Trabe edita los caberos rellatos ganadores del Fernández Lema

  Trabe presenta nel entamu del cursu los rellatos ganadores dende 2012 a 2014 del Premiu de Rellatu Curtiu de la Fundación Fernández Lema, unu de los más prestixosos d’España.

  Dotáu con cinco mil euros na modalidá de castellán y con dos mil quinientos na d’asturianu, el Premiu de Relatu Curtiu de la Fundación Fernández Lema ye unu de los más prestixosos d’España , como señala’l fechu de qu’en cada convocatoria aumente’l númberu d’obres presentaes y de la calidá d’estes.

  El volume qu’acaba de presentase nel mes d’agostu fai ya’l séptimu de la serie y axunta los relatos ganadores nes convocatories de los años 2012, 2013 y 2014, tantu na so categoría de castellán (Juan Ignacio Ripoll Cuetos, José Manuel Moreno Pérez y Juan Manuel Muñoz Aguirre), como na modalidá de llingua asturiana (Enrique Faes Díaz, Xosé Nel Riesgu y Marisa López Diz).

  La resultancia de les convocatories a les que se presentaren toes eses obres ye un llibru qu’axunta los relatos de los autores mentaos, variaos en temátiques, heteroxéneos n’estilos y distintos na llingua emplegada, pero toos ellos xuníos por una característica común: la so calidá.

  Por mor d’ello, Trabe asegura qu’esta obra (al igual que les sos predecesores) “forma parte yá del patrimoniu cultural de la villa asturiana de L.luarca, nel conceyu de Valdés, lo mesmo que de toa Asturies y contribúi a manifestar la excelencia d’un premiu que nació con voluntá de permanencia y que supo salvaguardar, ya inclusive amontar, la calidá de les obres presentar y galardonar”.Fonte: asturnews

Miguel R. Monteavaro publica "Poemas pr'amantes y paquidermos"

   L'escritor Miguel Rodríguez Monteavaro (Bual, 1990) torna otra vuelta publicar un poemario cola editorial Trabe y 2failo col título Poemas pr’amantes y paquidermos. Este é el terceiro llibro del bualés, que xa confirma a súa presencia na lliteratura en gallego-asturiano como úa voz característica, non xa como úa promesa" como asolea la nota de prensa na qu'esti día s'asoleyaba l'anuncia de la publicación.

 Na mentada nota de prensa desplicábase también que "despóis de Trenta razóis pra nun medrar (Trabe, 2010) veu el llibro Todos os tristes de mayo (Trabe, 2013), que cua súa versión en asturiano (Tolos tristes de mayu) ganóu el Premio de Poesía Fernán Coronas 2012. Agora publícase Poemas pr’amantes y paquidermos, úa reflexión acerca d’aquello qu’imprime a sociedá nel carácter individual de cada persona, hasta el punto de considerar búa ou mala xente a daquén solo pol feito de tomar certas decisióis. Este llibro forma parte das novas corrientes lliterarias polas que vei discurrindo el gallego-asturiano, variedá llingüística en pleno esplendor artístico. A publicación ta dentro da colección Pontiga de poesía da editorial Trabe y ten, como puntos fortes estralliterarios, as imaxes orixinales, de portada y del autor, da fotógrafa Svetlana Poutilina y un testo de solapa del poeta Pablo X. Suárez".

   Sigún informaba la editorial esti día "prevénse varias presentacióis del llibro qu’agora se publica de cara al outono, como é habitual cuas edicióis de Rodríguez Monteavaro. A os actos de presentación de Trenta razóis pra nun medrar y de Todos os tristes de mayo foran máis de cen personas y contaran cua participación de cerca de vente personaxes da cultura asturiana. Nestas futuras presentacióis ha a tar tamén presente outra nova publicación del poeta pra este ano: a traducción al asturiano del sou anterior llibro, Tolos tristes de mayu (Trabe, 2014), que salirá á lluz nos próximos meses".                                                           Fonte: Astunews

Dixebra y Trabe algamen el Premiu Andrés Solar. Los retayos en llingua asturiana y la Llei Wert el Madreñazu

La Xunta pola Defensa la Llingua Asturiana acaba d'anunciar los ganadores de los XXVIII Premios Andrés Solar. Nesta ocasión, el Pegollu foi, ex aequo, pa la formación musical Dixebra y pa la editorial Trabe, que cumplen 25 y 20 años, respectivamente, como proyectos fundamentales pa entender el desarrollu cultural, social y económicu de la llingua asturiana nes últimes décades. El Madreñazu foi, tamién ex aequo, pa los recortes en materia llingüística y pa la Llei Wert.


La Xunta pola Defensa de la Llingua Asturiana decidió conceder esti 2012 el Pegollu de los Premios Andrés Solar a los decanos del rock astur y a la editorial uviedina «pol so apueste decidíu pola música y lliteratura a lo llargo de bien d'años, demostrando que l’asturianu ye una ferramienta útil y necesaria nel rellatu de la contemporaneidá d'Asturies».

Otra manera, la versión negativa, el Madreñazu, reconoz a la persona o entidá que rescamplaren pol so llabor negativu pa cola llingua asturiana. Na edición del 2012, va pa los recortes en materia llingüística y pa la Llei Wert. «Nos últimos años, con diferentes gobiernos y cola pasividá de los grupos parllamentarios, tamos asistiendo a la aplicación d’un programa sistemáticu de desmantelamientu del texíu cultural y mediáticu n’asturianu», afirma la organización, qu'añade que no que cinca a la llamada Llei Wert, «namás hai que dicir qu’introduz modificaciones brutales que puen suponer un peligru de desaniciu de la enseñanza de la llingua, que yá ta nuna situación de marxinación llaceriosa».

La entrega de los Premios va facese’l día 15 d’avientu a les 19.30 hores, nel Salón d’Actos del Antiguu Institutu de Xixón. L’actu va contar cola actuación musical de Dani Stylo que va facer reellaboraciones de temes históricos de Dixebra. Tamién, como tolos años, depués de l’actu va haber una espicha nel chigre xixonés Canteli, la entrada val 20 euros. Pa dir, hai qu’acutar sitiu y llamar al 985229553 o mandar corréu a info@exunta.org, primero d’esti 13 d’avientu.

Fonte: Les Noticies

Primer tesis tramitada n'asturianu

Xuan Santori

Yá pue lleese en llínia la primer tesis tramitada dafechu n'asturianu

La Universidá d'Uviéu ta acabante poner en llínia la tesis doctoral de Xuan Santori Vázquez, titulada "El papel de los escritores del Surdimientu na recuperación del asturianu: la visión del escritor" y dirixida pol Dr. Ramón d'Andrés. Trátase d'una tesis redactada n’asturianu y que pudo facer tolos trámites dende l’aniciu y per primer vegada, dafechu n’asturianu, gracies al reglamentu nuevu de doctoráu. La calificación de la tesis doctoral foi de Sobresaliente "Cum Laude".

La investigación de Xuan Santori Vázquez (filólogu y escritor) refierse a la influencia de los escritores n'asturianu nel movimientu lliterariu y sociocultural llamáu Surdimientu, qu'entamó nel añu 1974 y llega hasta güei. Esta influencia estúdiala Xuan Santori al traviés de la percepción de los propios escritores, gracies a los datos llograos nuna macroencuesta fecha a prácticamente tolos escritores n'asturianu. La gran cantidá de datos estadísticos permiten facer un retratu escepcional de les interioridaes y característiques del mundu lliterariu asturianu nos últimos 30 años.
Amás, la editorial Trabe prepara una edición en papel de la mesma.

Fonte: asturnews

Más información: Descargar la tesis de Santori

La política llingüística y la construcción frustrada del nacionalismu asturianu

“Faer Asturies. La política llingüística y la construcción frustrada del nacionalismu asturianu (1974-1999)” ye una obra de Patrick W. Zimmerman con versión asturiana de Cesáreo García Fernández. Asoléyala la editorial Trabe na so colección d’ensayu Batura. Nel llibru Patrick Zimmermam pon la mirada oxetiva y distanciada de quien nun ye del nuesu llar, con lucidez y, al tiempu, empatía, y fai un estudiu eshaustivu del movimientu asturianista, dende los tiempos de la nacencia de Conceyu Bable –y el so antecedente, l’asociación Amigos del Bable– allá pel añu 1974 hasta l’acabu del sieglu xx.

Tres más de trenta años d’esporpolle, l’asturianismu cultural, que dio más tarde, o quixo dar, en ser políticu, tien lluces y sombres en sí mesmu y en rellación colos partíos mayoritarios d’Asturies, que fueron quien a emburriar esti movimientu a la marxinalidá.

Nel terrén políticu, l’asturianismu tuvo ciertu puxu allá pelos años noventa del sieglu pasáu, de la que foi a llevar a la Xunta Xeneral un diputáu, representante de la xuntura ente’l PAS y la UNA. L’ocasu llegó cola perda d’esti diputáu y la atomización d’un movimientu que, si bien cuenta coles simpatíes d’una parte de la sociedá asturiana, nun foi a dar el saltu definitivu que lu llantara daveres como una posibilidá real de facer política con mayúscules.

Con un trabayu de campu –documental y oral– de gran caláu, l’autor céntrase nel casu asturianu como paradigma de frustración d’un nacionalismu que nunca nun foi a guarir na sociedá asturiana, bien a la contra de lo qu’asocedió n’otres comunidaes autónomes vecines, como Galicia, Euskadi, Cataluña o mesmamente Andalucía. Esi mesmu trabayu llévalu a amosanos les contradicciones d’una corriente que nació baxo’l franquismu y que nun s’adaptó apode a la nueva realidá del Estáu de les Autonomíes y de la democracia lliberal.

Patrick Alan Zimmerman (California, 1981) ye doctor pola Universidá Carnegie Mellon de Pittsburgh; esti llibru ye’l resultáu del trabayu fechu pa la so tesis doctoral, pal que pasó dellos meses n’Asturies faciendo entrevistes ya informándose.
Fonte: asturnews

Xuan Xosé Sánchez Vicente y Xesús Cañedo Valle acaben de publicar la 2ª edición del "Refraneru asturianu"

Xuan Xosé Sánchez Vicente nuna imaxe d'arquivu. Xuan Xosé Sánchez Vicente y Xesús Cañedo Valle acaben de publicar con Trabe la segunda edición, revisada y ampliada, del so Refraneru asturianu, la recopilación de los refranes d'Asturies más completa que se pue atopar. El llibru empieza con una parte teórica, na que los autores espliquen con brevedá y aciertu qué s'entiende por refraneru asturianu, les clases y formes sintáctiques que presenta, amás de delles notes característiques de los dichos asturiano referíos al cuerpu, la enfermedá y l’alimentación. Al mesmu tiempu, Sánchez Vicente y Cañedo Valle reflexonen sobre’l camín qu’han triar los estudios futuros sobre’l refraneru asturianu, al empar que comenten la bibliografía yá existente. La segunda parte fórmala'l refraneru propiamente dichu, que recueye más de 4.000 proverbios clasificaos según el tema al que faen referencia. A lo último, pieslla’l llibru un índiz temáticu por palabres qu’apaecen nos refranes, que facilita la busca d’un refrán determináu. Ye esta una publicación pa saborgar, pa deprender y, al empar, pa evitar el desaniciu d’una parte importante de la cultura asturiana, porque nun se pue perder de vista que'l refraneru ye ún de los elementos de la cultura tradicional que meyor espeya la forma de ser, de ver y de sentir la vida del pueblu asturianu. Fonte: Asturnews.

Trabe edita'l poemariu "Ensin salir de casa" d'Ánxel Álvarez Llano.

Trabe edita'l poemariu «Ensin salir de casa», d'Ánxel Álvarez Llano «Ensin salir de casa», d'Ánxel Álvarez Llano. Ediciones Trabe acaba de publicar Ensin salir de casa, poemariu col qu'Ánxel Álvarez Llano (Bo, Ayer, 1958) ganó’l Premiu Fernán-Coronas del añu 2010, depués d’años de silenciu creativu. Con voz posada, Ánxel Álvarez Llano, poeta de palabra precisa, constrúi un llibru d’apariencia cenciella, con un llinguaxe pulío, onde nada falta nin ta de más nada. Ensin salir de casa ye un viaxe pel tiempu, pela memoria pero tamién pel escaezu. Un viaxe vital que va del ayeri al futuru ensin salir de casa en versos qu’abelluguen la infancia y el cariñu perdíos nun valle de nublina y cielos turbios. La carrera lliteraria d’esti poeta de mirada tranquila y al empar aliella a les coses del mundu ye llarga y fructífera: tres de los volúmenes consecutivos Les agües muertes (1994), Vieyos fuebos, fresques cenices (1995) y Güéspede del silenciu (1996) habíen de pasar años hasta qu’apaeciere Na mesma piedra (2001). Güei apaga la sede de quien lu sigue con esti poemariu redondu, trabayáu y sinceru. Fonte: Estaya d'asturianu, TPA.

La Casa Conceyu de Xixón acueye la presentación del Premiu Fierro Botas 2011

La obra ganadora del IV Premiu d’ensayu Fierro Botas va presentase esti xueves, 17 de mayu, a les siete la tarde, nel salón de receiciones de la Casa Conceyu de Xixón. La obra “Mitoloxía de los santos n’Asturies”, ta escrita por Alberto Álvarez Peña (Xixón, 1966), perconocíu estudiosu de la cultura y la mitoloxía asturiana, escritor y dibuxante, creador de cómic y cartelista. Tien publicaos, ente más otros, los llibros “Asturias mágica” y “Cuélebres, culuobras, culiebres y culiebrones. La culiebra na mitoloxía asturiana”. La obra asoleyada agora por Trabe Ediciones rastrexa pente la cultura popular y les ilesies asturianes los raigaños paganos de los que bebió y s’alimentó’l cristianismu de los primeros años.Si, como ta de moda dicir, Europa ye lo que ye pola influencia del cristianismu, nun ta demás alcordar qu’esti ye, tamién, lo que ye poles influencies paganes que, dilíes na corriente continua del so monoteísmu, son tovía reconocibles, na memoria colectiva de l’Asturies d’anguaño.
«Si nun yes a vencer al enemigu, únite a él». Esto paez ser que pensó’l cristianismu primitivu a la d’enfrentase a les creencies anteriores bien enraigonaes ente la xente del pueblu. Cristianizaes les fiestes paganes, hubo de buscar agospiu dientro’l monoteísmu a unos dioses que se calteníen vivos na creencia popular, que, polo normal, facíen referencia a la naturaleza y teníen el valir d’axudar a los humanos na comprensión de los sos fenómenos: d’esa manera los santos católicos nun son otro qu’aquellos dioses pequeñinos (afataos con ropa nuevo y con biografíes terroríficamente fantasioses), que garren pa sigo les cualidaes protectores y salvadores de los dioses antiguos.

Fonte: asturnews

Trabe publica'l ganador del Fernán-Coronas 2010

Trabe acaba de publicar Ensin salir de casa, d'Ánxel Álvarez Llano, poemariu ganador del Premiu Fernán-Coronas 2010. Nesta obra, con una voz posada, l'autor constrúi un poemariu d’apariencia cenciella, con un llinguaxe pulíu, onde nada falta nin nada ta de más.Ánxel Álvarez Llano (Bo, Ayer, 1958) tien una llarga y productible carrera lliteraria con obres como Les agües muertes (1994), Vieyos fuebos, fresques cenices (1995) y Güéspede del silenciu (1996). Depués, habíen de pasar años hasta qu’apareciera Na mesma piedra (2001).

Fonte: les noticies

La editorial Trabe convoca'l Premiu Narraciones Trabe 2011

La editorial Trabe ta acabante de convocar el Premiu Narraciones Trabe 2011, que va tener una dotación económica de 2.000 euros en conceptu de derechos d’autor, amás de publicar la obra premiada nuna de les colecciones de la casa. Los autores interesaos en participar tienen de plazu hasta’l 30 de setiembre pa presentar los sos trabayos, que pueden ser lo mesmo noveles que recopilaciones de cuentos o cualesquier otra forma de narración. Les obres presentaes a concursu han ser inédites y han tener una estensión mínima de sesenta páxines, teniendo en cuenta que cada páxina tien que tener 1.800 caracteres.Con esta, ye la octava edición na que se convoca’l concursu, que tien el so orixe nos años noventa, cuando salieron premiaes obres tan paradigmátiques como Histories d’un seductor de Miguel Rojo, Los Párpagos de Buda de Santi F. Ochoa, o Esa lluz que naide nun mata de Marín Estrada. Nel 2005, depués d’unos años de parón, escomenzó a convocase otra vuelta’l certame, saliendo ganadora La Banda Sonora del Paraísu de Xandru Fernández. Na última edición foi’l candasín David Artime’l quien se fixo col premiu pola novela d’ambiente futbolísticu La Bufanda, que resultó ser una de les obres de más repercusión del añu pasáu.

Fonte: les noticies

Editorial Trabe