XIV Xornaes de Lliteratura Infantil y Xuvenil de Samartín del Rei Aurelio

por Pablo R. Guardado

Venti neños y neñes d’ente 4 y 13 años participen nesta edición de la iniciativa que busca averar la lliteratura asturiana a los más mozos. L’actividá ta encuadrada nes XIV Xornaes de Lliteratura Infantil y Xuvenil.

Los monitores de l’Asociación Cultural Bocina Nalón, cola collaboración del escritor Pablo Rodríguez Medina, van desendolcar estremaes actividaes rellacionaes cola poesía, xéneru escoyíu pa esta edición tres dedicar l’anterior al cómic y la narrativa. Asina, los neños y neñes participantes van trabayar la poesía visual, los caligrames o la escritura automático, too ello col enfotu d’entretenelos y educalos, consiguiendo asina que garren actitúes positives hacia la llectura.

Les sesiones van principiar mañana a les 18 hores na Casa de la Mocedá de Sotrondio, con un llargor d’hora y media, y van continuar los díes 13 y 27. Nesta xornada cabera, inauguraráse tamién una esposición nesi mesmu centru colos trabayos fechos polos asistentes a los talleres d’animación a la llectura.

Actividaes mientres tol mes

Esta iniciativa ta encuadrada nes XIV Xornaes de Lliteratura Infantil y Xuvenil qu’entama la Oficina de Normalización Llingüística de Samartín del Rei Aurelio en collaboración coles asociaciones culturales Bocina Nalón y Reciella, la Tertulia Malory y la Oficina d’Información Xuvenil. Asina, mientres tol mes de payares van desendolcase tamién actividaes en castellanu nel conceyu dedicaes a les artes escéniques, como la representación de siete obres de xéneros tan diversos como la maxa, los títeres o’l circu.

Les producciones programaes pa los escolinos del conceyu nel Teatru Municipal, asitiáu en L’Entregu, son les siguientes: ‘Bebecuentos’, de Carlos Alba ‘Cellero’; ‘Andante caballero’, de Tras la Puerta Títeres; ‘Parasoles barrocos’, d’El Callejón del Gato; ‘Cuento del día y de la noche’, de Producciones Quiquilimón; ‘La habitación mágica’, del Mago Nacho; ‘Al circo con Augusto y Bianco’, d’Arte Producciones José Rico Teatro; y ‘Hansel y Gretel’, d’Higiénico Papel.

Na semeya, un momentu de los talleres d’animación a la llectura del añu pasáu.

Fonte. Asturies.com

Charra: “El pallabreru de la minería asturiana y el so orixe”

A les 19:30 d'esti vienres na Casona d'El Bravial (Blimea).

Lucía Cortina García va ufiertar una charra titulada “El pallabreru de la minería asturiana y el so orixe”, cola que va averar a la xente al significáu y l’orixe de dalgunos de los términos emplegaos con más frecuencia n’actividá minera asturiana, esplicando en qué midida los términos que son patrimoniales s’esportaron a otres zones mineres de fuera d'Asturies.

L'actividá entamada pol Serviciu de Normalización Llingüística de Samartín del Rei Aurelio, con motivu del Día Internacional de la Llingua Materna, desendolcáu'l pasáu 21 de febreru nuna xornada de reivindicación de la llingua propia.

Fonte: Infoasturies

Samartín del Rei Aurelio pieslla'l XVII Certame Nacional de Curtiumetraxe Aula 18

El Teatru Municipal va acoyer el 15 de payares la gala d'entrega de los premios

   El Conceyu Samartín del Rei Aurelio va abellugar el pieslle esti sábadu 15 de payares del XVII Certame Nacional de Cortometraje Aula 18 nel intre d'una gala que se va celebrase nel Teatru Municipal, en L'Entregu. Mientres la ceremonia, que va escurrir envolubrada nun espectáculu musical inspiráu nel llargumetraxe “Billy Heliot”, van dase a conocer los galardonaos y van apurrise les correspondientes distinciones.

La gala va entamar cola proyección de los curtiumetraxes que más votos del públicu recibieron demientres la so proyección nel Teatru Municipal y distintes sales públiques na segunda quincena del pasáu mes d'ochobre. El votu del espectador, qu'exerze como xuráu, volvió bater record de participación, degolando la barrera de los 6.000 y superando la participación d'años anteriores.

   El primer, segundu y tercer premiu, según el galardón al meyor curtiumetraxe empobináu o rodáu n'Asturies va salir d'ente los diez trabayos más votaos: Sájara, de Juanan Martínez (Madrid); Democracia, de Borja Cobeaga (San Sebastián);Cuerdes, de Pedro Solís (Madrid); El mio primer besu, d'Albert Manich (Barcelona); Sequence, de Josep Prim (Barcelona); Tupper, de Javier Pumar (Vigo);Eladio y la puerta interdimensional, de María Giraldez y Miguel Provencio (Madrid); Porsiemprejamón, de Ruth Díaz (Cantabria); El cascu de Xúpiter, de Diego Pérez y Chechu Llión (La Rioxa); y Bikini, d'Óscar Bernacer (Valencia).

   Pela so parte, los nomaos a la Meyor Interpretación Masculina y Femenina son: Karra Elejalde y Ruth Díaz por El cascu de Xúpiter’; Beatriz Olivares por ‘Sajara’; Asier Etxaendía en ‘Porsiemprejamón’; Oscar Ladoire, por Democracia’; y Marta Larralde por Los Güesos del fríu’.

   Na Sección Asturiana, los favoritos al premiu a la meyor dirección o producción na comunidá son: Hala la mio neña hala, de Pablo A. Quiroga (Candás); Safari, de Gerardo Herrero (Madrid); y ¿Quién ye Llibertá Lionetti?, de Juan Carlos Álvarez (Uviéu).

   Tres la proyección de los curtiumetraxes premiaos y antes de la entrega de los galardones, la escuela de baille Dancia Asturies, de Llangréu, va poner n'escena una reinterpretación musical del llargumetraxe Billy Heliot, Stephen Daldry, que va concluyir cola representación de ‘El Baille de los cisnes’.                                                                          Fonte: asturnews

Despídese en SMRA l'amuesa del Teatru

   Esti vienres 7 de payares nel Teatru Municipal de Samartín del Rei Aurelio, en L’Entregu, va clausurase la I Amuesa de Teatru d'humor entamada en collaboración con FETEAS. La Compañía encargada de la clausura va ser la llangreana “Les Filanderes” dirixida pola entreguina Carmen Gloria que va representar la obra de Maxi Rodríguez “Les Aeróbicas”.

   Esta amuesa de teatru lleva desenvolviéndose con gran ésitu dende'l mes de setiembre y pol escenariu del L’Entregu pasaron yá les mas importantes compañíes de teatru amateur d'Asturies.

   Les funciones teatrales van siguir en Samartín del Rei Aurelio la próxima selmana na redolada de la Fiesta Gastronómica de “Los Nabos” coles actuaciones na Aula Cultural “La Plaza” del Grupu Teatru “Refaxu” que va poner n'escena la obra de Eladio Verde “Los Chiflaos” el llunes día 10 y la Compañía “Odisea Teatro” que va representar la obra d'Alejandro Casona “La barca ensin pescador” el martes 11.                          Fonte: asturnews

Un taller de cómic ye la novedá de les XIII Xornaes de Lliteratura Infantil y Xuvenil de Samartín del Rei Aurelio

El plazu d'inscripción nestos talleres fina esti vienres 31 d'ochobre

Cartelu de lesl XIII Xornaes de Lliteratura Infantil y Xuvenil, Samartín del Rei Aurelio

   Esti mes de payares desenvuelvense les XIII Xornaes de Lliteratura Infantil y Xuvenil de Samartín del Rei Aurelio, que presenten esti añu la novedá d'unos talleres infantiles de llectura de cómic n’asturianu pa los que ye necesario apuntase güei vienres 31 d'Ochobre como data tope.

   Los talleres tán empobinaos a neños y neñes de 4 a 11 años y cuntarán cola presencia de dibuxantes de sonadía, como Enrique Carballeira, David Fernán o Ruma Barbero, o la traductora de los cómics d'Astérix, María Xosé Rodríguez.

   Les Xornaes lleva tiempu organizánles la Oficina de Normalización Llingüística de Samartín del Rei Aurelio en collaboración cola Oficina d’Información Xuvenil del conceyu y Bocina Nalón qu'entama estos talleres, que van dividise en dos turnos. El primeru ta destináu a neños y neñes de 4 a 6 años y va desendolcase, en dos sesiones, los díes 14 y 28 de payares (18 hores) na Casa de la Xuventú de Sotrondiu. Mentantu, los neños y neñes con ente 7 y 11 años, van dar trés sesiones: los díes 7 y 21, na Casona del Bravial de Blimea, y el 28 en Sotrondiu.

   Apuntase nos talleres pasa por llamar al númberu de teléfonu 984.11.22.39 o inscribise nel corréu electrónicu bocinaarrobabocina.org.                                                                                         Fonte: asturnews

Asturianu y creatividá aporten al "Samartín de les Tortielles"

Un total de 25 establecimientos hosteleros del conceyu Samartín del Rei Aurelio participen na tercera edición d´una cita gastronómica, dende´l vienres 7 al domingu 9 de marzu, que tien a les tortielles como protagonistes y que tien la cartelería y papelería fecho íntegramente n´asturianu. Tres l´ésitu de SAMARTÍN DEL PINCHU nel pasáu mes d´ochobre, la hostelería venceyada a ECOSAM propónse cellebrar la tercera edición de SAMARTÍN DE LES TORTIELLES, prósima cita gastronómica a desendolcar nel conceyu esta fin de selmana, ente los díes 7 y 9 de marzu, cuyu exe central van ser les tortielles creatives, diferentes y orixinales. En SAMARTÍN DE LES TORTIELLES podrán degustase 25 tortielles diferentes y orixinales, con ingredientes tan variaos como´l pulpu, oricios, centollu, llagostinos, almexes, gambes, amás de tortielles con carne guisao, morciella matachana, carne picao, xamón, salchiches, tando dalgunes d´elles complementaes con setes, xampiñones, calabacinos, pimientos o diferentes quesos, incluso con almendres. Variedá y creatividá para la tercera edición d´esti eventu gastronómicu nel que la clientela fai de xuráu, previa degustación de cuatro tortielles, col aliciente del sortéu de 100 € en compres ente los votantes que depositen la so papeleta en dalguna de les urnes instalaes nos establecimientos participantes. Como vien siendo habitual, fixáronse dos rutes pol conceyu, una ente Sotrondio y Blimea, y otra pol L´Entregu. Pa facilitar el desplazamientu, la llocalización y l´información de les diferentes tortielles que se servirán, editáronse 2.000 “gastromapas” distribuios polos llocales participantes. Pa alcontrar más información de los establecimientos participantes habrá que acceder al blog de noticies de la web de ECOSAM (www.ecosam.es/blog), o a la páxina de Facebook de la asociación (www.facebook.com/comerciodesanmartin). D´igual manera, ECOSAM continúa col fechu diferencial que tien tamién SAMARTÍN DEL PINCHU, esto ye la utilización de la llingua llariega como llingua oficial del eventu gastronómicu, ayudando d´esta manera a la normalización de la llingua asturiana fuera de los tradicionales ámbitos de la cultura. Pa too ello, ECOSAM cuenta col asesoramientu de la Oficina de Política Llingüística de Samartín del Rei Aurelio. Fonte. Asturnews

Samartín celebra'l Día Internacional de la Llingua Materna con una Uiquimaratón

Les actividaes van tener llugar na Casona del Bravial los díes 20 y 21 de febreru.

   Da-y presencia a la llingua asturiana nes nueves teunoloxíes ye ún de los aspeutos que más puen contribuyir a la so normalización. Por esi motivu, y coinciendo col Día Internacional de la Llingua Materna que se celebra’l próximu 21 de febreru, la Oficina de Normalización Llingüística de Samartín del Rei Aurelio va collaborar con un grupu de voluntarios de laUiquipedia pa llevar a cabu un taller esplicativu y una Uiquimaratón col envís d’enantar el númberu d’usuarios activos del proyeutu y aprovechar pa crear y ameyorar artículos enciclopédicos que tengan que ver col conceyu.

   Estes xornaes van entamar el xueves 20 a les 18:30 hores col saludu de les autoridaes, la presentación del proyeutu Wikimedia y un taller d’edición na Uiquipedia. Al día siguiente, de 6 a 9 de la tarde va llevase a cabu la Uiquimaratón na que los participantes van poder colgar artículos y semeyes rellacionaos con aquellos temes que más-yos interesen y que tengan que ver cola historia y el patrimoniu cultural de Samartín del Rei Aurelio.

La Wikipedia ye una enciclopedia llibre caltenida pola Fundación Wikimedia, una organización ensin ánimu de llucru. Los sos más de 15 millones de artículos tán escritos collaborativamente por usuarios de tol mundu y los más de los mesmos puen ser editaos por cualesquier persona con accesu a internet. Creóse en 2001 por Jimmy Walles y Larry Sanger y anguaño ye la obra de referencia más grande y popular d’internet. La Uiquipedia, la versión n’asturianu de la enciclopedia, alcuéntrase ente les más de 270 llingües que la componen y con un total de 19.400 artículos. Surdió en 2004.

Siguen asina les actividaes previstes pa celebrar los cuatro años de la Casona del Bravial de Blimea como centru cultural, qu’entamaron el día 6 cola inauguración de la esposición “El Castiellu de Blimea. Historia, lleendes, abandonu”, que pue visitase hasta’l próximu día 7.   Fonte: Qué ye ho!

Uiquimaratón en Samartín del Rei Aureliu'l Día Internacional de la Llingua Materna del 21 de febreru

El 21 de febreru, coincidiendo col Día Internacional de la Llingua Materna va desendolcase nel conceyu de Samartín del Rei Aurelio un taller de presentación del proyeutu y d'edición de la Wikipedia y una Uiquimaratón d'artículos rellacionaos col mesmu (incluyendo la xuba d'imáxenes venceyaos a los mesmos). Na xornada proponse escribir del Conceyu y de la hestoria del mesmu, asina como del so patrimoniu cultural. La Uiquipedia, una enciclopedia llibre en 277 idiomes, tien ya na so versión n'asturianu 19,395 artículos. La enciclopedia dixital más conocida de la rede superó en marzu de 2008 los 11.000 artículos na so edición n’asturianu y los responsables de la mesma entamaron dende entós “non tanto a medrar en númberu como facelo en calidá de los artículos”. Pa ello, entamaron d'aquella la “La Quincena a Sestaferia” un proyectu “col envís d’ameyorar, enachar y encadarmar la Uiquipedia a lo llargo de quince díes”. La idea de los responsables ye “facela más útil” y afitala “como una ferramienta pal espardimientu del asturianu na rede”. En Payares de 2013 cellebraríase la segunda edición d'es Sestaferia. La edición n'asturianu de la Wikipedia perpasó n'Ochobre del añu pasáu los 19.000 artículos, con una entrada sobro la 'Hestoria de la Llingua catalana' que foi a ser la númberu 19.000. Un fechu que s'algamó dientro de la I Nit de la Llengua al Món Dixital, celebrada en Barcelona y na que Vítor Suárez participó en representación de la llingua asturiana, como Vicepresidente d'Iniciativa pol Asturianu. La Uiquipedia asítiabase asina, depués de cásique 10 años de xera dende qu'entamra en 2004, como l'idioma númberu 100 con más artículos nesta enciclopedia dixital, 63 posiciones perbaxo del puestu 37 qu'ocupaba nel 2005, cuando la 'wiki' n'asturianu cuntaba con 3.000 entraes y yera una de les más actives. Anguaño'l crecimientu de la Uiquipedia n'asturianu ye enforma más sele y nun algama les mil entraes por añu, razón pola que se vien agora a sofitar un llamamientu a los interesaos en collaborar pa que seyan más activos. Fonte: Asturnews

Nuevu taller de llectura infantil en Samartín del Rei Aurelio

L'autor Chechu García abre un nuevu taller de llectura infantil en Samartín del Rei Aurelio L’actividá ta incluyida nes XII Xornaes de Lliteratura Infantil y Xuvenil Esti vienres 22 de payares a les 6 de la tarde na Casona del Bravial de Blimea va tener llugar un nuevu taller de llectura infantil entamáu pola Oficina de Normalización Llingüística del conceyu en collaboración cola asociación cultural Bocina Nalón y la Oficina d’Información Xuvenil. Si los dos vienres anteriores un grupu de neños d’ente 7 y 10 años s’acercaben al argumentu y el pallabreru del llibru “Tapín de Picupáu”, de Pablo Rodríguez Medina, esta selmana va ser otru grupu d’edaes ente 4 y 6 años los que van poder conocer en persona al escritor Chechu García, que-yos va cuntar el so llibru tituláu “Marta y el peludín de Carrandi” (Ámbitu). Amás de charrar col autor van facer distintes actividaes rellacionaes con esti llibru, ente les que s’incluyen manualidaes y dibuxos, too ello dende un enfoque llúdicu y d’entretenimientu. Chechu García dase a conocer como escritor en 1996 col llibru infantil “Vieyu Trasgu”, col qu’algamó’l primer premiu de “Llectures pa rapazos” de l’Academia de la Llingua. Nesi mesmu añu algama tamién el premiu Teodoro Cuesta de poesía col llibru tituláu “Les coraes de la roca”. Tamién tien escrites distintes obres teatrales, rellatos curtios, antoloxíes, estudios sobre la historia del cómic y llibros infantiles. Ye ún de los fundadores de la tertulia lliteraria “Tom Malory” y el coordinador de la revista que surde d’ella. Estos talleres son una de les principales novedaes que presenten les Xornaes de Lliteratura Infantil y Xuvenil d’esti añu, y que se suma a les esposiciones y les representaciones teatrales que se tán celebrando nel conceyu a lo llargo del tol mes. Fonte: Asturnews

XII Xornaes de Lliteratura Infantil y Xuvenil de Samartín del Rei Aurelio

Les XII Xornaes de Lliteratura Infantil y Xuvenil de Samartín del Rei Aurelio entamen en payares con talleres y teatru. Les XII Xornaes de Lliteratura Infantil y Xuvenil de Samartín del Rei Aurelio dirixíes a escolinos de toles edaes entamen el próximu llunes 4 de payares cola principal novedá d’esti añu de los talleres de llectura entamaos dende la Oficina de Normalización Llingüística de Samartín del Rei Aurelio en collaboración cola asociación Bocina Nalón y la Oficina d’Información Xuvenil del conceyu. La Conceyalía de Cultura, Educación, Igualdá y Deportes de Samartín del Rei Aurelio va celebrar esti mes de payares la décimosegunda edición de les sos Xornaes de Lliteratura Infantil y Xuvenil. La programación inclúi espectáculos teatrales, talleres infantiles y esposiciones dirixíes a los escolinos del conceyu colos que se pretende fomentar los vezos llectores y foi presentada esta selmana nel Ayuntamientu de SMRA. “Estes xornaes abarquen les artes escéniques y les lletres cola finalidá d’animar a la llectura a la infancia y la mocedá. Naguamos por educar dende l’entretenimientu con una programación de calidá, acercando a la población escolar les últimes producciones teatrales y lliteraries. Tamién queremos sorrayar les creaciones de los autores del conceyu” señaló la conceyala de Cultura, Educación, Igualdá y Deportes, Gema Suárez nesta presentación na que tuvieron tamién presentes representantes de les asociaciones collaboradores. La principal novedá d’esti añu son los talleres de llectura entamaos dende la Oficina de Normalización Llingüística de Samartín del Rei Aurelio en collaboración cola asociación Bocina Nalón y la Oficina d’Información Xuvenil del conceyu. Nellos van llevase a cabu xuegos y actividaes rellacionaes colos llibros “Marta y el peludín de Carrandi” de Chechu García y “Tapín de Picupáu” de Pablo Rodríguez Medina. La inscripción nestos talleres ye de baldre y van desendolcase tolos vienres del mes de payares a les 6 de la tarde na Casa de la Xuventú de Sotrondio y na Casona del Bravial de Blimea respeutivamente. En cuanto al teatru van representase nel Teatru Municipal obres destinaes a tolos ciclos de primaria, como “Un gallinero en la azotea”, “Cuatro hojas y la máquina fantabulosa”, “Por las nubes” o “El pelegrín valiente”, adautación esta última del cuentu d’Antón García fecha pola compañía Nun Tris Teatru. Tamién va haber teatru nes escueles infantiles cola obra de Carlos Alba “Sol, luna, arriba y abajo”. Les xornaes complétense coles esposiciones sobre’l llibru “Mieu” nel colexu d’El Bosquín de L’Entregu y la muestra “Hai una ringlera trazada”, sobre los escritores del conceyu, que se va poder visitar na Casa de la Xuventú de Sotrondio y na Casona del Bravial. Fonte: Asturnews

García Arias entamó la campaña sobre la toponimia de Samartín del Rei Aurelio

La charra tuvo llugar nel marcu de la presentación de la campaña “Los nomes de llugar nun tienen preciu”

Xosé Lluis García Arias arrancó la campaña sobre la toponimia de Samartín del Rei Aurelio na Casona del Bravial con una charra que sirvió de presentación de la campaña mesma que lleva por títulu “Los nomes de llugar nun tienen preciu”. Xosé Lluis García Arias, especializáu en cuestiones del ámbitu llingüísticu y toponímicu, como asina lo amuesen gran parte de les sos publicaciones, fizo referencia a l’orixe de munchos topónimos del conceyu como Sotrondio, Blimea, Llantero o La Güeria, y asina un llargu etcétera de nomes polos que s’interesó’l numberosu públicu asistente. L’Ayuntamientu de Samartín del Rei Aurelio, a de la so Oficina de Normalización Llingüística, presentó esti xueves una nueva campaña destinada a reforzar l’usu de la toponimia oficial del conceyu, aprobada por decretu nel añu 2008. Pa ello llevó a cabu la edición de 2000 chapes metáliques nes qu’apaecen recoyíos un total de 52 topónimos del conceyu. Sanamiés, La Güeria, L’Acebal, La Envernal o La Potoxa, ente otros munchos, son dalgunos de los nomes de llugar qu’apaecen reflexaos nestes chapes. Tamién s’editaron pegatines col nome del conceyu y cartelos de la campaña col eslogan “Los nomes de llugar nun tienen preciu” que se van repartir per distintos edificios públicos como biblioteques, polideportivos o telecentros. L’actu contó cola presencia de l’alcalde de Samartín del Rei Aurelio, Enrique Fernández Rodríguez. Xosé Lluis García Arias, especializáu en cuestiones del ámbitu llingüísticu y toponímicu, como asina lo amuesen gran parte de les sos publicaciones, fizo referencia a l’orixe de munchos topónimos del conceyu como Sotrondio, Blimea, Llantero o La Güeria, y asina un llargu etcétera de nomes polos que s’interesó’l numberosu públicu asistente. A la fin de la charra repartiéronse ente la xente chapes y pegatines colos topónimos del conceyu. Nel actu pudo vese tamién un videu sobre la campaña nel que distintes persones lligaes a la cultura como Alfonso Zapico, Chus Pedro o Aurora Suárez, y tamién el propiu alcalde del conceyu animen al usu de la toponimia oficial. Esta campaña fízose en collaboración cola Rede de Normalización Llingüística nos Conceyos y cuenta col sofitu de la Conseyería d’Educación, Cultura y Deporte del Principáu d’Asturies. Fonte: Asturnews

Samartín: Campaña pa reforzar l'usu de los topónimos tradicionales ente la población

Samartín entama una campaña pa reforzar l’usu de los topónimos tradicionales ente la población

   ‘Los nomes de llugar nun tienen preciu’ ye’l nome de la campaña qu’entama Samartín del Rei Aurelio pa reforzar l’usu de los topónimos tradicionales, agora oficiales, ente la población. L’alcalde Fernández participa de forma activa.

   La Oficina de Normalización Llingüística de Samartín del Rei Aurelio editó un total de 2.000 chapes metáliques colos nomes de los 52 topónimos mayores del conceyu que se van repartir ente la población, a lo qu’hai que sumar pegatines col nome del conceyu y cartelos promocionales de la campaña que van distribuyise n’edificios públicos como biblioteques, polideportivos o telecentros. L’oxetivu ye “reforzar l’usu de la toponimia oficial del conceyu, aprobada por decretu nel añu 2008”, señalen dende’l SNL que dirixe Hugo Fanjul. Completa esta iniciativa un videu de Pablo A. Quiroga nel qu’apaecen l’alcalde Enrique Fernández, l’ilustrador Alfonso Zapico, el cantante Chus Pedro y Aurora Suárez, direutora de Refaxu, comentando la so rellación con dalguna de les poblaciones del conceyu utilizando la forma asturiana.

   La presentación oficial de la campaña va tener llugar el xueves, a les 19 hores, na Casona del Bravial, en Blimea, cola presencia de la conceyala de Cultura de Samartín del Rei Aurelio, Gema Suárez Torre. Va completar esti actu una charra de Xosé Lluis García Arias sobre ‘La toponimia de Samartín del Rei Aurelio’. Toles persones qu’asistan van recibir el material de la campaña, na que collaboren la Rede de Normalización Llingüística nos Conceyos y la Conseyería d’Educación, Cultura y Deporte.

   Fonte:  Asturies.com

L'Entregu: esposición sobre escritores n'asturianu del conceyu

L'Entregu va acoyer una esposición sobre escritores n'asturianu del conceyu

   L’Institutu d’Enseñanza Secundaria Virxe de Cuadonga de L’Entregu va acoyer dende’l 29 d’abril al 3 de mayu una esposición sobre los escritores de Samartín del Rei Aurelio. Na muestra incluyénse 10 paneles onde se fai un repasu de la biografía, obra y testos de distintos autores del conceyu como Xulio Arbesú, Pablo Rodríguez Medina, Chechu García o Manuel Asur, ente otros.

   Amás, a lo llargo de la selmana l'alumnáu del centru va trabayar cuestiones rellacionaes colos conteníos d’esta esposición, y van ser ellos mesmos los que busquen y ellaboren información complementaria a la qu’ufierten los paneles. Asina, cartelos ellaboraos por ellos mesmos sobre estos autores van sirvir de complementu a la propia esposición.

   Esta muestra forma parte del programa d’actividaes entamáu dende la Conceyalía de Cultura de Samartín del Rei Aurelio y la Oficina de Normalización Llingüística en collaboración con distintos centros educativos pa celebrar la XXXIV Selmana de les Lletres Asturianes.

   Fonte:  Asturnews.

La piscina de Samartín yá ta tamién n’asturianu

Unu de los nuevos cartelos billingües

Dende va unes selmanes la piscina pública de Samartín, asitiada en Sotrondio, presenta nueva rotulación informativa en cauna de les sos dependencies, de mou qu’a partir d’agora, amás d’ufiertar la información en castellán, failo tamién n’asturianu. Sigue asina un procesu que’l Conceyu de Samartín yá entamó fai varios años y col que yá se llevó a cabu la rotulación billingüe d’otros edificios públicos como la Casa Conceyu o los polideportivos de Blimea y L’Entregu.

“Vestuariu masculín”, “Vestuariu femenín”, "Ximnasiu", “Homes”, “Muyeres” son dalgunos de los trenta nuevos rótulos que presenta esti equipamientu deportivu y colos que la llingua consigue facese güecu y tener presencia nunu de los ámbitos que más puen contribuyir a la so normalización, ya que se-y da presencia dientro de la propia alministración de los conceyos, lo que supón tamién da-y prestixu. Esti trabayu llevóse a cabu a traviés de la Oficina de Normalización Llingüística, y cuntó pa ello con una sovención de la Conseyería d’Educación, Cultura y Deporte d’Asturies.

Fonte: Asturnews

XI Xornaes de Lliteratura Infantil y Xuvenil en Samartín del Rei Aurelio

Entamen les Xornaes de Lliteratura Xuvenil en Samartín del Rei Aurelio


La Conceyalía de Cultura, Educación, Deporte organiza les XI Xornaes de Lliteratura Infantil y Xuvenil que se van a celebrar a lo llargo d’esti mes. El programa d'esta edición ye heteroxéneu en cuantes a que contién cine, teatru, esposiciones y lliteratura, pero toos estos xéneros xiren alredor del terror que fai de filu conductor d'estos alcuentros lliterarios. Güei a les 18:30 de la tarde ábrense cola inauguración de la esposición del llibru MIEU, escritu por Milio’l del Nido y con ilustraciones d’Alberto Sastre. Na inauguración van tar presentes Ángela Sánchez, de la Editorial Pintar-Pintar y Gema Suárez Torre, conceyala de Cultura de Samartín del Rei Aurelio.

L'envís d'estes xornaes pasar por impulsar vezos de llectura y creativos ente’l públicu infantil y xuvenil pente medies de el so aproximamientu al mundu de les lletres, les arte escénicas o'l cine dende una perspectiva recreativa y coles mesmes educativa.

Les xornaes son tamién una escelente oportunidá pa conocer novedaes en lliteratura infantil y xuvenil y facer un repás a los trabayos que nos últimos años tán produciendo nel xéneru del terror, en medios como la radio, el cine, el teatru o'l cómic.

El programa va rematar el 28 de payares, con conteníos en llingua asturiana y castellán.

El martes 13 tendrá llugar la proyección de la película “La nueche de los muertos viviente”, un clásicu del géneru de terror del añu 1968 y que se puede revisar agora n'asturianu gracies al doblaxe de Gonzali Producciones. La proyección fadráse na Casona del Bravial a les siete de la tarde. La entrada ye llibre y gratuita.

La viniente selmana, el miércoles 21 de payares tendrá llugar una charra a cargu del escritor Chechu García titulada “Terror n’asturianu” y na que se llevará a cabu un repás de tolo que se fizo y se ta faciendo col xéneru de terror en llingua asturiana, tanto nel ámbitu lliterariu como n'otros como'l cómic, la radio, la televisión o'l cine. Esta actividá celebraráse tamién na Casona del Bravial.

El día 28 la Casona del Bravial acueye un alcuentru con Milio’l del Nido, autor de los testos del llibru infantil Mieu, que cunta la hestoria de dos hermanos que se treslladen colos sos padres a una casona antigua al pie d'un faru nel que comiencen a asoceder fechos estraños. Na presentación l'autor tará acompañáu por Ángela Sánchez, de la Editorial Pintar-Pintar.

A toes estes actividaes que se celebrarán na Casona del Bravial hai qu'añedir tamién les representaciones teatrales que tendrán llugar nes escueles d’escolinos. El martes 6 de payares Carlos Alba representará la obra “Un cuentu, un arrullu, un cantar”, a les 10:30 na escuela infantil d'El Apurro y a les 11:30 na de Sotrondio.

Tamién habrá representaciones pa los centros escolares nel Teatru Municipal de Samartín. El martes 13 Con Alevosía Teatruo representará “Tristán y Pauletta”. Tomen el relevu Tras la Puerta Títeres, que representarán el xueves 15 “Malas Palabras”. P'acabar, el miércoles 21 de noviembre Callejón del Gato representará “Semillas de Cardamomo”. Toles representaciones serán a les 11:30 de la mañana.

Más información: Programa completu d’actividaes de les Xornaes

Fonte: Asturnews

Piden que la páxina del Ayuntamientu de Samartín se torne al asturianu

Conceyu Abiertu por Samartín del Rei Aurelio pidió nun comunicáu que la web del conceyu tea tamién disponible n'asturianu, al entender que ye un drechu fundamental y básicu pa los y les vecines.

Pa Conceyu Abiertu por Samartín, "L´actual estáu de la páxina web ye que únicamente se pue visualizar en castellán, siendo esta una actitú de despreciu y marxinación pa cola llingua asturiana y pa cola cultura qu´ésta representa por parte de l´actual gobiernu municipal". Camienten que "Amás ye una midía perfácil de iguar y que yá fixeron otros Ayuntamientos de conceyos veceros como por exemplu los de Llaviana y Llangréu, nos que se puede atopar una pestiñina cola que se tien accesu a la web na llingua que’l llector prefiera".

Consideren que "el nuesu conceyu tien una oficina de política llinguística que debería encargase de xestionar esti tema y actualizar la web de mou que quede una versión n´asturianu normativu", polo que finen afitando que "también falamos n´asturianu y por ello queremos que los medios de comunicación públicos del conceyu tean tamién na nuesa llingua".

Fonte: Infoasturies

Campaña n’asturianu sobre'l reciclaxe en Samartín del Rei Aurelio

Pablo R. Guardado
‘Echái una mano al mundu’ ye’l nome de la campaña sobre'l reciclaxe qu’entama’l Conceyu de Samartín del Rei Aurelio. Van repartise bolses reutilizables ente la población y dípticos con conseyos pa curiar el mediu ambiente, ente otres aiciones.

“Con esta iniciativa búscase concienciar a la xente sobre la importancia del reciclaxe y el curiáu del mediu ambiente”, espliquen dende’l Conceyu, que va presentar la campaña mañana, a les 19 hores na Casona del Bravial (Blimea), con una xornada especial a la que convidaron a Elisabet Soto Álvarez, vocera de la Plataforma Medioambiental d’Aviles y Redolada, pa dar una charra informativa ‘Pola reducción de residuos”, na que va esponer datos tán preocupantes como que’l porcentaxe de basura que se recicla nun llega’l 18 por cientu del total. Gema Suárez, conceyala de Cultura, y Hugo Cortina, responsable de la Oficina de Política Llingüística, van encargase d’esplicar los detalles d’esta iniciativa entamada pol Conceyu en collaboración cola Rede de Normalización Llingüística nos Conceyos y la Conseyería de Cultura y Deporte.

Les persones qu’acudan a esti actu van recibir tolos materiales de la campaña: bolses reutilizables en trés collores pa separar la basura a la hora de reciclar, cartelos, axendes y dípticos con conseyos pa curiar el mediu ambiente. Nes xornaes próximes, toles persones interesaes en disponer d’estos útiles han d’averase a quiscos y papeleríes del conceyu, onde van repartise de baldre.

Fonte: Asturies.com

Ciclu de Cine n'Asturianu en Samartín del Rei Aurelio

01-12-2011
Proyeición de 'McLintock', llargumetraxe tornáu al asturianu por Gonzali Producciones.

A les 19 hores na Casona del Bravial, en Blimea.

Entrada llibre hasta completar aforu.

Entama la conceyalía de Cultura al traviés de la Oficina de Normalización Llingüística en collaboración con Gonzali Producciones.

Fonte: Asturies.com

Cinema n’asturianu N'El Corte Inglés
La sucursal uvieína d’El Corte Inglés allugada nel centru comercial Salesas, na cai Xeneral Elorza 75, tien nel departamentu de vídeos una estaya denomada Cinema n’asturianu a disposición de los sos veceros, según informen dende Gonzali Producciones.

Esti espaciu creyóse pa ufiertar les películes doblaes al asturianu por Gonzali Producciones. Nelli puen topase copies de Los viaxes de Gulliver y El tercer home, a les que van xunise n’avientu copies de McLintock y d’una edición especial de La nueche de los muertos vivientes. L’ésitu de ventes, afirmen dende GP, “llevó a qu’en poco más de dos meses ficiérense nesti establecimientu trés remeses de películes”.

Fonte: Asturnews

La Xunta Elleutoral de Llaviana refuga les candidatures de Conceyu Abiertu n'asturianu pese a la sentencia del Tribunal Constitucional

Nuevu casu de represión llingüísitica nunes elleiciones anque esta vegada el proceder de la Xunta ye anticonstitucional gracies a la sentencia 48/2000 de 24 de febrero de Tribuna Constitucional.

La Xunta Ellectoral de Zona de Llaviana comunicó ayeri a los representantes de Conceyu Abiertu énte la mesma que nun daba por válides les candidatures presentaes nos conceyos de Samartín del Rei Aurelio y Llangréu por emplegar l’asturianu na documentación requería al efeutu. Concretamente, lo que s’argumenta dende la XEZ de Llaviana ye que “nun s’utiliza nenguna de les llingües oficiales del Estáu español”. De momentu, ye l’únicu casu nel que se refuguen les llistes de Conceyu Abiertu por esta razón, ya que nin la Xunta Ellectoral Provincial nin nenguna de les otres de Zona nes qu’hai presentaes candidatures de Conceyu Abiertu comunicaren nada al respeutu.

Magar que nun ye definitivu, Conceyu Abiertu quixo facer públicu y denunciar el determín tomáu pola XEZ de Llaviana porque supón "l’enésimu ataque escontra la llingua asturiana y aquellos ciudadanos que la empleguen". Ye más, Conceyu Abiertu "llamenta" que los responsables de la XEZ de Llaviana "tovía nun conozan la sentencia 48/2000, de 24 de febreru, del Tribunal Constitucional (BOE nº 76, 29 de marzu de 2000) qu’anulaba’l determín de la Xunta Ellectoral Provincial d’Asturies de nun proclamar les candidatures de la organización política Andecha Astur al Congresu los Diputaos y al Senáu pola mesma razón, al considerar que se taba vulnerando’l drechu de les persones a acceder a los cargos públicos en condiciones d’igualdá, sentando un precedente hestóricu".

Conceyu Abiertu retrucará al determín de la Xunta Ellectoral de Zona de Llaviana sofitándose nesta sentencia y confía en que’l prósimu llunes, 25 d’abril, se proclamen les sos candidatures nos conceyos de Samartín del Rei Aurelio y Llangréu.
Fonte:blogue frayando cadenes