Campaña n’asturianu sobre'l reciclaxe en Samartín del Rei Aurelio

Pablo R. Guardado
‘Echái una mano al mundu’ ye’l nome de la campaña sobre'l reciclaxe qu’entama’l Conceyu de Samartín del Rei Aurelio. Van repartise bolses reutilizables ente la población y dípticos con conseyos pa curiar el mediu ambiente, ente otres aiciones.

“Con esta iniciativa búscase concienciar a la xente sobre la importancia del reciclaxe y el curiáu del mediu ambiente”, espliquen dende’l Conceyu, que va presentar la campaña mañana, a les 19 hores na Casona del Bravial (Blimea), con una xornada especial a la que convidaron a Elisabet Soto Álvarez, vocera de la Plataforma Medioambiental d’Aviles y Redolada, pa dar una charra informativa ‘Pola reducción de residuos”, na que va esponer datos tán preocupantes como que’l porcentaxe de basura que se recicla nun llega’l 18 por cientu del total. Gema Suárez, conceyala de Cultura, y Hugo Cortina, responsable de la Oficina de Política Llingüística, van encargase d’esplicar los detalles d’esta iniciativa entamada pol Conceyu en collaboración cola Rede de Normalización Llingüística nos Conceyos y la Conseyería de Cultura y Deporte.

Les persones qu’acudan a esti actu van recibir tolos materiales de la campaña: bolses reutilizables en trés collores pa separar la basura a la hora de reciclar, cartelos, axendes y dípticos con conseyos pa curiar el mediu ambiente. Nes xornaes próximes, toles persones interesaes en disponer d’estos útiles han d’averase a quiscos y papeleríes del conceyu, onde van repartise de baldre.

Fonte: Asturies.com

Campaña n'asturianu sobre'l reciclaxe en Llaviana

La campaña ‘¡Erre qu’erre! ¡Reduz, reutiliza, recicla!’ yá llegó a Llaviana. La Oficina de Normalización Llingüística del conceyu de la cuenca’l Nalón ta acabante de poner en marcha esta actividá dirixida al seutor del comerciu.

La conseyería de Mediu Ambiente y la Oficina de Normalización de Llaviana busquen con esta campaña “sensibilizar a la ciudadanía del pelligru que supón la contaminación, amás de fomentar actitúes respetuoses pa col mediu ambiente. Con esos oxetivos los comercios participantes na campaña van distribuir tres tipos de materiales: bolses reutilizables con información sobre reciclaxe, cuadernos de papel reciclao con conseyos mediuambientales y cartelos esplicativos”. Tolos comerciantes interesaos en participar nesta campaña de normalización de la llingua del país puen recoyer el material na Oficina de Normalización Llingüística, na plaza Armando Palacio Valdés númberu 1 de La Pola Llaviana.

Esta iniciativa, que tamién ta furrulando n’otros conceyos como Cangas del Narcea, Siero o Ḷḷena gracies a la collaboración ente servicios al traviés de la Rede de Normalización Llingüística nos Conceyos, tien ayuda económica de la Conseyería de Cultura y Turismu.

Fonte: Asturies.com

Segunda fas de la campaña del reciclaxe de Cangas

El Serviciu de Normalización de Cangas presentó la segunda fas de la campaña sobre’l reciclaxe.

‘¡Erre qu’erre! ¡Reduz. Reutiliza. Recicla!’ ye’l nome de la segunda fas de la campaña sobre’l reciclaxe qu’entama’l Serviciu de Normalización Llingüística de Cangas de Narcea. Ésta ta destinada a los comercios del conceyu. L’oxetivu d’esta campaña, amás de promocionar l’usu del asturianu, ye apurrir a los comercios material reutilizable pa contribuyir nestos tiempos de cris económica a reducir los costes derivaos de les bolses y “concienciar a la sociedá en materia de reducción de residuos, al tiempu que se mira pola sostenibilidá mediuambiental.

Pa eḷḷo ufiértanse de baldre unas bolsas de material reutilizable conos tres colores del reciclaxe ya unos cuaderninos de papel recicláu con dalgunos conseyos mediuambientales ya espaciu p’apuntar lo que se quiera”, señala Mónica Rodríguez Riesgo, responsable del Serviciu de Cangas.

Los establecimientos cangueses que quieran participar nesta campaña han de ponese en contatutu col Serviciu de Normalización Llingüística del Conceyu, asitiáu na plaza la Oliva; nos teléfonos 985.812.617 y 985.817.089; o nel corréu lletrónicu l.linguacangas@ayto-cnarcea.es.

Fonte: Asturies.com

Campañes n'asturianu en Samartín del Rei Aurelio

L’Ayuntamientu de Samartín del Rei Aurelio entama una campaña p’afalar l’usu del asturianu y el respetu del mediu ambiente. Los establecimientos comerciales van recibir de baldre bolses reutilizables, que tienen por diez quilos de pesu y que lleven el testu: “¿Y tu que faes pa cuidar el mundu? Reduz, reutiliza, recicla”.

Amás, l’Ayuntamientu va distribuyir “El mio primer vocabulariu” ente los neños, una campaña que quier acercar el vocabulariu asturianu a los neños de primaria del conceyu.

Fonte: Asturnews

Repartu de bolses de papel con una conseña n'asturianu pol reciclax

Los Conceyos de Mieres, L.lena, Avilés y Cangas del Narcea, van repartir ente los comercios d'estos conceyos bolses de papel recicláu nes que se llee la conseña: "¿Tú qué faes pa cuidar el mundu? Reduz, reutiliza, recicla". Ye una iniciativa que busca la concienciación col cuidáu ambiental, al traviés de la sustitución de les bolses de plásticu poles que se tán distribuyendo. Les conceyales mierenses de Cultura, y Comerciu, presentáronla nesti conceyu, enmarcada na campaña de promoción del usu del asturianu 2008-2009. Trátase d'un proyeutu col que se pretende, "al traviés de la llingua asturiana, tresmitir un mensaxe de concienciación sobre'l cuidáu del mediu ambiente, potenciando l'emplegu de bolses de papel recicláu", esplicó'l Conceyu nuna nota prensa. Trátase d'un proyeutu de la Conceyalía de Cultura, al traviés del Serviciu de Normalización Llingüística de Mieres, y de la Conceyalía de Comerciu, y va desendolcase en collaboración colos servicios de normalizacion de L.lena, Avilés y Cangas del Narcea.

La campaña se realiza al traviés del repartu de baldre, nos comercios del conceyu, de bolses de papel recicláu impreses con tinta ecolóxica. Nestos díes va procedese al so repartu ente los comercios de ropa, calzáu, regalos, llibreríes y otros comercios minoristes, asina como ente los comerciantes del mercáu de los domingos.

La conceyala de Cultura allabó esta iniciativa que se desendolca col sofitu del Principáu, cola que se nagua "concienciar al comerciu de la necesidá de dexar d'emplegar les bolses de plásticu y pasar al papel, y esta campaña mos permite xunificar dos oxetivos, per un llau la promoción del usu del asturianu nel comerciu llocal y, per otru, la sensibilización ecolóxica de comerciantes y compradores". Pela so parte, la conceyala de Comerciu y Turismu recordó qu'esta iniciativa pa comerciantes ta abierta tamién a les grandes superficies, que se puen sumar a la campaña. Camentamos que ye un bon entamu pa la visualización del idioma.