Botas" al trabayu tituláu N’el falar de la mio tierrina de Gabino Muñiz García-Robés, del que ye autor Rafael Rodríguez Valdés. Fueron xuráu Ana María Cano González como presidenta, Xosé Lluis García Arias como vocal y Corsino García Gutiérrez faciendo de secretariu.

Los concursos d'Investigación Llingüística, Investigación sobre lliteratura asturiana, Recoyida de Material Lliterario Oral, de Curtios Cinematográficos y el Concursu de Cómics en Llingua Asturiana quedaron ermos.

Nel actu presentáronse amás delles obres ganadores n’años anteriores, pertenecientes a les colecciones “Escolín”, “Toponimia” o “Llibrería Académica”.

Semeyes del actu
Fonte: asturnews

Reclamen la oficialidá na entrega de los Premios Lliterarios en Llingua Asturiana

Dos de los premiaos d’esti añu colos Premios Lliterarios en Llingua Asturiana, Vicente García Oliva y Marta Mori, reclamaron na entrega de premios que la llingua se puea emplegar en más ámbitos. Oliva fíxolo pidiendo direutamente la oficialidá.
Los ganadores de los Premios Lliterarios en Llingua Asturiana 2010, Vicente García Oliva (premiu Máximo Fuertes Acevedo d'ensayu), Marta Mori (premiu Xuan María Acebal de Poesía) y Montserrat Garnacho (premiu María Josefa Canellada de lliteratura infantil y xuvenil) tuvieron presentes esti llunes na entrega institucional que tuvo llugar na Conseyería de Cultura, institución que convoca l’actu.
Na gala d’entrega, García Oliva quiso aprovechar la ocasión pa esixir la oficialidá de la llingua asturiana. Na so intervención, destacó que "los asturianos tenemos una llingua mui guapa, que ye un patrimoniu inmaterial pol qu'hai que lluchar y qu'hai que defender". Al so xuiciu, "la meyor manera de defendela ye pidiendo la oficialidá". Dende'l so puntu de vista, "tarde o temprano llegará esi día". Marta Mori tamién pidió que la llingua puea salir "de la llírica y la lliteratura", y que "podamos emplegala n'ámbitos menos prosaicos". Nel pieslle del actu, la Direutora de Política Llingüística, Consuelo Vega, refirióse a les pallabres del escritor. "La llingua asturiana ye un patrimoniu inmaterial, pero tamién pa los que nun la falen, nin la entienden nin s'interesen por ella".

Caltener los premios

Otra reivindicación común de Marta Mori y Vicente García Oliva nes sos intervenciones foi la de pedir qu’estos gallardones se caltengan pa próximos años, nuna referencia velada al contestu de crisis económica actual. Dase la circunstancia de que dos de les estayes d'esta edición 2010 quedaron desiertes, la de cómic y la de novela. Los trés recibieron la figura que s'entrega a los ganadores, asina como la cantidá de 7.000 euros. Amás espublizaránse les sos obres.

Obres premiaes

Vicente García Oliva ye l'autor de 'El Síndrome de Xerezade', qu'analiza la necesidá antropolóxica de cuntar hestories, y la función de los mitos y los cuentos na evolución de la humanidá.
Marta Mori presentó'l poemariu 'La mio voz', del que xuráu destacó'l so calter "intimista y emocionante, mui bien trabayáu estilística y formalmente".
A lo último, Monserrat Garnacho foi ganadora con 'A pespunte', "un testu que recupera, revisa y actualiza la tradición oral d'una manera que l'avera a los neños y neñes del nuesu tiempu", según la Conseyería.

Fonte: Asturies.com

Premios pa recompensar les firmes pa servicios de llingua galesa

by Sion Barry
An award scheme for companies which offer “excellent” Welsh language services has been launched by Cymdeithas yr Iaith Gymraeg (Welsh Language Society).
The initiative is a new direction for the society which has traditionally focused on campaigning against large corporations who provide no or very few bilingual services. Under the scheme, members of Cymdeithas yr Iaith Gymraeg will assess the standard of local firms’ services. Small companies who support local produce and provide a high standard of Welsh-language service will be eligible for the awards.

Broadcaster Angharad Mair joined members of the society to launch the awards in Carmarthen
Sioned Elin, chairwoman of the Carmarthenshire branch of Cymdeithas yr Iaith, said: “This is an exciting initiative and it’s part of our plan as a society to take more positive steps to promote the use of Welsh in the community. While there are many companies who ignore Welsh, especially big international businesses, it’s important that the small local companies who do think about the local community are rewarded.

“We have always organised events to promote the use of Welsh in the community, from gigs to other social activities, this is another way to push the agenda forward.
“We as a society are looking for other opportunities to support good practice in the future. The Welsh language is a treasure for everyone in Wales – whether they speak Welsh or not. So we want to make a positive effort to praise small local companies, who play a part in keeping the language alive.”

Fonte: WalesOnLine

I Premiu María Elvira Muñiz de promoción de la llectura

El Conceyu de Xixón, dientro del marcu del pautu ciudadanu "Xixón pola Llectura", que representa a los estremaos axentes que trabayen nel conceyu de Xixón a favor del llibru y la llectura, nos ámbitos de la creyación, la edición, la comunicación, les llibreríes, les biblioteques, l’enseñu, les asociaciones y empreses, y qu’alcordaron convocar unos premios que sirvieran d'estímulu a les iniciatives más destacables dientro d'esti ámbitu fundamental de la cultura.
Foi tamién alcuerdu unánime del Conseyu Asesor de "Xixón pola Llectura" que los premios lleven el nome de la profesora María Elvira Muñiz Martín, en reconocencia a la “exemplar trayeutoria profesional y a les cualidaes humanes d'esta estudiosa y caderalga de lliteratura, qu'arimó a munches xeneraciones d'alumnos xixoneses el so amor polos llibros y la so pasión pola llectura”.

Los premios van convocase añalmente baxo la denomación Premiu María Elvira Muñiz de promoción de la llectura y tendrán trés modalidaes:

A. Reconocencia a una persona, entidá o empresa por tola so trayeutoria (creativa, investigadora, divulgadora, educadora) o por iniciatives especialmente destacaes a favor del llibru y la llectura.
B. Premiu a un artículu, collaboración, reportaxe o programa, espublizáu nos medios de comunicación (tanto los impresos como los audiovisuales o dixitales), que contribuya especialmente a la promoción del llibru y la llectura
C. Premiu pa una iniciativa singular desendolcada por un centru educativu del conceyu de Xixón en favor de la llectura.

Fonte: Asturnews

Ier Premiu d'Ensayu "Asturies"

Col enfotu de da-y puxu al estudiu de la realidá política, económica, social y cultural d’Asturies, asina como al so pensamientu, la editorial Espublizastur convoca’l “Ier Premiu d’Ensayu ASTURIES" pa obres escrites n'asturianu. El premiu ta dotáu con 1.500 euros y la editorial espublizará de la obra premiada. El plazu pa presentar los ensayos a esti premiu fina'l 1 de payares. El premiu tien les bases que vienen darréu:

Capítulu Primeru: Oxetu.
Artículu 1.- Les obres que se presenten al “Ier Premiu d’Ensayu ASTURIES” tendrán que versar alrodiu la realidá política, económica, social y cultural d’Asturies –nos sos territorios hestóricos- y los sos retos de futuru.
Artículu 2.- Valoraránse especialmente obres que combinen la esposición teórica, la so aplicación práutica y la so exemplificación al traviés de comparatives con otres realidaes nacionales.

Capítulu Segundu: Condiciones de les obres
Artículu 3.- Les obres tendrán de ser estrictamente inédites y nun podran tar premiaes anteriormente.
Artículu 4.- Toles obres tendrán de tar escrites n’asturianu.
Artículu 5.- Les obres tendrán una estensión d’ente 120.000 y 240.000 caráuteres. (unes 60 páxines, lletra 12, con un interlliniáu de 1,5.)

Capítulu Terceru: Conteníu del premiu
Artículu 6.- El “Ier Premiu d’Ensayu “ASTURIES” ta dotáu con 1.500 euros (1250 en metálicu y 250 en llibros) que se fadrá efeutivu nel intre de la so concesión pública.
Artículu 7.- La obra premiada sedrá espublizada pola editorial Espublizastur
Artículu 8.- Espublizastur resérvase’l drechu a espublizar aquelles obres non premiaes, entendiendo que la presentación al mencionáu premiu supón la cesión a la editorial de los drechos d'edición.
Artículu 9.- Si el Xuráu lo camienta afayaízo, el premiu podrá ser consideráu desiertu y esceicionalmente concedíu ex aequo.

Capítulu Cuartu: Resolución del premiu
Artículu 10.- La resolución del “Ier Premiu d’Ensayu “ASTURIES” dirá a cargu d’un Xuráu compuestu por cinco personalidaes destacaes del mundiu cultural, social, políticu y económicu, propuestos por Espublizastur xunta un representante de la mesma.
Artículu 11.- Nun entamu, la resolución del Ier Premiu d’Ensayu “ASTURIES” intentará decidise por consensu ente los miembros del Xuráu. Si ello nun fore posible procederáse a una votación que decidirá por mayoría simple.
Artículu 12.- La resolución del premiu fadráse pública’l 7 de payares.

Capítulu Quintu: Presentación de les obres
Artículu 13.- El términu de presentación d’orixinales fina’l día 1 de payares. Almitiránse toles obres cuya fecha d’unvíu postal seya anterior al pieslle de la convocatoria.
Artículu 14.- Habrán d’unviase a la direición postal: Espublizastur La Caleya'l Ríu, 205 CP 33394, Xixón, Asturies.
Artículu 15.- Recurriráse a la forma de plica, ello ye, axuntaránse 2 sobres zarraos ónde s’escribirá: “Premiu d’Ensayu ASTURIES”, faciendo constar nos dos el títulu de la obra y el seudónimu del autor. Nún d’ellos introduciránse l’orixinal y 5 copies, en cuyes portaes namái apaecerá’l títulu de la obra y el del autor o’l seudónimu. Nel otru sobre figurarán los datos personales del autor o autores (nome, direición postal, teléfonu y e-mail). Nesti segundu sobre axuntaráse una copia en formatu dixital del orixinal.
Artículu 16.- L’autor/es comprométense a nun retirar la obra enantes de faese pública l’alxudicación del premiu y a nun presentala a otros concursos en cursu nin en xeneral, a tener comprometida la so espublización. La obra tien que ser inédita, nun tener cedíos los drechos con anterioridá
Artículu 17.- La presentación d’orixinales implica l’aceutación d’estes bases, qu’actúen en valir de contratu d’edición.

Premios de los Concursos 2009 de l'Academia de la Llingua Asturiana

Ayeri tuvo llugar l'actu d’entrega de los premios a los ganadores de los Concursos de l’Academia de la Llingua Asturiana 2009, al tiempu que quedaben convocatos los premios de 2010 y se daba l'anuncia de que cada añu na entrega de los premios van presentase les ediciones de los premiaos nel añu anterior.

Los premios del apartáu de recoyida d'información toponímica, foron un trabayu sobre los topónimos de les parroquies de les parroquies de Zarréu y Degaña, del que ye autor Francisco Javier Redondas Maseda y los áccesit de los trabayos sobre les parroquies de Llatores (Uviéu), fechos por Gabino Arcadio Alonso; Felgueras (L.lena) de Verónica y Raúl Fueyo Alcedo; y La Marea (Piloña), de María Aurina González Nieda.

Lluis Portal Hevia foi'l ganador del Concursu de Llectures pa Rapazos, pol trabayu 'Pelegrinos del abismu'. Mientres, el poemariu tituláu 'Cuando'l mundu debala', del que ye autor Berto García García, ganó'l premiu 'Llorienzu Novo Mier'. Nel apartáu de teatru, ganó la obra titulada 'La fuxida', de la que ye autor Xaviel Vilareyo.

El premiu de recoyida de material lliterario escrito 'Premiu Federico G.-Fierro Botas', onde se dio un accésit de 300 € al trabayu tituláu 'Poesíes asturianes de Carlos de la Concha', de Rafael Rodríguez Valdés, amás d'otros dos a los trabayos titulaos 'Testos asturianos en prosa', de Xosé Lluis Campal y Aurora Sánchez, y al trabayu 'Amuesa de publicidá en llingua asturiana', d'Inaciu Galán.

'El teatru de Pachín de Melás y la crítica del so tiempu', del que ye autor Xosé Lluis Campal Fernández, ye'l ganador de la modalidá d'investigación sobre lliteratura asturiana. Mientres, 'El llobu na tradición oral asturiana', d'Alberto Álvarez Peña, recibió l'áccesit na categoría de recoyida de material oral lliterario.

Dientro de los trabayos d'investigación quedaron ermos los de la categoría de recoyida oral de material léxico, d'investigación llingüística, y los de cómics y curtios cinematográficos n'asturianu.